အတုမဲ့နတ်ဂိုဏ်း

စန်းဟုန်းလျန်၏စကားကြောင့် ကျန်လူများလည်းအတွေးနက်သွားကြသည် ။

ထိုစဉ် ဟောင်ရန်က တစ်စုံတစ်ခုကို သတိရသွားကာ အနည်းငယ်ရှုပ်ထွေးသည့်လေသံဖြင့်ပြောလိုက်သည်။

" သူထွက်မသွားခင်ညနေတုန်းက ကျုပ်တို့ လမ်းဘေးမြို့ကစားသောက်ဆိုင်မှာ ည‌စာစားကြသေးတယ်လေ။

အဲဒီတုန်းကစကားစပ်မိလို့ပြောကြရင်းနဲ့ ဆရာကြီးစီးတုက သွေးအေးသခင်မအကြောင်းကိုပြောခဲ့သေးတယ်။

အဲဒီတုန်းက အစ်ကိုရှောင်ယောင်က တော်တော်လေးအမူအယာပျက်သွားပြီး တခြားလူတွေမရိပ်မိခင်ပြန်ပြီး ပုံမှန်ဖြစ်သွားခဲ့တာ။

ဒါပေမယ့် အဲဒီအချိန်ကစပြီး သူငေးငေးငိုင်ငိုင်ဖြစ်ပြီးတော့ နောက်တစ်နေ့မနက်မှာပျောက်သွားတာပဲ ...."

ဟောင်ရန်၏အသေးစိတ်ကျလှသည့်အကြောင်းအရာကြောင့် ကျန်သုံးယောက်လည်း အံ့အားသင့်သွားကြပြီး ကြွယ်ယန်ကမနေနိုင်ဘဲမေးလိုက်မိသည်။

" မင်းက အစ်ကိုကြီးရဲ့မျက်နှာကိုတစ်ချိန်လုံးကြည့်နေတာလားဟ ငါတို့တစ်ယောက်မှသူအမူအယာပျက်တာကိုသတိမထားမိလိုက်ဘူး ... "

‌ကြွယ်ယန်၏အံ့သြသည့်ပုံစံကြောင့်ဟောင်ရန်၏မျက်နှာကအနည်းငယ်နီရဲသွားပြီးမကျေနပ်သည့်လေသံဖြင့်ပြောလိုက်သည်။

" ငါပြောတာအကူအညီရမရသာစဉ်းစားစမ်းပါ ...."

သူတို့နှစ်ယောက်ကငြင်းခုန်ကြတော့မည့်ပုံစံဖြစ်လာ၍ စန်းဟုန်းလျန်က ဝင်ပြောလိုက်ရသည်။

" ဘာပဲဖြစ်ဖြစ်ပါ အဲဒီသွေးအေးသခင်မဆိုတဲ့မိန်းကလေးအကြောင်းကို ငါတို့သေချာစုံစမ်းကြည့်တာပေါ့...."

&&&

ပန်းတစ်ရာတောင်ကုန်း

တောင်ကုန်းသခင်လီချန်းစိန်၏စံအိမ်ထဲတွင် ဝတ်စုံဖြူဝတ်မိန်းမပျိုလေးနှင့်ခေါင်းဆောင်သုံးယောက်တို့ရှိနေကြသည်။

ယခုအခါသူတို့၏ပုံစံက တစ်စုံတစ်ခုကိုဆွေးနွေးနေကြဟန်တူပြီး ဆွေးနွေးခြင်းထက်မိန်းမပျိုလေးကို အကျိုးအကြောင်းတင်ပြပြောဆိုနေခြင်းဟုပြောလျှင် ပို၍မှန်ကန်ပေသည်။

ခေါင်းဆောင်သုံးယောက်၏စကားများကိုအဆူံးထိနားထောင်ပြီးနောက် မိန်းမပျိုလေးက လက်ထဲရှိကျောက်စိမ်းခွက်ကလေးကိုကျောက်စားပွဲပေါ်သို့အသာအယာပြန်ချလိုက်သည်။

တမင်လုပ်ယူနေခြင်းမဟုတ်ဘဲ သူမ၏အပြုအမူတစ်ခုချင်းစီကကျက်သရေရှိနေကာ ကောင်းမွန်ပြီး အဆင့်အတန်းမြင့်မားသည့်မျိုးရိုးမှဆင်းသက်လူသူတစ်ဦးဖြစ်ကြောင်းအလွယ်တကူသိရှိနိုင်ပေသည်။

" ဆိုတော့ ....အင်အားစုအသစ်ရဲ့ဖွင့်ပွဲကို လုပ်ဆောင်ဖို့အားလုံးအဆင်သင့်ဖြစ်နေပြီပေါ့ ...."

တေးသီငှက်ကလေးများထက်ချိုလွင်ကြည်သာပြီး လူတိုင်း၏စိတ်ဝိညာဥ်ကိုဖမ်းစားနိုင်စွမိးရှိသည့်စကားသံလေးထွက်ပေါ်လာသည် ။

မိန်းမပျိုလေးနှင့်အချိန်အတော်ကြာအတူရှိခဲ့ကြပြီးဖြစ်သည့်တိုင် သူမ၏တုနှိုင်းမဲ့သည့်အသံကလေးကြောင့်ခေါင်းဆောင်သုံးယောက်လုံးအံ့ဩမိကြဆဲပင်။

သူမ၏အသံကဘေးကပင် ထိုမျှနားထောင်မဝဖြစ်နေရာ သစ်သားမျက်နှာဖူံး၏နောက်ကွယ်မှရုပ်ရည်သွင်ပြင်ကမည်မျှလှပမည်ကို မှန်းဆကြည့်၍ပင်မရပေ။

စိတ်ထဲတွင်အတွေးများစွာဖြတ်ပြေးသွားကြသည့်တိုင် မိန်းမပျိုလေး၏မေးခွန်းကြောင့် ခေါင်းဆောင်သုံးယောက်အလျှင်အမြန်ပြန်ဖြေလိုက်ကြသည်။

" ကျုပ်တို့အားလုံးပြင်ဆင်ပြီးပါပြီ ...."

အနီရောင်ဝတ်စုံကိုဝတ်ဆင်ထားပြီး ခန့်ညားသည့်လီချန်းစိန်၏စကားကို ဝဝဖိုင့်ဖိုင့်နှင့်ရှန့်ချင်းမန်က ထောက်ခံလိုက်သည်။

" ဟုတ်ပါတယ် သခင်မလေး ။ ကျုပ်တို့ အင်အားစုသုံးခုလုံးကို ပြန်ပြီးအသစ်ဖွဲ့စည်းထားတဲ့အပြင်လက်ရွေးစငသိုင်းသမားတွေကိုလည်းရွေးထုတ်ထားပါပြီ။

ကျုပ်တို့သုံးယောက်ကိုထည့်မတွက်ရင်တောင်မှ အင်အားစုသုံးခုရဲ့ပေါင်းစည်းမှုက အတော်လေးအင်အားတောင့်တင်းလှပါတယ်....."

ခေါင်းဆောင်နှစ်ယောက်၏ ယုံကြည်မှုပြည့်ဝသည့်ပုံစံကြောင့် မိန်းမပျိုလေးက စိတ်ကျေနပ်သွားဟန်တူပြီး သူမ၏ကြည်လင်စူးရှသည့်မျက်ဝန်းများက တဖျက်ဖျက်တောင်ပလာသည်။

" ဒါဆိုရင် အင်အားစုအသစ်ကိုနာမည်ပေးရဦးမှာပေါ့ ...."

မိန်းမပျိုလေး၏စကားကြောင့် ခေါင်းဆောင်သုံးယောက်ကိုတစ်ယောက်ကိုတစ်ယောက်ကြည့်လိုက်မိကြသော်လည်းမည်သူမှစောဒကတတ်ခြင်းမရှိပေ။

ထိပ်တန်းအင်အားစုများ၏ခေါင်းဆောင်ဖြစ်ပြီး သိုင်း‌လောကထဲတွင်ထိပ်တန်းနေရာ၌ရှိသညိ့သူတို့သုံးယောက်က မိန်းမပျိုလေးနှငိ့သူ့လက်အောက်ငယ်သားများ၏ရှေ့တွင် ဘာကောင် မှမဟုတ်သည်ကို သူတို့ကောင်းစွာသိထားကြပြီးဖြစ်သည်။

မလှမ်းမကမ်းတွင်အဖြူရောင်ဝတ်စုံဝတ်လူများကလည်း မိန်းမပျိုလေးကိုစောင့်ကြပ်လျက်ရှိကြပြီး ကျန်လူများကိုဘေးဖယ်ထားလျှင်ပင် ခါးကုန်းအဖိုးအို သို့မဟုတ် ရုပ်ဆိုးအဖိုးအိုတစ်ယောက်ယောက်က သူတို့အင်အားစုသုံးခုကိုအလွယ်တကူဖျက်ဆီးနိုင်စွမ်းရှိသည်။

" ဒါဆိုရင် အတုမဲ့နတ်ဂိုဏ်းလို့ခေါ်ရင်ဘယ်လိုလဲ...."

မိန်းမပျိုလေး၏စကားကြောင့် ရှန်ချင်းမန်၏ပြုံးနေသည့်မျက်နှာက တောင့်တင်းသွားသလို အမြဲလိုလိုတည်ငြိမ်သည့်လီချန်းစိန်၏အမူအယာပင်အနည်းငယ်ကိုးယိုးကားယားဖြစ်သွားသည်။

အတုမဲ့နတ်ဂိုဏ်း

မည်မျှ မောက်နာဝံ့ကြွားလိုက်သည့်နာမည်မျိုးဖြစ်သနည်း။

ထိုနာမည်ကိုသာအမှန်တကယ်ပေးလိုက်ပါက သိုင်းလောကသားများလှောင်ရယ်ကြပေမည်။

" ဒါကြီးက နည်းနည်း...."

ပွင့်လင်းပြီးစိတ်မြန်သည့်ပိုင်ဖုန်းလူက ငြင်းဆန်ရန်ပြင်လိုက်သော်လည်းမိန်းမပျိုလေး၏အကြည့်စူးစူးက သူဆီသို့ကျရောက်လာ၍ ပိုင်ဖုန်းလူလည်းပါးစပ်ပိတ်သွားတော့သည်။

" ဟဲ ဟဲ အဆင်ပြေပါတယ် အတုမဲ့နတ်ဂိုဏ်း ကြီးကျယ်ခမ်းနားပြီးစွမ်းအားကြီးတဲ့နာမည်မျိုးပဲ....."

ရှန့်ချင်းမန်က ပိုင်ဖုန်းလူ၏နံဘေးကိုတံတောင်ဖြင့်တွက်၍သတိပေးလိုက်ပြီး အလျှင်အမြန်ရယ်မောကာထောက်ခံလိုက်သည်။

သူ၏သိသာထင်ရှားစွာမြှောက်ပင့်သည့်စကားကြောင့် ပိုင်ဖုန်းလူနှင့်လီချန်းစိန်တို့၏မျက်နှာများကအနည်းငယ်ပြောင်းလဲသွားသည့်တိုင် လီချန်းစိန်လည်း မျက်နှာအောက်ချကာ ပြောလိုက်သည်။

" ဟုတ်ပါတယ် သခင်မလေး အဲဒီနာမည်က သင့်လျော်ပါတယ်...."

သူတို့၏ကန့်ကွက်သူမရှိ‌ထောက်ခံသည့်စကားများကြောင့်မိန်းမပျိုလေးလည်း သူမ၏လက်ကိုဝေ့ယမ်းကာပြောလိုက်သည်။

" ကောင်းပြီ ဒါဆိုရင် အတုမဲ့နတ်ဂိုဏ်းရဲ့မိတ်ဆက်ပွဲကိုပြုလုပ်ဖိူ့စီစဥ်လိုက်ပါ။

သိုင်းလောကထဲက အင်အားကြီးဂိုဏ်းအဖွဲ့တိုင်း ၊ ကျော်ကြားတဲ့သိုင်းသမားတိုင်းကိုဖိတ်စာပို့ထားလိုက်။

ဒီတစ်ခါ အတုမဲ့နတ်ဂိုဏ်းရဲ့အင်အားကို သူတို့အားလုံးသိစေရလိမ့်မယ်....."

မိန်းမပျိုလေး၏အသံက တင်းမာခြင်းမရှိသော်လည်း လွှမ်းမိုးချုပ်ကိုင်နိုင်ပြိး ဩဇာကြီးမားသည့်အငွေ့အသက်များပါဝင်လျက်ရှိသည်။

ထို့နောက် ခေါင်းဆောင်သုံးယောက်လည်း မိန်းမပျိုလေးကိုနှုတ်ဆက်ပြီး ဆောင်ရွက်စရာကိစ္စများစွာရှိနေ၍ထွက်ခွာသွားကြသည်။

" သခင်မလေး ဘာတွေလျှောက်လုပ်ဦးမလို့လဲ....."

နွေးထွေးကြင်နာသည့်စကားသံနှင့်အတူ အရုပ်ဆိုးဆိုးအဖိုးအိုက မိန်းမပျိုလေး၏အနားသို့ရောက်ရှိလာလေသည်။

သူနှင့်အတူ ခါးကုန်းအဖိုးအိုလည်းအတူပါလာပြီး မျက်စေ့ကိုတစ်ဝက်သာဖွင့်ထားပြီးပျင်းရိနေသည့် သူ၏သွင်ပြင်ကရှောင်လင်ကျောင်းတွင်အစွမ်းပြသွားသည့် သိုင်းပညာရှင်၏ပုံစံနှင့်လားလားမှတူညီခြင်းမရှိပါချေ။

အဖိုးအိုနှစ်ယောက်က မိန်းမပျိုလေး၏ရှေ့တွင်ဝင်ထိုင်လိုက်ကြသလို မိန်းမပျိုလေးကလည်း သူတို့အတွက် ရေနွေးကြမ်းငှဲ့ပေးလိုက်သည်။

ထိုအဖိုးအိုနှစ်ယောက်က သူတို့၏နေရာတွင်ပင် လွန်စွာမြင့်မားသည့်အဆင့်အတန်းရှိကြပြီး သူမကိုဂရုစိုက်ချစ်ခင်၍ ယခုလိုမျိူးသိုငိးလောကထဲအထိ လိုက်ပါစောင့်ရှောက်ပေးနေကြခြင်းဖြစ်သည်။

သူတို့နှစ်ယောက်က မိန်းမပျိုလေးကို ရိုကျိူးစွာပြောဆိုပြုမူသော်လည်း သူတို့၏ဆက်ဆံရေးက မြေးအဖိုးများလိုရင်းနှီးကျွမ်းဝင်လှသည်။

" အဖိုးလီ မဟုတ်မှလွဲရော နန်းတော်ကိုပြန်ချင်လို့ ကျမကိုလာ‌ပြောတာထင်တယ်...."

ရုပ်ဆိုးဆိုးအဖိုးအိုကိုစူးစိုက်ကြည့်ရင်း မေးလိုက်သည့်မိန်းမပျိုလေး၏မေးခွန်းကြောင့် အဖိုးအိုက အနည်းငယ်အံ့အားသင့်သွားပြီး ရယ်မောရင်းခေါင်းညိမ့်ပြလိုက်သည်။

" သခင်မလေးကတော့ တကယ်ပဲအရိပ်အကဲကိုကောင်းကောင်းကြီးအကဲခပ်နိုင်တယ် ။ အမှန်ပါပဲ ကျုပ်နန်းတော်ကိုပြန်ဖို့အချိန်တန်ပြီလားလို့။

ကျုပ်ထွက်လာတာမကြာသေးပေမယ့် သိုင်း‌လောကထဲမှာဆက်ပြီးမနေချင်တော့ဘူး။ ပြီးတော့ မိုးနတ်နှစ်ပါး၊ မြေနတ်ခြောက်ပါးနဲ့ ဒီကောင်ကြီးလည်းရှိနေမှတော့ သိုင်းလောကထဲမှာ သခင်မလေးကိုဘယ်သူမှထိခိုက်အောင်မလုပ်နိုင်ပါဘူး ...."

အရုပ်ဆိုးဆိုးအဖိုးအိူ၏စကားအဆုံးတွင် ခါးကုနိးအဖိုးအိုက ချက်ခြင်းဆိုသလို ထပြောလိုက်သညိ။

" အဲဒီအသုံးမကျတဲ့ကောင်တွေကို မင်းနဲ့အတူပြန်ခေါ်သွားလို့ရတယ်။ ငါတစ်ယောက်ထဲသခင်မလေးကိုစောင့်ရှောက်နိူင်ပါတယ်...."

ခါးကုန်းအဖိုးအို၏ဝံ့ကြွားသည့်စကားကြောင့် ရုပ်ဆိုးအဖိုးအိုက နှာခေါင်းရှုံ့ကာပြောလိုက်သည်။

" ရှောင်လင်ကျောင်း‌ပေါကဝမှာ ငါသာထွက်မလာရင် ဂိုဏ်းကြီးခြောက်ဂိုဏ်းကသိုင်းဝိဇ္ဇာတွေကြောင့် မင်းမရှုမလှခံနေရလောက်ပြီ။။

တခြားလူတွေနောက်ထားဦး ရှောင်လင်က ခုံးဝန်ကိုယ်တော်က မင်းထက်နိမ့်ရင်တောင် နည်းနည်းပဲနေမှာ။ ပြီးတော့ ပိဍိကတ်ဆရာတော်ဆိုရင် ငါတို့ထက်မြင့်တာ အသိသာကြီး သူတို့နှစ်ယောက်ထဲနဲ့ မင်းကိုသွားကျွတ်အောင်ရိုက်လို့ရတယ် ..."

ရုပ်ဆိုးအဖိုးအို၏ထိမိသည့်စကားကြောင့် ခါးကုန်းအဖိုးအိုက ရှူးရှူးရှားရှားဖြစ်လာသည်။

ယခုပုံစံအတိုင်းဆက်သွားနေပါက နေရာတွင်ရန်ထသတ်တော့မည့်အဖိုးအိုနှစ်ယောက်၏အကြောင်းကို ရိပ်စားမိ၍ မိန်းမပျိုလေးက ကြားဖြတ်ကာပြောလိုက်သည် ။

" အဖိုးတို့နှစ်ယောက်တော်ကြပါတော့... အဖိုးမန်ရှိနေရင် ကျမကို ကောင်းကောင်းကြီး ကာကွယ်ပေးနိုင်ပါတယ် ။

ပြီးတော့ အဖိုးလီကလည်း နန်းတော်မှာ အရေးကြီးတဲ့ကိစ္စရှိလို့ပြန်မှာမလား....."

သူမ၏ဖျန်ဖြေသည့်စကားကြောင့် ရန်စောင်နေသည့်အဖိုးအိုနှစ်ယောက်က အာရုံပြောင်းသွားကြပြီး ရုပ်ဆိုးအဖိုးအိုက ခေါင်းညိမ့်ကာပြောလိုက်သည်။

" ဟုတ်တယ် သခင်မလေးရေ .. တေလေဂိုဏ်းချုပ် သူတောင်းစားစုတ်ရယ် ၊ သူတော်စင်တောင်ကြားကကောင်ရယ် နောက်ပြီး အရှေ့ပင်လယ်မြွေကျွန်းကကောင်ရယ်သုံး‌ယောက်ပေါင်းပြီး နန်းတော်ကိုမကြာခဏဝင်မွှေနေတယ်။

အဖိုးကြီးချင်းတစ်ယောက်ထဲနဲ့သူတို့ကိုထိမ်းနိုင်မှာမဟုတ်ဘူး ။

သူတို့သုံးယောက်လုံးကသိုင်းဝိဇ္ဇာနှောင်းပိုင်းအဆင့်တွေဖြစ်တဲ့အပြင် ကိုယ်ဖော့ပညာကလည်း အံ့မခန်းကောင်းမွန်ကြတော့ သူတို့ကိုဘယ်သူမှမဟန့်တားနိုင်ဘူး။

ပြီးတော့ နန်းတော်သခင်ကိုယ်တိုင်ရောက်လာမယ့်အရိပ်အယောင်မြင်ရင်သူတို့က တစ်ချိူးထဲလစ်ပြေးရော....တကယ့်ကိုအာရုံနောက်စရာကောင်းတဲ့ကောင်တွေ..."

ယခုတစ်ကြိမ်၌ ရုပ်ဆိုးအဖိုးအို၏စကားကို ခါးကုန်းအဖိုးအိုကလည်း ခေါင်းညိမ့်ကာထောက်ခံလိုက်သည်။

&&&