ပြိုကျသွားသောလောက

အဲဒီမှာ ပို၍ပင် အရေးပါသော အကြောင်းပြချက်တစ်ခု ရှိနေသည်။

သိုင်းတာအိုပင်မခန္ဓာသည် တမလွန်ဘုံရတနာကြေးမုံကို အသုံးချပြီး ကံကောင်းထောက်မစွာဖြင့် တက္ကသိုလ်ဂိုဏ်းချုပ်ကို သတ်ဖြတ်နိုင်ခဲ့မည်ဆိုလျှင်တောင် သူသည် မွန်မြတ်ကောင်းကင်ဘုံကမ္ဘာ၏ ပစ်မှတ်ထားခြင်းကို သေချာပေါက်ခံရပေတော့မည်။

ယခုအချိန်မှာ မွန်မြတ်ကောင်းကင်ဘုံကမ္ဘာသည် တမလွန်ကိုးဘုံအပြစ်သားကုန်းမြေကို ခြေမွှဖျက်ဆီးပြီး ယက္ခိုသ်များကို ထွက်ပြေးလွတ်မြောက်စေခဲ့သည့်လူကို အသည်းအသန် သေချာပေါက် ရှာဖွေနေပေလိမ့်မည်။

သူသည် တမလွန်ဘုံရတနာကြေးမုံ၏ စွမ်းအားကို အသုံးချပြီး တမလွန်ကိုးဘုံအပြစ်သားကုန်းမြေကို ခြေမွှဖျက်ဆီးခဲ့လေသည်။

မွန်မြတ်ကောင်းကင်ဘုံကမ္ဘာသည် သူ၏ တည်ရှိမှုကို ယခုအချိန်ထိ မသိရှိသေးသော်လည်း တမလွန်ဘုံရတနာကြေးမုံ၏ စွမ်းအားသည် ကြေမွပျက်စီးသွားသော တမလွန်ကိုးဘုံအပြစ်သားကုန်းမြေမှာ သေချာပေါက် ကျန်ရစ်ခဲ့ပေလိမ့်မည်။

သူသည် တမလွန်ဘုံရတနာကြေးမုံကို နောက်တစ်ဖန် ဆင့်ခေါ်လိုက်သည်နှင့် သူသည် မွန်မြတ်ကောင်းကင်ဘုံကမ္ဘာ၏ အလွယ်တကူ ပစ်မှတ်ထားခြင်းကို ခံလာရပေလိမ့်မည်။

ယခုအချိန်မှာ သူသည် မွန်မြတ်ကောင်းကင်ဘုံကမ္ဘာနှင့် ရင်မဆိုင်လိုသေးပေ။

သူသည် အဝီစိမှာ လုံးဝပေါ်ထွက်မလာဘဲ တစ်ချိန်လုံး ပုန်းကွယ်မနေလိုပေ။

သူသည် မဟာအရိုင်းကမ္ဘာသို့ သွားရောက်ချင်သေးသည်။

တမလွန်ဘုံရတနာကြေးမုံကလွဲလျှင် သူ့မှာ နောက်ဆုံးမှီခိုအားထားရာ နည်းလမ်းတစ်ခုသာ ကျန်တော့လေသည်။

အမြုတေသိုင်း ကောင်းကင်လိုဏ်ဂူ…

တကယ်တော့ အမြုတေသိုင်း ကောင်းကင်လိုဏ်ဂူအကြီးတစ်ခုသည် ဧကရာဇ်နယ်ပယ်မှာရှိသော တက္ကသိုလ်ဂိုဏ်းချုပ်ကို ခြိမ်းခြောက်နိုင်လိမ့်မည် မဟုတ်ပေ။ အဲဒါက လောကတစ်ခု၏ စွမ်းအားနှင့် လုံးဝ ဆန့်ကျင်တိုက်ခိုက်နိုင်မည် မဟုတ်ပေ။

သို့သော်လည်း သိုင်းတာအိုငရဲခန်းနှင့် အမြုတေသိုင်း ကောင်းကင်လိုဏ်ဂူကို တစ်ချိန်တည်းမှာ ထုတ်ဖော်ခြင်းဖြင့် ထွက်ပေါ်လာမည့် ပေါင်းစပ်စွမ်းအားက မည်ကဲ့သို့ဖြစ်လာမည်ကို သိုင်းတာအိုပင်မခန္ဓာပင် မသိရှိပေ။

သူသည် အဲဒါကို အရင်က ဘယ်တုန်းကမှ မကြိုးစားခဲ့ဖူးသောကြောင့် ဖြစ်သည်။

တကယ်တော့ ထိုလုပ်ရပ်နှင့်အတူ သိုင်းတာအိုပင်မခန္ဓာသည် ဘာမှန်းမသိရသော အန္တရာယ်အငွေ့အသက်ကို နောက်တစ်ဖန် တွေ့ကြုံခံစားရပေလိမ့်မည်။

ဤသည်က သူ့အတွက် ကြီးမားသော စွန့်စားမှုတစ်ရပ်ဖြစ်သည်။

ထိုအန္တရာယ်အငွေ့အသက်သည် ဘယ်အချိန်မှာ ဆင်းသက်လာမည်ကို သူမသိပေ။

အဲဒါက ဤတစ်ခေါက် သို့မဟုတ် နောက်တစ်ခေါက်မှာ ဖြစ်ကောင်းဖြစ်ပေမည်။

သို့သော်လည်း သူသည် တက္ကသိုလ်ဂိုဏ်းချုပ်ကို ယခုအချိန်မှာ မဖိနှိမ်နိုင်ဘူးဆိုလျှင် သူ၏ အစစ်အမှန်ခန္ဓာနှစ်ခုက သေခြင်းတရားကနေ လွတ်မြောက်နိုင်လိမ့်မည် မဟုတ်ပေ။

အဲဒီမှာ နောက်ထပ်အချက်တစ်ချက်လည်း ရှိနေသည်။

သိုင်းတာအိုပင်မခန္ဓာသည် သိုင်းတာအိုငရဲခန်းနှင့် အမြုတေသိုင်း ကောင်းကင်လိုဏ်ဂူကို ပေါင်းစည်းလိုက်သည့်အခါ မည်ကဲ့သို့သော ပြောင်းလဲမှုများ ဖြစ်ပွားလာမည်ကို သိုင်းတာအိုပင်မခန္ဓာကလည်း အလွန်တရာ စူးစမ်းလိုစိတ် ဖြစ်ပေါ်နေ၏။

ဤသည်မှာ ကောင်းကင်လိုဏ်ဂူနှစ်ခုအကြား ရိုးရှင်းသော ပေါင်းစည်းမှုတစ်ခု မဟုတ်သောကြောင့်ပင်။

သိုင်းတာအိုငရဲခန်းသည် ကောင်းကင်လိုဏ်ဂူတစ်ခု မဟုတ်ဘဲ သိုင်းတာအို၏ ဓမ္မတာအိုကနေ ပြုစုပျိုးထောင်ထားသော ပိုင်နက်နယ်မြေတစ်ခု ဖြစ်လေသည်။

အမြုတေသိုင်း ကောင်းကင်လိုဏ်ဂူ၏ မွေးဖွားပေါ်ထွက်လာမှုက ပို၍ပင်ထူးခြားနေသည်။

အနာဂတ်မှာ သိုင်းတာအိုကို ကျင့်ကြံသော မည်သူမဆို သိုင်းပိုင်နက်နယ်မြေထဲသို့ ဝင်ရောက်သည့်အခါ သူတို့ကိုယ်ပိုင် သိုင်းတာအိုပိုင်နက်နယ်မြေတစ်ခုကို စုဖွဲ့လာနိုင်ပေလိမ့်မည်။

သို့သော်လည်း မည်သူကမှ အမြုတေသိုင်း ကောင်းကင်လိုဏ်ဂူကို တုပနိုင်လိမ့်မည် မဟုတ်ပေ။

သိုင်းတာအိုပင်မခန္ဓာသည် သူ၏ အစစ်အမှန် သိုင်းတာအိုခန္ဓာကို ခြေမွှဖျက်ဆီးခြင်းကနေ အမြုတေသိုင်း ကောင်းကင်လိုဏ်ဂူကို ဆင့်ကဲပြောင်းလဲစေခဲ့သည်။

သိုင်းတာအိုပင်မခန္ဓာ၏ မွေးဖွားပေါ်ထွက်လာမှုသည် အစကတည်းက မူကွဲတစ်ခု ဖြစ်နေခဲ့သည်။

ယခုအချိန်ထိကို သူသည် ထျန်ဟွမ်ကုန်းမြေတိုက်မှာ သိုင်းတာအိုကို တည်ထောင်ခဲ့စဉ်က ဤကဲ့သို့သော မူကွဲတစ်ခုက ဘာကြောင့်မွေးဖွားပေါ်ထွက်လာသည်ကို ဆူဇီမိုက ယခုအချိန်ထိ နားမလည်နိုင်ပေ။

အဲဒါသည် တာအိုသစ်သီးတစ်လုံး၏ ပုံစံမှာ မွေးဖွားပေါ်ထွက်လာခဲ့သည်။

အရင်တုန်းက ဆူဇီမို၏ ကျင့်ကြံမှုနယ်ပယ်က နိမ့်ကျလွန်းနေခဲ့ပြီး သူသည် ထိုဖြစ်စဉ်တစ်ခုလုံးနှင့်ပတ်သက်၍ များစွာမစဉ်းစားနိုင်ခဲ့ပေ။

အထက်ဘုံသို့ တက်လှမ်းလာပြီး သူ၏ ကျင့်ကြံမှုက နက်ရှိုင်းလာသည်နှင့်အမျှ တာအိုသစ်သီး၏ မွေးဖွားပေါ်ထွက်လာမှုက အလွန်တရာထူးခြားသည်ကို သူက တဖြည်းဖြည်း နားလည်သဘောပေါက်လာခဲ့သည်။

ထိုအချိန်တုန်းက သူသည် ဗလာနယ်ဝိညာဉ်နယ်ပယ်မှာသာ ရှိနေခဲ့ပြီး သူ၏ ဘဝသက်တမ်းက ကုန်ဆုံးလုနီးပါး ဖြစ်နေခဲ့သည်။ အဲဒါသည် သိုင်းတာအိုကို တည်ထောင်ရန် သူ၏ အကန့်အသတ် ဖြစ်နေခဲ့လေပြီ။

ဒြပ်စင်ငါးမျိုးနှင့် ပြန်ဝင်စားခြင်းစက်ဝန်းကနေ လွန်မြောက်နေသော မူကွဲတစ်ခု၊ သိုင်းတာအိုသစ်သီးက ဘာကြောင့်မွေးဖွားပေါ်ထွက်လာခဲ့တာလဲ။

ဖြစ်စဉ်တစ်ခုလုံးအတွင်းမှာ ဘာတွေဖြစ်ပျက်ခဲ့တာလဲ။

ဆူဇီမိုသည် အဖြေတစ်ခုကို မရရှိသေးသော်လည်း သိုင်းတာအိုငရဲခန်းဖြစ်စေ၊ အမြုတေသိုင်း ကောင်းကင်လိုဏ်ဂူဖြစ်စေ သူတို့၏ တည်ရှိမှုများက အလွန်တရာထူးခြားနေသည်။

သူတို့နှစ်ခု၏ ပေါင်းစည်းမှုသည် ကောင်းကင်လိုဏ်ဂူနှစ်ခုအကြား ပေါင်းစည်းမှုမဟုတ်ဘဲ ဓမ္မတာအိုနှစ်ခုကြား ပေါင်းစည်းမှု ဖြစ်ပေလိမ့်မည်။

သိပ်သည်းပြင်းထန်သော အော်ရာရှိသည့် တက္ကသိုလ်ဂိုဏ်းချုပ်နှင့် ရင်ဆိုင်ရချိန်မှာ သိုင်းတာအိုပင်မခန္ဓာသည် ထိုအန္တရာယ်ကို စွန့်စားဖို့ ဆုံးဖြတ်လိုက်သည်။

ဝုန်း…

ရုတ်တရက် သိုင်းတာအိုပင်မခန္ဓာသည် နောက်ဆုတ်ခြင်းမရှိတော့ဘဲ သူ၏ ခန္ဓာကိုယ်က ဝေဝါးလာခဲ့လေသည်။ အလွန်ကြီးမား၍ ထူးဆန်းသော ကောင်းကင်လိုဏ်ဂူတစ်ခုက သူ၏ ဘေးပတ်လည်မှာ ပေါ်ထွက်လာ၏။

ထိုအန္တရာယ်အငွေ့အသက်က နောက်တစ်ဖန် ဆင်းသက်လာခဲ့လေသည်။

ဤတစ်ခေါက်မှာ အဲဒါက ပို၍ပင် သန်မာအားကောင်းနေ၏။

တကယ်ဆို သိုင်းတာအိုပင်မခန္ဓာသည် အန္တရာယ်အငွေ့အသက်၏ အရင်းအမြစ်ကိုပင် ခပ်ရေးရေးအာရုံခံမိလာပြီဖြစ်သည်။

အဲဒါက သူ၏ ဦးခေါင်းထက်မှ ဖြစ်သည်။

အဲဒါက ကြယ်တာရာကောင်းကင်ထက်မှ ဖြစ်သည်။

အဲဒါက မဟာကမ္ဘာတစ်ထောင်လောကကနေ လာတာလား။

“ဟဲဟဲ”

တက္ကသိုလ်ဂိုဏ်းချုပ်သည် သိုင်းတာအိုပင်မခန္ဓာက ကောင်းကင်လိုဏ်ဂူတစ်ခု ထုတ်ဖော်လိုက်သည်ကို တွေ့မြင်သောအခါ သူက ရယ်မိသွားလေသည်။

“ကောင်းကင်လိုဏ်ဂူအကြီးတစ်ခုပဲ… အဲဒါက မင်းရဲ့နောက်ဆုံးရွှေ့ကွက်လား”

သိုင်းတာအိုပင်မခန္ဓာက သူ့ကိုယ်သူ ခပ်မြန်မြန် ဣန္ဒြေဆယ်ပြီး ထိုအန္တရာယ်အငွေ့အသက်ကို လောလောဆယ်မှာ ဖိနှိမ်ထားဖို့ အတတ်နိုင်ဆုံး ကြိုးစားလိုက်သည်။

ယခုအချိန်မှာ သူ့အတွက် အကြီးမားဆုံးအန္တရာယ်က တက္ကသိုလ်ဂိုဏ်းချုပ်ဖြစ်နေသည်။

စာနာစိတ်မရှိသော ကောင်းကင်ဘုံ၏ ဖိနှိမ်မှုအောက်မှာ အမြုတေသိုင်း ကောင်းကင်လိုဏ်ဂူအကြီးက မူကွဲတစ်ခုဖြစ်သော်လည်း ၎င်းသည် ထိုဝန်ထုပ်ဝန်ပိုးကို ခံနိုင်ရည်မရှိဘဲ ယိမ်းထိုးလာခဲ့သည်။

သိုင်းတာအိုပင်မခန္ဓာသည် သူ၏ သိုင်းစိတ်ဝိညာဉ်ကို ရူးသွပ်စွာ လှည့်ပတ်ပြီး ကြေမွနေသော သိုင်းတာအိုငရဲခန်းကို နောက်တစ်ဖန် စုဖွဲ့လိုက်၏။

တက္ကသိုလ်ဂိုဏ်းချုပ်သည် အန္တရာယ်အငွေ့အသက်တစ်ခုကို အာရုံခံမိသွားသည့်အလား မျက်မှောင်ကြုတ်လိုက်လေသည်။

“ဟမ်”

တက္ကသိုလ်ဂိုဏ်းချုပ်က ဒီဃာယုဓားကို လှည့်ပတ်ပြီး ငရဲဖိနှိမ်မီးဖိုကို တားဆီးထားလေသည်။

တစ်ချိန်တည်းမှာပင် သူက သူ၏ စာနာစိတ်ကင်းမဲ့သော ကောင်းကင်ဘုံကို မြှောက်တင်ပြီး သိုင်းတာအိုပင်မခန္ဓာကို ပြင်းထန်ကြမ်းတမ်းစွာ ဖိနှိမ်လိုက်သည်။

တက္ကသိုလ်ဂိုဏ်းချုပ်သည် သိုင်းတာအိုပင်မခန္ဓာကို သိုင်းတာအိုငရဲခန်း နောက်တစ်ဖန်စုဖွဲ့ရန် အခွင့်အရေးမပေးလိုပေ။

ထိုစဉ်မှာပင် သိုင်းတာအိုပင်မခန္ဓာက လက်ဟန်ခြေဟန်အမူအရာများကို တစ်ခုပြီးတစ်ခု ဆင့်ခေါ်ပြီး ရှေ့သို့ စေညွှန်လိုက်၏။

ဝုန်း…

မိစ္ဆာချီများဖြင့် လွှမ်းခြုံထားသည့် ဧရာမ မှောင်မည်းနေသော တံခါးတစ်ချပ်က ရုတ်တရက်ဆင်းသက်လာပြီး တက္ကသိုလ်ဂိုဏ်းချုပ်၏ ရှေ့မှာ ပိတ်ဆို့တားဆီးလိုက်၏။ ၎င်းသည် အရာရာတိုင်းကို ဝါးမျိုချင်သည့်အလား တံခါးချပ်ကနေ ကြောက်စရာကောင်းသော အော်ရာတစ်ခု ဖြာထွက်နေ၏။

ဧရာမတံခါး၏ ဘေးပတ်လည်မှာ လောင်ကျွမ်းနေသော အနက်ရောင်မီးတောက်များပင် ရှိနေသည်။

ငရဲဂိတ်တံခါး…

အတိအကျဆိုရလျှင် ဤသည်က ကောင်းကင်လိုဏ်ဂူတစ်ခု၏ ပုံသဏ္ဌာန်လည်းဖြစ်လေသည်။

အဲဒါက ကောင်းကင်လိုဏ်ဂူစွမ်းအား ဖြစ်နေသ၍ ၎င်းသည် တက္ကသိုလ်ဂိုဏ်းချုပ်၏ စာနာစိတ်မရှိသော ကောင်းကင်ဘုံကို ဆန့်ကျင်တိုက်ခိုက်နိုင်မည် မဟုတ်ပေ။

“ချောင်ပိတ်ရိုက်ခံရတဲ့ တောကောင်တစ်ကောင်ရဲ့ ရုန်းကန်မှုပဲ… ပျက်စမ်း”

တက္ကသိုလ်ဂိုဏ်းချုပ်က အော်ပြောလိုက်၏။

သူ့စကားမဆုံးသေးခင်မှာပင် ကျယ်လောင်သော ပေါက်ကွဲသံက ထွက်ပေါ်လာသည်။

ငရဲဂိတ်တံခါးသည် စာနာစိတ်မရှိသော ကောင်းကင်ဘုံနှင့် ကျယ်လောင်စွာ ထိတွေ့ရိုက်ခတ်ပြီး လောကက လှုပ်ခတ်သွားသည်။

ချက်ချင်းနီးပါးပင် ငရဲဂိတ်တံခါးပေါ်ရှိ မီးတောက်များက ငြိမ်းသေသွားပြီး ငရဲဂိတ်တံခါးပေါ်မှာ အက်ကွဲကြောင်းများ ပေါ်ထွက်လာပြီးနောက် လဲပြိုကျသွား၏။

အဲဒါက လုံလောက်လေသည်။

ထိုတဒင်္ဂကြန့်ကြာမှုသည် သိုင်းတာအိုပင်မခန္ဓာအတွက် လုံလောက်မှုရှိသည်။

တက္ကသိုလ်ဂိုဏ်းချုပ်သည် ငရဲဂိတ်တံခါး၏ အဟန့်အတားကို ချိုးဖျက်ပြီး သိုင်းတာအိုပင်မခန္ဓာကို နောက်တစ်ဖန် တွေ့မြင်လိုက်ရသည့်အခါ သိုင်းတာအိုငရဲခန်းနှင့် အမြုတေသိုင်း ကောင်းကင်လိုဏ်ဂူက ထွက်ပေါ်လာခဲ့ပြီ ဖြစ်သည်။

လုံးလုံးလျားလျား မတူကွဲပြားသော ဓမ္မတာအိုနှင့် စွမ်းအားနှစ်ခုက သိုင်းတာအိုပင်မခန္ဓာထံမှာ ထူးဆန်းသော မျှခြေတစ်ခုကို တည်ဆောက်ပြီး ပဲ့တင်ထပ်လာခဲ့သည်။

တက္ကသိုလ်ဂိုဏ်းချုပ်၏ အမူအရာက ပြောင်းလဲသွား၏။

သူသည် သိုင်းတာအိုပင်မခန္ဓာထံမှ အလွန်တရာအန္တရာယ်များသော အော်ရာတစ်ခုကို အာရုံခံမိလာခဲ့သည်။

ဘာတွေဖြစ်နေတာလဲ…

တစ်ခဏချင်းမှာပင် ဤကဲ့သို့ သိသာထင်ရှားသော ပြောင်းလဲမှုတစ်ရပ်က ဘယ်လိုလုပ်ပြီး ပေါ်ထွက်လာရတာလဲ…

တက္ကသိုလ်ဂိုဏ်းချုပ်သည် အဲဒါကို နားမလည်နိုင်သလို မယုံကြည်နိုင်ပေ။

သူက တွေးဝေတုံ့ဆိုင်းနေစဉ်မှာပင် သိုင်းတာအိုပင်မခန္ဓာက နောက်ဆုတ်ရမည့်အစား ရှေ့သို့တက်လှမ်းလာခဲ့သည်။ တောက်လောင်ပြင်းပြသော အကြည့်နှင့်အတူ သူက ရှေ့သို့ခြေတစ်လှမ်းတိုးပြီး စာနာစိတ်မရှိသော ကောင်းကင်ဘုံကို ပစ်ထိုးလိုက်၏။

“မင်းက လက်ဗလာနဲ့ ငါ့ရဲ့ကောင်းကင်ဘုံကို ဖျက်ဆီးချင်နေတာလား… မင်းက…”

တက္ကသိုလ်ဂိုဏ်းချုပ်က စကားပြောလိုက်စဉ်မှာပင် ကျယ်လောင်သော ပေါက်ကွဲသံက သူ၏ စကားသံကို ဖြတ်တောက်ပစ်လိုက်၏။

ဝုန်း…

သိုင်းတာအိုပင်မခန္ဓာ၏ လက်သီးက စာနာစိတ်မရှိသော ကောင်းကင်ဘုံနှင့် ထိခတ်မိသောအခါ တက္ကသိုလ်ဂိုဏ်းချုပ်၏ လောကက ပြင်းထန်စွာ တုန်ခါသွားပြီး အက်ကွဲကြောင်းများပင် ပေါ်ထွက်လာသည်။

ဟာ…

တက္ကသိုလ်ဂိုဏ်းချုပ်က တုန်လှုပ်ချောက်ချားသွားသည်။

ထိုးချက်တစ်ချက်သည် သူ၏ စာနာစိတ်မရှိသော ကောင်းကင်ဘုံကို ကြေမွစေလုမတတ်ပင်။ အဲဒါက မည်ကဲ့သို့သော စွမ်းအားမျိုးလဲ။

မှောင်မည်းနေသော ကောင်းကင်လိုဏ်ဂူတစ်ခုအဖြစ် ပြောင်းလဲသွားပုံရသော သိုင်းတာအိုပင်မခန္ဓာ၏ ဝေဝါးနေသော ပုံရိပ်ကိုကြည့်ရင်း တက္ကသိုလ်ဂိုဏ်းချုပ်၏ ရင်ထဲမှာ နောက်ဆုံး အကြောက်တရားတစ်ခုက ပေါ်ထွက်လာခဲ့သည်။

သိုင်းတာအိုပင်မခန္ဓာသည် တက္ကသိုလ်ဂိုဏ်းချုပ်ကို အသက်ရှူချိန်ပေးလိမ့်မည် မဟုတ်ပေ။

ကြယ်တာရာကောင်းကင်ထက်မှ လာသော အန္တရာယ်အငွေ့အသက်က ပိုမိုသန်မာသည်ထက် သန်မာလာပြီး သူ့ကို မွန်းကျပ်စေလုနီးပါး ဖြစ်လာစေသည်။

သူသည် တက္ကသိုလ်ဂိုဏ်းချုပ်ကို တတ်နိုင်သမျှမြန်မြန် ရှင်းထုတ်ပစ်ရပေမည်။

ဝုန်း…

သိုင်းတာအိုပင်မခန္ဓာက ရှေ့သို့ခြေတစ်လှမ်းတိုးပြီး ဒုတိယအကြိမ် ပစ်ထိုးလိုက်၏။

ထိုးချက်တိုင်းမှာ သိုင်းတာအိုငရဲခန်းနှင့် အမြုတေသိုင်းကောင်းကင်လိုဏ်ဂူ၏ ဓမ္မတာအိုတို့၏ ပေါင်းစည်းမှုနှင့် ပဲ့တင်ထပ်မှုစွမ်းအား ပါဝင်နေလေသည်။

လောကသည် ရုတ်တရက် ရပ်တန့်သွားပုံရသည်။

ဝုန်း…

နောက်ခဏ၌ တက္ကသိုလ်ဂိုဏ်းချုပ်၏ မယုံကြည်နိုင်သော အကြည့်အောက်မှာ စာနာစိတ်မရှိသော ကောင်းကင်ဘုံက ချက်ချင်းပင် လဲပြိုကျသွားလေသည်။