အမှောင်စွမ်းအင်ဂိုဏ်းမှ အကြီးအကဲများ၏ နွေးထွေးမှု လက်ဆောင်

အမှောင်စွမ်းအင်ဂိုဏ်းမှ အကြီးအကဲများသည် ကွက်စိတ်ထဲသို့ ဝင်ရောက်ရန် ဟန်ပြင်နေသည်ကိုမြင်သောအခါ ယခုလေးတင်ရောက်ရှိလာသော ရဲရှင်းဟွေ့နှင့် ရဲလန်ယွဲ့တို့သည် သူတို့ကိုတားဆီးရန် ရှေ့သို့တက်လိုကြသည်။

ကွက်စိတ်ထဲတွင် အားနည်းနေသော ဂိုဏ်းချုပ် စတစ်ခ် သည် ဤမြင်ကွင်းကိုမြင်သောအခါ အလွန်ဝမ်းမြောက်သွားသည်။

‘ဟုတ်တယ်… ဒီငတုံးအကြီးအကဲတွေကို တားလိုက်စမ်းပါ။’

ထိုအချိန်တွင် ဂိုဏ်းချုပ် စတစ်ခ် သည် သူ့တွင် မျှော်လင့်ချက်အလင်းတန်းလေးတစ်ခု ရှိနေသေးသည်ဟု ခံစားလိုက်ရပြီး ထိုအရာမှာ သူ၏ကျင့်ကြံခြင်းကို ကြိုးစားဖျောက်ဖျက်ပစ်ရန် ဖြစ်သည်။

သူ၏ကျင့်ကြံခြင်းကို ဆုံးရှုံးသွားသရွေ့ ဝိညာဉ်စွမ်းအင်သည် နောက်တစ်ကြိမ် နောက်ပြန်စီးဆင်းလာပေလိမ့်မည်။

အကယ်၍ ထိုငတုံးအကြီးအကဲများက ဤအချိန်တွင် ကွက်စိတ်ထဲသို့ ဝင်ရောက်လာပါက သူတို့လုပ်နိုင်သည့် တစ်ခုတည်းသောအရာမှာ ရဲယင်ကို နွေးထွေးမှုပေးပို့ခြင်းသာ ဖြစ်ပေလိမ့်မည်။

သူ၏ဝိညာဉ်စွမ်းအင်အားလုံးကို ဖျောက်ဖျက်စွန့်လွှတ်လိုက်လျှင်ပင် အသုံးဝင်တော့မည်မဟုတ်ပေ။

ထို့အပြင် သူအမှန်တကယ်သေဆုံးသွားလျှင် သို့မဟုတ် ရဲယင်က ကွက်စိတ်မှ အောင်မြင်စွာလွတ်မြောက်သွားလျှင်ပင် အမှောင်စွမ်းအင်ဂိုဏ်းမှ အကြီးအကဲအများအပြားသည် အခြေအနေကို ထိန်းချုပ်နိုင်ကြဦးမည်ဖြစ်သည်။

ထိုအခိုက်အတန့်တွင် ဂိုဏ်းချုပ် စတစ်ခ် သည် ရဲရှင်းဟွေ့၊ ရဲလန်ယွဲ့နှင့် ပေါင်ပေါင်းတို့ ရုတ်တရက်ပေါ်လာသည့်အတွက် ဝမ်းသာနေခဲ့သည်။

ရုတ်တရက် လိုလီတစ်ယောက်သည် ကောင်းကင်မှ ကျဆင်းလာပြီး ရဲရှင်းဟွေ့အဖွဲ့နှင့် အကြီးအကဲများကြားတွင် ဆင်းသက်လာသည်။

ဤအရာကြောင့်ပင် အကြီးအကဲအချို့မှာ ကွက်စိတ်ထဲသို့ ပြေးဝင်သွားကြပြီးနောက် ရဲယင်နှင့် ဂိုဏ်းချုပ် စတစ်ခ် ကဲ့သို့ လက်တံများတွင် ရစ်ပတ်ခံလိုက်ရသည်။

ကောင်းကင်မှ ကျဆင်းလာသော လိုလီမှာ အခြားသူမဟုတ်။ အစစ်အမှန် ရူဟွားပင် ဖြစ်သည်။

ဤနေရာတွင် ဆူညံသံများနှင့် လှုပ်ရှားမှုများစွာ ရှိနေ၏။ အစောပိုင်းက ကြယ်စွမ်းအင်ပေါက်ကွဲမှုသည် အဝေးရှိ ရူဟွား၏သကြားလုံးအိမ်ကို တိုက်ရိုက်ပြိုကျစေခဲ့သည်။

သူမ၏သကြားလုံးအိမ် ပြိုကျသွားသောကြောင့်ပင် ရူဟွားသည် အလွန်ဒေါသထွက်သွားသည်။ ဒေါသထွက်နေသော ရူဟွားသည် ဤနေရာဘက်သို့ ပြေးဝင်လာခဲ့၏။

မီးခိုးငွေ့များ ကြည်လင်သွားပြီး

ဂိုဏ်းချုပ် စတစ်ခ် သည် ရူဟွားကိုမြင်သောအခါ သူ၏မျက်လုံးများမှာ ချက်ချင်းပင် ဟောက်ပက်ဖြစ်သွားသည်။

"ဒါ… ဒါက… အစစ်အမှန် ရူဟွားပဲ…"။

ဤသို့ပြောပြီးနောက် ဂိုဏ်းချုပ် စတစ်ခ် သည် အခြားတစ်ဖက်တွင် သူ၏ကျင့်ကြံခြင်းကို တည်ငြိမ်အောင်လုပ်နေသော ရဲယင်ကို ကြည့်ကာ "ဒါဆို ဒီတစ်ယောက်က ဘယ်သူလဲ…" ဟု ရေရွတ်လိုက်သည်။

ဂိုဏ်းချုပ် စတစ်ခ် သည် စိတ်ထဲမှ အရူးအမူးအော်ဟစ်နေသော်လည်း မည်သူမျှ သူ့ကို ရှင်းပြမည်မဟုတ်ပေ။

ရူဟွားသည် ရဲရှင်းဟွေ့နှင့် ပေါင်ပေါင်းကို မြင်သောအခါ သူမ၏မျက်လုံးများမှာ ရှောင်လွှဲသွားသည်။

နောက်ဆုံးတွင် နှစ်ရက်သာကုန်လွန်သေးပြီး ရူဟွားသည် ရဲရှင်းဟွေ့နှင့် ပေါင်ပေါင်းကို အလွန်စွဲမှတ်နေဆဲဖြစ်သည်။

ရဲရှင်းဟွေ့သည် ဓားတစ်ချက်ဖြင့်ပင် သူမကို ဒူးထောက်စေနိုင်သူ ဖြစ်သည်။

ပေါင်ပေါင်းမှာ ပို၍ပင် ကြောက်စရာကောင်းသည်။ ပေါင်ပေါင်း၏ လက်သီးတစ်ချက်ကိုပင် သူမ ခံနိုင်ရည်ရှိရန် ခက်ခဲလှသည်။

ရဲရှင်းဟွေ့သည် ရူဟွားကို လျစ်လျူရှုလိုက်သည်။ အကြောင်းမှာ ထိုနေရာတွင် ကွက်စိတ်ထဲသို့ ဝင်ရောက်သွားပြီးဖြစ်သော အကြီးအကဲများ ရှိနေသောကြောင့်ဖြစ်သည်။

ရဲရှင်းဟွေ့၊ ရဲလန်ယွဲ့နှင့် ပေါင်ပေါင်းတို့သည် ကျန်ရှိနေသော အကြီးအကဲများကို တားဆီးရန် တစ်ချိန်တည်းတွင် လှုပ်ရှားလိုက်ကြသည်။

ဤကိတ်မုန့်လုပွဲအခြေအနေတွင် လက်နှေးသူ ရှုံးနိမ့်မည်ဖြစ်သောကြောင့် အမှောင်စွမ်းအင်ဂိုဏ်းမှ ဤအကြီးအကဲများသည် သူတို့၏လမ်းကို မည်သူပိတ်ဆို့နေသည်ကို ဂရုမစိုက်ကြပေ။

သူတို့သည် စကားတစ်ခွန်းမပြောဘဲ လှုပ်ရှားလိုက်ကြပြီး ရဲရှင်းဟွေ့နှင့် အခြားနှစ်ယောက်ကို မောင်းထုတ်လိုကြသည်။

ဤသည်ကိုမြင်သောအခါ သူတို့သုံးဦးသည် တစ်ချိန်တည်းတွင် လှုပ်ရှားလိုက်ကြသည်။

ရဲရှင်းဟွေ့သည် သူ၏ဓားကိုမထုတ်ဘဲ သူ၏ညာလက်ကို ဝေ့ယမ်းလိုက်ရာ မိုးကြိုးသည် မထင်မှတ်ဘဲပေါ်လာပြီး သူ၏ရှေ့မှ လူများကို ထိမှန်သွားသည်။

ကောင်းကင်မိုးကြိုး၏ တန်ခိုးသည် ဤလူများကို မီးသွေးခဲများအဖြစ် တိုက်ရိုက်ခုတ်ပိုင်းပစ်လိုက်သည်။

သဘာဝအတိုင်း ရဲရှင်းဟွေ့၏ ကိုယ်ပိုင်ကျင့်ကြံခြင်းမှ ထုတ်လုပ်သော မူလမိုးကြိုးငါးသွယ်တွင် ဤမျှမြင့်မားသော စွမ်းအားအဆင့် မရှိခဲ့ပေ။

သို့သော် နတ်ဘုရားဇာတိနှင့် ပေါင်းစပ်ပြီးနောက် စွမ်းအားမှာမူ ပြောဖွယ်ရာမရှိတော့။

အရေးကြီးဆုံးမှာ နတ်ဘုရားစွမ်းအင်ကို ထုတ်လွှတ်ပြီးနောက် မကြာမီတွင် ရဲရှင်းဟွေ့၏ခန္ဓာကိုယ်သို့ ပြန်လည်ရောက်ရှိလာမည်ဖြစ်ပြီး ၎င်းမှာ အသုံးပြုရန် အလွန်အဆင်ပြေစေ၏။

အလယ်တွင်ရပ်နေသော ရဲလန်ယွဲ့သည် သူမ၏ရှေ့မှ လူတစ်ဒါဇင်ကို လက်ညှိုးတစ်ချောင်ူဖြင့် ထိုးပြလိုက်ပြီး ခဏလေးအတွင်းမှာပင် လူတစ်ဒါဇင်၏ အချက်အလက်များကို မှတ်တမ်းတင်ကာ နားလည်သွားသည်။

ထို့နောက် သူမသည် သူမ၏အခြားလက်ဖြင့် လေဟာနယ်ကို အကြိမ်အနည်းငယ်တို့ထိလိုက်ရာ ဤလူများ၏ကျင့်ကြံခြင်းကို ချက်ချင်းပင် ကန့်သတ်လိုက်ပြီး သူတို့သည် အားကောင်းသောကျင့်ကြံသူများမှ သာမန်လူများအဖြစ်သို့ ပြောင်းလဲသွားကြသည်။

သူတို့၏ခန္ဓာကိုယ်ထဲရှိ ပုံမှန်မဟုတ်သောအခြေအနေကို ရှာဖွေတွေ့ရှိပြီးနောက် ဤလူများသည် သေရန်အတွက် ရှေ့သို့ ဆက်လက်တုံးအစွာပြေးဝင်ကြမည်မဟုတ်ပေ။

သူတို့သည် ထိုနေရာတွင် ငေးကြောင်စွာရပ်နေနိုင်ရုံသာရှိပြီး သူတို့အားလုံးကို အပေါ်စီးမှကြည့်နေသော ရဲလန်ယွေ့ကို မျှော်လင့်ချက်မဲ့စွာ ကြည့်နေကြ၏။

ပေါင်ပေါင်းအတွက်မူ ပြောစရာမလိုပေ။ သူမနှင့်အတူ လက်ဝှေ့အိတ်များပါလာပြီး သူမ၏ရှေ့မှလူများကို လက်သီးဖြင့်ထိုးလိုက်သည်။ သူတို့သည် လေထဲသို့ လွင့်စင်သွားကြပြီး သွေးများနှင့် အတွင်းအင်္ဂါများကို အန်ထုတ်လိုက်ကာ ဒီတစ်ခါမှမသေလျှင် နောက်ဘယ်တော့မှသေနိုင်တော့မည်မဟုတ်ပေ။

ရဲရှင်းဟွေ့သည် သူ၏အစ်မကြီးကို စူးစမ်းစွာကြည့်ကာ

"အစ်မ၊ အစ်မရဲ့စွမ်းရည်က ဘာလဲ"

"ဘာမှမဟုတ်ပါဘူး… မျိုးရိုးဗီဇအင်ဂျင်တစ်ခုပါပဲ"။

ရဲလန်ယွဲ့သည် အလွန်ပေါ့ပေါ့ပါးပါးပြောလိုက်သော်လည်း ရဲရှင်းဟွေ့သည် ၎င်းမှာ အလွန်အစွမ်းထက်သော နည်းစနစ်တစ်ခုဖြစ်မည်ကို သိနေသည်။

သို့သော် ယခုမှာ သူ၏အစ်မကြီး၏ နည်းပညာအသေးစိတ်ကို မေးမြန်းရမည့်အချိန်မဟုတ်ပေ။ အကြောင်းမှာ ထိုအချိန်တွင် ကွက်စိတ်ထဲ၌ နောက်ထပ်ပြောင်းလဲမှုတစ်ခု ဖြစ်ပွားခဲ့သောကြောင့်ဖြစ်သည်။

ခုနက ကွက်စိတ်ထဲသို့ ဝင်ရောက်သွားသော အကြီးအကဲများသည် လက်တံများတွင် ရစ်ပတ်ခံရပြီးနောက် တစ်ခုခုမှားနေပြီဟု ခံစားလိုက်ရသည်။ ထိုအချိန်တွင် သူတို့၏စွမ်းအားကို အရူးအမူးစုပ်ယူခံနေရ၏။

"ဂိုဏ်းချုပ် စတစ်ခ်… ဘာတွေဖြစ်နေတာလဲ"။

"ဟုတ်တယ်…။ ငါတို့က ရူဟွားရဲ့ကျင့်ကြံခြင်းကို မျှဝေယူဖို့ သဘောတူထားတာလေ၊ ဒါဖြင့် ဘာလို့ငါတို့ရဲ့ကျင့်ကြံခြင်းကိုပါ စုပ်ယူနေရတာလဲ"

"ဂိုဏ်းချုပ် စတစ်ခ်… မင်းကောင်စုတ်ကြီး… ငါတို့ မင်းကို မယုံခဲ့သင့်ဘူး"

အစပိုင်းတွင် အကြီးအကဲများသည် ရှုပ်ထွေးနေရုံသာဖြစ်သည်။ ဂိုဏ်းချုပ် စတစ်ခ် စကားမပြောသောအခါ သူတို့သည် စိတ်မရှည်ဖြစ်လာပြီး ကျိန်ဆဲစပြုလာကြသည်။

ဂိုဏ်းချုပ် စတစ်ခ် သည် နောက်ဆုံးတွင် သည်းမခံနိုင်တော့ပေ။ သူ၏လေသံမှာ အားနည်းနေသော်လည်း ကြားနိုင်သေးသည်။ သူသည် အကြီးအကဲများကို တုံ့ပြန်လိုက်သည်။

"မင်းတို့ ငတုံးတွေ ငါ့ကျင့်ကြံခြင်းတွေ မရှိတော့ဘူးဆိုတာ သတိမထားမိကြဘူးလား။ ငါတို့အားလုံး လှည့်စားခံလိုက်ရတာ။ ငါတို့က ရူဟွားကို ငတုံးတစ်ယောက်လို့ ထင်ခဲ့ကြတာ။ သူက လုံးဝမတုံးဘူး… မတုံးရုံတင်မကဘူး၊ သူက အရမ်းလည်တယ်။ သူက…"

"သူက သူ့လိုဟန်ဆောင်ဖို့ တစ်ယောက်ယောက်ကိုခိုင်းပြီး ငါ့ကိုလှည့်စားခဲ့တယ်၊ ပြီးတော့ ငါ့ကျင့်ကြံခြင်းကို ပြောင်းပြန်စုပ်ယူသွားတယ်။ မင်းတို့သာ ကွက်စိတ်ထဲမဝင်လာခဲ့ရင် ငါပြန်လည်နာလန်ထူနိုင်သေးတယ် အခုတော့… အားလုံးအတူတူသေကြတာပေါ့။ မင်းတို့ ငတုံးတစ်သိုက်"။

စတစ်ခ် ပြောသည်ကိုကြားသောအခါ လူတိုင်း မျှော်လင့်ချက်မဲ့သွားကြသည်။

အပြင်ဘက်ရှိ ရဲရှင်းဟွေ့နှင့် ရဲလန်ယွဲ့တို့သည်လည်း ကြားလိုက်ကြသည်။

ရဲလန်ယွဲ့သည် အနည်းငယ်ရှုပ်ထွေးနေသော်လည်း ရဲရှင်းဟွေ့မှာမူ ခန့်မှန်းမိပြီးသားဖြစ်သည်။

၎င်းမှာ အခြားပရိယာယ်တစ်ခုထက်မပိုပေ။ ဂိုဏ်းချုပ် စတစ်ခ် သည် ရူဟွားကို ထောင်ချောက်ဆင်ကာ သူမ၏ကျင့်ကြံခြင်းကို စုပ်ယူလိုခဲ့သော်လည်း ထူးဆန်းသော တိုက်ဆိုင်မှုများကြောင့် သူသည် ရဲယင်ကို ရူဟွားအဖြစ် ပြောင်းလဲပစ်ခဲ့ပြီးနောက် ဤကွက်စိတ်မှာ ချို့ယွင်းသွားကာ ဤအားကြီးသောသူများ၏ကျင့်ကြံခြင်းကို ရဲယင်ထံ လွှဲပြောင်းပေးသည့်အရာအဖြစ်သို့ ပြောင်းလဲသွားသည်။

‘တကယ့်ဇာတ်လမ်းဆန်လိုက်တာ။ ဒါက ဇာတ်လိုက်တစ်ယောက်ရဲ့ အခွင့်အရေးလား။ သူကျင့်ကြံဖို့တောင်မလိုဘူး။ တစ်ယောက်ယောက်က သူ့ကို အဆင့်မြင့် အဆင့်တစ်ခုကိုရောက်အောင် ကူညီပေးလိမ့်မယ်။’

ထိုအချိန်တွင် ရဲရှင်းဟွေ့သည် နဂါးနိုင်ဓားသမားများ ဇာတ်လမ်းထဲမှ ဇာတ်လိုက်တစ်ဦးဖြစ်သော ရွှီကျူကို သတိရသွားသည်။

မူလက ရဲရှင်းဟွေ့သည် သူ၏တူအကြီးဆုံးကို ကယ်တင်လိုခဲ့သော်လည်း လုံးဝမလိုအပ်ကြောင်း ထွက်ပေါ်လာသည်။

ဆယ်မိနစ်အကြာတွင်။

ကွက်စိတ်ထဲသို့ ဝင်ရောက်သွားသော အကြီးအကဲများသည် တစ်ယောက်ပြီးတစ်ယောက် အားနည်းလာကြသည်။

ဂိုဏ်းချုပ် စတစ်ခ် ကဲ့သို့ပင် သူတို့သည် သူတို့၏အသက်ကို ထိန်းသိမ်းရန် ကျင့်ကြံခြင်းအလင်းတန်းလေးတစ်ခုသာ ကျန်တော့သည်။

အခြားတစ်ဖက်ရှိ ရဲယင်သည် မသေမျိုးဧကရာဇ်အတုအယောင်အဆင့်သို့ အောင်မြင်စွာရောက်ရှိသွားပြီး သူသည် မသေမျိုးဧကရာဇ်အဆင့်နှင့် ခြေတစ်လှမ်းသာ ကွာတော့သည်။

သို့သော် သူသည် ကြယ်ဧကရာဇ်ကျမ်းကို ကျင့်ကြံသောကြောင့် ဤခြေတစ်လှမ်းမှာ အခြားသူများလိုအပ်သော ခြေတစ်လှမ်းထက် များစွာကြီးမားလှသည်။

ကွက်စိတ်အတွင်း၌ ရဲယင်သည် သူ၏မျက်လုံးများကို ဖွင့်လိုက်ပြီး သူ၏လက်များကို ရှုပ်ထွေးစွာကြည့်လိုက်သည်။

"ဘာ… ဘာတွေဖြစ်ကုန်တာလဲ"။

စွမ်းအားများ ကြမ်းတမ်းစွာ သွင်းလောင်းခံရမှုကြောင့် ရဲယင်သည် အလိုအလျောက် ကြယ်ဧကရာဇ်ကျမ်းကို ကျင့်ကြံသည့် နက်ရှိုင်းသောအခြေအနေသို့ ဝင်ရောက်သွားပြီး အပြင်ဘက်တွင် အတိအကျဘာဖြစ်ခဲ့သည်ကို သူလုံးဝမသိရှိခဲ့ပေ။

"ငါ… ငါ ပိုအားကောင်းလာသလိုပဲ"။

ထိုသို့ပြောရင်း ရဲယင်သည် သူ၏မျက်နှာချင်းဆိုင်ရှိ အားနည်းနေသော ဂိုဏ်းချုပ် စတစ်ခ် နှင့် အမှောင်စွမ်းအင်ဂိုဏ်းအကြီးအကဲများကို ကြည့်လိုက်သည်။

ကွက်စိတ်အပြင်ဘက်တွင် အနည်းငယ်မနာလိုဖြစ်နေပုံရသော ရဲရှင်းဟွေ့၊ စိုးရိမ်တကြီးကြည့်နေသော ရဲလန်ယွဲ့နှင့် မျက်နှာအမူအရာမပြောင်းလဲသေးသော ပေါင်ပေါင်းတို့လည်း ရှိနေသည်။

ရဲရှင်းဟွေ့၊ ရဲလန်ယွဲ့နှင့် ပေါင်ပေါင်းတို့ ရောက်နေသည်ကိုမြင်သောအခါ ရဲယင်သည် သက်ပြင်းချလိုက်သည်။

တစ်ချိန်တည်းမှာပင် ကြယ်စွမ်းအင်များ၏ အဆက်မပြတ်လှုံ့ဆော်မှုကြောင့် ကွက်စိတ်သည် ပြိုကျလုနီးပါးဖြစ်နေ၏။

ကွက်စိတ်ထဲတွင် သူတို့၏ကျင့်ကြံခြင်းကို ကြိုးစားဖျောက်ဖျက်နေသော အကြီးအကဲများသည် ကွက်စိတ်၏အလင်းရောင် တဖြည်းဖြည်းပျောက်ကွယ်သွားသည်ကိုမြင်သောအခါ သူတို့အားလုံး မျှော်လင့်ချက်မဲ့သွားကြသည်။