ပိုင်လန်အား ဝိညာဉ်ရှာဖွေခြင်း

ဘုန်း…

အဆများစွာ ဖောင်းကားနေသော ပိုင်လန်၏ ခန္ဓာကိုယ်မှာ မြေပြင်ပေါ်သို့ ကျဆင်းသွားသည်။

ရဲယင်က ရှေ့သို့ တိုးလာပြီး ပိုင်လန်၏ လူမဆန်သော ပုံစံကို မြင်သောအခါ တံတွေးမျိုချလိုက်မိ၏။

အရေးအကြီးဆုံးမှာ ပိုင်လန် မည်မျှ ဆိုးရွားစွာ ဒဏ်ရာရနေသည် မဟုတ်ဘဲ ဤမျှ ဆိုးရွားသော ပိုင်လန်မှာ မသေဆုံးသေးခြင်း ဖြစ်သည်။ ဤသည်က... ရဲရှင်းဟွေ့မှာ တိုက်ခိုက်သည့်အခါ သူ၏ ခွန်အားကို အမြဲတမ်း ထိန်းချုပ်ထားကြောင်း ပြသနေသည်။

ရဲယင်က ရဲရှင်းဟွေ့ကို ကြည့်လိုက်၏။ မူလက သူက “ဒီဆံပင်စိမ်းက မင်းနဲ့ တကယ်လိုက်တယ်…” ကဲ့သို့သော စကားအချို့ ပြောနိုင်ခဲ့သော်လည်း... စကားလုံးများက သူ့နှုတ်ဖျားသို့ ရောက်သောအခါ…။

“ဦးလေး… ဦးလေး အရမ်းကြည့်ကောင်းတယ်…”

ရဲယင်၏ စကားကို ကြားသောအခါ ရူဟွားကလည်း ခေါင်းကို အပြင်းအထန် ညိတ်၍ ပြောလိုက်သည်။ “ဦးလေးက ဆံပင်စိမ်းနဲ့ဆို အရမ်းကြည့်ကောင်းတာပဲ…”

ရဲယင် - “…”

ရဲရှင်းဟွေ့ - “…”

ရဲယင်မှာ စကားမပြောနိုင် ဖြစ်သွားသည်။ သူက ဆံပင်စိမ်းအကြောင်း ပြောရန် မရဲသော်လည်း ရူဟွားကမူ အမှန်တကယ် အော်ပြောလိုက်၏။

ရဲရှင်းဟွေ့မှာ အမှန်တကယ်တော့ အစက ဆံပင်စိမ်းနှင့် မနေတတ် ဖြစ်နေသည်။ သူက ရှာမိတ်အကသမားလည်း မဟုတ်၊ ဖောက်ပြန်ခံရသူလည်း မဟုတ်ချေ။

သို့သော်... သူ စိမ်းသွားပြီးနောက်မှာမူ ခံစားချက်က... မဆိုးပေ။ တိုက်ခိုက်ရေးစွမ်းအား တိုးတက်လာခြင်းမှာ အလွန် ကျေနပ်ဖွယ်ကောင်း၏။

ထို့အပြင် သူက ရင်းနဲ ရှာရင်းဂန်နှင့် စူပါဆိုင်ရန်းဂျင်း ၄ အဆင့်ကိုလည်း တွေ့ကြုံခံစားခွင့် ရခဲ့သည်။

ရဲရှင်းဟွေ့က အသက်ပြင်းပြင်း ရှူသွင်းလိုက်ပြီး သူ၏ စွမ်းရည်များအားလုံးကို ပယ်ဖျက်ကာ ယခင်ပုံစံအတိုင်း ပြန်ဖြစ်သွားသည်။

“ကျွန်တော့်… ကျွန်တော့်အသက်ကို ချမ်းသာပေးပါ… ကျွန်တော်က… ကြယ်တာရာဧကရာဇ်ရဲ့… တစ်ဦးတည်းသော တပည့်ပါ… ချမ်းသာပေးပါ…”

ထိုအခိုက်၌ ပိုင်လန်၏ အားနည်းဖျော့တော့သော အသံ ထွက်ပေါ်လာသည်။

ပိုင်လန်၏ အသံကို ကြားသောအခါ လူအများအပြားက သူ့ကို တစ်ချိန်တည်း ကြည့်လိုက်ကြသည်။

ရဲရှင်းဟွေ့က ရှေ့သို့ တိုးလာပြီး ပြုံးလိုက်သည်။

“ဟေး… ဒါဘယ်သူလဲ… ဒါ မျက်လုံးဖြူဝံပုလွေ၊ အဲ… ပိုင်လန် အင်မော်တယ်ဧကရာဇ် မဟုတ်လား… မိနစ်အနည်းငယ် မတွေ့ရတာနဲ့ ဘယ်လိုလုပ် ပုံစံပြောင်းသွားရတာလဲ… မင်းရဲ့ အရင်က မနိုင်ဝန်ထမ်းတဲ့ ပုံစံကို ငါ ပိုသဘောကျတယ်…”

ပိုင်လန် - “…”

ပိုင်လန် စကားမပြောနိုင်သည်ကို မြင်သောအခါ ရဲရှင်းဟွေ့က ရဲယင်ဘက် လှည့်၍ ပြောလိုက်သည်။ “မင်းကိုပဲ လွှဲလိုက်ပြီ…”

ရဲယင်က ခေါင်းညိတ်၍ ရှေ့သို့ လျှောက်သွားကာ သူ၏ လက်တစ်ဖက်ကို ပိုင်လန်၏ ခေါင်းပေါ် တင်လိုက်သည်။

ရဲယင် ဘာလုပ်မလဲဟု မေးလျှင်... ဝိညာဉ်ရှာဖွေခြင်း ဖြစ်သည်။

ပိုင်လန်မှာ လက်ရှိတွင် ဝိညာဉ်နှင့် ခန္ဓာကိုယ် နှစ်ခုစလုံး အားနည်းနေချိန်ဖြစ်ပြီး ရဲယင်၏ ဝိညာဉ်ရှာဖွေမှုကို လုံးဝ ခုခံနိုင်စွမ်း မရှိချေ။

ထို့အပြင် ရဲယင်က ပိုင်လန်၏ အသက်ရှင်သေဆုံးမှု ကိစ္စကို လုံးဝ ထည့်မစဉ်းစားဘဲ သူ၏ ဝိညာဉ်ကို အကြမ်းပတမ်း ရှာဖွေလိုက်သည်။

ပိုင်လန်၏ မျက်လုံးများက မှုန်ဝါးလာပြီးနောက်... အသက်မဲ့သွားသည်။

ရဲ့ယင်၏ မျက်နှာမှာမူ ပို၍ ပို၍ မည်းမှောင်လာသည်။

ရဲယင်က ပိုင်လန်၏ မှတ်ဉာဏ်ထဲတွင် သူ့မိခင်ကို တွေ့ရှိခဲ့သော်လည်း အခြေအနေမှာ အလွန် မကောင်းမွန်လှပေ။

ကြယ်တာရာဧကရာဇ်ကျမ်း၏ အမွေအနှစ်ကို ရှာဖွေရန်အတွက် ပိုင်လန်က နန်ကုန်းချင်းယွီကိုလည်း ဝိညာဉ်ရှာဖွေမှု အသုံးပြုခဲ့သည်။

အကြမ်းပတမ်း ဝိညာဉ်ရှာဖွေခြင်း မဟုတ်သော်လည်း ၎င်းက နန်ကုန်းချင်းယွီ၏ စိတ်ကို ထိခိုက်ပျက်စီးစေခဲ့ပြီး သူမ၏ မှတ်ဉာဏ်များအားလုံးကို မေ့ပျောက်သွားစေခဲ့သည်။

သူ၏ မာနကို ဖြည့်ဆည်းရန်အတွက် ပိုင်လန်က နန်ကုန်းချင်းယွီကို သူ၏ အိမ်တော်တွင် အစေခံအဖြစ် ထားရှိခဲ့သည်။

ပိုင်လန်က ပို၍ သန်မာလာရန်သာ လိုလားသောကြောင့် အမျိုးသမီးများကို စိတ်မဝင်စားပေ။

ထို့အပြင် နန်ကုန်းချင်းယွီမှာ ရင်သပ်ရှုမောဖွယ် အလှပဂေးတစ်ဦးလည်း မဟုတ်ချေ။

ဤသည်ကလည်း ရဲယင်အတွက် သတင်းကောင်း ဖြစ်သည်။

.......

ဝိညာဉ်ရှာဖွေမှု ပြီးဆုံးသွားပြီး ရဲယင်မှာ သူ၏ မိခင်ရှိရာ နေရာကို ရှာဖွေတွေ့ရှိသွားပြီ ဖြစ်သည်။

ပိုင်လန်မှာမူ အကြမ်းပတမ်း ဝိညာဉ်ရှာဖွေမှုကြောင့် အရူးတစ်ယောက် ဖြစ်သွားခဲ့သည်။

“ဦးလေး… ကျွန်တော် အမေ့ကို သွားခေါ်တော့မယ်…”

စကားဆုံးသည်နှင့် ရဲယင်မှာ အဝေးသို့ ပျံသန်းသွားရန် မစောင့်နိုင်တော့ပေ။

ဤသည်ကို မြင်သောအခါ ရူဟွားကလည်း သူ့နောက်မှ လိုက်ပါသွား၏။

ရူဟွားက မနေချင်၍ မဟုတ်ဘဲ ကျန်ရှိနေသော လူသုံးယောက်မှာ အလွန် ကြောက်စရာကောင်းလွန်းသောကြောင့် ဖြစ်သည်။

သူမက မူလက ရဲရှင်းဟွေ့ကို ထူးဆန်းသော စွမ်းရည်အချို့ရှိသူဟုသာ ထင်ခဲ့သော်လည်း... ပိုင်လန်နှင့် တိုက်ပွဲကို မြင်ပြီးနောက်တွင်မူ... ဤလူမှာ သူမ မထိခိုက်နိုင်သောသူ ဖြစ်ကြောင်း ရူဟွား သိရှိသွား၏။

အထူးသဖြင့် ပေါင်ပေါင်းနှင့် ရဲလန်ယွဲ့တို့ ဖြစ်သည်။

ပေါင်ပေါင်းအကြောင်းမှာ ပြောစရာမလိုတော့ပေ။ သူမက အရင်က သူမနှင့် တိုက်ခိုက်ခဲ့ဖူးသည်။

ရဲလန်ယွဲ့မှာမူ... သူမထက် သန်မာသော အင်မော်တယ်ဧကရာဇ်တစ်ပါးကို သွေးအန်သည်အထိ လက်သီးဖြင့် ထိုးခဲ့သည်... ဤသို့သော ခွန်အားမျိုး…

စဉ်းစားပြီးနောက် ရူဟွားမှာ ရဲယင်နှင့် အတူရှိနေခြင်းက ပိုကောင်းမည်ဟု ခံစားမိသည်။

အနည်းဆုံးတော့ သူမက သူ့ကို အနိုင်ယူနိုင်သေး၏။

.......

လူနှစ်ယောက် ထွက်ခွာသွားသည်ကို မြင်သောအခါ ရဲရှင်းဟွေ့နှင့် အခြားသူများကလည်း ကြယ်တာရာဂိုဏ်းအောက်ရှိ ကြယ်တာရာမြို့တော်သို့ ပြန်လာကြသည်။

ထိုနေရာသို့ ဝင်ရောက်သည်နှင့် တစ်ပြိုင်နက် အောင်ပွဲခံသံများ ထွက်ပေါ်လာသည်။

“ကြယ်တာရာဂိုဏ်း… သက်တော်ရာကျော် ရှည်ပါစေ…”

“ဒုတိယဂိုဏ်းချုပ် ရဲရှင်းဟွေ့… သက်တော်ရာကျော် ရှည်ပါစေ…”

“ဒုတိယဂိုဏ်းချုပ် ရဲလန်ယွဲ့… သက်တော်ရာကျော် ရှည်ပါစေ…”

“ကြယ်တာရာဂိုဏ်းက အကောင်းဆုံးပဲ…”

.......

အတွင်းမှ မိုးခြိမ်းသံကဲ့သို့သော အောင်ပွဲခံသံများက မူလက သက်မဲ့နေသော ကြယ်တာရာဂိုဏ်းကို အသက်ပြန်ဝင်လာစေသည်။

.......

တစ်ဖက်တွင်…

အာကာသထဲမှ ပါဆယ်ထုပ် ရရှိခဲ့သော လူအုပ်ကြီးကလည်း ကြယ်တာရာဂိုဏ်းမှ အောင်ပွဲခံသံများကို ကြားလိုက်ရသည်။

“ကြယ်တာရာဂိုဏ်း… ထွန်းတောက်လာတော့မယ်…”

“ဟုတ်တယ်… အင်မော်တယ်ဧကရာဇ်ငါးယောက်တောင်မှ… သူတို့ကို ဘာမှလုပ်လို့ မရဘူး…”

“အခု… နောက်တစ်ခါ ကြယ်တာရာဂိုဏ်းနဲ့ ဘယ်လို ပေါင်းသင်းဆက်ဆံရမလဲဆိုတာ စဉ်းစားကြရအောင်…”

“ဟုတ်တယ်… ငါတို့ ဆက်ပြီး နှိမ်နင်းမလား… ဒါမှမဟုတ်… သဟဇာတဖြစ်အောင် နေမလားဆိုတာ ဆွေးနွေးသင့်တယ်…”

…

သူတို့ ဥက္ကာခဲနှင့် ထိမှန်ခဲ့သော်လည်း အားကောင်းသော လူများစွာမှာ အသက်ရှင်ကျန်ရစ်ခဲ့သေး၏။ အထူးသဖြင့် အင်မော်တယ်ဧကရာဇ်နှစ်ပါး ဦးဆောင်သော ဂိုဏ်းများတွင်မူ အခြေခံအားဖြင့် ထိခိုက်သေဆုံးမှု မရှိပေ။

ဤတစ်ကြိမ် တိုက်ပွဲကို ကြည့်ပြီးနောက် သူတို့က ကြယ်တာရာဂိုဏ်း၏ ခွန်အားကို ရှင်းရှင်းလင်းလင်း မြင်တွေ့ခဲ့ရသည်။

ကြယ်တာရာဂိုဏ်း၏ အတွင်းပိုင်း အမွေအနှစ်အကြောင်း ပြောရန်မလိုပေ။ အဆင့်မြင့် တိုက်ခိုက်ရေးစွမ်းအားအရဆိုလျှင် ပထမတန်းစားဂိုဏ်းများကို ကျော်လွန်နိုင်သည်မှာ သေချာသည်။

အနည်းဆုံးတော့ ရှိနေသော ဂိုဏ်းများထဲမှ မည်သည့်ဂိုဏ်းကမျှ သူတို့ဂိုဏ်းက ကြယ်တာရာဂိုဏ်းကို စိန်ခေါ်နိုင်သည်ဟု မပြောရဲပေ။

သူတို့က ကြယ်တာရာဂိုဏ်း၏ ခွန်အားကို အသိအမှတ်ပြုသော်လည်း လက်နက်ချခြင်းမှာ လုံးဝ မဖြစ်နိုင်ပေ။ ထို့ကြောင့်... ဂိုဏ်းများစွာက ကြယ်တာရာဂိုဏ်းနှင့် သဟဇာတဖြစ်အောင် မည်သို့ အတူယှဉ်တွဲနေထိုင်ရမည်ကို စဉ်းစားနေကြသည်။

ဤသည်တို့မှာ အင်မော်တယ်ကျင့်ကြံရေးကမ္ဘာ၏ စည်းမျဉ်းများ ဖြစ်သည်။ အားကြီးသူများသာလျှင် သဟဇာတဖြစ်စွာ နေထိုင်ခွင့်ရှိသည်။ အကယ်၍ ကြယ်တာရာဂိုဏ်းသာ သူတို့၏ ခွန်အားနှင့် စွမ်းရည်ကို မပြသနိုင်ခဲ့လျှင် သူတို့အားလုံးမှာ ဆာလောင်နေသော ဝံပုလွေများအဖြစ်သို့ ပြောင်းလဲကာ ကြယ်တာရာဂိုဏ်းတစ်ခုလုံးကို စားသောက်ပစ်ကြမည် ဖြစ်သည်။

.......

“ကြယ်တာရာဂိုဏ်း… အဲဒီ ရဲရှင်းဟွေ့က အရမ်း အားကြီးတာပဲ… ငါ ဘယ်လို လက်စားချေရမှာလဲ…”

မြင့်မြတ်စိတ်ဝိဉာည်ဂိုဏ်းနှင့် မနီးမဝေးတွင် လင်ချင်းယွဲ့မှာ လက်စားချေရန် စဉ်းစားနေဆဲ ဖြစ်သည်။

သူမက ရဲရှင်းဟွေ့၏ ကြီးမားသော ခွန်အားကို မြင်တွေ့ခဲ့သော်လည်း... သူမကို မစင်စားစေခဲ့သည့်အတွက် သူ့ကို လက်စားမချေဘဲ မည်သို့ နေနိုင်မည်နည်။

ထိုအခိုက်၌ နောက်မှ ခေါ်သံတစ်ခု ထွက်ပေါ်လာသည်။

“သူတော်စင်မိန်းမပျို… ဆင်းရဲသား ဘုန်းကြီးကို စောင့်ပါဦး…”

လင်ချင်းယွဲ့က နောက်သို့ လှည့်ကြည့်လိုက်ရာ ယွမ်ကျစ်က သူမထံသို့ ပျံသန်းလာသည်ကို တွေ့လိုက်ရသည်။

ယွမ်ကျစ်ကို မြင်သောအခါ လင်ချင်းယွဲ့က အနည်းငယ် နားမလည်ဟန်ဖြင့် မေးလိုက်သည်။ “ဆရာတော် ဂိုဏ်းတောင်ကို ပိတ်ဖို့ ပြန်မသွားဘဲ ဘာလို့ ကျွန်မကို ရှာနေတာလဲ…”

“အမိတ္တဖ…” ယွမ်ကျစ်က လင်ချင်းယွဲ့ကို ဦးညွှတ်၍ ပြုံးလိုက်သည်။ “သူတော်စင်မိန်းမပျို… မကျေမနပ် မဖြစ်ဘူးလား…”

လင်ချင်းယွဲ့က ယွမ်ကျစ်၏ စကားကို မဖြေဘဲ သူ့ကို တိတ်ဆိတ်စွာ ကြည့်နေ၏။ သူမက ဤကတုံး ဘာလုပ်ချင်သည်ကို ကြည့်လိုသည်။

ဤသည်ကို မြင်သောအခါ ယွမ်ကျစ်က ကြင်နာစွာ ပြုံးလိုက်သည်။ လင်ချင်းယွဲ့က ရပ်၍ သူပြောသည်ကို နားထောင်နေသမျှ ကာလပတ်လုံး သူ အောင်မြင်ပြီ ဖြစ်သည်။

“နတ်ဘုရားလက်သီးတောင်ကြားမှာ လက်သီးနတ်ဘုရား အသစ်တစ်ပါး ပေါ်လာတယ်လို့ ကြားတယ်… သူက နတ်ဘုရားလက်သီးတောင်ကြားရဲ့ နတ်ဘုရားလက်နက်နဲ့ ဆက်သွယ်နိုင်ရုံသာမက သူကိုယ်တိုင်လည်း အင်မော်တယ်ဧကရာဇ်အဆင့်ကို ရောက်ရှိနေပြီ…”

လင်ချင်းယွဲ့ ဤသည်ကို ကြားသောအခါ သူမ၏ မျက်လုံးများ အနည်းငယ် လှုပ်ရှားသွားသော်လည်း စကားမပြောသေးပေ။

“ဒုတိယမြောက် နတ်ဘုရားလက်သီးတစ်စုံ ရှိနေတာကို သိသွားရင် နတ်ဘုရားလက်သီးတောင်ကြားက ဘယ်လို ခံစားရမလဲ မသိဘူးနော်…”

ဤသို့ ပြောပြီးနောက် ယွမ်ကျစ် ထွက်ခွာသွားသည်။