သွေးဝိဉာဉ်သခင်

ချီရွှယ်နန်းတော်မှ လူများမှာ သူတို့ရှေ့မှ လူကြီး၏ အရောင်အဝါကြောင့် ရေခဲဂူကြီးတစ်ခုထဲ ကျနေသလို ခံစားလိုက်ကြရသည်။

သူတို့ ထိုအရောင်အဝါအား ရင်းရင်းနှီးနှီးပင် သိပါ၏။

၎င်းမှာ တားမြစ်နယ်မြေမှ ကြောက်မက်ဖွယ် အရောင်အဝါဖြစ်ပြီး ...

ချီရွှယ်နန်းတော်မှ အားလုံးအတွက် အိမ်မက်ဆိုးကြီးတစ်ခုဟု ဆို၍ရပေသည်။

ထိုစဥ် ခန်းမထဲမှ အကြီးအကဲတစ်ယောက်က ရုတ်တရက် တစ်ခုကိုသတိရသွားဟန်ဖြင့် တအံ့တသြပြော၏။

" မဖြစ်နိုင်ဘူး ၊ ညီမလေးတွေနဲ့ တခြားသူတွေက အချုပ်အနှောင်ကို တစ်ချိန်လုံး စောင့်ကြပ်နေကြတာလေ ။ ခုလို ဘယ်သူမှမသိအောင် ဘယ်လိုလုပ်ပြီး

ချိုးဖျက်လိုက်နိုင်တာလဲ "

တဖက်အမျိုးသမီးက နှုတ်ခမ်းတွန့်ရုံ ပြုံးသည်။

" အဲ့လို ဘာမဟုတ်တဲ့ အရှုံးသမားလေးနည်းနည်းလောက်နဲ့ ငါတို့ကို တားနိုင်မယ် ထင်တယ်လား "

အကြီးအကဲ မျက်မှောင်ကြုံ့သွား၏။

" အရင်တစ်ခေါက်က ငါ မင်းတို့ကို တားခဲ့လို့ရတယ်.... "

" ငါတို့ကို တားမယ်.. ဟုတ်လား.. "

အမျိုးသမီးက ရယ်စရာအလွန်ကောင်းသည့် အရာတစ်ခုကို ကြားလိုက်ရသည့်အလား အားပါးတရ အော်ရယ်သည်။

အချိန်အတန်ကြာ ရယ်နေပြီးမှ သူမ အပြုံးဖြင့် ဆို၏။

" ငါသာ လုပ်ချင်ရင် မင်းတို့အားလုံးကို တစ်ချက်တည်းနဲ့ အပျောက်ဖျောက်ပစ်လိုက်လို့ ရတယ်ဟဲ့ ။ နင်တို့ရဲ့ ဂိုဏ်းချုပ်ကြီးကိုယ်တိုင်က အသည်းအသန် ကြိုးစားရင်တောင် အသုံးဝင်မှာ မဟုတ်ဘူး ။ ဒါပေမယ့် အဲ့နေ့တုန်းက... ဒီသခင်ကြီး

က အကြာကြီးချုပ်နှောင်ခံထားရတာမို့ အားပြန်ပြည့်အောင် သက်ရှိတချို့ရဲ့ စိတ်ဝိဥာဥ်လိုအပ်နေတာကြောင့် နင်တို့ကိုမသတ်ပဲ တမင်ချန်ထားခဲ့တာ "

" အခု သခင်ကြီး ပြန်လွတ်မြောက်လာပြီဆိုတော့ နင်တို့အားလုံး သူ့အတွက်အစာ ဖြစ်လာပြီလေ "

ထို့နောက် သူမက ခန်းမထဲတွင် ရှိနေသော စိတ်ဝိဥာဥ်စခန်းမှ လူများကိုကြည့်ကာ အပြုံးဖြင့် စကားဆက်သည်။

" ဒါပေမယ့် နင်တို့က အံ့သြစရာတစ်ခုတော့ကောင်းတယ် ။ ဒီလိုအခြေနေမှာတောင် နင်တို့တွေ မထွက်ပြေးပဲ တခြားသူတွေ အများကြီးကိုပါ ထပ်ခေါ်လာသေးတာ ။ အဲ့တော့လဲ သခင်ကြီး မြန်မြန်အားပြည့်သွားတာပေါ့လေ "

စကားဆုံးသည်နှင့် အမျိုးသမီး ထပ်ရယ်နေပြန်၏။

တဖက်ရှိ ချီရွှယ်နန်းတော်မှ အကြီးအကဲမှာကား ကြားလိုက်ရသည့်စကားကြောင့် ဒယိမ်းဒယိုင်ဖြင့် နောက်သို့ ခြေနှစ်လှမ်းဆုတ်သွားသည်။

ယခုမှလည်း ရန်သူက မည်မျှကြောက်မက်ဖွယ်ကောင်းကြောင်း သူမ သိလိုက်ရခြင်းပင် ။

လေထဲရပ်နေသော လူကြီးကိုကြည့်ကာ သူမ အသံတုန်တုန်ဖြင့် မေး၏။

" ရှင်... ရှင်က ဘယ်သူလဲ "

လူကြီးက သူမကို အေးစက်စက်တစ်ချက်ကြည့်ပြီး မထူးခြားဟန်ဖြင့် ပြောသည်။

" ကမ္ဘာကြီးက တကယ်ကို ပြောင်းလဲသွားပြီပဲ ။ ဒီနေ့ခေတ် လူတွေက ငါ့နာမည်ကိုတောင် မသိကြတာ ယုံတောင်မယုံနိုင်ဘူးကွာ "

ဘေးတွင်ရှိသော အမျိုးသမီးက ချက်ချင်းဦးညွှတ်၍ ဝင်ပြော၏။

" သခင်ကြီးရွှယ်က အချိန်တွေအကြာကြီး အိပ်နေခဲ့တာမို့ ဒီလူတွေ သခင်ကြီးအကြောင်း မကြားဖူးကြတာ နားလည်ပေးလိုက်ပါ သခင်ကြီးရယ် "

သခင်ကြီးရွှယ် ဆိုသူက ခေါင်းညိတ်၍ အားလုံးဘက် လှည့်ကြည့်ကာ ဆိုသည်။

" ကိစ္စမရှိပါဘူးလေ ... ငါ့အတွက် အစာဖြစ်ပေးလို့

ဆုချတဲ့အနေနဲ့ မင်းတို့မသေခင် ငါဘယ်သူလဲ ပြောပြလိုက်မယ် "

" ငါက ဝမ်ဟွန်းကွေ့ယီဂိုဏ်းရဲ့ ပထမမျိုးဆက်က လက်ထောက်ဂိုဏ်းချုပ်ကြီး ၊ သွေးနီစိတ်ဝိဥာဥ်သခင်ကြီး ပဲ "

" ဘယ်လို.... "

ချီရွှယ်နန်းတော်မှလူများအားလုံး ပါးစပ်အဟောင်းသား ဖြစ်ကုန်ကြသည်။

သူတို့ ချီရွှယ်နန်းတော်အောက်တွင် ချုပ်နှောင်ခံထားရသူက ထိုသို့သော အစွမ်းထက်ကျင့်ကြံသူကြီးတစ်ယောက်တဲ့လား .. ။

ချီရွှယ်နန်းတော်မှ အခြားအကြီးအကဲတစ်ယောက်က အံကြိတ်ကာ ဝင်မေး၏။

" ရှင်က ကျွန်မတို့ ချီရွှယ်နန်းတော်ရဲ့ တားမြစ်နယ်မြေမှာ ဘာလို့ရောက်နေရတာလဲ "

သွေးနီစိတ်ဝိဥာဥ် သခင်ကြီးက လှောင်ပြုံးဖြင့်

ပြန်ပြောသည်။

" မင်းတို့ မှားနေပြီကွ ။ ငါက မင်းတို့ ချီရွှယ်နန်းတော်ရဲ့ တားမြစ်နယ်မြေကို ရောက်နေတာမဟုတ်ဘူး ။ မင်းတို့ကသာ ငါ့ရဲ့ ချုပ်နှောင်နယ်မြေမှာ ဂိုဏ်းလာဆောက်ထားကြတာ "

သူ ပြောနေရင်း ခပ်လှမ်းလှမ်းကောင်းကင်ယံသို့ အေးစက်စက်မော့ကြည့်ကာ စကားဆက်၏။

" နှစ်အတိအကျ မမှတ်မိတော့ပေမယ့်.. ဟိုးအရင်က ငါ့ရဲ့ ဝမ်ဟွန်းကွေ့ယီဂိုဏ်းအတွက် ဖုန့်လင်းဒေသကလူတွေနဲ့ ယဇ်ပူဇော်ဖို့ ငါ မြောက်ပိုင်းဒေသကို လာခဲ့တယ် ။ ဒါပေမယ့် မမျှော်လင့်ပဲ မြောက်ပိုင်းနတ်ဘုရားမြို့တော်က ဟို မသေမျိုးဖြစ်လာတဲ့ ကောင်နဲ့ ဆုံခဲ့ရတာပဲ "

" အဲ့ကောင်က ငါ့ကိုသတ်ချင်ခဲ့ပေမယ့် ငါတို့ ဝမ်ဟွန်းကွေ့ယီဂိုဏ်းရဲ့ ကျင့်ကြံခြင်းက ထူးခြားလွန်းတယ်လေ ။ ကမ္ဘာပေါ်က မသေမျိုးတစ်ယောက်ဖြစ်တဲ့ သူတောင် ငါ့ကို မသေမသတ်နိုင်ခဲ့ဘူး ။ အဲ့တော့ သူက တခြားရွေးစရာမရှိပဲ ငါ့ကို ဒီမှာပဲ ချုပ်နှောင်ထားပြီး အချိန်ကြာလာတာနဲ့အမျှ အားနည်းသွားအောင် လုပ်ခဲ့တာပဲ "

" ဒါပေမယ့် ဒီကောင်က ငါ့ရဲ့ စိတ်ဝိဥာဥ်အစွမ်းကို လျှော့တွက်ထားခဲ့တယ်ကွ ။ ငါ အချုပ်အနှောင်ကနေ လုံးဝကြီး မလွတ်နိုင်ပေမယ့် တစ်ခါတလေ ငါ့ရဲ့စိတ်ဝိဥာဥ်အစွမ်း နည်းနည်းနဲ့ အသိစိတ်ကို ထုတ်လွှတ်နိုင်တယ် "

" အဲ့နောက်ပိုင်းတော့ .. မိန်းကလေးတစ်ယောက်က ငါ ချုပ်နှောင်ခံထားရတဲ့နေရာကို မတော်တဆ ရောက်လာခဲ့တယ် ။ အဲ့အချိန်မှာ ငါ့ရဲ့ စိတ်ဝိဥာဥ်အစွမ်းက နည်းနည်းအားနည်းနေတာဆိုတော့ ငါ သူ့ကို လှည့်စားပြီး အချုပ်အနှောင်ကို ဖျက်ဆီးအောင် ကူညီခိုင်းခဲ့တာပေါ့ကွာ ။ အဲ့အတွက်လဲ ငါ့ရဲ့မှော်အစွမ်းတွေကို သူ့ကို သင်ပေးခဲ့တယ် "

" ဒါပေမယ့် အဲ့ကောင်မလေးက ဉာဏ်ထက်တော့ ငါ့လှည့်ကွက်ထဲကို ရောက်မသွားခဲ့ဘူး ။ အဲ့တော့ ငါ့အနေနဲ့လဲ ဘာမှရွေးချယ်စရာ မရှိတော့ပဲ သူ့ကို ငါ့ရဲ့ သိုင်းပညာနဲ့ ကျင့်စဥ်တချို့ သင်ပေးပြီး စိတ်ရှည်ရှည်ပဲ စောင့်နေခဲ့ရတာ ။ အဲ့ကလေးမက မင်းတို့ ချီရွှယ်နန်းတော်ရဲ့ ပထမမျိုးဆက် ဘိုးဘေးပေါ့ "

သူ့စကားကြောင့် ချီရွှယ်နန်းတော်မှ လူများအားလုံး

အံ့သြမှင်သက်သွားကြတော့၏။

ယခုမှသာလည်း သူတို့ ဘိုးဘေး၏ သိုင်းပညာကျင့်စဥ်များက ဘယ်နေရာမှ ရလာသည်ကို အားလုံးသိလိုက်ရခြင်းပင် ...

အကြီးအကဲက သွေးနီစိတ်ဝိဥာဥ်သခင်ကြီးအား လက်ညိုးထိုးကာ တုန်တုန်ယင်ယင် ဆိုသည်။

" ဒါဆို.... ရှင် ဆိုလိုတာက.... "

သွေးနီစိတ်ဝိဥာဥ်သခင်ကြီးက နှုတ်ခမ်းတွန့်ရုံ ပြုံး၏။

" အမှန်ပဲ .... တနည်းပြောရရင်တော့ ငါကမှ မင်းတို့ရဲ့ ဘိုးဘေးအစစ် ၊ မင်းတို့က ငါ့ရဲ့ တပည့်တွေပဲ "

ချီရွှယ်နန်းတော်မှ လူများအားလုံး မျက်နှာဆိုးရွားစွာ ပျက်ကုန်ကြတော့သည်။

ထိုစဥ်မှာပင် သွေးနီစိတ်ဝိဥာဥ်သခင်ကြီးက စကားဆက်သည်။

" အဲ့ကလေးမက တကယ်လဲ ပါးနပ်တယ်ကွ ။ သူက ငါ့ဆီကနေ သိုင်းပညာပေါင်းစုံနဲ့ အစွမ်းပေါင်းစုံကို ရ

ဖို့ကြိုးစားခဲ့ပေမယ့် ငါ့ကို လွတ်မြောက်အောင် လုပ်ပေးဖို့ ငြင်းခဲ့တယ် ။ ငါ ချုပ်နှောင်ခံထားရတဲ့ သတင်းကိုတောင် အပြင်ကို မပြန့်စေချင်ခဲ့ဘူး "

" ဒါတင် ဘယ်ကဦးမလဲ ၊ ငါ ချုပ်နှောင်ခံထားရတဲ့ နေရာကိုပါ တားမြစ်နယ်မြေအဖြစ် သတ်မှတ်ပြီး ဘယ်သူမှ အနားမကပ်ကြအောင် လုပ်ခဲ့သေးတယ် ။ ခေတ်အဆက်ဆက်မှာလဲ လူတွေအများကြီးနဲ့ စောင့်ကြပ်ထားခိုင်းသေးတယ်ကွာ "

ထိုသို့ပြောနေစဥ်တွင် သွေးနီစိတ်ဝိဥာဥ်သခင်ကြီး ၊ ရွှယ်လင်းကျို့၏ မျက်နှာက သိသိသာသာပင် ပျက်သွားသည်။

သူ့ရင်ထဲ၌ ချီရွှယ်နန်းတော်၏ ဘိုးဘေးအား အလွန်မုန်းတီးနေသည်မှာ အသိအသာပင် ...

ထို့နောက် သူ စကားဆက်၏။

" ဒါပေမယ့် .. အခု မင်းတို့မျိုးဆက် ဂိုဏ်းချုပ်ကြီးအလှည့်မှာတော့ .. သူ့ရဲ့ ကျင့်ကြံခြင်းက အင်မတန်အားနည်းသလို လုံလောက်တဲ့ အာရုံစိုက်နိုင်စွမ်းလဲ မရှိဘူး ။ အဲ့တော့ အစွမ်းလွှဲပြောင်းနေတဲ့အချိန်မှာ ငါ

သူ့ကို လှည့်စားပြီး စိတ်ဝိဥာဥ်အစွမ်းတွေ အများကြီးကို အချုပ်အနှောင်ကတဆင့် သူ့ဆီ ကပ်ပေးခဲ့တယ် "

" သူ ထွက်သွားတဲ့နောက်မှာတော့ ငါ့ရဲ့ တာအိုစိတ်ဝိဥာဥ်အစွမ်းလဲ တစ်ခါတည်း ပါသွားတာပေါ့ကွာ ။ အဲ့နောက်တော့ ဆယ်နှစ်ဆိုတဲ့အချိန်က ခဏလေးနဲ့ ကုန်သွားပြီးတော့... ငါ့ရဲ့ တာအိုစိတ်ဝိဥာဥ်အစွမ်း ဆယ်ခုကျော်လောက် ကုန်သွားပြီးတဲ့အချိန်မှာ ငါ ချုပ်နှောင်ခံထားရတဲ့ လျှို့ဝှက်ချက်က ဝမ်ဟွန်းကွေ့ယီဂိုဏ်းကို ရောက်သွားခဲ့တယ် "

ထိုစဥ် ဘေးမှ အမျိုးသမီးက ဝင်ပြောသည်။

" ကျွန်မတို့လဲ သတင်းရရချင်းမှာပဲ ချီရွှယ်နန်းတော်ကို လာခဲ့ကြတာ ။ ကျန်တာတော့ ဘာဆက်ဖြစ်လဲ အားလုံးသိမှာပါ "

ချီရွှယ်နန်းတော်မှ လူများမှာကား ထိုတခဏ၌ ဘာစကားမှ မဆိုနိုင်ကြတော့ချေ။

ထိုစဥ်မှာပင် ....

ဝီ .....

ချီရွှယ်နန်းတော် အပေါ်ဘက် ပတ်ပတ်လည်၌ မရေမတွက်နိုင်သော ထွင်းစာများ ပေါ်လာ၏။

" ဟင်... ဒါ ဘာတွေလဲ "

တစ်ယောက်က တအံ့တသြ ရေရွတ်သည်။

သွေးနီစိတ်ဝိဥာဥ်သခင်ကြီးက လှောင်ပြုံးဖြင့် ပြန်ပြော၏။

" အဲ့ဒါ ငါ့ရဲ့ ယဇ်ပူဇော်ခြင်းထွင်းစာတွေလေ ။ ငါ ဘာလို့ အချိန်အဲ့လောက်အကုန်ခံပြီး မင်းတို့တွေနဲ့ စကားပြောနေတယ် ထင်လို့လဲ ။ တကယ်တော့ ငါက အဲ့ထွင်းစာတွေ ပြီးသွားအောင် စောင့်နေတာကွ "

" ဘယ်လို "

ချီရွှယ်နန်းတော်မှ လူများအားလုံး တုန်လှုပ်ကုန်ကြသည်။

သွေးနီစိတ်ဝိဥာဥ်သခင်ကြီးက အသက်ပြင်းပြင်းရှိုက်ကာ ဆက်ပြော၏။

" ငါ အချိန်အကြာကြီး ချုပ်နှောင်ခံထားရပြီးတော့

မင်းတို့တွေ အားနည်းလွန်းနေတာတော့ စိတ်မကောင်းစရာပဲကွာ ။ တကယ်လို့ မင်းတို့အားလုံးကို သတ်လိုက်ရင်တောင် ငါ့ရဲ့အစွမ်းက အရင်လို ထိပ်ဆုံးအခြေအနေကို ပြန်မရောက်နိုင်ဘူး ။ ဒါပေမယ့် အရေးမကြီးပါဘူးလေ .... ငါ အရင်ကြုံခဲ့ရတဲ့ အရှက်ကွဲမှုအတွက် ပြန်ပြီး လက်တုန့်ပြန်နိုင်မှာပါ "

" ဒီတစ်ခေါက်တော့ မင်းတို့တင်မကဘူး ၊ မြောက်ပိုင်းဒေသ တစ်ခုလုံးကို ယဇ်ပူဇော်ပြီးတော့ မင်းတို့အားလုံးရဲ့ စိတ်ဝိဥာဥ်တွေကို ငါ့ရဲ့အစာ လုပ်ပစ်မယ် "

သူ ထိုသို့ပြောကာ လက်အသာမြှောက်လိုက်သည်။

ဝုန်း...

မရေမတွက်နိုင်သော သွေးနှင့်စွမ်းအင်များ ကောင်းကင်ယံသို့ တမဟုတ်ချင်း ထိုးတက်သွား၏။

အားလုံးရင်ထဲတွင်လည်း ကြောက်မက်ဖွယ် ဖိနှိပ်အားတစ်ခုကို ခံစားလိုက်ကြရသည်။

" မျိုးမစစ်ကောင် ၊ ငါတို့ ချီရွှယ်နန်းတော်က မင်းရဲ့ ဆက်ခံသူတွေ မဟုတ်ဘူး "

ချီရွှယ်နန်းတော်မှ အကြီးအကဲတစ်ယောက်က ဒေါသတကြီးဖြင့် ဓားဆွဲထုတ်၍ ထိုလူအား ခုတ်လိုက်၏။

သို့သော်...

ဓားရှည်က သွေးနီစိတ်ဝိဥာဥ်သခင်ကြီး၏ ခန္ဓာကိုယ်ထဲ ထိုးဖောက်ဝင်သွားသည့်တိုင် သူ့အား မည်သို့မှ ထိခိုက်အောင် မလုပ်လိုက်နိုင်ပေ ။

သွေးနီစိတ်ဝိဥာဥ်သခင်ကြီးက ၎င်းကိုကြည့်ကာ လှောင်ပြုံးဖြင့် ဆိုသည်။

" အရူး ၊ ငါက ငါ့ရဲ့ခန္ဓာကိုယ်ကို စွန့်လွှတ်ပြီး သွေးစိတ်ဝိဥာဥ် ခန္ဓာကိုယ်ကိုပဲ ကျင့်ကြံနေတာ ကြာလှပြီကွ ။ မင်းရဲ့ အစွမ်းလောက်နဲ့ ငါ့ကို ထိလို့တောင်ရမှာမဟုတ်ဘူး "

ချီရွှယ်နန်းတော်မှ လူများမှာ ထိုမြင်ကွင်းကိုကြည့်ရင်း ကူကယ်ရာမဲ့ ဖြစ်ကုန်ကြ၏။

သူတို့ရှေ့မှ ဘီလူးကြီးက သူတို့နားလည်နိုင်စွမ်းထက်ပင် ကျော်လွန်နေလေပြီ ။

သို့သော် .. ထိုစဥ်မှာပင်..

" ဗိုက်ဝသွားပြီ "

ခန်းမအတွင်းပိုင်းဘက်မှ အသံတစ်သံ ထွက်လာသည်။

“အေ့ အေ့ အေ့”

လေတက်သံများစွာတို့ ထွက်ပေါ်လာကြ၏။