ပြာကျသွားခြင်း

အရှေ့ဘက် အရိုင်းနယ်မြေနှင့် အပြာရောင်အဖွဲ့ကြား ကြီးမားသော တိုက်ပွဲက နောက်တစ်ဖန် ပေါ်ထွက်လာသည်။

နှစ်ဦးနှစ်ဖက်က တိုက်ခိုက်ပြီးမကြာခင် အရှေ့ဘက်အရိုင်းနယ်မြေက အပြတ်အသတ်ဖိနှိမ်ခံလာရသည်။

အန္တိမဧကရာဇ်များ၏ တိုက်ပွဲနယ်မြေမှာ သားရဲဧကရာဇ် နတ်ဆင်နှင့် သားရဲဧကရာဇ် အမြီးကိုးချောင်း စုဖွဲ့ထားသည့် လောကအကြီးများက ဖိအားဒဏ်ကို ခံနိုင်ရည်မရှိဘဲ ယိမ်းထိုးလာခဲ့ပြီဖြစ်သည်။

သာမန်ဧကရာဇ်များ၏ တိုက်ပွဲနယ်မြေမှာ သားရဲဧကရာဇ် ပိုင်ကျဲ၊ သားရဲဧကရာဇ် ကောင်းကင်ထိုးသွင်းနှင့် သားရဲဧကရာဇ် ဆန်းကြယ်မြွေတို့က ပို၍ပင် ကြီးမားသော ဖိအားနှင့် ရင်ဆိုင်နေရသည်။

သားရဲဧကရာဇ်တိုင်းသည် အပြာရောင်အဖွဲ့မှ သားရဲဧကရာဇ်လေးဦး၏ ပူးပေါင်းတိုက်ခိုက်ခြင်းကို ရင်ဆိုင်နေရပြီး တစ်လှမ်းပြီးတစ်လှမ်း နောက်သို့ဆုတ်ခွာပေးနေရသည်။ သူတို့သည် အချိန်မရွေး ဒဏ်ရာအပြင်းအထန် ရရှိသွားနိုင်သည်။

အရှေ့ဘက် အရိုင်းနယ်မြေမှ သားရဲဧကရာဇ်များသည် ဧကရာဇ်နယ်ပယ်တိုက်ပွဲမြေကနေ ရှုံးနိမ့်စွာ ဆုတ်ခွာသွားသည်နှင့် အခြားသော သားရဲဘုရင်များနှင့် သားရဲစစ်ဗိုလ်များကလည်း ကျရှုံးသွားပေလိမ့်မည်။ သူတို့သည် အပြာရောင်အဖွဲ့၏ သားရဲပေါင်း ဘီလီယံချီပါဝင်သည့် စစ်တပ်ကို လုံးဝခုခံနိုင်မည် မဟုတ်ပေ။

သို့သော်လည်း သိုင်းတာအိုပင်မခန္ဓာ တိုက်ခိုက်ပြီးနောက် ဧကရာဇ်နယ်ပယ်တိုက်ပွဲမြေမှာ တစ်စုံတစ်ရာ ပြောင်းလဲလာခဲ့သည်။

တကယ်ဆို ဤအပြောင်းအလဲသည် စစချင်း နဝယင်နှင့် အခြားသော အန္တိမသားရဲဧကရာဇ်များ၏ စိတ်အာရုံကိုပင် မဆွဲဆောင်နိုင်ခဲ့ပေ။

သို့သော်လည်း သိပ်မကြာခင် အခြေအနေက သူတို့၏ ထိန်းချုပ်မှုအတွင်းမှာ မရှိတော့သည်ကို နားလည်သဘောပေါက်လာကြသည်။

ဝုန်း…

ကျယ်လောင်သော ပေါက်ကွဲသံသည် သိုင်းတာအိုပင်မခန္ဓာ၏ ခန္ဓာကိုယ်ထဲကနေ ထွက်ပေါ်လာပြီး မီးတောက်များနှင့်အတူ နီရဲနေသော ရောင်လျှံစက်ဝန်းတစ်ခုက ပစ်လွင့်ထွက်ပေါ်ကာ ကောင်းကင်ထက်သို့ တလိပ်လိပ်ထိုးတက်လာ၏။

အစစ်အမှန်ခန္ဓာကို ဗဟိုပြုပြီး မီးတောက်များက အဘက်ဘက်ကို ဖြန့်ကြက်ကာ သားရဲဧကရာဇ် သွေးမျှော့၊ သားရဲဧကရာဇ် အစိမ်းရောင်ငှက်၊ သားရဲဧကရာဇ် ကောင်းကင်ဘုံကင်းမြီးကောက်နှင့် သားရဲဧကရာဇ် ဆီးနှင်းပုစဉ်းရင်ကွဲတို့ကို ချက်ချင်းပင် လွှမ်းခြုံသွားလေသည်။

ပိုင်နက်နယ်မြေ၏ စွမ်းအားက ကောင်းကင်လိုဏ်ဂူများနှင့် လောကများနှင့် ကွာခြားသည်။

သားရဲဧကရာဇ်လေးဦးသည် အဲဒါကို အရင် ဘယ်တုန်းကမှ မတွေ့မြင်ဖူးခဲ့ပေ။ သို့သော်လည်း သူတို့လေးယောက် ပူးပေါင်းထားမည်ဆိုလျှင် သူတို့အနေဖြင့် သိုင်းတာအိုပင်မခန္ဓာ၏ တန်ပြန်တိုက်ခိုက်မှုကို ရှောင်လွှဲစရာ မလိုပေ။ သူတို့သည် သူတို့၏ လောကများကို မြှောက်တင်ပြီး ရှေ့သို့ဆက်ဖိလာခဲ့ကြသည်။

သားရဲဧကရာဇ်လေးဦးသည် သိုင်းတာအိုငရဲခန်းထဲသို့ ကျဆင်းလာသောအခါ တစ်စုံတစ်ရာ လွဲမှားနေသည်ကို သူတို့နားလည်သဘောပေါက်လိုက်ကြသည်။

သိုင်းတာအိုငရဲခန်းထဲမှာ အန္တိမမီးတောက်ခြောက်ခုက မီးနဂါးခြောက်ကောင်အဖြစ် အသွင်ပြောင်းလဲသွားပြီး ပိုင်နက်နယ်မြေထဲမှာ အဆက်မပြတ်လှည့်ပတ်ကခုန်ရင်း အရာရာတိုင်းကို လောင်ကျွမ်းပြာချပစ်နိုင်ပုံရသော ကြောက်စရာကောင်းသည့် အပူလှိုင်းတစ်ခုကို ဖြာထုတ်ပေးနေ၏။

သားရဲဧကရာဇ်လေးဦး၏ လောကများက သိုင်းတာအိုငရဲခန်းထဲသို့ ကျဆင်းလာသည့်ခဏမှာပင် သူတို့က လဲပြိုကျတော့မည့် လက္ခဏာများ ပြသလာသည်။

သွေးမျှော့ သားရဲဧကရာဇ်၏ လောကက ညစ်ညမ်း၍ ဆိုးယုတ်သော သွေးမြူခိုးများစွာဖြင့် ပြည့်နှက်နေလေသည်။ ၎င်းသည် သက်ရှိများအားလုံးကို ဝါးမျိုပြီး သူတို့ကို အားဖြည့်စရာအဖြစ် ပြောင်းလဲပစ်နိုင်သည်။

သို့သော်လည်း သိုင်းတာအိုငရဲခန်း၏ လောင်ကျွမ်းမှုအောက်မှာ အထဲမှာရှိသော သွေးမြူခိုးများက လျင်မြန်စွာ အငွေ့ပျံလာခဲ့သည်။

သားရဲဧကရာဇ် သွေးမျှော့၏ အစစ်အမှန်သွင်ပြင်ကပင် သူ့၏ အရေပြားနှင့် အသားတို့ စုတ်ပြဲသည်အထိ လောင်ကျွမ်းခံရပြီး သူက စူးစူးဝါးဝါး အော်ဟစ်နေရသည်။

သားရဲဧကရာဇ် ဆီးနှင်းပုစဉ်းရင်ကွဲ၏ လောကက ဆီးနှင်းများဖြင့် ပြည့်နှက်နေပြီး သိုင်းတာအိုငရဲခန်းကနေ ထုတ်ဖော်ထားသည့် စွမ်းအားနှင့် လုံးဝကွဲလွဲဆန့်ကျင်နေသည်။

ဆီးနှင်းလောကသည် ထူးဆန်းသော ပုစဉ်းရင်ကွဲအော်မြည်သံများကို ဆက်တိုက်ထုတ်ဖော်ကာ ထိုအသံသည် သက်ရှိများ၏ ခံစစ်ကို လျစ်လျူရှုပြီး သူတို့၏ နားစည်ကို ထိုးဖောက်ကာ သူတို့၏ အသိစိတ်များထဲသို့ပင် ဝင်ရောက်နိုင်သည်။

အမှားတစ်ချက်သည် အမြုတေစိတ်ဝိညာဉ်အပေါ် ပြန်လည်ကုသမရနိုင်သည့် ပျက်စီးထိခိုက်မှု ဖြစ်စေနိုင်သည်။

ပုစဉ်းရင်ကွဲအသံက အဆက်မပြတ်ထွက်ပေါ်နေပြီး စူးရှလွန်းနေ၏။

သိုင်းတာအိုပင်မခန္ဓာက အမူအယာကင်းမဲ့နေသည်။ ရုတ်တရက် သူက ပါးစပ်ကို ဖွင့်ဟပြီး ကမ္ဘာတုန်လောက်သော ဟိန်းဟောက်သံကို ထုတ်ဖော်လိုက်သည်။

ချက်ချင်းဆိုသလို…

လောကမှာရှိသော သက်ရှိများအားလုံးက တစ်ချိန်တည်းမှာ ဟိန်းဟောက်အော်ဟစ်လိုက်သည့်အလားပင်။

အသင်္ချေသက်ရှိများအသံ…

သိုင်းတာအိုပင်မခန္ဓာ၏ အသံပိုင်းလျှို့ဝှက်အတတ်ကို ထုတ်ဖော်လိုက်ပြီးနောက် လောကတစ်ခုလုံးက ငြိမ်သက်သွားပုံရသည်။

ပုစဉ်းရင်ကွဲအော်သံများ၊ တိုက်ပွဲနယ်မြေမှ စူးစူးဝါးဝါးအော်ဟစ်သံများနှင့် လက်နက်ချင်း ထိခတ်သံများ…။

အသံများအားလုံးက ချက်ချင်းပင် ပျောက်ကွယ်သွားသည်။

သားရဲဧကရာဇ် ဆီးနှင်းပုစဉ်းရင်ကွဲ၏ အကြည့်က ထုံထိုင်းသွားပြီး သူ၏ နောက်ဘက်ရှိ လောကမှာ အက်ကွဲကြောင်းများ ပေါ်ထွက်ကာ ဝုန်းခနဲမြည်သံနှင့်အတူ ပြိုကျသွားသည်။

တစ်ချိန်တည်းမှာပင် သားရဲဧကရာဇ် ဆီးနှင်းပုစဉ်းရင်ကွဲ၏ ခန္ဓာကိုယ်က အသင်္ချေသက်ရှိများ ဟိန်းသံကြောင့် ကြေမွပျက်စီးသွားလေသည်။ သိုင်းတာအို၏ ငရဲခန်း၏ မီးတောက်များဖြင့် လောင်ကျွမ်းခံရပြီးနောက် သူက ပြာအဖြစ်ပြောင်းလဲကာ သေဆုံးသွားသည်။

နောက်ထပ် သားရဲဧကရာဇ်တစ်ဦး သေဆုံးသွားသည်။

ပို၍ပင် ကြောက်စရာကောင်းသည့်အရာမှာ သားရဲဧကရာဇ် ဆီးနှင်းပုစဉ်းရင်ကွဲသည် အထီးကျန်သိုင်းသခင်ထံမှ ဟိန်းဟောက်သံတစ်သံဖြင့် သတ်ဖြတ်ခြင်းခံလိုက်ရသည့်ပုံပင်။

ဤမြင်ကွင်းက အရမ်းကို တုန်လှုပ်စရာကောင်းသည်။

သားရဲဧကရာဇ်တစ်ပါးက ထွက်ပြေးလွတ်မြောက်ဖို့ အခွင့်အရေးပင်မရဘဲ နေရာမှာတင် သေဆုံးသွားရသည်။

အပြာရောင်အဖွဲ့နှင့် အရှေ့ဘက်အရိုင်းနယ်မြေက အကြိမ်ပေါင်းများစွာ တိုက်ခိုက်ခဲ့သော်လည်း ဤကဲ့သို့သော အခြေအနေတစ်ရပ် ဘယ်တုန်းကမှ မဖြစ်ပွားခဲ့ဖူးပေ။

ပုစဉ်းရင်ကွဲမျိုးနွယ်၏ ကိုယ်ကာယနှင့် မျိုးဆက်သွေးက မသန်မာပေ။ ဆီးနှင်းပုစဉ်းရင်ကွဲမျိုးနွယ်သည် ပုစဉ်းရင်ကွဲမျိုးနွယ်၏ ဘုရင်များဟု ဆိုနိုင်သော်လည်း သူတို့သည်လည်း အသင်္ချေသက်ရှိများအသံ၏ ထိတွေ့ရိုက်ခတ်မှုကို ခံနိုင်ရည်မရှိပေ။

အသင်္ချေသက်ရှိများအသံ၏ သက်ရောက်မှုက ထိုမျှသာမကပေ။

သိုင်းတာအိုငရဲခန်း၏ အဝန်းအဝိုင်းအတွင်းမှာ သားရဲဧကရာဇ် သွေးမျှော့၊ သားရဲဧကရာဇ် အစိမ်းရောင်ငှက်နှင့် သားရဲဧကရာဇ် ကောင်းကင်ဘုံကင်းမြီးကောက်တို့ကလည်း အသင်္ချေသက်ရှိများအသံကြောင့် ဒဏ်ရာရရှိသွားကြသည်။ သူတို့၏ ခန္ဓာကိုယ်များက တဆတ်ဆတ်တုန်ယင်သွားပြီး သွေးများစွာကို ထွေးထုတ်လိုက်ရသည်။

သားရဲဧကရာဇ်သုံးပါး၏ ကိုယ်ကာယနှင့် မျိုးဆက်သွေးက ထူးခြားလေသည်။ သူတို့သည် အသင်္ချေသက်ရှိများအသံ၏ ရိုက်ခတ်မှုကို ခုခံခဲ့သော်လည်း သူတို့၏ နောက်ဘက်ရှိ လောကများမှာ အက်ကွဲကြောင်းများပေါ်ထွက်လာပြီး သူတို့က လဲပြိုကျတော့မည့်ဆဲဆဲဖြစ်သည်။ သူတို့က ယခုချိန်မှာ ဒဏ်ရာအပြင်းအထန်ရရှိထားသည့် သူတို့၏ လောကများကို ရုပ်သိမ်းမည်ဆိုလျှင် သူတို့သည် သိုင်းတာအိုငရဲခန်းထဲမှာ ချက်ချင်းပင် လောင်ကျွမ်းပြာကျသွားပေလိမ့်မည်။

ဘာမှမတတ်နိုင်ဘဲ သားရဲဧကရာဇ်သုံးပါးက သူတို့၏ ကြေမွနေသော လောကများကို ထိန်းထားရင်း ထိတ်လန့်တကြားဖြင့် လှည့်ထွက်ပြေးလိုက်ကြ၏။

သို့သော်လည်း ဤသည်ကား သိုင်းတာအိုပင်မခန္ဓာ၏ ပိုင်နက်နယ်မြေ ဖြစ်သည်။

မည်သူမဆို သူ၏ ပိုင်နက်နယ်မြေထဲသို့ ဝင်ရောက်လာပြီးနောက် ထွက်ခွာချင်တိုင်း ထွက်ခွာနိုင်တော့မည် မဟုတ်ပေ။

သားရဲဧကရာဇ်သုံးပါးသည် သူတို့၏ သွေးချီကို အတင်းအကျပ် လှည့်ပတ်ပြီး သူတို့၏ မျိုးဆက်သွေးနယ်မြေများကို ထုတ်ဖော်လာကြ၏။ သူတို့၏ ပျက်စီးထိခိုက်သွားသော လောကများ၏ အကူအညီနှင့်အတူ သူတို့က နောက်ဆုံးမှာ သိုင်းတာအိုငရဲခန်း၏ အစပ်သို့ ရောက်ရှိလာကြသည်။

ဝုန်း… ဝုန်း… ဝုန်း…

ဧကရာဇ်သုံးပါးက အပြင်ဘက်သို့ ခုန်ထွက်ချင်သော်လည်း သိုင်းတာအိုငရဲခန်း၏ အစပ်မှာ လျှို့ဝှက်ဆန်းကြယ်သော မှော်စာလုံးများဖြင့် ပြည့်နှက်နေသည့် အဟန့်အတားအလွှာတစ်ခု ပေါ်ထွက်လာပြီး သူတို့ကို ပိတ်ဆို့တားဆီးလိုက်၏။

သူတို့၏ ဧရာမခန္ဓာကိုယ်များက သိုင်းတာအိုငရဲခန်း၏ အဟန့်အတားအလွှာနှင့် ကျယ်လောင်စွာ ထိတွေ့ရိုက်ခတ်ပြီး သူတို့က မြေပြင်ပေါ်သို့ လဲကျသွားသည်။

အဟန့်အတားအလွှာက တုတ်တုတ်မျှမလှုပ်ဘဲ လုံးဝသက်ရောက်မခံရပေ။

ထို့မျှသာမက အဟန့်အတားအလွှာအပေါ်မှာ လျှို့ဝှက်ဆန်းကြယ်သော မှော်စာလုံးများက နှိုးဆွခံလိုက်ရပြီး သူတို့အပေါ်သို့ မီးတောက်များကို ပစ်ထုတ်လိုက်၏။

သားရဲဧကရာဇ်သုံးပါးက သူတို့၏ မျက်လုံးထဲရှိ စိတ်ပျက်အားငယ်မှုနှင့် ဖြူဖပ်ဖြူရော် မျက်နှာများနှင့်အတူ သူတို့၏ မျက်လုံးများက ပြူးကျယ်သွားကြသည်။

မီးတောက်များက တိုက်ခိုက်လာပြီး သားရဲဧကရာဇ်သုံးပါးကို တစ်ခဏချင်းမှာပင် ဆွဲယူနှစ်မြုပ်ကာ တဖျောက်ဖျောက်မြည်သံများ ထွက်ပေါ်နေသည့် ဧရာမမီးတောက်လုံး သုံးလုံးအဖြစ် ပြောင်းလဲသွားစေသည်။

ဧကရာဇ်သုံးပါး၏ လောကများက ကြေမွသွားပြီဖြစ်ပြီး သိုင်းတာအိုငရဲခန်းထဲမှာ ပြန့်ကျဲနေ၏။

သိုင်းတာအိုပင်မခန္ဓာ၏ လက်ရှိခွန်အားအရ သူ့အနေဖြင့် ကောင်းကင်လိုဏ်ဂူ အပိုင်းအစများကို သန့်စင်မွမ်းမံဖို့က လွယ်ကူသည်။

သို့သော်လည်း ဤအပိုင်းအစများကို သန့်စင်မွမ်းမံဖို့အတွက် အချိန်အချို့ ယူရပေလိမ့်မည်။ သိုင်းတာအိုပင်မခန္ဓာက လောလောဆယ်မှာ လောကအပိုင်းအစများကို သူ့ခန္ဓာကိုယ်ထဲသို့ ဝါးမျိုပြီး အမြုတေသိုင်း ကောင်းကင်လိုဏ်ဂူထဲမှာ နေရာချကာ နောက်ထပ်တိုက်ပွဲမြေသို့ လှည့်ထွက်သွားလေသည်။

သူ့ကို ဝိုင်းပတ်ထားသော သားရဲဧကရာဇ်လေးဦးက ခြွင်းချက်မရှိ သေဆုံးသွားကြပြီဖြစ်သည်။

အပြာရောင်အဖွဲ့၏ အန္တိမသားရဲဧကရာဇ်များဖြစ်သော နဝယင်၊ စိတ်ဝိညာဉ်ဦးချို၊ ဖေးလန်နှင့် ဟို့တူတို့က အမူအယာများ ပျက်ယွင်းသွားကြသည်။ သို့သော်လည်း သူတို့လေးယောက်သည် အဲဒါကို စိတ်ထဲမှာ သိပ်ထည့်မထားဘဲ မျက်မှောင်ကြုတ်လိုက်ရုံသာဖြစ်သည်။ သူတို့၏ မျက်လုံးထဲမှာ သိုင်းတာအိုပင်မခန္ဓာသည် မည်သို့ပင်ဆိုစေ သာမန်သားရဲဧကရာဇ်တစ်ဦးသာ ဖြစ်လေသည်။

သိုင်းတာအိုငရဲခန်းက စွမ်းအားကြီးမားသော်လည်း ၎င်းသည် သူတို့၏ လောကအကြီးများထက် အားနည်းနေဆဲဖြစ်သည်။

သူတို့သည် သားရဲဧကရာဇ် နတ်ဆင်နှင့် သားရဲဧကရာဇ် အမြီးကိုးချောင်းတို့ကို ဖိနှိမ်နိုင်သည်နှင့် အခြေအနေက သူတို့၏ ထိန်းချုပ်မှုအတွင်းမှာ ရှိနေပေဦးမည်။

ဝေါ…

သိုင်းတာအိုပင်မခန္ဓာက ကောင်းကင်ကို ထယ်ထိုးပြီး မိုးကောင်းကင်ထက်မှာ ဧရာမ လျှိုမြောင်များကို ကျန်ရစ်ခဲ့စေ၏။ သူသည် ရပ်တန့်တားဆီးမရနိုင်သော အော်ရာနှင့်အတူ နောက်ထပ်တိုက်ပွဲမြေသို့ ဆင်းသက်ရောက်ရှိလာသည်။

အပြာရောင်အဖွဲ့မှ သားရဲဧကရာဇ် ရှစ်ယီ၊ သားရဲဧကရာဇ် မဟူရာပျား၊ သားရဲဧကရာဇ် မီးကြွက်နှင့် သားရဲဧကရာဇ် လေခွေးအတို့သည် အရှေ့ဘက်အရိုင်းနယ်မြေ၏ သားရဲဧကရာဇ်ပိုင်ကျဲကို ဝိုင်းပတ်ထားကြသည်။

သိုင်းတာအိုပင်မခန္ဓာက သားရဲဧကရာဇ် ဆီးနှင်းပုစဉ်းရင်ကွဲကို စောစောက သတ်ဖြတ်လိုက်ခြင်းကို သူတို့ကလည်း သတိထားမိခဲ့သည်။

သို့သော်လည်း သိုင်းတာအိုပင်မခန္ဓာသည် ဤမျှအထိ လျင်မြန်စွာနှင့် ဤကဲ့သို့ ကြမ်းကြုတ်ခက်ထန်သော အော်ရာတစ်ခုနှင့်အတူ ရောက်ရှိလာလိမ့်မည်ဟု သူတို့က ထင်မှတ်မထားခဲ့ပေ။

“အားလုံးပဲ… အဲဒါကို သေသေချာချာကိုင်တွယ်ကြ”

သားရဲဧကရာဇ် ရှစ်ယီက ဟိန်းဟောက်လိုက်ပြီး လျှို့ဝှက်အတတ်တစ်ခုကို လှည့်ပတ်လိုက်၏။ သူ၏ ခန္ဓာကိုယ်ကို ရွှေညိုရောင်အမွေးကြမ်းများက ဖုံးအုပ်လာခဲ့လေသည်။ အဲဒါက မနှိုင်းယှဉ်သာအောင် မာကြောပြီး ဖျက်ဆီး၍ မရနိုင်ပေ။

နောက်ခဏ၌ အဲဒါကို သိုင်းတာအိုငရဲခန်းက အုပ်မိုးကျဆင်းလာပြီး မီးတောက်များက တလိပ်လိပ်ထိုးတက်ကာ သားရဲဧကရာဇ်လေးပါးကို လွှမ်းခြုံသွားလေသည်။

“သတ်”

သားရဲဧကရာဇ် ရှစ်ယီက မာန်သွင်းအော်ဟစ်ပြီး သိုင်းတာအိုပင်မခန္ဓာ ရှိရာသို့ ပစ်တိုက်ချလိုက်၏။

သူက ကျောက်တုံးမျိုးနွယ်မှ ဖြစ်လေသည်။

ကျောက်တုံးမျိုးနွယ်၏ ကိုယ်ကာယသည် မျိုးနွယ်စုတစ်သောင်း၏ ထိပ်တန်းအဆင့်မှာ ရပ်တည်နိုင်လေသည်။

မည်သည့်မျိုးနွယ်ကမှ ကျောက်တုံးမျိုးနွယ်ကို အနီးကပ်တိုက်ခိုက်ရည်မှာ မယှဉ်နိုင်ကြပေ။