အပိုင်း ၄၁၂

နိုင်ငံရေးသမားတွေဟာ လေယူရာ ယိမ်းကြပြီး အမြဲတမ်း အတော်ဆုံးပင်။ စိတ်ဝိညာဥ် စားစရာရဲ့ အာနိသင်တွေ ထွက်ပေါ်လာတာနဲ့တစ်ပြိုင်နက် ဂလက်ဆီအသီးသီးက ခေါင်းဆောင်တွေဟာ အဖွဲ့ချုပ် ကို လျှို့ဝှက်စွာ ချော့မော့ပြောဆိုကြတော့သည်။

ဘာကြောင့်လဲဆိုတော့ သူတို့နဲ့ ကောင်းမွန်တဲ့ ဆက်ဆံရေး တည်ဆောက်ထားမှသာ စိတ်ဝိညာဥ် စားစရာကို ရရှိနိုင်မှာ မလို့ပင်။

ဆန့်ကျင်ဘက်အားဖြင့် ဘေးမှာ တိတ်ဆိတ်စွာ ထိုင်နေတဲ့ ချီရှောင်ပိုင်ကတော့ အနည်းငယ် စိတ်မသက်မသာ ဖြစ်နေခဲ့သည်။

အရင်တုန်းက ချော့မော့ခံရတဲ့သူတွေထဲမှာ ဉာဏ်ပညာတိမ်တိုက် ဂလက်စီက လူတွေက အများစုပင်။ ဒါပေမဲ့ ဒီနှစ်မှာ စိတ်ဝိညာဥ် စားစရာရုတ်တရက် ပေါ်လာတာက အခြေအနေတစ်ခုလုံးကို ချက်ချင်း ဖြိုခွဲပစ်လိုက်လိမ့်မယ်လို့ သူ မမျှော်လင့်ခဲ့ပေ။

သူ မနာလို မဖြစ်ဘူးလို့ ပြောရမလား? အဲဒါတော့ လိမ်ရာရောက်လိမ့်မည်။

ဒါပေမဲ့ တကယ်လို့သာ ချီရှောင်ပိုင်က သူ့မျက်နှာအိုးမဲသုတ်ပြီး အဖွဲ့ချုပ်နဲ့ ပတ်သက်ဖို့ လိုလားမယ်ဆိုရင်တောင် သူက တကယ်ကို လုပ်နိုင်မှာ မဟုတ်ဘူး။ လုပ်နိုင်ရင်တောင် အဖွဲ့ချုပ်က အသိအမှတ်ပြုမှာ မဟုတ်ဘူး! ဒီလိုနဲ့ သူကတော့ မျက်နှာမဲမှောင်မှောင်နဲ့ ဘေးမှာပဲ ထိုင်နေရပြီး တစ်ကိုယ်တည်း အထီးကျန်သလို ခံစားနေခဲ့ရသည်။

ဘေးကနေ ကြည့်နေတဲ့ အကြီးအကဲနျဥ်ကတော့ မျက်ခုံးပင့်လိုက်မိသည်။ 'ဟဲဟဲ! သောက်ကျိုးနည်း၊ ဘယ်သူက မင်းတို့ကို ငါတို့ အဖွဲ့ချုပ်ကို အထင်သေးခိုင်းလို့လဲ? အခုတော့ ပြီးပြီ၊ မင်းတို့ ကိုယ့်ဘာသာ ဒုက္ခခံရလိမ့်မယ်!'

ခေါင်းကို အနည်းငယ် ခါယမ်းလိုက်ရင်း အကြီးအကဲနျဥ်က သက်ပြင်းချလိုက်သည်။ အရင်ကဆိုရင် ဒီလို ကောင်မလေးတစ်ယောက်က ဒီလောက်ကြီးမားတဲ့ မုန်တိုင်းတစ်ခုကို ဖန်တီးနိုင်လိမ့်မယ်လို့ သူ မထင်ခဲ့ချေ။ အခုတော့ ကြည့်ရတာ နျဥ်ယွိယွမ်ကသာ အမြော်အမြင်ရှိခဲ့ပုံပဲ။

ဤသို့ တွေးလိုက်မိသဖြင့် အကြီးအကဲနျဥ်က သူ၏ အကြည့်ကို ဖန်သားပြင်ဆီသို့ လှည့်လိုက်သည်။

အချိန်တိုအတွင်းတွင် အဖွဲ့ချုပ်နှင့် မဟူရာ သမုဒ္ဒရာ ဂလက်စီတို့သည် တိကျသော အစီအစဉ်ကို ဆွေးနွေးပြီးသွားကြပြီ ဖြစ်သည်။ ယခုအခါတွင် တစ်ဦးပြီးတစ်ဦး ဉာဏ်ပညာတိမ်တိုက် ဂလက်စီကို ‘ထောင်ချောက်ထဲ ဆွဲသွင်း’ ရန် ပြင်ဆင်နေကြပြီ ဖြစ်သည်။

နျဥ်ယွိယွမ်၏ ယခင်ခန့်မှန်းချက်များမှာ လုံးဝမှန်ကန်ခဲ့သည်။ လန်ဟန်နှင့် အခြားသူများ၏ အတွေးများကို သူတို့ ခန့်မှန်းမိခဲ့သည်။ အဖွဲ့သုံးဖွဲ့ကို ဖယ်ရှားပြီးနောက် သူတို့၏ ယုံကြည်မှုမှာ မြင့်တက်လာခဲ့သည်။ အောင်ပွဲကို ရရှိပြီးပြီဟု သိထားသော်လည်း ပို၍ကြီးမားသော ဂုဏ်ကျက်သရေကို မည်သို့ လက်လွှတ်ခံနိုင်မည်နည်း။ အဖွဲ့ချုပ်နှင့် မဟူရာ သမုဒ္ဒရာ ဂလက်စီကို တစ်ကြိမ်တည်းဖြင့် ချေမှုန်းနိုင်က သူတို့၏ အောင်မြင်မှုများသည် သမိုင်းစာမျက်နှာများတွင် အမည်ထင်ရှားစွာ ကျန်ရစ်နေမည်မှာ သေချာသည်။

ဒီအကြောင်းကို စဉ်းစားမိတော့ ဉာဏ်ပညာတိမ်တိုက် ဂလက်စီက လူတွေက ပိုပြီး စိတ်လှုပ်ရှားလာကြပြီး သူတို့မျက်နှာတွေမှာ စမ်းသပ်ကြည့်ဖို့ စိတ်အားထက်သန်မှုတွေ ပြည့်နှက်နေခဲ့သည်။

ဒီလိုနဲ့ ခဏတာ အနားယူပြီးနောက် သူတို့က ကျန်ရှိနေသေးတဲ့ တပ်ဖွဲ့နှစ်ခုရဲ့ ခြေရာခံရှာဖွေမှုကို စတင်ခဲ့သည်။

တစ်ဖက်က ရှာဖွေဖို့ စိတ်အားထက်သန်နေပြီး ကျန်တစ်ဖက်က သူတို့အိမ်တံခါးဝကို အရောက်ပို့ဖို့ အစပြုခဲ့တာဆိုတော့ ဘယ်လိုလုပ် မဆုံဘဲ ရှိတော့မလဲ? နာရီဝက် မကြာသေးခင်မှာ ဉာဏ်ပညာတိမ်တိုက် ဂလက်စီက အဖွဲ့ချုပ်နဲ့ တိုက်မိသွားခဲ့ပြီ!

“တိုက်ဆိုင်လိုက်တာ!” လန်ဟန်က ပထမဆုံး စကားပြောလိုက်သည်။ သူ့မျက်နှာအမူအရာက ပေါ့ပေါ့ပါးပါးဖြစ်ပေမဲ့ သူ့မျက်လုံးတွေက နျဥ်ယွိယွမ်နဲ့ တခြားသူတွေဆီမှာ စွဲမြဲနေခဲ့သည်။ “ဘာလဲ? ဘယ်သူနဲ့ တွေ့ခဲ့တာလဲ? ဘယ်လိုလုပ် ဒီလိုဖြစ်ကုန်တာလဲ?”

ဟုတ်တယ်!

သူတို့ မြင်သမျှ အဝေးထိတော့ မော့ချူးနဲ့ တခြားသူတွေက စုတ်ပြဲနွမ်းနယ်နေခဲ့ကြသည်။ တချို့ဆိုရင် ခန္ဓာကိုယ်မှာ ဒဏ်ရာတွေတောင် ရနေကြသည်။

အဝတ်အစားတွေမှာ သွေးစွန်းတာကို သဲ့သဲ့လေး မြင်ရပြီး အဝေးကနေလည်း သွေးနံ့ပြင်းပြင်းကို ရှင်းရှင်းလင်းလင်း ရနံ့ခံနိုင်သည်။

ဒါက မော့ချူးရဲ့ စိတ်ကူးပင်။ ဘာပဲဖြစ်ဖြစ် ခုန်လွှားသားရဲကောင်တွေ အများကြီး ရှိနေပြီး သန့်ရှင်းရေးလုပ်ပြီးတာတောင် သွေးတွေ အများကြီး ကျန်နေသေးတာပဲ။ အဲဒါတွေကို ဖြုန်းတီးတာထက်စာရင် ဒါက ပိုကောင်းသည်။ သူမက လူအနည်းငယ်ကို ရွေးချယ်ပြီး သူတို့ကိုယ်ပေါ် လိမ်းပေးလိုက်သည်။ ပြီးတော့ ရွှံ့တွေ နည်းနည်း လိမ်းပေးပြီး ဒဏ်ရာရထားသလိုမျိုး ပုံစံဖန်တီးလိုက်သည်။

နျဥ်ယွိယွမ်က ဘာမှ မပြောဘူး။ သူက ခေါင်းပဲလှည့်ပြီး မော့ချူးနဲ့ တခြားသူတွေကို ကြည့်လိုက်သည်။ သူတို့ အနည်းငယ်ကတော့ ဘာဖြေရာမှ မချန်ခဲ့ဘဲ ခြေလှမ်းအနည်းငယ် ဆုတ်သွားခဲ့ကြသည်။

ဤမြင်ကွင်းကို ဖုံးကွယ်ထားသော်လည်း အချိန်တိုင်း သူတို့ကို စိုက်ကြည့်နေသော လန်ဟန်က ရှင်းရှင်းလင်းလင်း မြင်လိုက်ရသည်။ သူ၏ မျက်လုံးများထဲရှိ အလင်းရောင်မှာ ပိုမိုပြင်းထန်လာပြီး “မင်းတို့ကို ထိခိုက်စေနိုင်တဲ့သူတွေက မဟူရာ သမုဒ္ဒရာ ဂလက်စီကလူတွေပဲ ဖြစ်ရမယ်၊ ဟုတ်တယ်မလား?”

လန်ဟန်က သူ့မျက်ခုံးတွေကို အနည်းငယ် ပင့်လိုက်သည်။ သူ့နှုတ်ခမ်းထောင့်စွန်းတွေ ကွေးညွှတ်သွားပြီး သူ့လေသံထဲက ပြင်းထန်မှုတွေက ရုတ်တရက် ပွင့်ထွက်လာခဲ့သည်။ “အဲတော့၊ မင်းတို့ မဟူရာ သမုဒ္ဒရာ ဂလက်စီကို ဖယ်ရှားလိုက်တာလား?”

“မင်း ဘာတွေ လျှောက်ပြောနေတာလဲ!” နျဥ်ယွိယွမ်ရဲ့ မျက်လုံးတွေ အနည်းငယ် မှောင်ကျသွားပြီး သူက ဒီကိစ္စကို ဝန်မခံဘဲ ငြင်းဆန်လိုက်သည်။

သို့သော် လန်ဟန်ရဲ့ မျက်လုံးထဲမှာတော့ နျဥ်ယိယွမ်ရဲ့ အပြုအမူက အဖြစ်မှန်ကို သူ ခန့်မှန်းမိသွားပြီလို့ ခံစားမိစေသည်။ လန်ဟန်က သူ့မျက်လုံးထဲမှာ ကျေနပ်မှု အရိပ်အယောင်လေး ပေါ်လာတာကို မထိန်းချုပ်နိုင်ခဲ့ဘူး။ 'တကယ်ပဲ၊ မိုးကောင်းကင်ကြီးကတောင် သူတို့ကို ကူညီနေတာပဲ။ အဖွဲ့ချုပ် နဲ့ မဟူရာ သမုဒ္ဒရာ ဂလက်စီက တိုက်ခိုက်နေကြတာ၊ ဒါက သူတို့အတွက် ကောင်းတဲ့ အခွင့်အရေး မဟုတ်လား?'

“သွား!” အသံတိုးတိုးနဲ့ ဟိန်းဟောက်ရင်း လန်ဟန်က သူ့လက်ကို ဝှေ့ယမ်းပြီး နျဥ်ယွိယွမ်နဲ့ ကျန်တဲ့သူတွေကို တိုက်ခိုက်ဖို့ ဦးဆောင်လိုက်တော့တယ်!

သူတို့အားလုံး စိတ်ကူးယဥ်နေကြတာ။ အဖွဲ့ချုပ် နဲ့ မဟူရာ သမုဒ္ဒရာ ဂလက်စီက တိုက်ပွဲကြီးတစ်ခု ဆင်နွှဲခဲ့ကြတာဆိုတော့ သူတို့ရဲ့ စွမ်းအင်နဲ့ ဒြပ် စွမ်းအင်အများစု ကုန်ဆုံးသွားပြီ ဖြစ်သည်။ ဒီလူအုပ်ကို ချေမှုန်းဖို့ သိပ်အားထုတ်စရာ မလိုလောက်ဘူးလို့ သူတို့ ထင်ခဲ့ကြသည်။

ရန်သူကို အထင်သေးတဲ့ ဒီစိတ်ဓာတ်ကြောင့်ပဲ သူတို့နှစ်ဖွဲ့ တိုက်ပွဲစတဲ့အချိန်မှာပဲ အင်အားကွာခြားချက် ချက်ချင်း ပေါ်လွင်သွားခဲ့သည်။

ဉာဏ်ပညာတိမ်တိုက် ဂလက်စီအဖွဲ့ဝင်တစ်ဦးက သူ့ရဲ့ ကြေးတံဆိပ် ချက်ချင်း ဆုံးရှုံးသွားပြီး တိုက်ပွဲမှ ပြတ်ပြတ်သားသား ဖယ်ရှားခံလိုက်ရတော့တယ်!

ဒီအခြေအနေကို မြင်တော့ လန်ဟန်နဲ့ တခြားသူတွေက နောက်ဆုံးမှာတော့ သူတို့ရဲ့ ပြိုင်ဘက်တွေကို အထင်သေးတာကို ရပ်တန့်ပြီး ဒီတိုက်ပွဲကို အလေးအနက်ထား စတင်ခဲ့ကြသည်။ ဒါပေမဲ့ တိုက်ပွဲ ရှည်ကြာလေ လန်ဟန်ရဲ့ မျက်ခုံးတွေက ပိုပြီး တွန့်ချိုးလာလေပဲ!

အစောပိုင်းတုန်းက အဖွဲ့ချုပ်က လူတွေဟာ ရုတ်တရက် အစွမ်းထက်တဲ့ တိုက်ခိုက်ရေးစွမ်းရည်တွေ ထွက်ပေါ်လာတာက အသက် သေရေးရှင်ရေး ပြဿာနာနဲ့ ရင်ဆိုင်ရလို့ပဲဟု သူ ထင်ခဲ့သည်။ ဒါပေမဲ့ အခုကြည့်ရတာ ဒါက မဟုတ်သေးပေ။ သူတို့ရဲ့ တိုက်ခိုက်ရေးစွမ်းရည်က လုံးဝ ဆုံးရှုံးသွားတာ မရှိရုံသာမက သူ အရင်က မျှော်မှန်းထားတာထက်တောင် ပိုပြီး အစွမ်းထက်နေခဲ့သေးတယ်!

လန်ဟန်မှာ အခုထိ ဇဝေဇဝါ ဖြစ်နေတုန်းပဲ! ရုတ်တရက် သူ့ကျောပေါ်မှာ ချမ်းစိမ့်စိမ့် ခံစားရပြီး သူ့ခန္ဓာကိုယ်ကို ဘေးဘက်သို့ ရုတ်တရက် လှည့်လိုက်သည်။

သူလှည့်လိုက်တာနဲ့ သူ့မျက်ဆံတွေ ရုတ်တရက် ကျယ်သွားခဲ့တယ်!

လေဓားလှိုင်းတစ်ချို့က သူ့နောက်ကျောမှာ ပေါ်လာခဲ့တာကိုး။ သူသာ လျင်မြန်စွာ မတုံ့ပြန်ခဲ့ရင် သူက ပြင်းထန်စွာ ဒဏ်ရာရပြီးသား ဖြစ်နေမှာ။ ဒါပေမဲ့ ဒါက သူ့ကို အထိတ်တလန့်ဆုံး ဖြစ်စေခဲ့တာ မဟုတ်ဘူး။ သူ့ကို အထိတ်တလန့်ဆုံး ဖြစ်စေခဲ့တာက သူ့ကို နောက်ကနေ တိုက်ခိုက်ခဲ့တဲ့သူက မဟူရာ သမုဒ္ဒရာ ဂလက်စီက ပြိုင်ပွဲဝင်တစ်ယောက် ဖြစ်နေတာကိုး!

တစ်ခဏအတွင်းမှာပဲ လန်ဟန် ချက်ချင်း တုံ့ပြန်မိလိုက်တယ် – သူ လှည့်စားခံလိုက်ရပြီ!

သူတို့က မဟာမိတ်ဖွဲ့ထားပြီး ဒီလို ထောင်ချောက်တစ်ခုကို တမင်တကာ ဖန်တီးထားတာကိုး! ဒါတောင် သူက ဂုဏ်ယူစွာနဲ့ ခုန်ဝင်သွားခဲ့တာ! သူ တကယ့်ကို ငတုံးပဲ!

ကံမကောင်းစွာနဲ့ပဲ လန်ဟန်အတွက် ဒီအချိန်မှာ နိုးကြားဖို့ နောက်ကျနေပြီ။

သူက နောက်ကနေ တိုက်ခိုက်တာကို အောင်မြင်စွာ ရှောင်တိမ်းနိုင်ခဲ့တာကလွဲလို့ ကျန်သူတွေကတော့ အနည်းနဲ့အများ ဒဏ်ရာရခဲ့ကြပြီ! နှစ်ဖက်စလုံးက လူအရေအတွက် ရုတ်တရက် ပြောင်းလဲသွားတာနဲ့ ပေါင်းလိုက်တဲ့အခါ ဉာဏ်ပညာတိမ်တိုက် ဂလက်စီရဲ့ ရှုံးနိမ့်မှုက ကံကြမ္မာအဖြစ် သတ်မှတ်ပြီးသား ဖြစ်နေပြီဆိုတာ ရှင်းနေခဲ့ပြီပင်!

လွန်ခဲ့တဲ့နာရီဝက်လောက်က သူတို့က အကြီးဆုံး အနိုင်ရရှိသူတွေ ဖြစ်နေသေးသည်။ အခုတော့ သူတို့က မဟူရာ သမုဒ္ဒရာ ဂလက်စီနဲ့ အဖွဲ့ချုပ်တို့ရဲ့ နင်းခြေမှုကို ခံခဲ့ရပြီ။ ဒီအကြောင်းကို စဉ်းစားမိတော့ လန်ဟန်ရဲ့ ရင်ထဲမှာ မကျေနပ်မှုတွေ ပြည့်နှက်နေခဲ့တော့တယ်!

နျဥ်ယွိယွမ်!

ဒီလိုမျိုး ပရိယာယ်ကိုတောင် ကြံစည်နိုင်တာကိုး!

လန်ဟန်ရဲ့ မျက်လုံးတွေက ဒေါသနဲ့ ပြည့်နှက်နေခဲ့သည်။ သူ မွေးဖွားလာခဲ့တဲ့အချိန်ကစပြီး ဒီလိုကြီးမားတဲ့ ဆုံးရှုံးမှုကို သူ တစ်ခါမှ မခံစားဖူးသေးဘူး! ဒါ့အပြင် ဒီလောက်လူအများကြီး ရှေ့ အရေးကြီးတဲ့ အခမ်းအနားမှာ ဒီလိုဖြစ်ရတာ! အရှက်ရတဲ့ ခံစားချက်ပြင်းပြင်းက သူ့ကို ချက်ချင်း လွှမ်းမိုးလာခဲ့သည်။

ဘန်း! ဘန်း!

အသံများမှာ တစ်ခုပြီးတစ်ခု ထွက်ပေါ်လာသည်။

လန်ဟန်က သူ့မျက်လုံးထောင့်စွန်းမှ ဘေးဘက်သို့ လှမ်းကြည့်လိုက်သည်။ သူတို့အဖွဲ့ဝင်များ၏ ကြေးတံဆိပ်များကို တစ်ခုပြီးတစ်ခု ဖြုတ်ယူသွားကြသည်။ အရင်က သူတို့လုယူခဲ့သည့် ကြေးတံဆိပ်များကိုပင် တစ်ခုပြီးတစ်ခု တခြားသူများလက်ထဲရောက်သွားတော့သည်။

သောက်ကျိုးနည်း!

လန်ဟန်ရဲ့ အကြည့်တွေက မှောင်ကျသွားခဲ့သည်။

သူ့ရဲ့ မကောင်းဆိုးဝါးအကြည့်တွေက နျဥ်ယွိယွမ်ကို ပြင်းပြင်းထန်ထန် စိုက်ကြည့်နေခဲ့သည်။ ဒါက ဒီကောင်ကြောင့်ပဲ။ သူ့ရဲ့ ကောက်ကျစ်စဉ်းလဲတဲ့ အကြံအစည်တွေသာ မရှိရင် သူတို့က ဒီလိုအခြေအနေမျိုးကို ရောက်လာစရာ အကြောင်းမရှိဘူး!

သူ့ခန္ဓာကိုယ်ထဲက ဒြပ် စွမ်းအားတွေကို စုစည်းပြီး သူ့လက်ဖဝါးထဲမှာ ထုတ်လုပ်ဖန်တီးလိုက်တဲ့အခါ မီးခိုးရောင် ညစ်ညစ် အမှောင်ဒြပ်စွမ်းအင်က မှင်လို ထူထပ်သွားခဲ့ပြီ။ လန်ဟန်က ထုတ်လွှတ်ဖို့ ပြင်ဆင်နေတုန်းမှာပဲ သူ့ဘေးက မော့ချူးကို ရုတ်တရက် မြင်လိုက်ရသည်။ သူ့နှလုံးသား တုန်လှုပ်သွားခဲ့သည်။

သူ့ကိုယ်ကို လှည့်လိုက်တာနဲ့ နျဥ်ယွိယွမ်ကို မူလက ပစ်မှတ်ထားခဲ့တဲ့ တိုက်ခိုက်မှုက မော့ချူးရဲ့ ခန္ဓာကိုယ်ပေါ်ကို ကျရောက်သွားခဲ့သည်။ အမှောင်ဒြပ်စွမ်းအင်က မဖယ်ရှားနိုင်တဲ့ အမှောင်မှုန်အဖြစ်နဲ့ မော့ချူးရဲ့ တစ်ကိုယ်လုံးကို ဝန်းရံထားခဲ့သည်။ သူမရဲ့ ပုံရိပ်ကိုတောင် မြင်ရဖို့ မဖြစ်နိုင်လောက်ဘူး!

လန်ဟန်ရဲ့ လှုပ်ရှားမှုက အလွန်မြန်ဆန်ခဲ့သည်။

ဘယ်သူမှ မတုံ့ပြန်နိုင်ခဲ့ကြဘူး။ မော့ချူး တိုက်ခိုက်ခံရပြီးမှပဲ သူတို့က မှိုင်တိုင်တိုင်နဲ့ သူတို့ရဲ့ လုပ်ဆောင်ချက်တွေကို ရပ်တန့်ခဲ့ကြသည်။

“ရှောင်ချူး…” မှောင်မိုက်တဲ့ဒြပ်စွမ်းအင်က အလုံးစုံ ဖုံးလွှမ်းနေတဲ့ မော့ချူးကို ကြည့်ပြီး နျဥ်ယွိယွမ်တစ်ယောက် မျက်လုံးတွေ ပြူးသွားကာ တိုးတိုးလေး ရေရွတ်လိုက်မိသည်။

သူခေါင်းလှည့်လိုက်တဲ့အခါ သူ့မျက်လုံးတွေ ချက်ချင်း မှောင်ကျသွားခဲ့သည်။ သူက လန်ဟန်ကို အပိုင်းပိုင်း ဆွဲဖြဲပစ်ချင်သလို စိုက်ကြည့်နေခဲ့သည်။ 'ဒီကောင်က သေဖို့ပဲထိုက်တယ်!'