အပိုင်း ၄၁၇

နှစ်တစ်ရာ တစ်ကြိမ် ဖြစ်ပွားတဲ့ စစ်ပွဲကြီး ပြီးဆုံးသွားချိန်မှာ လူတိုင်းက ဒီအကြောင်းကိုပဲ ပြောဆိုနေကြသည်။

အဖွဲ့ချုပ်ဟာ “အင်အားကြီး ဂလက်ဆီ” တွေရဲ့ နယ်နိမိတ်ထဲကို ခိုင်မာတဲ့ နေရာတစ်ခုနဲ့ ဝင်ရောက်လာခဲ့သည်။ နျဥ်ယွိယွမ်၊ မော့ချူး... ကြယ်ပွင့်တွေဟာ တစ်ပွင့်ပြီးတစ်ပွင့် ထွက်ပေါ်လာကြပြီး လူအများကို ချီးကျူးဂုဏ်ပြုစေကာ ကြယ်ကွန်ယက် ပေါ်မှာ လှိုင်းလုံးတွေ တစ်လှိုင်းပြီးတစ်လှိုင်း ထလာသည်။

သို့ပေမဲ့ နျဥ်ယွိယွမ်တို့အတွက်ကတော့ သေနတ်မပါတဲ့ စစ်ပွဲတစ်ခုက ခုမှ စတင်ခဲ့လေသည်။

“ကြယ်တာရာတိုက်ပွဲတွေရဲ့ ရလဒ်တွေ ဆုံးဖြတ်ပြီးစီးသွားပြီဆိုတော့…” အကြီးအကဲ ချင်ဟာ စားပွဲရဲ့ ထိပ်နေရာမှာ ထိုင်နေသည်။ သူ့ရဲ့ မြင်နေကြ မျက်နှာမှာ အပြုံးက ပျောက်ဆုံးနေပြီး စကားပြောတဲ့လေသံကလည်း နည်းနည်းလေး တည်ကြည်နေသည်။ “ဒါဆို နောက်ရာစုနှစ်အတွက် သယံဇာတခွဲဝေမှုကလည်း ဆုံးဖြတ်သင့်ပြီ မဟုတ်ဘူးလား။”

ဂလက်ဆီအချင်းချင်း တိုက်ပွဲတွေရဲ့ အလုံးစုံအဆင့်သတ်မှတ်ချက်ကို ဆုံးဖြတ်ပြီးပြီ ဖြစ်ပေမဲ့ သယံဇာတ ခွဲဝေမှုနဲ့ ပတ်သက်တဲ့ အသေးစိတ် အချက်အလက်တွေကတော့ နည်းနည်း ရှုပ်ထွေးနေသေးသည်။ အဘယ်ကြောင့်ဆိုသော် သေးငယ်သော ကိန်းဂဏန်းတစ်ခုဟာ ကြီးမားတဲ့ အမြတ်အစွန်းတွေကို ကိုယ်စားပြုနေတာ ဖြစ်ပြီး ဘယ်သူမှ အလကား မပေးချင်ကြတာကြောင့်ပင်။

“ဟုတ်တယ်။” ချီရှောင်ပိုင်ရဲ့ နေရာမှာ ဉာဏ်ပညာတိမ်တိုက် ဂလက်စီက ကိုယ်စားလှယ်တွေ အစားထိုးဝင်ရောက်လာပြီဖြစ်သည်။ အသစ်ရောက်လာသူက ဉာဏ်ပညာတိမ်တိုက် ဂလက်စီရဲ့ နိုင်ငံခြားရေးရာ အကြီးအကဲ လော်ဖန် ဖြစ်သည်။ သူက သူ၏ ပြုံးရွှင်တဲ့ မျက်နှာနှင့် နာမည်ကြီးသူတစ်ယောက်ပင်။ ရိုးသားဖြောင့်မတ်တဲ့သူလို ပုံစံပေါက်ပေမဲ့ သူ့ရဲ့ တွက်ချက်မှုတွေကတော့ ဘယ်သူ့ထက်မဆို ပိုပြီး တိကျသည်။

“နောက်ဆုံးတော့ နိဂုံးချုပ်ရမှာပေါ့။ ဒီနှစ်ရဲ့ ချန်ပီယံက အဖွဲ့ချုပ် ဖြစ်နေတာဆိုတော့ ခင်ဗျားတို့ပဲ အစီအစဉ်တစ်ခု အရင်ချကြည့်ပါလား။”

ရိုးရှင်းတဲ့ ဝါကျတစ်ကြောင်းနဲ့ သူဟာ ဒီစိတ်ရှုပ်စရာ ကိစ္စကို အဖွဲ့ချုပ်ဆီ ပစ်ချလိုက်သည်။

“ဒါဆို မနှစ်က အချိုးအစားအတိုင်းပဲ တွက်ချက်ရအောင်။ ဘာမှ မပြောင်းနဲ့တော့၊ အားလုံးလည်း ပိုပြီး စိတ်အေးရတာပေါ့။” အကြီးအကဲနျဥ်က မျက်လုံးတွေကို မော့ကြည့်ပြီး အသံတိုးတိုးနဲ့ ပြောလိုက်သည်။

ဒီစကားကို ကြားတဲ့အခါ လော်ဖန်ရဲ့ မျက်လုံးတွေဟာ အရောင်လက်သွားတာကို မထိန်းနိုင်အောင် ဖြစ်သွားသည်။

မနှစ်က ချန်ပီယံက ဉာဏ်ပညာတိမ်တိုက် ဂလက်စီဖြစ်ပြီး ဒီအချက်ကြောင့်ပဲ ပထမနေရာအတွက် ခွဲဝေမှု အချိုးအစားကို ၂၀% အပြည့်အထိ မြင့်မားစွာ သတ်မှတ်ထားခဲ့တာပင်။ ဒီကိန်းဂဏန်းကို အထင်သေးလို့မရ။ ဘာလို့လဲဆိုတော့ ဒီကျယ်ပြန့်လှတဲ့ ဂလက်ဆီမှာ ဂလက်ဆီ ၃၀ ကနေ ၄၀ အထိ ရှိနေတာကြောင့်ပင်။

ခုတော့ ငါတို့ကို အခွင့်ကောင်းယူချင်တယ်ပေါ့။ လော်ဖန်က မျက်ခုံးပင့်လိုက်သည်။ ဉာဏ်ပညာတိမ်တိုက် ဂလက်စီမှာ ပူးပေါင်းပါဝင်နေတဲ့ ဂလက်ဆီငယ်လေးရဲ့ ခေါင်းဆောင်က ချက်ချင်း နားလည်သွားပြီး မျက်မှောင်ကြုတ်ကာ ထရပ်လိုက်သည်။ “ဒါကတော့ သိပ်မကောင်းဘူး မဟုတ်လား။ အရင်တုန်းက ရာခိုင်နှုန်းကို ပြန်လည်သတ်မှတ်တာပဲ။ ဘယ်သူက မနှစ်က ပုံစံဟောင်းအတိုင်း လိုက်နာမှာလဲ။”

တစ်ယောက်က စပြောလိုက်တာနဲ့ ချက်ချင်း တခြားသူတွေက လိုက်ပြီး ထောက်ခံ ကန့်ကွက်ကြသည်။ အစည်းအဝေးခန်းတစ်ခုလုံးဟာ ချက်ချင်း ဈေးတန်းလို ဆူညံသွားသည်။

“အားလုံးက အရင်အချိုးအစားကို မကျေနပ်ကြဘူးဆိုတော့ ဒီအစီအစဉ်ကိုပဲ ကြည့်ကြည့်ရအောင်လား။” လူတိုင်း အငြင်းအခုံလုပ်ရင်း ပါးစပ်တွေ ခြောက်သွေ့နေချိန်မှာ နျဥ်ယွိယွမ်က ဖြည်းဖြည်းချင်း ထရပ်လိုက်ပြီး သူ့လက်ထဲက စာရွက်စာတမ်းတွေကို အားလုံးဆီ လှမ်းပေးရင်း လေးနက်တဲ့ အသံနဲ့ ပြောလိုက်သည်။

ဒါတွေကတော့ အဖွဲ့ချုပ်ရဲ့ ပြည်တွင်း အစည်းအဝေးမှာ တင်ပြခဲ့တဲ့ အစီအစဉ်နှစ်ခု ဖြစ်သည်။ လော်ဖန် ရှိနေတာကြောင့် ပထမအစီအစဉ်က သေချာပေါက် မအောင်မြင်နိုင်ဘူးဆိုတာ ထင်ရှားပြီး ဒုတိယအစီအစဉ်ကိုပဲ ထုတ်သုံးရတာ ဖြစ်သည်။

အားလုံး စာရွက်စာတမ်းကို ဖတ်ပြီးသွားဖို့ ခဏလောက် စောင့်ပြီးနောက် နျဥ်ယွိယွမ်က “အားလုံး ဘယ်လိုထင်လဲ။” လို့ မေးလိုက်သည်။

“ဒါ… ငါတို့ရဲ့ အချိုးအစားက နည်းနည်း နည်းလွန်းနေတာ မဟုတ်ဘူးလား။” လော်ဖန်ရဲ့ မျက်နှာမှာ ပူပန်မှုတွေ ပြည့်နှက်နေပြီး ခါးသီးစွာ ပြောလိုက်သည်။ “ခင်ဗျားတို့ မသိဘူး၊ ကျွန်တော်တို့ ဉာဏ်ပညာတိမ်တိုက် ဂလက်စီမှာ ခုတလော သယံဇာတတွေ နည်းနေတာ။ ဒီလောက်လေးနဲ့ မလောက်ဘူး ထင်တယ်။”

'ကောင်းပါရော! ဒီလူက ချက်ချင်း ဆင်းရဲကြောင်း ငိုပြလာလေပြီ။'

အကြီးအကဲနျဥ်က မျက်လုံးကို မလှန်ဘဲ မနေနိုင်အောင် ဖြစ်သွားသည်။ 'ဒီလူရဲ့ ပုံစံက ချီရှောင်ပိုင်နဲ့ လုံးဝ ကွာခြားနေတာပဲ။ ဒါ့အပြင် ခင်ဗျားတို့ ဉာဏ်ပညာတိမ်တိုက် ဂလက်စီက သယံဇာတတွေ လိုအပ်နေတုန်းပဲလား။ နှစ်စဉ် အများစုကို ခင်ဗျားတို့ပဲ ယူနေတာပဲ။ ခုကျတော့ ဘယ်လိုလုပ်ပြီး ညည်းညူရဲတာလဲ။ ခင်ဗျားတို့က သယံဇာတ လိုအပ်တာ မဟုတ်ဘူး၊ ယုတ်မာနေတာပဲ ထင်တယ်။'

“ဟုတ်လား။” နျဥ်ယွိယွမ်က မျက်ခုံးကို နည်းနည်း ပင့်လိုက်ပြီး နောက်ထပ် စာရွက်စာတမ်းတစ်ခုကို အားလုံးဆီ လှမ်းပေးလိုက်သည်။ “ဒါကတော့ ကျွန်တော်တို့ ရာစုနှစ်ပေါင်းများစွာက အချက်အလက်တွေပေါ် မူတည်ပြီး တွက်ချက်ထားတဲ့ အခြေအနေပါ။ အားလုံး အရင်ကြည့် ကြည့်ပါ။”

စာရွက်စာတမ်းကို ဖွင့်လိုက်တာနဲ့ လူတိုင်းရဲ့ မျက်နှာအမူအရာတွေ ပြောင်းလဲသွားသည်။

နျဥ်ယွိယွမ် ထုတ်ပြတဲ့ အချက်အလက်တွေက အလွန်တိကျပြီး အသေးစိတ်သည်။ ကဏ္ဍတိုင်းကနေ ဂလက်ဆီအသီးသီးရဲ့ သယံဇာတတွေကို အကြမ်းဖျင်း သိရှိနိုင်သည်။ ဒီလို စုဆောင်းနိုင်မှုနဲ့ ပြင်ဆင်နိုင်မှု စွမ်းရည်က အံ့ဩစရာကောင်းလှသည်။

ကျိုးလင်သာ သူတို့ရဲ့ အတွေးတွေကို သိရင် ခေါင်းကို လေးနက်စွာ ငြိမ့်ပြမှာ သေချာသည်။ ဟုတ်ပေသည်၊ ထိုကဲ့သို့ပင်။ အဲဒီတုန်းက သူ အချက်အလက်တွေကို နားလည်အောင် လုပ်ဖို့ သေလုနီးပါး မောပန်းခဲ့ရတာပင်။

“ယုတ္တိရှိရှိ ပြောရရင် ဉာဏ်ပညာတိမ်တိုက် ဂလက်စီရဲ့ သယံဇာတတွေက အရမ်းပေါများသင့်တယ်။” နျဥ်ယွိယွမ်က ခေါင်းကို အနည်းငယ် လှည့်ပြီး လော်ဖန်ကို ကြည့်လိုက်ပြီး ဘာတစ်ခုမှ လိုက်လျောမပေးခဲ့ပေ။

အမှန်ပင် နွားသစ်ကလေးက ကျားကို မကြောက်ပေ။ လော်ဖန်ရဲ့ အပြုံးက ပိုပြီး ချိုမြိန်လာသည်။ အရင်တုန်းက သူ နျဥ်ယွိယွမ်ဟာ ရိုးရှင်းတဲ့ သူမဟုတ်ဘူးဆိုတာ သိခဲ့ပေမဲ့ အခု သူ့နဲ့ ထိပ်တိုက်တွေ့လိုက်တော့ တကယ်ကို မှန်နေခဲ့သည်။

ဒီအချက်အလက်တွေကနေ တစ်ခုနှစ်ခုကို မြင်နိုင်သည်။ ဘာလို့လဲဆိုတော့ ဒီလောက်များပြားတဲ့ အချက်အလက်ပမာဏနဲ့ သီးခြားအခြေအနေတွေနဲ့ဆိုရင် နှစ်နှစ် သုံးနှစ် ကြိုတင်ပြင်ဆင်မှု မရှိဘဲ တွက်ချက်နိုင်မှာ မဟုတ်ပေ။ ဒါဆို… နျဥ်ယွိယွမ်က အစောကြီးကတည်းက ပြင်ဆင်နေခဲ့တာလား။

“ဘယ်သူမှ ကန့်ကွက်စရာ မရှိဘူးဆိုရင် ပစ္စည်းအချိုးအစားကို အဲဒီအတိုင်း သတ်မှတ်လိုက်မယ်နော်။” နျဥ်ယွိယွမ်က ထရပ်ပြီး ပတ်ဝန်းကျင်ကို ဝေ့ကြည့်လိုက်သည်။

ဘယ်လိုလုပ် ဖြစ်နိုင်မှာလဲ။ အဆင့်မြင့်သူတွေက အချိုးအစားက နည်းလွန်းတယ်လို့ ခံစားရပြီး အဆင့်နိမ့်သူတွေက မလုံလောက်ဘူးလို့ ခံစားရသည်။ အတိုချုပ်ပြောရရင် ပြီးပြည့်စုံတဲ့ အစီအစဉ်တစ်ခုကို ရှာတွေ့ဖို့က လက်တွေ့မကျပေ။

ထို့ကြောင့် စကားစစ်ပွဲက ထပ်ပြီး စတင်ခဲ့သည်။

နားထဲမှာ စကားပြောသံတွေ ဆူညံနေတုန်းပင်။ အကြီးအကဲနျဥ်က သူ့ထိုင်ခုံမှာ စိတ်မရှည်စွာ ခန ခန လှုပ်ရွနေသည်။

စစ်တပ်ကနေ ထွက်လာတဲ့သူတွေက အလုပ်တွေကို မြန်မြန်ဆန်ဆန်နဲ့ သပ်သပ်ရပ်ရပ် လုပ်ချင်ကြတာပင်။ 'ဒါပေမဲ့ ခုတော့ ကြည့်ဦး၊ ဒါကို ကြန့်ကြာတာလို့ ခေါ်တယ်။ ခွဲဝေမှု အချိုးအစား ကိစ္စလေးတစ်ခုပဲ မဟုတ်လား။ ဒီလောက်တောင် ဒုက္ခခံစရာ လိုလို့လား။'

အကြီးအကဲ ချင်က သူ့သူငယ်ချင်းဟောင်းရဲ့ မျက်နှာပေါ်ရှိ စိတ်မရှည်မှုကို အလိုလျောက် မြင်သွားပြီး သူ့မျက်လုံးထဲမှာ ခါးသီးတဲ့ အပြုံးတစ်ခု ထွက်ပေါ်လာတာကို မထိန်းနိုင်အောင် ဖြစ်သွားသည်။ တကယ်ပဲ! မူလကတော့ ကိစ္စကြီးကြီးမားမား မဟုတ်ပေမဲ့ ဂလက်ဆီအသီးသီးရဲ့ အကျိုးစီးပွားတွေ ပါဝင်လာတာနဲ့ လူတိုင်းက ချက်ချင်းပဲ အမြတ်အစွန်းတိုင်းကို ဈေးဆစ်လာကြသည်။ ဘယ်သူမှ လိုက်လျောဖို့ စိတ်မဝင်စားကြတာကြောင့် သဘာဝအတိုင်း သဘောတူညီမှု မရနိုင်ခဲ့ပေ။

ဒီအကြောင်းကို တွေးရင်း အကြီးအကဲ ချင်က ခေါင်းကို မော့ကြည့်လိုက်သည်။ နျဥ်ယွိယွမ်က အလယ်မှာ ရပ်နေသည်။ သူ့ရဲ့ တောက်ပနေတဲ့ ကိုယ်ခန္ဓာနဲ့ အရှိန်အဝါက အကြီးအကဲနျဥ်ရဲ့ ပုံစံနဲ့ လုံးဝ ကွာခြားနေသည်။

“ဪ၊ ဒါနဲ့ ခဏလေး။” နျဥ်ယွိယွမ်ရဲ့ လေသံက အေးစက်စက် ရှိပေမဲ့ သူပြောလိုက်တဲ့ စကားက အစည်းအဝေးခန်းတစ်ခုလုံးကို ချက်ချင်း တိတ်ဆိတ်သွားစေခဲ့သည်။ “ကျွန်တော် လူတိုင်းကို ပြောဖို့ မေ့သွားတယ်။ ကျွန်တော်တို့ အဖွဲ့ချုပ်ဟာ ပထမဆုံး ပုံမှန် အပင်စိမ်းကို အောင်မြင်စွာ စိုက်ပျိုးနိုင်ခဲ့ပြီ။”

“ဘာ!” ဖုကျွင်းရဲ့ မျက်နှာမှာ ထိတ်လန့်မှုတွေ ပြည့်နှက်နေပြီး ပြန်မေးလိုက်သည်။ “တကယ်လား။”

ပိုပြီး အင်အားကြီးတဲ့ ဂလက်ဆီတွေက ပုံမှန် အပင်စိမ်းတွေအတွက် ပိုပြီး အားထုတ်ကြသည်။ မဟူရာ သမုဒ္ဒရာ ဂလက်စီ နဲ့ ဉာဏ်ပညာတိမ်တိုက် ဂလက်စီဟာ ဒီပြဿနာကို လေ့လာခဲ့တဲ့ ပထမဆုံး ဂလက်ဆီနှစ်ခု ဖြစ်ပေမဲ့ နှစ်ပေါင်းများစွာ ကြာသည်အထိ ဒီပြဿနာကို ဖြေရှင်းနိုင်ခြင်း မရှိခဲ့ပေ။ အဖွဲ့ချုပ်က သူတို့ကို ကျော်တက်ပြီး အရင်လုပ်နိုင်ခဲ့မယ်လို့ ဘယ်သူကများ ထင်ထားမိမှာလဲ။

“ဟုတ်တယ်” အကြီးအကဲ ချင်က ခေါင်းငြိမ့်ပြီး မျက်ခုံးကို အနည်းငယ် ပင့်လိုက်သည်။ ဘေးက ဝန်ထမ်းတွေက ချက်ချင်း ဖန်သားပြင်ကို ဓာတ်ခွဲခန်းဆီ ပြောင်းလိုက်သည်။ အတွင်းထဲက အပင်စိမ်းက ကြီးထွားနေပြီဖြစ်ပြီး သူ့ရဲ့ စိမ်းလန်းတဲ့ အရွက်တွေက ဖြည်းဖြည်းချင်း လှမ်းနေတာကို ကြည့်လိုက်ရုံနဲ့တင် လူတွေကို သက်တောင့်သက်သာနဲ့ ငြိမ်းချမ်းမှုကို ခံစားရစေသည်။

“ကြည့်ပါဦး…” အကြီးအကဲ ချင်ရဲ့ နှုတ်ခမ်းတွေ အနည်းငယ် ကော့ညွတ်သွားပြီး အသံတိုးတိုးနဲ့ မေးလိုက်သည်။

နောက်ဆုံးတော့ ခွဲဝေမှု အချိုးအစားကို ဆုံးဖြတ်နိုင်မလားဆိုတာက အင်အားကြီး ဂလက်ဆီအနည်းငယ်ပေါ်မှာပဲ မူတည်နေသည်။ သူတို့သာ ခေါင်းငြိမ့်လိုက်ရင် တခြားဂလက်ဆီတွေရဲ့ ထင်မြင်ယူဆချက်တွေက ဘာမှ မဟုတ်ပါဘူး။ ဒီအခိုက်အတန့်မှာ “အားနည်းတဲ့ နိုင်ငံမှာ သံတမန်ရေးရာ မရှိ” ဆိုတဲ့ အမှန်တရားက ထင်ရှားစွာ ပေါ်လွင်လာသည်။

ပြီးတော့ တခြားဂလက်ဆီတွေကို ခေါင်းငြိမ့်အောင် လုပ်နိုင်မလားဆိုတာကတော့ အဖွဲ့ချုပ်က ဘယ်လောက် အကျိုးအမြတ်တွေ ပေးနိုင်မလဲဆိုတာပေါ်မှာပဲ မူတည်နေဦးမှာပင်။

ရှင်းရှင်းပြောရရင် ပုံမှန် အပင်စိမ်းတွေ ပေါ်လာတာက မဟူရာ သမုဒ္ဒရာ ဂလက်စီ နဲ့ ဉာဏ်ပညာတိမ်တိုက် ဂလက်စီကို နည်းနည်း စိတ်ဝင်စားသွားစေခဲ့သည်။ ဖုကျွင်းက ခေါင်းကို ငုံ့ပြီး အနည်းငယ် စဉ်းစားနေချိန်မှာ လော်ဖန်က မျက်ခုံးကို အနည်းငယ် ပင့်လိုက်သည်။

“ဪ၊ ဒါနဲ့ ကျွန်တော် ကြားတာက အဖွဲ့ချုပ်ရဲ့ စိတ်ဝိညာဥ် စားစရာတွေက တကယ်ကို အံ့မခန်းပဲတဲ့။ ကျွန်တော် တစ်ခါမှ မမြင်ဖူးဘူး၊ ကြည့်ခွင့်ပေးပါလား။”

ဒီစကားတွေရဲ့ အဓိပ္ပာယ်က အရမ်းကို ရှင်းသည်။ လော်ဖန်က စိတ်ဝိညာဥ် စားစရာတွေမှာ ပိုပြီး စိတ်ဝင်စားနေတာ ထင်ရှားသည်။ ပြီးတော့ ဒီစကားတွေ ပြောလိုက်တာနဲ့ တခြားဂလက်ဆီတွေမှ ခေါင်းဆောင်တွေရဲ့ မျက်လုံးတွေက ချက်ချင်း ဝင်းလက်သွားသည်။

ဒါက ဒဏ္ဍာရီလာ စိတ်ဝိညာဥ် စားစရာမဟုတ်ပါလား။ ဘယ်သူက မလိုချင်မှာလဲ။ ဆက်စပ်မေးခွန်းတွေ ပေါ်လာတာနဲ့ လူတိုင်း နားစွင့်နေကြသည်။

နျဥ်ယွိယွမ်ရဲ့ မျက်လုံးတွေ မဲမှောင်သွားသည်။

ပုံမှန် အပင်စိမ်းတွေကို အပေးအယူလုပ်ဖို့ ထုတ်ပြလိုက်ရတဲ့ အကြောင်းရင်းက ချူးလေးကို ဒီပြဿနာထဲ မပါဝင်စေချင်လို့ပင်။ လော်ဖန်က ဒီလောက် ပွင့်ပွင့်လင်းလင်း ပြောလိမ့်မယ်လို့ သူ မထင်ထားခဲ့ပေ။

“ဒီကိစ္စ အတည်ပြုပြီးတာနဲ့ ခင်ဗျားတို့ အခွင့်အရေး ရပါလိမ့်မယ်။” နျဥ်ယွိယွမ်ရဲ့ စကားတွေက ပြတ်သားပြီး သူ့မျက်လုံးတွေ ကျဉ်းသွားသည်။