ရှောင်းယောင်၏ တည်နေရာ

သူ၏ နောက်ဘက်မှာရှိသော ကောင်းကင်လိုဏ်ဂူပုံရိပ်ယောင်က တဖြည်းဖြည်းပျက်ပြယ်သွားသည်။ ဆူဇီမိုသည် စိတ်သက်သာစွာ သက်ပြင်းချပြီး သူ၏ မျက်လုံးနှစ်ဖက်ကို ဖွင့်ကာ ဂမ္ဘီရအလင်းတစ်ချက် လက်သွား၏။

သူသည် သုခဘုံလေဟာနယ်နယ်ပယ်မှာ ရှိနေသေးသော်လည်း သူသည် ကောင်းကင်လိုဏ်ဂူတစ်ခု၏ စွမ်းအားကို အရင်ဆုံး နားလည်ဆင်ခြင်မိခဲ့ပြီဖြစ်သည်။

သိုင်းတာအိုပင်မခန္ဓာသည် အစစ်အမှန်သိုင်းနယ်ပယ်မှာ ရှိခဲ့စဉ်က သူသည်လည်းပဲ ဆင်တူသော နည်းလမ်းတစ်ခုကို နားလည်ဆင်ခြင်ကာ နောက်ပိုင်းတွင် အဲဒါက အဝီစိဂိတ်တံခါး ဖြစ်လာခဲ့သည်။

“တောင်ထွတ်သခင်ဆူ…”

မူလျန်က အနည်းငယ်စိုးရိမ်ပူပန်နေပြီး မရဲတရဲခေါ်လိုက်သည်။

ဆူဇီမိုက မတ်တတ်ထရပ်ပြီး သူတို့နှစ်ယောက်ကို လှည့်ကြည့်ကာ ခေါင်းညိတ်ပြလိုက်၏။

ဆူဇီမို၏ တည်ငြိမ်သော အမူအရာကို တွေ့မြင်သောအခါ မူလျန်က စိတ်သက်သာရာရသွား၏။

“အဲဒါက တော်တော်နီးစပ်ခဲ့တာပဲ… တောင်ထွတ်သခင်ဆူ… ရှင်က ကောင်းကင်လိုဏ်ဂူနယ်ပယ်ကို အဆင့်ချိုးဖျက်တက်လှမ်းမယ်ဆိုရင် ဆိုးရွားတာတစ်ခုခု ဖြစ်လာနိုင်တယ်”

ဆူဇီမိုက ပြုံး၍ ရှင်းပြမနေပေ။

သူ့မှာ မီးပဒေသာကျောက်တုံးနှင့် တမလွန်မီးရောင်ကျောက်တုံး ရှိလေသည်။ သူသည် ကောင်းကင်လိုဏ်ဂူနယ်ပယ်သို့ တကယ်တမ်းဝင်ရောက်မည်ဆိုလျှင်တောင် အဲဒါသည် နေ့နှင့်ညကုန်းမြေမှာ တုံ့ပြန်မှုများစွာကို ဖြစ်ပေါ်လာစေလိမ့်မည် မဟုတ်ပေ။

နေနှင့်ညကုန်းမြေမှာရှိသော အလင်းနှင့်အမှောင်စွမ်းအားက သူ့ကို လုံးဝမထိခိုက်စေနိုင်ပေ။

ဆူဇီမို၏ အကူအညီနှင့်အတူ သူတို့သုံးယောက်သည် တစ်ရက်ကြာပြီးနောက် အနီးအနားမှာ ငရဲကြည်လင်အေးမြစိမ့်စမ်းမှ ရေတချို့ကို ရှာဖွေတွေ့ရှိခဲ့သည်။

သို့သော်လည်း ပမာဏက အရမ်းနည်းပြီး ဆေးတစ်ပုလင်းစာပင် မရှိတတ်ပေ။

ထိုသို့ဆိုလျှင်တောင် မူလျန်က အတော်လေးကျေနပ်အားရနေ၏။

သူမ၏ ထင်မြင်ချက်အရ ခေတ်ပေါင်းများစွာကြာပြီးနောက် ဤကဲ့သို့သော ရှေးဟောင်းစိမ့်စမ်းရေကို ရှာဖွေတွေ့ရှိနိုင်သည်မှာ အလွန်တရာကံကောင်းလှပြီဖြစ်သည်။

ဆူဇီမိုသည် ဤတစ်ခေါက် နေနှင့်ညကုန်းမြေသို့ လိုက်ပါစောင့်ရှောက်ပေးခဲ့သောကြောင့် လမ်းတစ်လျှောက်မှာ ပြဿနာတချို့နှင့် ကြုံတွေ့ခဲ့ရသော်လည်း အဲဒါက အရမ်းကိုချောမွေ့ခဲ့၏။

ငရဲကြည်လင်အေးမြစိမ့်စမ်းမှ ရေကို ရရှိပြီးနောက် သူတို့သုံးယောက်သည် နေနှင့်ညကုန်းမြေမှာ ဆက်လက်၍ ကြန့်ကြာမနေတော့။

ပန်းကမ္ဘာမှ ကလန်သားများစွာသည် တမလွန်ကပ်ဘေးအဆိပ်မိထားသည်။ သူတို့သည် ငရဲကြည်လင်အေးမြစိမ့်စမ်းရေကို မြန်မြန်ဆန်ဆန်လက်ခံရရှိလေ… သူတို့က အန္တရာယ်ကနေ မြန်မြန်ဆန်ဆန်လွတ်မြောက်လာနိုင်လေ ဖြစ်သည်။

ဒါ့အပြင် သွေးကမ္ဘာ၊ အဆိပ်ကမ္ဘာနှင့် အုတ်ဂူကမ္ဘာမှ ကျင့်ကြံသူများစွာက ထွက်ပြေးလွတ်မြောက်သွားကြသည်။

သူတို့သည် သူတို့၏ သက်ဆိုင်ရာကမ္ဘာများသို့ ပြန်လည်ရောက်ရှိသွားမည်ဆိုလျှင် သူတို့က တစ်ကျော့ပြန်လာဖို့ ဖြစ်နိုင်ခြေများသည်။ ကောင်းကင်လိုဏ်ဂူဘုရင်များ ပါဝင်လာမည်ဆိုလျှင် အလှည့်အပြောင်းများစွာ ပေါ်ထွက်လာနိုင်၏။

သူတို့သုံးယောက်သည် နေနှင့်ညကုန်းမြေကနေ ထွက်ခွာပြီး အပြင်ဘက်မှာ အင်မော်တယ်ဘုရင်မယိုလန် စောင့်ဆိုင်းနေသည်ကို တွေ့မြင်လိုက်ရသည်။

အင်မော်တယ်ဘုရင်မယိုလန်သည် သူတို့သုံးယောက်က ဘေးအန္တရာယ်မရှိဘဲ ရှေးဟောင်းစိမ့်စမ်းရေကို ရရှိလာခဲ့သည်ကို သိရသောအခါ သူမက ဝမ်းသာအားရဖြစ်သွားသည်။

“တာအိုရောင်းရင်းဆူ… အခုလိုကူညီပေးတဲ့အတွက် ကျေးဇူးအများကြီးတင်ပါတယ်”

အင်မော်တယ်ဘုရင်မယိုလန်က ပြောလိုက်သည်။

“တာအိုရောင်းရင်း… ရှင့်မှာ တခြားလုပ်စရာ မရှိသေးဘူးဆိုရင် ကျွန်မတို့နဲ့ ပန်းကမ္ဘာကို လိုက်ခဲ့ပါလား… ကျွန်မက အိမ်ရှင်တစ်ယောက်အနေနဲ့ ဧည့်ဝတ်ကျေပွန်စေရပါမယ်… ပန်းကမ္ဘာကလည်း ရှင့်ကို ရက်ရက်ရောရော သေချာပေါက် ဆုချီးမြှင့်ပေးပါလိမ့်မယ်”

“အဲဒါက အထွေအထူးကိစ္စ မဟုတ်ပါဘူး”

ဆူဇီမိုက ညင်သာစွာ ပြုံးပြလိုက်၏။

ထိုစဉ်မှာပင် ဆူဇီမိုသည် တစ်စုံတစ်ရာကို အာရုံခံမိသွားပုံရပြီး အခြားတစ်ဖက်ကို လေးနက်စွာကြည့်ကာ မျက်မှောင်အနည်းငယ်ကြုတ်ထားသည်။

ထိုဘက်အရပ်၊ ကြယ်တာရာကောင်းကင်ကနေ မသဲမကွဲ စွမ်းအင်အတက်အကျတစ်ခု ပေါ်ထွက်လာပြီး အဲဒါက နေနှင့်ညကုန်းမြေတစ်ခုလုံးကိုပင် သက်ရောက်စေပုံရသည်။

တစ်ယောက်ယောက်သည် ကျင့်ကြံဖို့အတွက် နေနှင့်ညကုန်းမြေ၏ အလင်းနှင့်အမှောင်စွမ်းအားကို အသုံးပြုနေသည့်အလားပင်။

ဆူဇီမိုသည် အဲဒါနှင့်ပတ်သက်၍ များစွာစဉ်းစားတွေးတောမနေဘဲ သူများကိစ္စမှာ ဝင်မရှုပ်ဖို့ ဆုံးဖြတ်လိုက်၏။ သူက တစ်ဖက်သို့လှည့်ပြီး အင်မော်တယ်ဘုရင်မယိုလန်ကို စကားပြောလိုက်မည့်ဆဲဆဲမှာပင် သူ့ဘေးမှာရှိသော ပေမင်ရွှယ်က ရုတ်တရက်ပြောလိုက်၏။

“ဆရာ… အဲဒီဘက်မှာ…”

ပေမင်ရွှယ်သည် ယခုတင် ဆူဇီမို အာရုံခံမိခဲ့သည့် ထိုဘက်အရပ်မှာရှိသော ကြယ်တာရာကောင်းကင်ကို လက်ညှိုးထိုးပြလိုက်၏။ သူမက မျက်မှောင်ကြုတ်ပြီး တစ်ခုခုကို ပြောချင်သော်လည်း ချီတုံချတုံဖြစ်နေ၏။

“ဘာဖြစ်လို့လဲ”

ဆူဇီမိုက မေးလိုက်သည်။

ပေမင်ရွှယ်က အဲဒါကို နောက်တစ်ဖန် စေ့စေ့စပ်စပ်အာရုံခံကြည့်ပြီးနောက် မဝံ့မရဲဖြင့် ပြောလိုက်၏။

“အဲဒီကနေ လာနေတဲ့ မျိုးဆက်သွေးက ရင်းနှီးနေသလို ခံစားရတယ်… အဲဒါ…”

ခဏမျှရပ်တန့်ပြီးနောက် ပေမင်ရွှယ်က ဖြည်းဖြည်းချင်းပြောလိုက်သည်။

“ခွန်ဖန်းရဲ့ မျိုးဆက်သွေးပဲ”

“ဟမ်”

ဆူဇီမို၏ အမူအရာက အနည်းငယ်ပြောင်းလဲသွားသည်။

အင်မော်တယ်ဘုရင်မယိုလန်နှင့် မူလျန်က ခွန်ဖန်းမျိုးဆက်သွေးအကြောင်း ကြားရသောအခါ အံ့အားသင့်သွားသော်လည်း သူတို့က အဲဒါနှင့်ပတ်သက်၍ များစွာမတွေးတောကြပေ။

ခွန်ဖန်းသည် တဗူးမျိုးဆက်သွေးတစ်ခုဖြစ်ပြီး အလွန်တရာ ရှားပါးသည်။

သို့သော်လည်း သည်ဘက်မျိုးဆက်မှာ ခွန်ကမ္ဘာ သို့မဟုတ် ဖန်းကမ္ဘာက ခွန်ဖန်းမျိုးဆက်သွေးတစ်ခုကို ပြုစုပျိုးထောင်နိုင်ဖို့ ဖြစ်နိုင်ခြေ မြင့်မားလေသည်။

သူတို့နှစ်ယောက်သည် ဆူဇီမိုနှင့် ပေမင်ရွှယ်၏ အမူအရာများက ဘာကြောင့် ဤကဲ့သို့ဖြစ်နေသည်ကို နားမလည်ကြပေ။

ဆူဇီမိုက မေးလိုက်သည်။

“ရှောင်းယောင်များလား”

ထျန်ဟွမ်ကုန်းမြေတိုက်မှာတုန်းက သူ့မှာ တပည့်နှစ်ယောက် ရှိခဲ့သည်။

သူ၏ အကြီးဆုံးတပည့်က ပေမင်ရွှယ်ဖြစ်သည်။

သူ၏ ဒုတိယတပည့်က ရှောင်းယောင်ဟု သူအမည်ပေးထားသော တဗူးခွန်ဖန်းတစ်ကောင်ဖြစ်သည်။

ပေမင်ရွှယ်က ခဏမျှ တွေဝေတုံ့ဆိုင်းပြီးနောက် ခေါင်းညိတ်ပြလိုက်၏။

“ကျွန်မတို့မျိုးရိုးက ခွန်ဖန်းဥကို မျိုးရိုးစဉ်ဆက် ကာကွယ်စောင့်ရှောက်ပေးခဲ့ရတယ်… အဲဒါကြောင့် ကျွန်မရဲ့မျိုးဆက်သွေးနဲ့ ဂျူနီယာမောင်ကြားမှာ မသိသာတဲ့ ဆက်သွယ်ချက်တစ်ခု ရှိတယ်… ကျွန်မတို့က သိပ်မဝေးတဲ့အကွာအဝေးတစ်ခုမှာ ရှိနေသရွေ့ ကျွန်မက အဲဒါကို အာရုံခံမိနိုင်သေးတယ်”

ပေမင်ရွှယ်၏ မျိုးဆက်သွေးနယ်မြေက ဧရာမခွန်တစ်ကောင်ဖြစ်သည်။

အရင်တုန်းက ရှောင်းယောင်သည် ပေမင်မိသားစု၏ မြေအောက်အနက်ပိုင်းထဲရှိ ဂမ္ဘီရစိမ့်စမ်းထဲမှာ မွေးဖွားလာပြီး သူသည် ပေမင်မိသားစု၏ မျိုးဆက်သွေးနှင့် ခွဲခြားမရအောင် ဆက်စပ်နေလေသည်။

သူတက်လှမ်းလာပြီးနောက် ဆူဇီမိုသည် ရှောင်းယောင်ထံမှ မည်သည့်သတင်းကိုမှ မရရှိခဲ့ပေ။

ရှောင်းယောင်သည် ခွန်ကမ္ဘာ သို့မဟုတ် ဖန်းကမ္ဘာမှာ ရှိလောက်သည်ဟု သူက ထင်မြင်ယူဆမိသည်။

သို့သော်လည်း သူသည် သတင်းအချက်အလက်ကို စုဆောင်းဖို့အတွက် ထိုထိပ်တန်းကမ္ဘာကြီးနှစ်ခုသို့ သွားရောက်ဖို့ အခွင့်အရေးမရခဲ့ပေ။

ယခု ရှောင်းယောင်၏ သတင်းက ပေါ်ထွက်လာပြီး အဲဒါက သူတို့အတွက် ကောင်းမွန်သောအချက် ဖြစ်နိုင်သည်။

သို့သော်လည်း ပေမင်ရွှယ်၏ မျက်နှာက မကောင်းသည်ကို ဆူဇီမိုက သတိထားမိသွားသည်။

“ရှောင်းယောင် တစ်ခုခုဖြစ်နေလို့လား”

ဆူဇီမို၏ အမူအရာက တည်တံ့လာခဲ့သည်။

ပေမင်ရွှယ်က သူမ၏ ခေါင်းကို ညင်သာစွာ ခါပြလိုက်၏။

“ကျွန်မ သေချာမပြောတတ်ဘူး… ဒါပေမဲ့ ကျွန်မရဲ့အသိစိတ်ထဲမှာ သူက အခြေအနေမကောင်းတဲ့ပုံပဲ”

“တစ်ချက်လောက် သွားကြည့်ကြတာပေါ့”

တွေဝေတုံ့ဆိုင်းခြင်းမရှိဘဲ ဆူဇီမိုက ထိုဘက်အရပ် ကြယ်တာရာကောင်းကင်သို့ လှည့်ထွက်လိုက်၏။

အင်မော်တယ်ဘုရင်မယိုလန်နှင့် မူလျန်ကလည်း နောက်ကနေ ထပ်ကြပ်မကွာ လိုက်ပါလာ၏။

ပေမင်ရွှယ်သည် အင်မော်တယ်ဘုရင်မယိုလန်နှင့် မူလျန်ကို အကျဉ်းချုံး ရှင်းပြပေးလိုက်သည်။ သူတို့နှစ်ယောက်က နားလည်သဘောပေါက်သွားပြီး ဆူဇီမို ဘာကြောင့် ဤမျှအထိ စိုးရိမ်ပူပန်နေသည်ကို သိရှိသွားကြသည်။

ဆူဇီမိုတို့ လေးယောက်အုပ်စုက စွမ်းအားအတက်အကျ ရှိရာဘက်သို့ တက်လှမ်းလာကြ၏။

သိပ်မကြာခင် သူတို့သည် သူတို့လိုရာပန်းတိုင်သို့ တဖြည်းဖြည်းချဉ်းကပ်လာကြသည်။

တစ်စုံတစ်ရာကို တွေးမိသွားသည့်အလား ဆူဇီမိုက ရှေ့သို့ မဆင်မခြင် တက်လှမ်းခြင်းမရှိပေ။ ထိုအစား သူက သူတို့လေးယောက်၏ အော်ရာများကို ပိတ်ဆို့တားဆီးရန် ယင်ယန်အဆောင်သုတ္တန်မှ ဓမ္မပညာရပ်တချို့ကို ထုတ်ဖော်လိုက်၏။

ရှေ့တည့်တည့်မှာ ကောင်းကင်လိုဏ်ဂူပညာရှင်တစ်ဦး၏ အော်ရာရှိနေသည်။ ဆူဇီမိုက မဖြစ်မနေ သတိထားရလေသည်။

သူတို့လေးယောက်က လေဟာနယ်ထဲသို့ တဖြည်းဖြည်းတိုးဝင်ပျောက်ကွယ်ပြီး အသံတစ်ချက်မထွက်ဘဲ ဖြည်းဖြည်းချင်း ချဉ်းကပ်လာကြသည်။

နေနှင့်ညကုန်းမြေကနေ မလှမ်းမကမ်းမှာ ရှေးဟောင်းကြယ်တစ်စင်း လွင့်မျောနေ၏။

နေနှင့်ညကုန်းမြေကို သက်ရောက်စေသော စွမ်းအင်အတက်အကျက ဤကြယ်ကနေ ထွက်ပေါ်လာခြင်းဖြစ်သည်။

ဆူဇီမိုက ပေမင်ရွှယ်ကို ကြည့်လိုက်၏။

ပေမင်ရွှယ်ကလည်း ခေါင်းညိတ်ပြီး ရှောင်းယောင်က ဤကြယ်မှာ ရှိသည်ကို အချက်ပြလိုက်၏။

သူတို့လေးယောက်သည် ရှေ့သို့ ဆက်လက်တက်လှမ်းပြီး ကြယ်နှင့်နီးကပ်လာကြသည်။

နောက်ဆုံးမှာ ကြယ်သည် သူတို့လေးယောက်၏ မြင်ကွင်းထဲသို့ ဝင်ရောက်လာ၏။

ကြယ်ပေါ်တွင် ဖြစ်ပျက်နေသည့်အရာများကိုလည်း သူတို့က ရှင်းရှင်းလင်းလင်း တွေ့မြင်လာရသည်။

ကြယ်၏ အထက်မှာ ပုံရိပ်နှစ်ခု လွင့်မျောနေ၏။

သူတို့ထဲမှ တစ်ယောက်သည် ပိန်လှီသော ခန္ဓာကိုယ်နှင့် လူငယ်အမျိုးသားတစ်ဦးဖြစ်ပြီး သူ၏ ခြေလက်များကို အစိမ်းရောင်မှော်စာလုံးများဖြင့် တောက်ပနေသော ချိန်းကြိုးများဖြင့် ရစ်ပတ်ထားလေသည်။ သူ၏ လက်ပြင်ရိုးနှစ်ဖက်ကို ဧရာမချိတ်ဆူးနှစ်ခုဖြင့် ထိုးဖောက်ထားပြီး သွေးများက စီးကျနေ၏။

ချိန်းကြိုးများ၏ အခြားတစ်ဖက်က ကြယ်ပေါ်ရှိ မြေကြီးထဲ နစ်ဝင်နေလေသည်။

ကုန်းမြေပေါ်မှာ ဝင်္ကပါအင်းကွက်များက အဆက်မပြတ် တဖျပ်ဖျပ်လက်နေပြီး အနက်ရောင်နှင့်အဖြူရောင် ယင်ယန်ငါးများကားချပ်တစ်ခုကို ဖြစ်ပေါ်နေစေသည်။ သူတို့က အဆက်မပြတ်လှည့်ပတ်၍ ကိုက်ခဲနေကြပြီး နေနှင့်ညကုန်းမြေမှ အလင်းနှင့်အမှောင်စွမ်းအားကို စုပ်ယူနေကြသည်။

ထိုစွမ်းအားသည် လူငယ်အမျိုးသား၏ ခန္ဓာကိုယ်ထဲသို့ အဆက်မပြတ် တိုးဝင်နေ၏။

လူငယ်အမျိုးသား၏ ဆံပင်က ဖိုသီဖတ်သီဖြစ်နေပြီး သူ၏ မျက်နှာက ဖြူဖတ်ဖြူရော် ဖြစ်နေ၏။ သူသည် သိပ်သည်းပြင်းထန်သော နာကျင်မှုကို ကြိတ်မှိတ်ခံစားနေရပြီး သူ၏ ခန္ဓာကိုယ်က တဆတ်ဆတ် တုန်ယင်နေလေသည်။

ထိုစွမ်းအားသည် သူ၏ ခန္ဓာကိုယ်ထဲမှာ လုံးဝ ရပ်တန့်မနေသောကြောင့် ဖြစ်သည်။

တစ်ဖက်မှာရှိသော လူငယ်အမျိုးသားက အနက်ရောင် ချပ်ဝတ်တန်ဆာကို ဝတ်ဆင်ထားပြီး အလွန်တရာ မြင့်မြတ်ထည်ဝါသည့်ပုံပေါ်သည့် အမျိုးသားတစ်ဦးဖြစ်သည်။ သူ၏ အနက်ရောင်ဆံပင်များက ကခုန်နေပြီး သူ၏ အကြည့်က နက်ရှိုင်း၍ စိတ်ဝိညာဉ်ဓာတ်ဖြင့် ပြည့်ဝနေ၏။

ထိုအခိုက်အတန့်မှာ အနက်ရောင် ချပ်ဝတ်တန်ဆာဝတ် အမျိုးသား၏ နောက်ဘက်တွင် ဧရာမ ခွန်တစ်ကောင်၏ ပုံရိပ်ယောင်က ပေါ်ထွက်လာ၏။ ၎င်းသည် ကောင်းကင်တစ်ခွင် အုပ်မိုးပြီး မရေမတွက်နိုင်သော အလင်းစက်များဖြင့် တောက်ပကာ ထူးဆန်းသော လမ်းကြောင်းများကို ဖြစ်ပေါ်လာစေ၏။

ဧရာမခွန်သည် ၎င်း၏ ပါးစပ်ကို ဖွင့်ဟပြီး အဆုံးမဲ့ အဆုံးမဲ့အာကာသတွင်းနက်တစ်ခုကဲ့သို့ လူငယ်အမျိုးသား၏ ခန္ဓာကိုယ်ထဲရှိ စွမ်းအားကို အငမ်းမရ စုပ်ယူဝါးမျိုနေ၏။

ကြယ်ပေါ်ရှိ ယင်ယန်အဆောင်သုတ္တန်ကနေတစ်ဆင့် နေနှင့်ညကုန်းမြေ၏ စွမ်းအားသည် လူငယ်အမျိုးသား၏ ခန္ဓာကိုယ်ထဲသို့ တလိပ်လိပ်တိုးဝင်ပြီး သူ့ခန္ဓာကိုယ်ထဲကနေ ထုတ်နုတ်ခံနေရသော ချည်မျှင်များအဖြစ် အသွင်ပြောင်းလဲသွားသည်။

စွမ်းအားနှစ်ခုကြားမှာ သွေးနီရောင်ချည်မျှင်များ ရှိနေသည်။

အနက်ရောင်ချပ်ဝတ်တန်ဆာဝတ်အမျိုးသား၏ နောက်ဘက်မှာရှိသော ဧရာမခွန်က လူငယ်အမျိုးသား၏ ခန္ဓာကိုယ်ထဲရှိ ယင်ယန်စွမ်းအားကိုသာမက သူ၏ မျိုးဆက်သွေးကိုပါ စုပ်ယူဝါးမျိုနေလေသည်။