အဆုံးစွန် သတ်ဖြတ်ကွက်

ခွန်ဘုရင်တစ်ပါးက ချက်ချင်းပင် သတ်ဖြတ်ခံလိုက်ရသည်။

ထို့နောက်မှာ အင်မော်တယ်ဘုရင်မ ယိုလန်သည် ဤမြင်ကွင်းကို အာရုံခံမိသောအခါ သူမက စိတ်ထဲကနေ ကြိတ်၍ ချီးကျူးမိလိုက်၏။

ဤသည်မှာ သုခဘုံလေဟာနယ် ပကတိစိတ်ဝိညာဉ်တစ်ဦးက ကျင့်ကြံမှုနယ်ပယ်အကြီးတစ်ခုကို ဖြတ်ကျော်ပြီး ကောင်းကင်လိုဏ်ဂူနယ်ပယ် ဘုရင်ပညာရှင်တစ်ဦးကို သတ်ဖြတ်လိုက်ခြင်းဖြစ်သည်။ သမိုင်းတစ်လျှောက် အထူးချွန် အထက်မြက်ဆုံး ပြိုင်စံရှားများနှင့် ပြန်ဝင်စားမွန်းစတား အများစုပင်လျှင် ထိုကဲ့သို့ ပြုလုပ်နိုင်ချင်မှ ပြုလုပ်နိုင်ပေလိမ့်မည်။

ဤတစ်ခေါက် လုပ်ကြံသတ်ဖြတ်ကြိုးပမ်းမှုကို မှင်တက်စရာ ကောင်းလွန်းသည်ဟု ဆိုနိုင်သည်။

ချိန်သားကိုက်မှုအရ ဖြစ်စေ၊ သူ၏ လျှို့ဝှက်အတတ် ထုတ်ဖော်မှုအရ ဖြစ်စေ၊ သူ့ပြိုင်ဘက်၏ စိတ်ပိုင်းဆိုင်ရာကို နားလည်သဘောပေါက်မှုအရဖြစ်စေ သူသည် အရာရာတိုင်းကို ပြီးပြည့်စုံစွာ အသုံးချနိုင်ခဲ့သည်။

တကယ်ဆို တစ်ဖက်သူကို အောင်မြင်စွာ လုပ်ကြံသတ်ဖြတ်ဖို့အတွက် ဆူဇီမိုသည် သူတော်စင်သုံးပါး ကျောက်စိမ်းကျမ်းကို ထုတ်ဖော်ဖို့ပင် တွေတုံ့ဆိုင်းမနေခဲ့ပေ။

သို့သော်လည်း တစ်ချိန်တည်းမှာပင် ခွန်ဘုရင်တစ်ဦးကို လုပ်ကြံသတ်ဖြတ်လိုက်ခြင်းသည် ဆူဇီမို၏ တိုက်ခိုက်ရည်ခွန်အားက ဘုရင်များနှင့် ဆန့်ကျင်တိုက်ခိုက်နိုင်သည့် အဆင့်ကို ရောက်ရှိနေခြင်းမဟုတ်ဟု အင်မော်တယ်ဘုရင်မ ယိုလန်က နားလည်သဘောပေါက်ထားသည်။

ဤကဲ့သို့သော လုပ်ကြံသတ်ဖြတ်ကြိုးပမ်းမှုသည် တစ်ကြိမ်တစ်ခါသာ အောင်မြင်နိုင်လေသည်။

အခြားတစ်ဖက်မှာ ခွန်ဘုရင်သုံးပါး ရှိနေဆဲဖြစ်သည်။ သူတို့က တုံ့ပြန်ကြပြီး သူတို့၏ အစွမ်းကုန်နှင့် တိုက်ခိုက်ရန် သူတို့၏ ကောင်းကင်လိုဏ်ဂူများကို ထုတ်ဖော်သည်နှင့် ဆူကျူးမှာ အခွင့်အရေးရှိတော့မည် မဟုတ်ပေ။

အင်မော်တယ်ဘုရင်မ ယိုလန်သည် ဘုရင်ကမ္ဘာမြေခွန်နဲ့ ဘုရင်စန္ဒာစုန်းကို တားဆီးဖို့အတွက် အတတ်နိုင်ဆုံး ကြိုးစားပေးနေသော်လည်း သူမက ကြိတ်၍ သက်ပြင်းချလိုက်၏။

သူမ၏ ထင်မြင်ချက်အရ ဆူဇီမိုသည် ခွန်ဘုရင်တစ်ပါးကို လုပ်ကြံသတ်ဖြတ်ရန် သူတော်စင်သုံးပါး ကျောက်စိမ်းကျမ်းကဲ့သို့ အန္တိမ လျှို့ဝှက်ရတနာတစ်ခုကို ထုတ်ဖော်ခြင်းဖြင့် အရာရာတိုင်းကို စွန့်စားခဲ့ပြီးပြီဖြစ်သည်။

သူက အောင်မြင်ခဲ့သော်လည်း သူတော်စင်သုံးပါး ကျောက်စိမ်းကျမ်း၏ ပေါ်ထွက်လာမှုက တခြားသူများ၏ ငမ်းငမ်းတက်အကြည့်များကို သေချာပေါက် ဆွဲဆောင်မိပေလိမ့်မည်။

ဘုရင်ကမ္ဘာမြေခွန်နှင့် ဘုရင်စန္ဒာစုန်းတို့က သူတော်စင်သုံးပါး ကျောက်စိမ်းကျမ်းကို တွေ့မြင်သောအခါ သူတို့၏ အကြည့်များက သိပ်သည်းစုဖွဲ့လာပြီး သူတို့၏ မျက်လုံးများက စိတ်လှုပ်ရှားမှုဖြင့် ဖျတ်ခနဲလက်သွား၏။

ဘုရင်ကမ္ဘာမြေစုန်းနှင့် ဘုရင်စန္ဒာလက ခွန်ဘုရင်တစ်ပါး သေဆုံးခြင်းမှာ အနည်းငယ် အံ့အားသင့်သွားသော်လည်း သူတို့က အဲဒါကို အလေးအနက်မထားပေ။

တစ်ဖက်သူက ပကတိစိတ်ဝိညာဉ်တစ်ဦးမျှသာ ဖြစ်သည်။ သူက ခွန်ဘုရင်တစ်ပါးကို အောင်မြင်စွာ လုပ်ကြံသတ်ဖြတ်နိုင်ခဲ့လျှင်တောင် သူသည် ပြဿနာများစွာ ရှာနိုင်လိမ့်မည် မဟုတ်ပေ။

သူတို့သည် သူတော်စင်သုံးပါး ကျောက်စိမ်းကျမ်းကို ဘယ်လို လုယူရမလဲ တိတ်တဆိတ် အကွက်ချ ကြံစည်နေကြပြီဖြစ်သည်။

တိုက်ပွဲမြေ၏ အခြားတစ်ဖက်မှာတော့…

ခွန်ဘုရင်တစ်ပါး သေဆုံးခြင်းနှင့်အတူ ဆူဇီမို၏ အစစ်အမှန်ခန္ဓာက လုံးလုံးလျားလျား ပေါ်ထွက်လာခဲ့၏။

အစက ကျင့်ကြံ၍ မျိုးဆက်သွေးကို အတင်းအဓမ္မ ဝါးမျိုနေသော အနက်ရောင် ချပ်ဝတ်တန်ဆာဝတ် အမျိုးသားက ထိုအခြင်းအရာကို အာရုံခံမိသောအခါ မျက်မှောင်ကြုတ်လိုက်သည်။

သို့သော်လည်း သူ့အမူအရာက တည်ငြိမ်၍ စိုးရိမ်ပူပန်နေခြင်း မရှိပေ။

ကျန်ရှိနေသော ခွန်ဘုရင်သုံးပါးက ရှေ့သို့ တက်သွားခဲ့ပြီဖြစ်သည်။

“ဆရာလား”

ရှောင်းယောင်က သူ၏ မျက်လုံးကို အတင်းကြိုးစား၍ ဖွင့်ပြီး အောက်ဘက်မှာရှိသော လူကို တွေ့မြင်သောအခါ သူက မယုံကြည်နိုင်စွာဖြင့် တီးတိုးရေရွတ်လိုက်၏။ သူ၏ မျက်လုံးများက တဖြည်းဖြည်း နီရဲလာခဲ့သည်။

အနက်ရောင် ချပ်ဝတ်တန်ဆာဝတ် အမျိုးသားသည် သူ၏ မျိုးဆက်သွေးကို အတင်းအဓမ္မ ဝါးမျိုနေသော်လည်း သူက တစ်ချိန်လုံး ခုခံဆန့်ကျင်၍ မဆုတ်မနစ် တောင့်ခံထားဆဲဖြစ်သည်။

သူသည် ဤကဲ့သို့ပင် အညံ့မခံလိုပေ။

သို့သော်လည်း သူ့ခန္ဓာကိုယ်ကို စုန်းမျိုးနွယ် မှော်စာလုံးများဖြင့် ပြည့်နှက်နေသည့် ချိန်းကြိုးများဖြင့် ရစ်ပတ်ထားပြီး သူ၏ လက်ပြင်ရိုးများကလည်း ထိုးဖောက်ခံထားရလေသည်။ သူသည် သူ၏ အစစ်အမှန်ပုံစံသို့ပင် မပြောင်းလဲနိုင်ဘဲ လုံးဝမခုခံနိုင်တော့ပေ။

ရှောင်းယောင်သည် သူ၏ မျိုးဆက်သွေးကို အနက်ရောင် ချပ်ဝတ်တန်ဆာဝတ် အမျိုးသားက တစ်စတစ်စ ဝါးမျိုနေသည်ကို ရှင်းရှင်းလင်းလင်း အာရုံခံမိနိုင်သည်။

သူက နာကျင်မှုနှင့် စိတ်ပျက်အားငယ်မှုကို ခံစားလာရ၏။

ရှောင်းယောင်၏ နှလုံးသားက ကူကယ်ရာမဲ့မှုဖြင့် ပြည့်နှက်လာခဲ့၏။ သူ၏ အသိစိတ်ကပင် တဖြည်းဖြည်း ဝေဝါးလာခဲ့ပြီဖြစ်သည်။

သူက သူ၏ ခေါင်းကိုငုံ့ပြီး လက်လျှော့တော့မည့်ဆဲဆဲမှာပင် အောက်ဘက်မှာ တစ်စုံတစ်ရာ ဖြစ်ပွားလာခဲ့၏။ သူက အလိုလိုမော့ကြည့်ပြီးနောက် အနက်ရောင်ဆံပင်၊ အစိမ်းရောင်ဝတ်ရုံနှင့် ရင်းနှီးနေကျ လူတစ်ယောက်ကို တွေ့မြင်လိုက်ရသည်။

“ဆရာ”

အဒါ အမှန်ပဲလား…

သူ့ဆရာက သူ့ကို ကယ်ဖို့ ရောက်လာခဲ့တာလား…

ထိုစဉ်မှာပင် အောက်ဘက်မှာရှိသော ခွန်ဘုရင်သုံးဦးက သူ့ဆရာကို တိုက်ခိုက်ဖို့အတွက် လုံးဝ ထိန်ချန်မထားကြတော့ပေ။ သူတို့က သူတို့၏ ကောင်းကင်လိုဏ်ဂူများကို မြှောက်တင်ပြီး သူ့ကို ဝိုင်းပတ်လိုက်ကြ၏။

ရှောင်းယောင်၏ မျက်လုံးက ပြူးကျယ်သွားပြီး သူ၏ လက်သီးနှစ်ဖက်ကို အလိုလိုဆုပ်လိုက်၏။

သူ့ဆရာ၏ ကျင့်ကြံမှုက ယခုအချိန်ထိ ကောင်းကင်လိုဏ်ဂူနယ်ပယ်သို့ မရောက်ရှိသေးသည်ကို သူပြောနိုင်သည်။

သူ့ဆရာသည် ပကတိစိတ်ဝိညာဉ်တစ်ဦးသာ ဖြစ်သည်။ သူက ခွန်ဘုရင်သုံးပါးကို ဘယ်လိုလုပ် ခုခံဆန့်ကျင်နိုင်မလဲ။

“ပကတိစိတ်ဝိညာဉ်တစ်ဦးက ငါတို့ခွန်မျိုးနွယ်ရဲ့ အရေးကိစ္စမှာ ဝင်ရောက်စွက်ဖက်ချင်တယ်ပေါ့… မင်းက တကယ့်ကို ကောင်းမှန်းဆိုးမှန်း နားမလည်ဘူးပဲ”

ခွန်ဘုရင်တစ်ပါးက အေးစက်နေသော အကြည့်ဖြင့် အော်ငေါက်လိုက်၏။ သူက သူ၏ ကောင်းကင်လိုဏ်ဂူကို မြှောက်တင်ပြီး အောက်သို့ ဖိချလိုက်လေသည်။

တိုက်ပွဲနယ်မြေမှာ…

ခွန်ဘုရင်သုံးပါး၏ ဝိုင်းပတ်ပိတ်ဆို့မှုမှာ ဆူဇီမိုက နောက်သို့မဆုတ်ပေ။

သူက ရှောင်တိမ်းလို့လည်း မရတော့ပေ။

ခွန်ဘုရင်သုံးဦး၏ ကောင်းကင်လိုဏ်ဂူများက သူ၏ ဘေးပတ်လည်မှာရှိသော လေဟာနယ်ကို ချိပ်ပိတ်ထားခဲ့ပြီဖြစ်သည်။

ဆူဇီမိုက အသက်ပြင်းပြင်းတစ်ချက်ရှိုက်ပြီး သူ၏ အကြည့်က သိပ်သည်းစုဖွဲ့လာခဲ့၏။

သူက လက်နှစ်ဖက်ဖြင့် လက်ဟန်ချိပ်စည်းများကို ဆင့်ခေါ်ပြီး သူ၏ အမြုတေစိတ်ဝိညာဉ်ကို ရူးသွပ်စွာ လှည့်ပတ်ကာ သူ၏ ပင်ကိုယ်နတ်ဘုရားစွမ်းအား၊ အစွယ်ရှစ်ချောင်း နတ်ဆင်ခွန်အားကို ထုတ်ဖော်လိုက်သည်။

ရွှစ်…

ချက်ချင်းပင် ဆူဇီမို၏ အော်ရာက နောက်တစ်ဆင့်သို့ မြင့်တက်လာခဲ့၏။

ထိုပင်ကိုယ်နတ်ဘုရားစွမ်းအား ထွက်ပေါ်လာပြီးနောက် ဆူဇီမို၏ ခန္ဓာကိုယ်၊ မျိုးဆက်သွေးနှင့် အမြုတေစိတ်ဝိညာဉ်တို့က သူတို့၏ အထွတ်အထိပ်သို့ ရောက်ရှိသွားခဲ့ပြီဖြစ်သည်။

ဘုန်း...

ကျယ်လောင်သော မြည်သံက ဆူဇီမို၏ ခန္ဓာကိုယ်ထဲကနေ ထွက်ပေါ်လာ၏။

သူ့ခန္ဓာကိုယ်က တစ်ချက်လှုပ်ခါသွားပြီးနောက် သူ၏ ပခုံးပေါ်ကနေ ခေါင်းသုံးလုံးက ပေါ်ထွက်လာပြီး သူ့ခန္ဓာကိုယ်၏ တစ်ဖက်တစ်ချက်စီကနေ လက်ခြောက်ဖက်က ကြီးထွားလာ၏။

အနှိုင်းမဲ့ နတ်ဘုရားစွမ်းအား၊ ခေါင်းလေးလုံး လက်ရှစ်ဖက်…

သူ့လက်နှစ်ဖက်က အနှိုင်းမဲ့ နတ်ဘုရားစွမ်းအားများကို တစ်ခုစီ ထုတ်ဖော်လိုက်သည်။

သူ၏ ခေါင်းလေးလုံး လက်ရှစ်ဖက် အခြေအနေမှာ ဆူဇီမိုသည် ဒေါသူပုန်ထနေပြီး သူ၏ အော်ရာက သိပ်သည်းပြင်းထန်အားကောင်းနေ၏။ အဆူရာဘုရင်တစ်ပါး ဆင်းသက်ရောက်ရှိလာသည့်အလားပင်။ သူ၏ အကြည့်က မိုးကြိုးလျှပ်စီးကဲ့သို့ ဝင်းဝင်းလက်နေပြီး သူက သူ့ဘေးပတ်လည်မှာရှိသော ခွန်ဘုရင်သုံးပါးကို စိုက်ကြည့်နေ၏။

ဟာ…

ခွန်ဘုရင်သုံးပါးက ပင့်သက်ကို ရှိုက်လိုက်ကြသည်။

“အဲဒါက ခေါင်းလေးလုံး လက်ရှစ်ဖက်ပဲ”

အစကတော့ သူတို့သုံးယောက်သည် ဆူဇီမိုကို ဝိုင်းပတ်ထားကြသည်။ သို့သော်လည်း ထိုအခိုက်အတန့်မှာ ခွန်ဘုရင်သုံးပါးသည် ဆူဇီမို၏ ဝိုင်းပတ်ခြင်း ခံနေရသည်ဟု ထင်ယောင်ထင်မှား မြင်မိလာကြသည်။

ဆူဇီမို၏ အသစ်ထွက်ပေါ်လာသော လက်ခြောက်ဖက်ကလည်း ဒီအတိုင်းမနေပေ။ သူတို့၏ လက်များကို တစ်ချိန်တည်းမှာ လှုပ်ရှားပြီး သူက အလုပ်များစွာကို တစ်ပြိုင်တည်းလုပ်ကာ မတူညီသော ဓမ္မပညာရပ်များကို ဆင့်ခေါ်လိုက်သည်။

နီရဲနေသော ဓားတစ်လက်မှာ အဆုံးမဲ့ သတ်ဖြတ်ခြင်းစိတ်ဆန္ဒ ပါဝင်နေပြီး လောကရှိ ကြယ်များကို ဆွဲငင်ယူလိုက်၏။ နဂါးနှင့် မြွေတို့က ကခုန်နေပြီး လောကက ကျွမ်းထိုးမှောက်ခုံ ဖြစ်သွားသည်။

အင်မော်တယ်နှိမ်နင်းဓား...

“ဂါး…”

“ဝေါင်း…”

“ဥုံ မာ ဏီ ပါ မီ ဟုံ”

ရုတ်တရက် သက္ကတဘာသာစကားသံက လေထဲမှာ ထွက်ပေါ်လာ၏။ နဂါးနှင့် ဆင်တို့၏ ဟိန်းဟောက်သံများနှင့်အတူ တွဲဖက်၍ ဗုဒ္ဓ နဂါး ဆင်က ဆူဇီမို၏ ဘေးပတ်လည်မှာ ပေါ်ထွက်လာ၏။ ဗုဒ္ဓအလင်းရောင်က တောက်ပလာပြီး ကောင်းကင်က နီရဲလာခဲ့သည်။

ဗုဒ္ဓ နဂါး ဆင်…

ဧရာမ ချောက်နက်ဝဲကတော့တစ်ခုက ကောင်းကင်ထက်ကနေ ဆင်းသက်လာပြီး ထူးဆန်းသော မှော်စာလုံးခြောက်လုံးနှင့်အတူ တောက်ပနေ၏။ ၎င်းက အဆက်မပြတ် လည်ပတ်နေပြီး လောကမှာရှိသော အရာရာတိုင်းကို ဝါးမျိုကာ သက်ရှိများအားလုံးကို ပြန်ဝင်စားခြင်း စက်ဝန်းထဲသို့ ဆွဲငင်ယူသွင်းချင်နေသည့်အလားပင်။

ပြန်လည်ဝင်စားခြင်း လမ်းခြောက်သွယ်…

ရွှစ်…

နီရဲနေသော မီးတောက်တစ်ခုက ပစ်လွင့်ထွက်ပေါ်လာပြီး လေထဲမှာ မီးတောက်နီရောင် ငှက်တစ်ကောင်အဖြစ် စုဖွဲ့သွားလေသည်။ ၎င်း၏ ခန္ဓာကိုယ်မှာ ကြောက်စရာကောင်းသော စွမ်းအားတစ်ခု ပါဝင်နေပြီး မနှိုင်းယှဉ်သာအောင် ပူပြင်းတောက်လောင်နေ၏။

ဟင်္သပဒါးငှက် ကောင်းကင်မီး…

နောက်ထပ် ဓမ္မပညာရပ်တစ်ခု ဆင်းသက်လာပြီး ဘေးပတ်ဝန်းကျင် လေဟာနယ်က ချုပ်နှောင်ခံလိုက်ရသည်။ အချိန်ကပင် ရပ်တန့်သွားခဲ့သည်။

ကြယ်တာရာအကျဉ်းထောင်…

ဆူဇီမို၏ ဘယ်ဘက်မျက်လုံးက ပိန်းပိတ်အောင် နက်မှောင်နေပြီး သူ၏ ညာဘက်မျက်လုံးက ပကတိဖြူဖွေးနေ၏။ တစ်ခုက အနက်၊ တစ်ခုက အဖြူဖြစ်သော ဂမ္ဘီရအလင်းနှစ်ခုက ပစ်လွင့်ထွက်ပေါ်လာပြီး လေထဲမှာ ဧရာမ ယင်ယန်ကြိတ်ဆုံကျောက်တစ်ခုအဖြစ် စုဖွဲ့သွားသည်။

အနန္တယင်ယန်…

အစွယ်ရှစ်ချောင်း နတ်ဆင်ခွန်အားနှင့် ခေါင်းလေးလုံး လက်ရှစ်ဖက် အပါအဝင် ဆူဇီမိုသည် အနှိုင်းမဲ့နတ်ဘုရားစွမ်းအား ရှစ်ခုကို တစ်ချိန်တည်းမှာ ထုတ်ဖော်လိုက်သည်။ ချက်ချင်းပင် မြေပြင်က တသိမ့်သိမ့် လှုပ်ခါပြီး လေဟာနယ်က တုန်ယင်လာခဲ့သည်။

ဤနေရာမှာရှိသော ရုတ်ရုတ်သဲသဲခြေအနေက အရမ်းကို ကြီးမားလာခဲ့သည်။ တစ်ဖက်မှာ တိုက်ခိုက်နေသော အင်မော်တယ်ဘုရင်မ ယိုလန်နှင့် အခြားနှစ်ယောက်ပင်လျှင် အလိုလိုလှည့်ကြည့်လာကြသည်။

ထိုအကြည့်တစ်ချက်က သူတို့သုံးယောက်ကို အံ့အားသင့် မှင်တက်သွားစေသည်။

“ဘာတွေဖြစ်နေတာလဲ”

“အနှိုင်းမဲ့နတ်ဘုရားစွမ်းအားတွေလား”

သူတို့ကျင့်ကြံမှု၏ ဤအဆင့်အရောက်မှာ သူတို့သည် အနှိုင်းမဲ့နတ်ဘုရားစွမ်းအားများ အားလုံးနီးပါးကို တွေ့မြင်ထားဖူးခဲ့သည်။

သို့သော်လည်း လူတစ်ယောက်၏ လက်ထဲကနေ တစ်ချိန်တည်းမှာ ထွက်ပေါ်လာသည့် ဤမျှများပြားသော အနှိုင်းမဲ့နတ်ဘုရားစွမ်းအားများကို သူတို့ ဘယ်တုန်းကမှ မတွေ့မြင်ဖူးခဲ့ပေ။

သူတို့ရှေ့မှ မြင်ကွင်းသည် ကမ္ဘာတုန်လောက်ဖွယ်ရာဖြစ်ပြီး ကြောက်စရာကောင်းလွန်းနေ၏။ အဲဒါသည် သူတို့၏ ကောင်းကင်လိုဏ်ဂူများကြား ထိပ်တိုက်ရင်ဆိုင် ရိုက်ခတ်ခြင်းထက် မနိမ့်ကျပေ။

ဆူဇီမိုသည် တစ်ခါက ခေါင်းလေးလုံး လက်ရှစ်ဖက် အခြေအနေပေါ် မှီခိုပြီး ချင်းဖျင်ဓားနှင့် အာဒိကပ္ပသမ္မဂ္ဂ မြင်းမြီးကျာပွတ်ကဲ့သို့ ရတနာများကို ကိုင်စွဲကာ အနီးကပ်တိုက်ခိုက်ရည်တွင် ပြိုင်ဘက်ကင်းခဲ့သည်။

တကယ်တော့ ဤသည်မှာ ခေါင်းလေးလုံး လက်ရှစ်ဖက်၏ အဆုံးစွန်သတ်ဖြတ်ကွက် မဟုတ်သေးပေ။

ခေါင်းလေးလုံး လက်ရှစ်ဖက် တည်ရှိနေခြင်း၏ အစစ်အမှန်အဓိပ္ပာယ်မှာ အနီးကပ်တိုက်ခိုက်ရည်အတွက်သာ မဟုတ်ပေ။

ခေါင်းလေးလုံး လက်ရှစ်ဖက် အခြေအနေမှာ ဆူဇီမိုသည် အနှိုင်းမဲ့နတ်ဘုရားစွမ်းအား ရှစ်ခုကို တစ်ချိန်တည်းမှာ ထုတ်ဖော်ပြီး သူ၏ သတ်ဖြတ်စွမ်းအားကို ၎င်း၏ အကန့်အသတ်အထိ ချက်ချင်း မြှင့်တင်နိုင်လေသည်။

အနှိုင်းမဲ့နတ်ဘုရားစွမ်းအားများသည် စွမ်းအားကြီးမားသော်လည်း ပကတိစိတ်ဝိညာဉ်များသည် သူတို့၏ ကျင့်ကြံမှုနယ်ပယ်များဖြင့် ကန့်သတ်ခံထားရသည်။ သူတို့က အနှိုင်းမဲ့စွမ်းအားများကို ထုတ်ဖော်သည့်အခါ ကောင်းကင်လိုဏ်ဂူများအပေါ် လုံးဝ သက်ရောက်စေနိုင်မည် မဟုတ်ပေ။

အနှိုင်းမဲ့နတ်ဘုရားစွမ်းအား နှစ်ခု သို့မဟုတ် သုံးခုကပင် ကောင်းကင်လိုဏ်ဂူများနှင့် ဆန့်ကျင်တိုက်ခိုက်နိုင်မည် မဟုတ်ပေ။

သို့သော်လည်း အနှိုင်းမဲ့နတ်ဘုရားစွမ်းအား ငါးခု သို့မဟုတ် ခြောက်ခုဆိုလျှင် ဘာဖြစ်လာမလဲ…

အနှိုင်းမဲ့နတ်ဘုရားစွမ်းအား ရှစ်ခုကို တစ်ချိန်တည်းမှာ ထုတ်ဖော်ပြီး အတူတကွ ထပ်ဆင့်သွားသည့်အခါ မည်ကဲ့သို့သော စွမ်းအားမျိုး ထွက်ပေါ်လာမလဲ။

သမိုင်းတစ်လျှောက်မှာ ဤကဲ့သို့သော အရာက ဘယ်တုန်းကမှ မဖြစ်ခဲ့ဖူးပေ။

ထို့ကြောင့် အနှိုင်းမဲ့နတ်ဘုရားစွမ်းအား ရှစ်ခုကို တစ်ချိန်တည်းမှာ ထုတ်ဖော်လိုက်သည့်အခါ သူတို့က ဘယ်လောက်ထိ စွမ်းအားကြီးမားလာမလဲ ဘယ်သူကမှ မသိပေ။

ဆူဇီမိုပင်လျှင် မသိပေ။

ဆူဇီမိုသည် သူ၏ ဘေးပတ်လည်မှာရှိသော ခွန်ဘုရင်သုံးဦးကို စိုက်ကြည့်ပြီး သူ၏ ပါးစပ်ကို တစ်ချိန်တည်းမှာ ဖွင့်ဟလိုက်၏။ သူ၏ အသံက ခေါင်းလောင်းထိုးသံကဲ့သို့ လောကတစ်ခွင် ပဲ့တင်ထပ်သွားပြီး သူက ဖြည်းဖြည်းချင်း ပြောလိုက်၏။

“မင်းတို့တွေအားလုံး.. ဒီနေ့ ဒါကို မင်းတို့မျက်လုံးနဲ့ ကိုယ်တိုင်မြင်တွေ့ရတာ ကံကောင်းကြတယ်”