အစည်းအဝေးသို့ တစ်ယောက်တည်းသွားခြင်း၊ ရုတ်တရက် အပြောင်းအလဲ

ယခုအချိန်တွင် စစ်ဝံပုလွေဂိုဏ်းခေါင်းဆောင်၏စကားများသည် လူတိုင်း၏အာရုံကို စွဲဆောင်သွားစေသောကြောင့် ဝမ်ဖေးဟုန်ကို မည်သူမှ မကြည့်တော့ပေ။ မန္တန်သည် သူ့ကို ဖိနှိပ်ထားသည့်အတွက် ယခုအချိန်တွင် စကားပင် မပြောနိုင်တော့ပေ။ ချိပ်ပိတ်မှုနှင့် ပတ်သက်၍ ချူးယွင်ဖန်း၏ ကျွမ်းကျင်မှုများသည် ၎င်းတို့ကို ထိတ်လန့်သွားစေသည်။ သူသည် ဤထူးခြားသော ချိပ်ပိတ်မှုနည်းပညာဖြင့် ကြီးမြတ်သော ဝေ့တိုင်းပြည်၏ ကျွမ်းကျင်သူများစွာထဲရှိ နေရာတစ်ခုကိုပင် သိမ်းပိုက်နိုင်ပေလိမ့်မည်။

"ခင်ဗျားရဲ့ရန်သူက ဘယ်သူလဲဆိုတာ ကျွန်မ သိချင်တယ်။ အကြောင်းပြချက်မရှိဘဲ ထောင်ချောက်ထဲ မကျချင်ဘူး" လူငယ်အကြီးအကဲက ဆိုသည်။

လျောင်သာ့ယီသည် အရှေ့သို့လှမ်းလာကာ ပြောလိုက်သည်။ "ကျုပ် သူ့အကြောင်းပြောပြပါ့မယ်။ သူ့နာမည်က ပုရှန်။ သူ့အသက်ငယ်စဥ်တုန်းက ခုန်းလုံမြို့မှာ ဂိုဏ်းတစ်ခုကို ဦးဆောင်ခဲ့ဖူးတယ်။ နောက်ပိုင်းမှာ ကျုပ်တို့စစ်ဝံပုလွေဂိုဏ်းက အဲ့ဒီဂိုဏ်းကို ဖျက်ဆီးပစ်လိုက်တယ်။ ဒါပေမယ့် ဒီလူ လွတ်သွားမယ်လို့တော့ မထင်ခဲ့မိဘူး’’

"သူ့မှာ ဘာကံကြမ္မာမျိုးနဲ့ ကြုံခဲ့လဲတော့ မသိပေမယ့် ကျော်ကြားတဲ့ ဆရာတစ်ယောက်ရဲ့ တပည့်ဖြစ်လာပြီး အခု သူ့ရဲ့ ကျင်ကြံမှုတွေက တော်တော်လေး တိုးတက်လာတယ်။ သူက ပိုလို့တောင် ရဲရင့်လာပြီး ဟိုတလောက ကျုပ်တို့ခေါင်းဆောင်ကို ခြုံခိုတိုက်ခိုက်ခဲ့တာ၊ အခု သူ ဂိုဏ်းငယ်တွေကို စုစည်းပြီး နေရာတိုင်းမှာရှိတဲ့ စစ်ဝံပုလွေဂိုဏ်းရဲ့ ဂိုဏ်းခွဲတွေကို ဆက်တိုက် ဖျက်ဆီးနေခဲ့တာ။ သူတို့တွေ အခု ဌာနချုပ်ကို ဦးတည်လာနေကြပြီ"

လူတိုင်း၏ အမူအရာများ လေးနက်လာကြသည်။ ဤပုရှန်ဆိုသူသည် အလွန် ကိုင်တွယ်ရခက်ခဲမည်ဖြစ်ကြောင်း သိသာထင်ရှားသည်။ ထိုသို့မှ မဟုတ်ပါက၊ စစ်ဝံပုလွေဂိုဏ်း၏ ခေါင်းဆောင်သည် ဒဏ်ရာရရှိသွားမည် မဟုတ်ပေ။

စစ်ဝံပုလွေဂိုဏ်းသည် ၎င်းတို့ခေါင်းဆောင်၏ ပြင်းထန်သော ခွန်အားကြောင့် ခုန်းလုံမြို့တွင် နှစ်ပေါင်းများစွာ ရပ်တည်နိုင်ခဲ့ခြင်းဖြစ်သည်။ ခုန်းလုံမြို့တွင် ကျွမ်းကျင်သူများစွာရှိသည့်အနက် ဂိုဏ်းခေါင်းဆောင်သည် ထိပ်တန်းပုဂ္ဂိုလ်တစ်ဦးဖြစ်ခဲ့သည်။ ယခုအခါ သူသည် ဒဏ်ရာအပြင်းအထန်ရရှိကာ တစ်ဦးချင်းတိုက်ခိုက်မှုတွင် ယုံကြည်မှု ပျောက်ဆုံးသွားသဖြင့် ပုရှန်ကို ဝန်းရံရန် သူ၏အင်အားကို အသုံးမချနိုင်ခဲ့ပေ။ ပုရှန်သည် လွယ်ကူသော ပြိုင်ဘက်တစ်ယောက်မဟုတ်ကြောင်း ခန့်မှန်းနိုင်သည်။

ခေါင်းဆောင်သည် လူတိုင်း၏ တုန်လှုပ်မှုကို သတိထားမိပုံပေါ်သည်။ "ခင်ဗျားတို့သာ ဒီမျိုးမစစ်ကောင်ကိုသတ်ပေးနိုင်ရင် ကျုပ်တို့ဂိုဏ်းက အဆင့်နိမ့်ဝိညာဉ်ကျောက်တုံး ဆယ်သန်းကို ဆုချီးမြှင့်မှာပါ"

ထိုအချိန်တွင် ကျွမ်းကျင်သူများ၏ အသက်ရှုနှုန်းများ မြန်ဆန်လာသည်။ ၎င်းတို့၏ ခွန်အားအရ၊ ၎င်းတို့သည် ချမ်းသာသူများဟုဆိုလျှင် ချဲ့ကားပြောဆိုခြင်း မဟုတ်ပေ။ သို့သော်လည်း အဆင့်နိမ့် ဝိညာဉ်ကျောက်တုံးဆယ်သန်းသည် ၎င်းတို့အတွက် များပြားသော ပမာဏတစ်ခုဖြစ်နေသေးသည်။ တစ်စိတ်တစ်ပိုင်းမျှသာ ရရှိနိုင်မည်ဖြစ်သော်လည်း၊ ၎င်းသည် သိသာထင်ရှားသော ပမာဏဖြစ်နေဆဲဖြစ်သည်။ အဆင့်နိမ့် ဝိညာဉ်ကျောက်တုံးဆယ်သန်းသည် နတ်အဆင့် အထွတ်အထိပ်တွင်ရှိနေသာ ကျွမ်းကျင်သူတစ်ဦး၏အသက်ကို ဝယ်ယူရန် လုံလောက်ပေသည်။ ချူးယွင်ဖန်းလျှင်ပင် မက်မောမိသွားလေသည်။

"ကောင်းပြီ၊ ဒီလိုဆိုမှတော့ ကျုပ် ဒီကမ်းလှမ်းချက်ကို လက်ခံတယ်" ထူးခြားဆန်းကြယ်သော အကြီးအကဲက ပြောလိုက်သည်။

အခြားလူများသည်လည်း သဘောတူလိုက်ကြစဥ် ချူးယွင်ဖန်းတစ်ဦးတည်းသာ မည်သည့်စကားမျှ မပြောခဲ့ပေ။ သို့တိုင် မည်သူမျှ သူ့ကို လျှော့မတွက်ရဲကြပေ။ ရုတ်တရက်ဆိုသလိုပင် ဌာနချုပ်အပြင်ဘက်တွင် ကျယ်လောင်သော တိုက်ပွဲသံများ ကြားလိုက်ရသောကြောင့် လူတိုင်း တုံ့ပြန်လာကြသည်။ ၎င်းတို့သည် နတ်အာရုံများကို ဖြန့်ကျက်လိုက်သောကြောင့် အပြင်ဘက်ရှိအခြေအနေကို ချက်ချင်း သိရှိသွားကြသည်။

ကမ္ဘာတစ်ဝှမ်းမှ ရောက်ရှိလာကြသည့် ဂိုဏ်းငယ်များ၏ အဖွဲ့ဝင်များသည် အချင်းချင်းစုရုံးကာ စစ်ဝံပုလွေဂိုဏ်း၏ဌာနချုပ်ကို စတင်တိုက်ခိုက်လာခြင်းဖြစ်သည်။ ဤသည်မှာ ချူးယွင်ဖန်းသည် ဝိညာဉ်နယ်မြေရှိ စစ်ပွဲဖြစ်စဥ်ကို ပထမဆုံးအကြိမ် မြင်တွေ့ဖူးခြင်းဖြစ်သည်။ ဂိုဏ်းများကြားရှိ တိုက်ပွဲတစ်ခုမျှသာဖြစ်သော်လည်း ဤဂိုဏ်းများသည် ချီတက်မှုနှင့် ဆုတ်ခွာမှုများကို စစ်တပ်များကဲ့သို့ အတိုင်းအတာတစ်ခုအထိ သိရှိနေကြသည်။

၎င်းတို့သည် သာမန်လူရမ်းကားများသာ မဟုတ်ကြပေ။ ထိုဂိုဏ်းများတွင် စစ်သားများကဲ့သို့ အထူးတလည် လေ့ကျင့်သင်ကြားခံထားရသည့် လက်ရွေးတစ်အချို့ပါရှိနေသည်။ ၎င်းတို့သည် ချီတက်မှုနှင့် ဆုတ်ခွာမှုတို့ကို သိထားကြ၍ တိုက်ပွဲဖွဲ့စည်းပုံများ တက်မြောက်ထားကြသည်။ ၎င်းတို့၏ ခွန်အားသည် အလွန်ထူးခြားလှသည်။

ဌာနချုပ်ကို နည်းလမ်းအမျိုးမျိုးဖြင့် တိုက်ခိုက်နေခြင်းသည် ချူးယွင်ဖန်း၏အမြင်အာရုံကိုပင် ပွင့်လန်းစေခဲ့သည်။ ဌာနချုပ်ကို တိုက်ခိုက်နေသည့် ဤရှေးဆန်သော နည်းလမ်းသည် ပြည်ထောင်စု၏ ရိုးရှင်း၍ ကြမ်းတမ်းသော နည်းလမ်းနှင့် လုံးလုံးလျားလျား ကွဲပြားပေသည်။ ပြည်ထောင်စု၏ မြို့များကို တိုက်ခိုက်သည့် နည်းလမ်းများသည် များသောအားဖြင့် ရိုးရှင်းလှသည်။ ၎င်းတို့သည် မြေပြင်ကို ဗုံးကြဲရန်အတွက် နည်းပညာမြင့်လက်နက်မျိုးစုံနှင့် နျူကလီးယားဗုံးများကို အသုံးပြုလေ့ရှိသည်။ ဤကဲ့သို့ ပြင်းထန်သော တိုက်ခိုက်မှုများကို မည်သည့်ရန်သူမျှ ခုခံနိုင်မည် မဟုတ်ပေ။

စစ်မြေပြင်ကို စိုးမိုးရန် အမျိုးမျိုးသော လက်နက်စွမ်းအင်များကို အသုံးပြုပြီးနောက် ၎င်းတို့၏ စစ်လွန်းပျံယာဥ်များသည် ထိုနယ်မြေကို ဗုံးကြဲတိုက်ခိုက်ကြပေလိမ့်မည်။ နောက်ဆုံးတွင် စက်လက်နက်များသည် စစ်မြေပြင်တွင် ကျန်ရစ်သော ရန်သူများကို ရှင်းလင်းကြမည်ဖြစ်သည်။ ဤရိုးရှင်းသော နည်းလမ်းကို “ပုဆိန်သုံးချောင်း" ဟု နောက်ပြောင်ခေါ်ဝေါ်လေ့ရှိကြသော်လည်း ၎င်း၏ထိရောက်မှုကို ဝန်ခံထားရမည်ဖြစ်သည်။

သို့ရာတွင် ဝေ့တိုင်းပြည်၏ ဝိုင်းရံတိုက်ခိုက်မှုသည် သိုင်းပညာကျွမ်းကျင်သူများဖြစ်သောကြောင့် လုံးလုံးလျားလျား ကွဲပြားခြားနားသည်။ ၎င်းတို့သည် လှေခါးတစ်ခုပင် မလိုအပ်ကြပေ။ ၎င်းတို့သည် စစ်ရထားများကို မြို့ရိုးအောက်ခြေသို့ တစ်ခုပြီးတစ်ခု တွန်းပို့ကာ အသည်းအသန် တိုက်ခိုက်နေကြသည်။

ကြီးမားသော စစ်ရထားများ၏ ရိုက်ခတ်မှုကြောင့် မြို့ရိုးများပေါ်တွင် ကြီးမားသော အက်ကြောင်းများ ပေါ်ပေါက်လာသည်။ ကျွမ်းကျင်သူအချို့သည် မြေပြင်မှ ပျံသန်းကာ မြို့ရိုးများပေါ် လျင်မြန်စွာ တက်လာကြသည်။ ဤထူးခြားသော တိုက်ခိုက်နည်းသည် ချူးယွင်ဖန်း၏ အမြင်အာရုံများကို ကျယ်ပြန့်စေသော်လည်း အရေးတကြီးဖြစ်နေသော အခြေအနေကို ခံစားမိသောကြောင့် အခြားလူများသည် သူကဲ့သို့ သက်သောင့်သက်သာမရှိလှပေ။

"အားလုံး မလန့်ကြပါနဲ့၊ ပုရှန်ရဲ့ တည်နေရာကို အရင်အတည်ပြုပြီးမှ သူ့ကို မျှားခေါ်ကြရအောင်။ ပြီးရင် သူ့ကို ဝိုင်းပြီးတိုက်ခိုက်ကြတာပေါ့၊ အဲ့ဒီ့ကြုံရာကျပန်းအဖွဲ့သားတွေအတွက်လည်း စိတ်မပူပါနဲ့။ ဒီနေရာက စစ်ဝံပုလွေဂိုဏ်းရဲ့ ဌာနချုပ်ပါ။ ဒင်းတို့တွေ ကျုပ်တို့ကို တိုက်ခိုက်ဖို့ အဲ့လောက်လွယ်မှာ မဟုတ်ပါဘူး" ခေါင်းဆောင်က ပြောလိုက်သည်။

လူတိုင်းက ခေါင်းညိတ်ပြလိုက်သည်။ ၎င်းတို့သည် ဤသာမန်လူများကို ဖြေရှင်းရန်အတွက် ဖိတ်ခေါ်ခံခဲ့ရခြင်း မဟုတ်ပေ။ စစ်ဝံပုလွေဂိုဏ်းတွင် လာရောက်တိုက်ခိုက်နေသည့် ဂိုဏ်းပေါင်းစုံရှိ နတ်အဆင့်များကို ကိုင်တွယ်ဖြေရှင်းမည့် နတ်အဆင့်ကျွမ်းကျင်သူများရှိနေသောကြောင့် ၎င်းတို့အတွက် စိတ်ပူရန် မလိုအပ်ပေ။

ရုတ်တရက်ဆိုသလို၊ လှောင်ပြောင်ရယ်မောသံနှင့်အတူ ဟင်းလင်းပြင်ထဲမှ ပုံရိပ်တစ်ခု ထွက်ပေါ်လာသည်။

"ခင်ဗျားက ကျုပ်ကိုရှာနေတာလား"

လူတိုင်း၏ စိတ်နှလုံးများ တင်းမာသွားသည်။ ၎င်းတို့အားလုံး လှည့်ကြည့်လိုက်သည်နှင့် ပိန်ပါးသော လူလတ်ပိုင်းအရွယ် အမျိုးသားတစ်ဦးကို တွေ့လိုက်ရသည်၊ သူ၏မျက်နှာတွင် ရှည်လျားသော အမာရွတ်တစ်ခုရှိနေသည့်အတွက် ပြုံးရယ်လိုက်သောအခါ သူ၏အမူအရာကို အလွန် ရက်စက်ကြမ်းကြုတ်ပုံပေါ်စေသည်။

"ပုရှန်"

လူတိုင်း တုံ့ပြန်လာကြသည်။ ဤသည်မှာ ၎င်းတို့အားလုံး ကိုင်တွယ်ဖြေရှင်းရန် တာဝန်ပေးခံထားရသည့် ပုရှန်ဟူသော ပစ်မှတ်ဖြစ်သည်။

"ခင်ဗျားလိုလူအိုကြီးတစ်ယောက် အသက်ရှင်နေဦးမယ်လို့ ကျုပ် တကယ် မမျှော်လင့်ထားဘူး။ နှမြောစရာပဲ" ပုရှန်က ခေါင်းဆောင်ကို ကြည့်၍ မောက်မာစွာ ပြောလိုက်သည်။

"ကောင်းပြီ၊ ဒီတစ်ခါတော့ ခင်ဗျားရဲ့လည်ပင်းကို ကျုပ်ကိုယ်တိုင် ချိုးပစ်မယ်။ စစ်ဝံပုလွေဂိုဏ်းမှာရှိနေတဲ့ ဘယ်သူမှ ထွက်သွားနိုင်မှာ မဟုတ်ဘူး။ ကျုပ် ခင်ဗျားတို့အားလုံးကို သတ်ပစ်မယ်"

ထိုအချိန် ပုရှန်၏ မျက်လုံးများတွင် ရူးသွပ်မှုများဖြင့် နီရဲလာသည်။ သူသည် နှစ်များစွာကြာမြင့်ပြီးနောက် လက်စားချေနိုင်ပြီဖြစ်သည်။ ဤသည်မှာ နှစ်ပေါင်းများစွာကြာမျှ ခါးသီးသော ကျင့်ကြံမှုများ၏ ရလဒ်ဖြစ်သည်။

"ဘာကိုစောင့်နေကြတာလဲ။ တိုက်ခိုက်ကြ" ခေါင်းဆောင်က ထိုသို့အော်ဟစ်လိုက်သည်နှင့် ထူးခြားဆန်းကြယ်သော အကြီးအကဲနှင့် အခြားလူများအားလုံး ချက်ချင်း စည်းရုံးလိုက်ကြသည်။

သို့သော် မထင်မှတ်ထားသည့် အကြောင်းအရာတစ်ခု ဖြစ်ပျက်သွားလေသည်။ ဤတစ်ချိန်လုံး တိတ်ဆိတ်နေသည့် ကျန်းမိသားစု၏ အမွှာကြယ်စင်သည် ရုတ်တရက် တိုက်ခိုက်လာကြသည်။ အစ်ကိုကြီးဖြစ်သူသည် လူငယ်အကြီးအကဲကို တိုက်ခိုက်လိုက်သည်။ သူသည် တိုက်ခိုက်မှုကို ကြိုတင်စီစဉ်ထားသည့်အတွက် သူမကို မလှမ်းမကမ်းသို့ လွင့်ပျံသွားစေသည့်အပြင် ဒဏ်ရာအပြင်းအထန်ရရှိသွားစေ၏။