အစစ်အမှန်တိုက်ခိုက်ရည်ခွန်အား

ဝုန်း…

နောက်ထပ် ကျယ်လောင်သော ပေါက်ကွဲသံ ထွက်ပေါ်လာသည်။

ဆူဇီမို၏ ကောင်းကင်လိုဏ်ဂူ ပုံရိပ်ယောင်နှင့် ခွန်ဘုရင်၏ ကောင်းကင်လိုဏ်ဂူအသေးက တစ်ချိန်တည်းမှာ ကြေမွပြီး ဘာမှမကျန်အောင် ပြောင်းလဲသွား၏။

ဆူဇီမိုသည် လက်တစ်ဖက်က အာဒိကပ္ပသမဂ္ဂ မြင်းမြီးကျာပွတ်ကို ကိုင်မြှောက်လိုက်ပြီး ငွေရောင်ချည်မျှင်သုံးထောင်က လေထုကို ဆုတ်ဖြဲကာ ခွန်ဘုရင်၏ ခန္ဓာကိုယ်ကို ရစ်ပတ်၍ သူ၏ အစစ်အမှန်ပုံစံသို့ မပြောင်းလဲနိုင်အောင် တားဆီးပေးထားသည်။

တစ်ချိန်တည်းမှာပင် သူက သုံးပါးရတနာ ကျောက်စိမ်းတောင်ဝှေးကို နောက်ထပ်လက်တစ်ဖက်ဖြင့် ထုတ်ယူပြီး ခွန်ဘုရင်၏ ဦးခေါင်းရှိရာသို့ ပစ်ရိုက်ချလိုက်၏။

နောက်ထပ်လက်တစ်ဖက်နှင့်အတူ သူက ချင်းဖျင်ဓားကို လွှဲယမ်းပြီး တစ်ဖက်သူ၏ နှာရောင်ကို ပစ်ထိုးလိုက်သည်။

အခြားသော ခွန်ဘုရင်က အခြေအနေမကောင်းတော့သည်ကို တွေ့မြင်သောအခါ သူက သူ၏ ကောင်းကင်လိုဏ်ဂူကို အလောတကြီး မြှောက်တင်ပြီး ဆူဇီမိုကို ဖိနှိမ်ဖို့ ကြိုးစားလိုက်၏။

ဆူဇီမို၏ ကောင်းကင်လိုဏ်ဂူ ပုံရိပ်ယောင်သည် စောစောက ထိတွေ့ရိုက်ခတ်မှုမှာ ပျက်ပြယ်သွားခဲ့ပြီဖြစ်သည်။ ယခုအချိန်မှာ သူသည် နောက်ထပ် ကောင်းကင်လိုဏ်ဂူအသေးတစ်ခု၏ တိုက်ခိုက်မှုကို ခံနိုင်ရည်မရှိတော့မည့်ပုံပင်။

သူ့ခန္ဓာကိုယ်ထဲကနေ အရိုးများ အက်ကွဲသံက ထွက်ပေါ်လာပြီး သူ၏ ခန္ဓာကိုယ်က အနည်းငယ် တုန်ယင်နေ၏။

“မင်းက ဘယ်လောက်ထိ အသက်ရှင်နိုင်ဦးမလဲ ကြည့်ရသေးတာပေါ့”

ခွန်ဘုရင်က အော်ငေါက်လိုက်ပြီး သူ၏ အမြုတေစိတ်ဝိညာဉ်ကို လှည့်ပတ်ကာ သူ၏ ကောင်းကင်လိုဏ်ဂူ စွမ်းအားများအားလုံးကို ထုတ်ဖော်လိုက်၏။

သူ၏ နောက်ဘက်မှာရှိသော ကောင်းကင်လိုဏ်ဂူက ညိုမှောင်နေသော အရောင်တစ်ခုကို ထုတ်ဖော်ပြီး အထဲမှာ ဆူနာမီတစ်ခုက တရုန်းရုန်းထကြွကာ အေးစက်၍ မကောင်းဆိုးဝါးဆန်နေပြီး ဆူဇီမိုကို တစ်စတစ်စ လွှမ်းခြုံနေ၏။

ဆူဇီမို၏ ကိုယ်ကာယသည် ကောင်းကင်လိုဏ်ဂူနယ်ပယ်ကို တကယ်ပင် ရောက်ရှိနေပြီဖြစ်သည်။

သို့သော်လည်း သူ့အနေဖြင့် ကောင်းကင်လိုဏ်ဂူအသေးတစ်ခု၏ စွမ်းအားကို ခုခံဖို့က ခက်ခဲနေဆဲဖြစ်သည်။

ဆူဇီမို၏ ခန္ဓာကိုယ်က ကောင်းကင်လိုဏ်ဂူအသေးဖြင့် တစ်စတစ်စ ဝါးမျိုခြင်းခံနေရသည်ကို တွေ့ရသောအခါ ရှောင်းယောင်က သူ၏ လက်သီးနှစ်ဖက်ကို ဆုပ်ပြီး သူ့မျက်လုံးထဲရှိ မျက်ရည်များနှင့်အတူ အဆက်မပြတ် ရုန်းကန်နေ၏။

သူ့ခန္ဓာကိုယ်ပေါ်ရှိ ချိန်းကြိုးများကနေ တချွင်ချွင်အသံများ ထွက်ပေါ်လာသည်။

“ဟဲဟဲ”

အနက်ရောင်ချပ်ဝတ်တန်ဆာဝတ် အမျိုးသားက ရယ်မောပြီး ဝင့်ကြွားစွာ ပြောလိုက်၏။

“ရုန်းမကန်နေနဲ့… ဒါက မင်းဆရာနဲ့ မင်းရဲ့ ကံကြမ္မာပဲ”

အင်မော်တယ်ဘုရင်မ ယိုလန်က ဤမြင်ကွင်းကို ကြည့်ပြီး သူမဘာသာသူမ သက်ပြင်းချလိုက်၏။

ဆူဇီမိုသည် ခွန်ဘုရင်နှစ်ဦးကို သတ်ဖြတ်ပြီး တတိယမြောက်ကောင်းကင်လိုဏ်ဂူကို ဖျက်ဆီးနိုင်ခဲ့သည့်အချက်ကပင် သူမတွေးထင်ထားသည်ထက် များစွာကျော်လွန်နေပြီဖြစ်သည်။

ကံဆိုးစွာနှင့်ပင် သူက အနည်းငယ်လိုအပ်နေဆဲဖြစ်သည်။

ယခု ဆူဇီမိုက သေရတော့မည်ဖြစ်ပြီး သူမအနေဖြင့် ဤနေရာမှာ ဆက်လက်၍ ရုန်းကန်နေစရာ မလိုတော့ပေ။ သူမအနေဖြင့် ထွက်ပေါက်တစ်ခုကို ကြံဆရတော့မည်ဖြစ်သည်။

ထိုစဉ်မှာပင် ခွန်ဘုရင်၏ ကောင်းကင်လိုဏ်ဂူထဲကနေ ထည်ဝါသော အသံတစ်သံ ထွက်ပေါ်လာ၏။

“ကံကြမ္မာကို ငါ ဘယ်တုန်းကမှ မယုံဘူး”

ထိုသို့ သူပြောလိုက်သည့်ခဏမှာပင် ခွန်ဘုရင်၏ ကောင်းကင်လိုဏ်ဂူအသေးထဲကနေ ကြောက်စရာကောင်းသော အက်ကွဲသံများ ထွက်ပေါ်လာ၏။

ကောင်းကင်လိုဏ်ဂူအသေးပေါ်မှာ ပင့်ကူအိမ် အက်ကွဲကြောင်းများ တဖြည်းဖြည်းပေါ်ထွက်လာပြီး လျင်မြန်စွာ ဖြန့်ကြက်ကာ ကောင်းကင်လိုဏ်ဂူတစ်ခုလုံးကို ဖုံးလွှမ်းသွား၏။

ဝေါ…

ရုတ်တရက်ဆိုသလို…

ကောင်းကင်လိုဏ်ဂူအသေး၏ အက်ကွဲကြောင်းများထဲကနေ ကျိန်းစပ်နေသော အစိမ်းရောင်အလင်းတန်းများ ပစ်လွင့်ထွက်ပေါ်လာပြီး ကောင်းကင်တစ်ခွင် ထိန်ထိန်လင်းသွားစေသည်။

ဝုန်း…

ထို့နောက် ချက်ချင်းပင် ကျယ်လောင်သော ပေါက်ကွဲသံက တိုက်ပွဲနယ်မြေမှာ ထွက်ပေါ်လာ၏။

ခပ်လှမ်းလှမ်းမှာ တိုက်ခိုက်နေသော အင်မော်တယ်ဘုရင်မ ယိုလန်နှင့် အခြားနှစ်ယောက်ပင်လျှင် တုန်လှုပ်သွားပြီး အလိုလိုလှည့်ကြည့်လာကြ၏။

ထို့နောက် သူတို့သုံးယောက်သည် ဖော်မပြတတ်အောင် တုန်လှုပ်စရာကောင်းသည့် မြင်ကွင်းတစ်ခုကို တွေ့မြင်လိုက်ရသည်။

လုံးလုံးလျားလျား မြစိမ်းရောင်ဖြစ်သော အစိမ်းရောင်ကြာပန်းတစ်ပင်က ကောင်းကင်လိုဏ်ဂူအသေးထဲကနေ ထိုးဖောက်ထွက်ပြီး ကောင်းကင်ထက်သို့ ဆန်တက်လာ၏။ ကြီးမားသော ကြာရွက်များက ပေါ်ထွက်လာပြီး ကောင်းကင်တခွင် အုပ်မိုးကာ အလင်းရောင်ဖြင့် တဖျတ်ဖျတ်လက်နေ၏။

အစိမ်းရောင်ကြာပင်၏ ထိပ်ဖျားမှာ အစိမ်းရောင်အလင်းဖြင့် ပြည့်နှက်နေသော ကြာပန်းတစ်ခု ပေါ်ထွက်လာသည်။ ကြာရွက် ၁၂ရွက်က အဆက်မပြတ် ပြန့်ကားလာပြီး ကြာစေ့ ၁၀၈ခုက လေထဲမှာ ကခုန်နေ၏။

အစိမ်းရောင်ကြာပင်က မနှိုင်းယှဉ်သာအောင် ကြောက်စရာကောင်းသော အော်ရာတစ်ခုကို ထုတ်ဖော်ထားပြီး သက်ရှိများအားလုံး၏ နတ်ဘုရားတစ်ပါးကဲ့သို့ ဖြစ်နေသည်။ ၎င်းသည် ကြယ်များကြားမှာ အမြစ်တွယ်ပြီး အလယ်အလတ်ကမ္ဘာတစ်ထောင်လောကကို အထက်စီးကနေ ငုံ့ကြည့်နေသည့်အလားပင်။

ဟာ…

အထွတ်အထိပ်ဘုရင်သုံးဦးက တွေ့မြင်ရသော မြင်ကွင်းမှာ တုန်လှုပ်သွားကြသည်။

“ဒါက…”

“အဆင့်-၁၂ ဖန်တီးခြင်းကြာပဒုမ္မာ…”

အင်မော်တယ်ဘုရင်မ ယိုလန်သည် ဆူဇီမိုက ဖန်တီးခြင်းကြာပဒုမ္မာနှင့် ဆက်စပ်နေနိုင်သည်ကို ခန့်မှန်းမိထားခဲ့ပြီးသားဖြစ်သည်။ သို့သော်လည်း ဆူဇီမိုသည် ဖန်တီးခြင်းကြာပဒုမ္မာကို အဆင့်-၁၂ အထိ ကျင့်ကြံထားလိမ့်မည်ဟု ထင်မှတ်မထားခဲ့ပေ။

ပုံမှန်အခြေအနေအောက်မှာဆိုလျှင် ဆူဇီမို၏ ကိုယ်ကာယသည် ကောင်းကင်လိုဏ်ဂူအသေးတစ်ခု၏ အဆင့်ကို ရောက်ရှိနေခဲ့ပြီဖြစ်သည်။

အစွယ်ရှစ်ချောင်း နတ်ဆင်ခွန်အားကို ထုတ်ဖော်ပြီးနောက် မျိုးဆက်သွေးနယ်မြေ၏ စွမ်းအားက ကောင်းကင်လိုဏ်ဂူအသေးတစ်ခုကို ကျော်လွန်လာခဲ့ပြီဖြစ်သည်။

အဆင့်-၁၂ ဖန်တီးခြင်းကြာပဒုမ္မာ၏ မျိုးဆက်သွေးနယ်မြေက ပေါ်ထွက်လာသည်။ ခေါင်းလေးလုံး လက်ရှစ်ဖက် အခြေအနေမှာ ရှိနေသော ဆူဇီမိုက ချက်ချင်းပင် ရုန်းထွက်ပြီး သုံးပါးရတနာ ကျောက်စိမ်းတောင်ဝှေး၊ အာဒိကပ္ပသမဂ္ဂ မြင်းမြီးကျာပွတ်နှင့် ချင်းဖျင်ဓားတို့ကို နောက်တစ်ဖန် ကိုင်စွဲကာ ခွန်ဘုရင်နှစ်ပါးရှိရာသို့ ပြေးဝင်လာ၏။

ခွန်ဘုရင်နှစ်ပါးက ကြက်သေသေနေကြသည်။

ဤကဲ့သို့ ကြောက်စရာကောင်းသော တိုက်ခိုက်ရည်ခွန်အားကို ထုတ်ဖော်နိုင်သည့် ပကတိစိတ်ဝိညာဉ်တစ်ဦးကို သူတို့ဘယ်တုန်းကမှ မတွေ့မြင်ဖူးခဲ့ပေ။

ပကတိစိတ်ဝိညာဉ်တစ်ဦး၏ မျိုးဆက်သွေးနယ်မြေက ကောင်းကင်လိုဏ်ဂူအသေးတစ်ခုကိုပင် ဖျက်ဆီးပစ်နိုင်နေသည်။ ဒါက မည်ကဲ့သို့သော မျိုးဆက်သွေးမျိုးလဲ…။

သူတို့၏ ကောင်းကင်လိုဏ်ဂူများ၏ ကာကွယ်မှုမရှိဘဲ သူတို့နှစ်ယောက်သည် ဆူဇီမို၏ သတ်ဖြတ်ခြင်းစိတ်ဆန္ဒကို လုံးဝမခုခံနိုင်ကြပေ။

အနီးကပ်တိုက်ခိုက်ရည်မှာ ခေါင်းလေးလုံး လက်ရှစ်ဖက် အခြေအနေမှာရှိသော ဆူဇီမိုကို မည်သူကမှ မယှဉ်နိုင်ပေ။

လက်ရှိ ခွန်ဘုရင်နှစ်ဦးကို မပြောနှင့်၊ နောက်ထပ် ခွန်ဘုရင်နှစ်ဦး ရောက်လာလျှင်ပင် မရပေ။

ခွန်ဘုရင်နှစ်ဦးက သူတို့၏ မျိုးဆက်သွေးနယ်မြေများကို တစ်ယောက်ပြီးတစ်ယောက် ထုတ်ဖော်လိုက်ကြ၏။ သို့သော်လည်း သူတို့သည် အဆင့်-၁၂ ဖန်တီးခြင်းကြာပဒုမ္မာ၏ ထိတွေ့ရိုက်ခတ်မှုကို ခံနိုင်ရည်မရှိပေ။

သူတို့၏ နောက်ဘက်မှာ ဧရာမခွန်များ ပေါ်ထွက်လာပြီး အဆင့်-၁၂ ဖန်တီးခြင်းကြာပဒုမ္မာကို ဝါးမျိုပစ်ချင်နေသည်။ သို့သော်လည်း သိပ်မကြာခင် သူတို့သည် ဖန်တီးခြင်းကြာပဒုမ္မာ၏ ယိမ်းနွဲ့မှုမှာ ကြေမွပျက်စီးသွားပြီး ဘာမှမကျန်အောင် ပြောင်းလဲသွားလေသည်။

ကြောက်စရာအကောင်းဆုံးအရာမှာ ခွန်ဘုရင်နှစ်ဦးသည် သူတို့၏ မျိုးဆက်သွေးများ ဖိနှိမ်ခံနေရသည်ဟု ရှင်းရှင်းလင်းလင်း ခံစားနေရသည်။

သူ့နောက်ဘက်မှာ လွင့်မျောနေသည့် အနှိုင်းမဲ့ အဆင့်-၁၂ ဖန်တီးခြင်းကြာပဒုမ္မာနှင့်အတူ ဆူဇီမိုက သူ၏ ခေါင်းလေးလုံး လက်ရှစ်ဖက် အခြေအနေမှာ နတ်ဘုရားစွမ်းအားအမျိုးမျိုးကို ကိုင်စွဲထားသည်။ သူ၏ အကြည့်က မိုးကြိုးလျှပ်စီးကဲ့သို့ ဝင်းဝင်းလက်နေပြီး သူ၏ အော်ရာက သိပ်သည်းပြင်းထန်ကာ ပြိုင်ဘက်ကင်းနေသည်။

ဆူဇီမို၏ အစိမ်းရောင်ကြာပန်း အစစ်အမှန်ခန္ဓာသည် ပကတိဧကနယ်ပယ်သို့ ဝင်ရောက်လာပြီးကတည်းက သူသည် သူ၏ မျိုးဆက်သွေး ပေါက်ကြားသွားမည်ကို စိုးရိမ်ရသောကြောင့် သူ၏ ခွန်အားအပြည့်အဝကို ဘယ်တုန်းကမှ အသုံးမပြုခဲ့ရပေ။

ဆူဇီမိုသည် ဆိုးယုတ်မိစ္ဆာတိုက်ပွဲမြေမှာ အန္တိမပကတိစိတ်ဝိညာဉ် ဆယ်ဦးကျော်ဖြင့် ဝိုင်းပတ်ပိတ်ဆို့ခံရပြီး သူက လူတိုင်းကို သတ်ဖြတ်ခဲ့စဉ်မှာတောင် သူ၏ ခွန်အားကို ထိန်ချန်ထားခဲ့ရဆဲဖြစ်သည်။

ယနေ့မှာသာ အဆင့်-၁၂ ဖန်တီးခြင်းကြာပဒုမ္မာ အစစ်အမှန်ခန္ဓာသည် သူ၏ ခွန်အားအပြည့်အဝကို အမှန်တကယ် ထုတ်ဖော်လိုက်ခြင်းဖြစ်ပြီး အချီရေအနည်းငယ်အတွင်းမှာ ခွန်ဘုရင်နှစ်ဦးကို သတ်ဖြတ်ပစ်လိုက်၏။ ဤသည်ကမှ အစိမ်းရောင်ကြာပန်း အစစ်အမှန်ခန္ဓာ၏ အစစ်အမှန် တိုက်ခိုက်ရည်ခွန်အားဖြစ်သည်။

ဆူဇီမိုသည် ကောင်းကင်လိုဏ်ဂူနယ်ပယ်သို့ မတက်လှမ်းရသေးခင်မှာပင် အင်မော်တယ်ဘုရင်မ ယိုလန်နှင့်အတူ ရှေ့သို့ထွက်လာရဲခဲ့သည်။

အဓိကအကြောင်းအရင်းမှာ သူ့မှာ ဤကဲ့သို့သော နောက်ချန်အစီအစဉ် ရှိနေသောကြောင့်ဖြစ်သည်။

သူသည် သာမန်အင်မော်တယ်ဘုရင်များနှင့် ရင်ဆိုင်ရမည်ဆိုလျှင် သူတို့ကို သတ်ဖြတ်ဖို့အတွက် လုံလောက်သည့် နည်းလမ်းများ သူ့မှာရှိနေသည်ကို သိရှိထားသည်။

သူသည် အန္တိမဘုရင်များ သို့မဟုတ် အထွတ်အထိပ်ဘုရင်များကို မနိုင်ဘူးဆိုလျှင်တောင် သူ့မှာ ကီလိုမီတာထောင်ချီအဝေးကို ထွက်ပြေးလွတ်မြောက်နိုင်မည့် အခွင့်အရေးရှိနေသည်။

လက်ရှိအခြေအနေမှာ အနက်ရောင်ချပ်ဝတ်တန်ဆာကို စောင့်ရှောက်ပေးနေသည့် ခွန်ဘုရင်လေးဦးစလုံးက သေဆုံးသွားကြပြီဖြစ်သည်။

ပထမဆုံးတစ်ယောက်ကသာ ငေးငိုင်နေစဉ် ဆူဇီမို၏ လုပ်ကြံသတ်ဖြတ်ခြင်း ခံခဲ့ရခြင်းဖြစ်သည်။

သူကလွဲလျှင် အခြားသုံးယောက်သည် ဆူဇီမိုနှင့် ထိပ်တိုက်ရင်ဆိုင်တိုက်ပွဲမှာ ဖိနှိမ်ခံရပြီး သတ်ဖြတ်ခံလိုက်ရသည်။

ထိုသည်ကို တွေ့မြင်သောအခါ လေထဲမှာရှိသော အနက်ရောင်ချပ်ဝတ်တန်ဆာဝတ်အမျိုးသားက နောက်ဆုံး ထိတ်လန့်တကြားဖြစ်လာခဲ့သည်။

ခွန်ဘုရင်လေးဦးကို သတ်ဖြတ်ပြီးနောက် ဆူဇီမိုသည် ချက်ချင်းပင် သူ့ကို စိုက်ကြည့်ကာ ပစ်မှတ်ထားလာခဲ့သည်။

“ဘုရင်ကမ္ဘာမြေခွန်… ကျုပ်ကို မြန်မြန်လာကယ်ဦး”

အနက်ရောင်ချပ်ဝတ်တန်ဆာဝတ်အမျိုးသားက ရင်တစ်ချက်ထိတ်သွားပြီး အလောတကြီး လှမ်းအော်ပြောလိုက်၏။

ဘုရင်ကမ္ဘာမြေခွန်၏ အမူအရာက ပျက်ယွင်းသွားပြီး မျက်မှောင်ကြုတ်ထားသည်။

အနက်ရောင်ချပ်ဝတ်တန်ဆာဝတ်အမျိုးသားမှာ မြင့်မြတ်သော အဆင့်အတန်းတစ်ခုရှိပြီး သူက မင်းသားတစ်ပါးဖြစ်သည်။ ဤမင်းသား၏ ဘေးကင်းလုံခြုံမှုကို ကာကွယ်ပေးရန် ခွန်မျိုးနွယ်မှ ဧကရာဇ်တစ်ပါးက သူ့ကို တာဝန်ပေးထားခဲ့ပြီး သူက မင်းသားကို လုံးဝအထိအခိုက်မခံနိုင်ပေ။

ဘုရင်ကမ္ဘာမြေခွန်က ဟိန်းဟောက်လိုက်ပြီး သူ့နောက်ဘက်မှာရှိသော ကောင်းကင်လိုဏ်ဂူစွမ်းအားကို အဆက်မပြတ် မြှင့်တင်ကာ အင်မော်တယ်ဘုရင်မ ယိုလန်ကို ဖိနှိမ်နေ၏။

ဘုရင်ကမ္ဘာမြေခွန်၏ ရည်ရွယ်ချက်ကို အာရုံခံမိပြီး ဘုရင်စန္ဒာစုန်းကလည်း လျှို့ဝှက်အတတ်များကို ဆက်တိုက်ထုတ်ဖော်ကာ အင်မော်တယ်ဘုရင်မ ယိုလန်၏ စွမ်းအင်ကို ချေဖျက်ပစ်နေ၏။

အင်မော်တယ်ဘုရင်မ ယိုလန်သည် နောက်သို့ တစ်လှမ်းပြီးတစ်လှမ်း ဆုတ်ခွာပေးနေရသည်။ သူမ၏ ပကတိကောင်းကင်လိုဏ်ဂူက ယိမ်းထိုးနေပြီး သိပ်ကြာကြာ တောင့်ခံနိုင်တော့မည် မဟုတ်ပေ။

ဘုရင်ကမ္ဘာမြေခွန်သည် သူ၏ ပကတိကောင်းကင်လိုဏ်ဂူကို တိုက်ပွဲမြေမှာ ချန်ထားခဲ့ပြီး အင်မော်တယ်ဘုရင်မ ယိုလန်ကို ဆက်လက်၍ ဖိအားပေးထားသည်။ တစ်ချိန်တည်းမှာပင် သူ၏ ခန္ဓာကိုယ်က ရိပ်ခနဲ လှုပ်ရှားသွားပြီး ဆူဇီမို၏ နောက်သို့ ချက်ချင်းပင် ရောက်ရှိလာကာ ပစ်ရိုက်ချလိုက်၏။

ဝုန်း…

ဆူဇီမို၏ မျိုးဆက်သွေးနယ်မြေက ချက်ချင်းပင် ပြိုကျလာခဲ့သည်။

ဘုရင်ကမ္ဘာမြေခွန်က အထွတ်အထိပ်ဘုရင်တစ်ပါးဖြစ်သည်။ ကောင်းကင်လိုဏ်ဂူတစ်ခု၏ ကာကွယ်မှုမရှိလျှင်တောင် သူ၏ ကိုယ်ကာယနှင့် မျိုးဆက်သွေးက ဆူဇီမိုကို အလွယ်တကူ သတ်ဖြတ်ဖို့အတွက် လုံလောက်လေသည်။

ပကတိကောင်းကင်လိုဏ်ဂူတစ်ခုနှင့်အတူ သူ၏ ဓမ္မတာအိုက ပြီးပြည့်စုံလုနီးပါး ဖြစ်နေခဲ့လေပြီ။ သူသည် သူ၏ ကိုယ်ကာယနှင့် မျိုးဆက်သွေးကို တစ်နှစ်ပတ်လုံး မီးဆေးထားပြီး သူက သာမန်ဘုရင်များထက် များစွာသာလွန်နေ၏။

ဆူဇီမိုသည် မည်သို့ပင်ဆိုစေ ပကတိစိတ်ဝိညာဉ်တစ်ဦးသာဖြစ်ပြီး သူတို့နှစ်ယောက်ကြား ကွာဟချက်က အရမ်းကို ကြီးမားနေသည်။ အဆင့်-၁၂ ဖန်တီးခြင်းကြာပဒုမ္မာ၏ မျိုးဆက်သွေးက အဲဒါကို လုံးဝခံနိုင်ရည်မရှိပေ။

“သေစမ်း”

ဘုရင်ကမ္ဘာမြေခွန်၏ အကြည့်က အေးစက်နေပြီး လက်ဝါးရိုက်ချက်တစ်ချက်နှင့်အတူ ဖန်တီးခြင်းကြာပဒုမ္မာ၏ မျိုးဆက်သွေးနယ်မြေကို ခြေမွှဖျက်ဆီးပစ်လိုက်၏။ သူ၏ လက်ဝါးက ရပ်တန့်မသွားဘဲ ဆူဇီမို၏ ဦးခေါင်းပေါ်သို့ ဆက်လက်ကျဆင်းလာသည်။

ထိုလက်ဝါးရိုက်ချက်၏ စွမ်းအားက လေဟာနယ်ကို ချက်ချင်းပင် ခြေမွှဖျက်ဆီးပြီး ဆူဇီမို၏ ရှောင်လွှဲနိုင်မည့် နေရာလွတ်များအားလုံးကို ပိတ်ဆို့လိုက်လေသည်။