အခန်း (၇၃၀)

ဘုန်း... ဘုန်း ... ဘုန်း...

လုံယီရွှယ် ငိုနေရင်း လက်သီးဖြင့် ဆက်တိုက်ထိုးလိုက်သည်။

သူမ၏ လက်သီးချက် တစ်ချက်စီတိုင်းတွင် မရေမတွက်နိုင်သော သားရဲအရိပ်ကြီးများနှင့် မျိုးစုံသော နဂါးအရိပ်များ ပါဝင်နေပါ၏။

နဂါးမည်းသခင်ကြီးမှာ စစချင်းတွင် ခုခံရန် ပြင်လိုက်သေးသော်လည်း..

သူ မည်မျှပင် ကြိုးစားရှေ့တိုးပါစေ ၊ လုံယီရွှယ်၏ လက်သီးချက်​ကြောင့် နောက်သို့ ဆုတ်သွားရသည်ချည်း ဖြစ်ပါသည်။

အကြိမ်အနည်းငယ် အထိုးခံရပြီး နောက်တွင်ကား.. သူ ငြိမ်သက်သွားတော့၏။

သူ့ခန္ဓာကိုယ် အများစုမှာလည်း ကမ္ဘာနှစ်ခုကြား

တံခါးပေါ်တွင် ကပ်နေလေပြီ ။

၎င်းတို့က ဟွမ်ဖုယွီ၏ ခန္ဓာကိုယ်အကြွင်းအကျန်နှင့် လှပစွာပင် ပေါင်းစပ်နေသေးတော့၏။

ထိုအချိန်တွင် လုံယီရွှယ်၏ လက်၌ နဂါးမည်းကြီး၏ အမည်းရောင်သွေးများ စွန်းထင်းနေကာ ... ၎င်းတို့က သူမ၏ ခန္ဓာကိုယ်ထဲသို့ နည်းနည်းချင်း စီးဝင်သွားသည်။

" ဟင်... "

ထိုစဥ်မှ သူ့လက်သူ ပြန်ကြည့်မိသော လုံယီရွှယ်တစ်ယောက် အံ့သြထိတ်လန့်သွား၏။

ဝီ ..

သူမ၏ အနောက်ဘက်တွင် အမည်းရောင် နဂါးအရိပ်တစ်ခု ရုတ်ချည်းစုစည်းလာသည်။

" ဟင်.... အဲ့ဒါ ဘာကြီးလဲ ၊ အမည်းရောင်နဂါးကြီးရဲ့ အစွမ်းလား "

သူမ နားမလည်နိုင်စွာ မေးလိုက်သည်။

ထိုစဥ် ကမ္ဘာနှစ်ခုကြား တံခါးပေါက်ရှေ့တွင် ရှိနေသော ဝိဥာဥ်သခင်ကြီး တံတွေးကို ခက်ခက်ခဲခဲ မြိုချလိုက်ရ၏။

" အမည်းရောင်နဂါးကြီးရဲ့ အစွမ်းတွေက ဒီကလေးမရဲ့ စုပ်ယူတာကို ခံလိုက်ရတာပဲ "

သူ တီးတိုးရေရွတ်လိုက်သည်။

သူ ၎င်းနှင့်ဆင်တူ မြင်ကွင်းမျိုးကို ကြိမ်ဖန်များစွာပင် မြင်ဖူးထားပါ၏။

သို့သော် ယခင်ကဆိုလျှင် အမည်းရောင်နဂါးကြီးကသာ အခြားနဂါးများ၏ အစွမ်းကို စုပ်ယူလေ့ ရှိခဲ့ပါသည်။

သို့သော်.. ယခုတွင်မူ ... ထိုသို့ စုပ်ယူခံရသူက အမည်းရောင်နဂါးကြီးကိုယ်တိုင် ဖြစ်သွားခဲ့လေပြီ ။

" ထျန်းယွမ်ကမ္ဘာရဲ့ ကောင်းကင်ဘုံနဂါး မျိုးဆက်

က အရင် မျိုးဆက်ထက်တောင် ပိုကြောက်စရာ ကောင်းတာပဲ ။ ဒီကိစ္စကို ကိုင်တွယ်ဖို့ လွယ်မှာမဟုတ်တော့ ဟိုကောင့်ကိုပဲ အရင်ရှင်းရမယ်နဲ့ တူတယ် "

တဖက်မှ ထိုမြင်ကွင်းကို ကြည့်နေသော သေမင်းသခင်ကြီး၏ မျက်လုံးထဲ၌ အေးစက်စက် အလင်းတန်းတစ်ခု ဖျတ်ခနဲ လက်သွားသည်။

သူ ထိုသို့တွေးပြီး လုံယီရွှယ်ဆီသို့ ခြေလှမ်းတိုးရန် ပြင်လိုက်၏။

သို့သော်.. ထိုစဥ်မှာပင်..

ဝှစ် ...

လူများစွာက သူ့အား ရုတ်တရက် ဝိုင်းရံလာကြသည်။

" အမှိုက်ကောင်တွေ... သေကြစမ်းကွာ "

သေမင်းသခင်ကြီး ထိုသူများအား အေးစက်စက် ကြည့်လိုက်သည်။

ဝုန်း..

တဖက်လူများအားလုံး နောက်သို့ အသည်းအသန် ဆုတ်သွားကြရ၏။

" ဒီ.. စိတ်ဝိဥာဥ်အစွမ်းက ကြောက်စရာကောင်းလိုက်တာ "

ထိုလူများ သေမင်းသခင်ကြီးကို တုန်လှုပ်စွာ ကြည့်လာကြသည်။

သေမင်းသခင်ကြီးကလည်း အနည်းငယ်လန့်သွားဟန်တူကာ ရယ်ရင်း ပြန်ပြော၏။

" အိုး.... မင်းတို့ကောင်တွေရဲ့ စိတ်ဝိဥာဥ်အစွမ်းကလဲ အားမနည်းပါလားကွ ။ ငါက သာမာန်ပဲ တိုက်ခိုက်လိုက်တာ ဆိုပေမယ့်လို့ မင်းတို့က အရူးတွေ မဖြစ်သွားကြသလို မင်းတို့ရဲ့ စိတ်ဝိဥာဥ်တွေလဲ ပျက်စီးမသွားခဲ့ဘူး ။ မင်းတို့ကို ချီးကျူးသင့်တာတော့ အမှန်ပဲ "

တဖက်မှ လူများ မျက်နှာထား အနည်းငယ်ပြောင်းသွားကြပြီး... တစ်ယောက်က လေသံမာဖြင့် အော်

ပြောလိုက်သည်။

" စိတ်ဝိဥာဥ်စခန်း ... လူစုကြ "

ဝုန်း

သူ့စကားသံ ဆုံးသည်နှင့် တိုက်ပွဲကွင်းပြင်အနှံံ့ ရောက်နေကြသည့် လူများစွာပင် ထွက်လာကာ ထိုလူဘေးသို့ ရောက်လာကြ၏။

ထိုလူအုပ်မှာ အရေအတွက် ရာချီပါသည်။

၎င်းကိုကြည့်နေသော သေမင်းသခင်ကြီးက ရယ်ရင်း ပြော၏။

" ရူးလိုက်တာကွာ ။ စိတ်ဝိဥာဥ်ပညာရှင်နဲ့ တိုက်ခိုက်တဲ့အချိန်မှာ လူတွေအများကြီးကို တိုက်ပွဲထဲ ခေါ်သွင်းလိုက်တော့ရော ဘာထူးမှာလဲ ။ စိတ်ဝိဥာဥ်ပညာရှင်တွေက စိတ်ဝိဥာဥ်အစွမ်းနဲ့ပဲ ယှဥ်ပြီး တိုက်ခိုက်တာကွ "

သူ့စကား ဆုံးချိန်မှာပင် ...

ဝုန်း ...

သူ့ကိုယ်ထဲမှ စိတ်ဝိဥာဥ်အစွမ်းများ ရုတ်တရက် ထွက်လာကာ အရပ်မျက်နှာစုံသို့ လွင့်ပျံ့သွားသည်။

ဤတစ်ကြိမ်တွင်မူ ရန်သူများအား တစ်ကွက်တည်းဖြင့် အပြောင်ရှင်းရန် ရည်ရွယ်ပြီး သူ့အစွမ်းအစစ်ကို ထုတ်သုံးလိုက်ပါ၏။

သို့သော်.. ထိုစဥ်တွင်..

" စိတ်ဝိဥာဥ်စခန်း ၊ စိတ်ဝိဥာဥ် သိုင်းကွက် "

အော်သံကျယ် တစ်သံနှင့်အတူ စိတ်ဝိဥာဥ်စခန်းမှ လူများအားလုံးက သူတို့၏ စိတ်ဝိဥာဥ်အစွမ်းများကို အစွမ်းကုန်ထုတ်၍ သေမင်းသခင်ကြီးထံသို့ ပို့လွှတ်လိုက်ကြသည်။

" ဟင်... "

သေမင်းသခင်ကြီးမှာလည်း ထိုစဥ်မှသာ တစ်စုံတစ်ခု လွဲချော်နေသည်ကို သတိထားမိသွားသည်။

စစချင်းတွင် တဖက်လူမှာ သာမာန်လူများကို စစ်ကူခေါ်နေသည်ဟုသာ သူ ထင်ထားခဲ့ပါ၏။

ထို့ကြောင့်လည်း သူ့စိတ်ထဲ ဘာကိုမှ အလေးနက်မထားခဲ့ခြင်းပင် ။

ယခု အမှန်တကယ် တိုက်ခိုက်ချိန်တွင်မူ.. သူ့ရှေ့ရှိ ရာနှင့်ချီသော လူအုပ်ကြီးက စိတ်ဝိဥာဥ်ပညာရှင်များဖြစ်ကြောင်း သိလိုက်ရတော့၏။

ထို့အပြင်... သူတို့အားလုံးမှာ စိတ်ဝိဥာဥ်ဖြင့် မသေမျိုးအဆင့်သို့ ရောက်ထားကြသူများ ဖြစ်ပါသည်။

" ဘာလို့ အဲ့လောက်များရတာလဲ "

ထိုတခဏ၌ သေမင်းသခင်ကြီး လွန်စွာ တုန်လှုပ်သွားတော့သည်။

သူတို့၏ ထျန်းမင်ကမ္ဘာတွင်ပင် ရှေးခေတ်ကတည်းက စိတ်ဝိဥာဥ်ဖြင့် မသေမျိုးအဆင့်သို့ ရောက်သွားခဲ့သော စိတ်ဝိဥာဥ်ပညာရှင် အရေအတွက် ဤမျှ မများပါချေ။

ယခု ထျန်းယွမ်ကမ္ဘာ၌ အဘယ့်ကြောင့် ဤမျှ များနေရပါသနည်း ။

ဝုန်း...

စိတ်ဝိဥာဥ်အစွမ်း လှိုင်းလုံးကြီးတစ်ခု ပေါ်လာပြီး..

သေမင်းသခင်ကြီး၏ စိတ်ဝိဥာဥ်အစွမ်းများမှာ သူ့ဘေးပတ်လည်ရှိ စိတ်ဝိဥာဥ်စခန်းမှ လူများ၏ တားဆီးပိတ်ဆို့ခြင်းကို ခံလိုက်ရတော့သည်။

" ရန်သူက အစွမ်းထက်တယ်ကွ ။ အားလုံး အတူတူလှုပ်ရှားကြ "

စိတ်ဝိဥာဥ်စခန်းမှ လူတစ်ယောက်က အော်ပြော၏။

" သတ်ကြဟေ့ "

ထို့နောက်တွင်... သူတို့လူစုက ရုတ်တရက် လက်ဖြင့် အစီအမံများလုပ်၍ သေမင်းသခင်ကြီးအား မျိုးစုံလှသော စိတ်ဝိဥာဥ်အစွမ်း သိုင်းကွက်များဖြင့် တိုက်ခိုက်လိုက်ကြသည်။

" မင်းတို့တွေ .... "

သေမင်းသခင်ကြီး မျက်နှာဖြူရော်သွားပါ၏။

စိတ်ဝိဥာဥ်အစွမ်းဖြင့် တစ်ယောက်ချင်း ရင်ဆိုင်တိုက်ခိုက်ရသည့် တိုက်ပွဲမျိုးဆိုလျှင် ထိုလူများက သူ့ပြိုင်ဘက် လုံးဝမဟုတ်ပါချေ။

သို့သော်... ရာချီသော လူအုပ်နှင့် ဆိုလျှင်မူ... အခြေအနေက ကွဲသွားလေပြီ ။

အထူးသဖြင့် တဖက်မှ ပြိုင်ဘက်များစွာ၏ အစွမ်းသည် သူ့ထက်နိမ့်ကြသည့်တိုင် များစွာ မနိမ့်လှပါ ။

ထိုသို့သော လူများ၏ စိတ်ဝိဥာဥ်အစွမ်း တိုက်ခိုက်မှုအောက်တွင် သေမင်းသခင်ကြီး ဆက်တောင့်မခံနိုင်တော့ပေ ။

သို့သော်.. သူ့ဘေးပတ်လည်တွင် စိတ်ဝိဥာဥ်စခန်းမှ လူများ ဝန်းရံထားကြသည့်အတွက် သူ ထွက်ပြေးချင်လျှင်ပင် ထွက်ပြေး၍ မရပါ ။

" ချီး... လုံးဝ လက်မခံနိုင်ဘူး ။ ငါက ဘာကြောင့်မို့

ခုလိုဖြစ်... "

သူ့ စိတ်ဝိဥာဥ်အစွမ်းက တဖြည်းဖြည်း ဖိနှိပ်ခံလာရသည်ကို သိလိုက်ရသော သေမင်းသခင်ကြီး ဒေါသတကြီး အော်လိုက်၏။

သို့သော်... နောက်ကျသွားခဲ့လေပြီ ။

စိတ်ဝိဥာဥ်စခန်းသားများ၏ ရာနှင့်ချီသော စိတ်ဝိဥာဥ်အစွမ်းများက သူ့အသိစိတ်ပင်လယ်ကိုပါ တိုက်ခိုက်လာကာ ...

သေမင်းသခင်ကြီး တစ်ကိုယ်လုံး တုန်သွားသည်။

ထို့နောက်တွင်..

ဝီ ..

သူ့ခန္ဓာကိုယ် လေထဲမှ ကျလာပြီး..

ဘုန်း..

မြေပြင်သို့ ခပ်ပြင်းပြင်း ကျကာ နေရာတွင် သေဆုံး

သွားတော့၏။

" ဝိုး... အစွမ်းထက်လိုက်တာ ။ ထျန်းမင်ကမ္ဘာက လူတွေရဲ့အစွမ်းက အဲ့လောက်တောင်လား "

ထိုအချိန်တွင် စိတ်ဝိဥာဥ်စခန်းမှ လူများမှာ အသက်ကို ခပ်ပြင်းပြင်း ရှူနေရပြီး မျက်နှာများလည်း ပုတ်သိုးနေကြသည်။

ကမ္ဘာနှစ်ခုကြား တံခါးပေါက်ရှေ့မှ သူတို့ကိုကြည့်နေသော ဝိဥာဥ်သခင်ကြီး အံ့သြမှင်သက်နေမိတော့၏။

" သေမင်းသခင်ကြီးလဲ သေသွားပြီလား ။ ထျန်းမင်သခင်ကြီး ၇ ယောက်ထဲမှာမှ သတ်ဖို့အခက်ဆုံးလို့ နာမည်ကျော်တဲ့ သေမင်းသခင်ကြီးက ဟိုလူတစ်စုကြောင့် သေသွားခဲ့ရတယ်ပေါ့ ။ ဒါ မဟုတ်သေးဘူး... အဲ့လို မဖြစ်သင့်ဘူးလေ "

ဝိဥာဥ်သခင်ကြီး မျက်နှာဖြူရော်နေတော့သည်။

သူ ချက်ချင်းပင် ကျန် ထျန်းမင်သခင်ကြီး လေးယောက်ဘက်လှည့်၍ သတိပေးစကားဆိုလိုက်၏။

" အားလုံး.... သတိထားကြနော် ၊ ဒီ ထျန်းယွမ်ကမ္ဘာ

က ပုံမှန်မဟုတ်ဘူး "

သို့သော် တဖက်မှ ထျန်းမင်သခင်ကြီး လေးယောက်မှာကား သူ့ကို အာရုံစိုက်ရန်ပင် မအားကြပါ ။

ဝုန်း ..

ပေါက်ကွဲသံ တစ်သံနှင့်အတူ အရပ်ရှည်ရှည် လူငယ်တစ်ယောက် လေထဲပေါ်လာသည်။

" ထျန်းမင်ကမ္ဘာရဲ့ မသေမျိုးသခင်ကြီး တစ်ယောက်ဖြစ်တဲ့ ၊ ငါ က ထျန်းမင်ကမ္ဘာမှာ နံပါတ်တစ် ခန္ဓာကိုယ်ကျင့်ကြံသူပဲ ။ မင်းက ကိုယ့်ကိုကိုယ် ဘာထင်နေတာလဲကွ... ငါ့ကို တားနိုင်မယ် ထင်လို့လား "

ထျန်းမင်သခင်ကြီးက ရှေ့တွင်ပေါ်လာသော လူငယ်ကိုကြည့်ကာ လှောင်ပြုံးဖြင့် ပြောလိုက်၏။

သို့သော် သူ့စကားဆုံးချိန်မှာပင် ...

ဝုန်း.... ဘုန်း ... ဘုန်း.... ဘုန်း ...

လူငယ်ဘေး၌ အခြားသော လူငယ်များစွာ ထပ်ပေါ်လာပြီး .. သူတို့အနောက်ဘက်တွင်လည်း နတ်ဆိုးအရိပ်များ စုစည်းလာကြသည်။

ဖြစ်သွားပုံမှာလည်း လျင်မြန်လွန်းလှပါ၏။

" ဟင် .... ရှေးဟောင်းနတ်ဆိုးကမ္ဘာက နတ်ဆိုးခန္ဓာကိုယ် တွေပါလား ... ။ မင်းတို့ အဲ့ဒါတွေကို ဘယ်လိုရခဲ့တာလဲ ။ ပြီးတော့... အားလုံးက အဆင့် ၈ နဲ့အထက် နတ်ဆိုးခန္ဓာကိုယ်တွေချည်းပဲ ။ မြေကမ္ဘာနတ်ဆိုး ခန္ဓာကိုယ်တောင် ခြောက်ယောက် ပါတယ်... "

ထျန်းမင်ကမ္ဘာမှ မသေမျိုးသခင်ကြီး ဟန်ချက်ပျက်သွားတော့သည်။

ထျန်းမင်ကမ္ဘာနှင့် ရှေးဟောင်းနတ်ဆိုးကမ္ဘာတို့မှာ ကြိမ်ဖန်များစွာ တိုက်ခိုက်ခဲ့ကြဖူးပြီး သူတို့ထျန်းမင်ကမ္ဘာကသာ အနိုင်ရခဲ့သည် များပါ၏။

သို့သော် ရှေးဟောင်းနတ်ဆိုးကမ္ဘာမှ နတ်ဆိုးခန္ဓာကိုယ်များက မည်မျှအစွမ်းထက်သည်ကို ထျန်းမင်ကမ္ဘာ၏ မသေမျိုးသခင်ကြီး ဖြစ်သော သူ မသိ

ဘဲ မနေပါချေ ။

အထူးသဖြင့် မြေကမ္ဘာနတ်ဆိုးခန္ဓာကိုယ် များပင် ...

သူ မြေကမ္ဘာနတ်ဆိုးခန္ဓာကိုယ် ပိုင်ရှင်နှင့် တစ်ကြိမ် တိုက်ခိုက်ခဲ့ဖူးပြီး သိုင်းကွက်ထောင်ချီ သုံးပြီးချိန်မှသာ တဖက်ပြိုင်ဘက်အား ခဲခဲယဥ်းယဥ်း သတ်နိုင်ခဲ့ပါ၏။

ထိုသို့ သတ်ရန်အတွက်လည်း သူ့ဘက်မှ ဆုံးရှုံးမှု ကြီးခဲ့ပါသည်။

သို့သော်.. ယခုတွင်ကား သူ့ရှေ့၌ မြေကမ္ဘာနတ်ဆိုးခန္ဓာကိုယ် များစွာပင် ပေါ်လာနေပါ၏။

သူ ထိုလူများကို မည်သို့ တိုက်ခိုက်ရပါမည်နည်း ။

သူ လူအုပ်အား ဝေ့ကြည့်လိုက်ရာ.. နောက်တွင် နတ်ဆိုးအရိပ် မထုတ်ထားသော လူငယ်တစ်ယောက်ကို မြင်လိုက်ရသည်။

" ဟာကွက်တော့ တွေ့ပြီ ၊ အဲ့ကနေ ထွက်ရမယ် "

သူ ထိုသို့တွေးပြီး လူငယ်ရှိရာဘက်သို့ ပြေးဝင်သွားလိုက်သည်။

ယခုလို အချိန်မျိုးတွင် ရူးနေမှသာ ဤမျှများပြားသော နတ်ဆိုးများနှင့် တိုက်ခိုက်ပေလိမ့်မည်။

" ကောင်လေး.. သေလိုက်တော့ "

သူ အော်ပြီး ပြေးနေရင်း လူငယ်အား လက်ဝါးဖြင့် ရိုက်လိုက်သည်။

တဖက်လူငယ်က ၎င်းကိုကြည့်ရင်း မျက်မှောင်ကြုံ့သွား၏။

" အရှုပ်အထွေး ခန္ဓာကိုယ်... ပွင့်စေ "

ဝုန်း...

ချက်ချင်းမှာပင် သူ့ အရှုပ်အထွေးခန္ဓာကိုယ် စလှုပ်ရှားလာတော့သည်။

သူ့နောက်တွင်လည်း တာအိုစိတ်ဝိဥာဥ် အရိပ်တစ်ခု

စုစည်းလာပါ၏။

ထိုလူငယ်မှာ လောရုံပါပင်...

" ဟင်... အရှုပ်အထွေးခန္ဓာကိုယ် ပါလား... "

ထျန်းမင်ကမ္ဘာမှ မသေမျိုးသခင်ကြီး မျက်နှာဖြူသွားပြန်တော့သည်။

နတ်ဆိုးခန္ဓာကိုယ် များမှ လွတ်မြောက်ရန်အတွက် သူ ဟာကွက်ရှာပြီး ထွက်ပြေးရန် ကြိုးစားခဲ့သော်လည်း...

နောက်ဆုံးတွင် အရှုပ်အထွေးခန္ဓာကိုယ် နှင့်မှ ဝင်တိုးမိသွားသတဲ့လား ။