ချန်ရှန်းဟုန်က သူ့ကို အရှက်ရစေချင်တာတဲ့လား

ကျုံးရှင်မြို့ဝန်၏ မိသားစုတစ်ခုလုံးသည် သခင်မကြီး၏ အသက်တစ်ရာငါးဆယ်ပြည့် မွေးနေ့ပွဲကို ကျင်းပနေကြသဖြင့် ယနေ့တွင် အလွန်သက်ဝင်လှုပ်ရှားနေလေသည်။ ဤသည်မှာ အိမ်တော်တစ်ခုလုံးအတွက် အရေးပါသော အခမ်းအနားတစ်ခုဖြစ်သည်။ မရေတွက်နိုင်သော ဧည့်သည်များစွာသည် ဂုဏ်ပြုစကားဆိုကြရန် မနက်ခင်းကတည်းက တဖွဲဖွဲ ရောက်ရှိလာကြသည်။ ကျုံးရှင်မြို့ဝန်သည် ဩဇာအာဏာအရှိဆုံးနှင့် အမြင့်မြတ်ဆုံးပုဂ္ဂိုလ်ဖြစ်၍ ကြီးမြတ်သော ဝေ့တိုင်းပြည်ရှိ မရေတွက်နိုင်သော လူများစွာသည် စားဝတ်နေရင်းအတွက် သူ့ကို အားကိုးနေကြသည်။

ထိုသို့သောအခြေအနေမျိုးအောက်တွင် သခင်မကြီး၏မွေးနေ့ကို မည်သူမျှ မမေ့ဝံ့ကြပေ။ လွန်ခဲ့သည့်ရက်အတွင်း လက်ဆောင်မျိုးစုံကို ပို့ဆောင်လာကြရာ၊ ဂိုဒေါင်တစ်ခုလုံးပင် ပြည့်နှက်သွားခဲ့သည်။ မွန်းတည့်ချိန် နီးကပ်လာသောအခါ မွေးနေ့ပွဲ အမှန်တကယ် စတင်တော့မည်ဖြစ်သောကြောင့် အဆင့်အတန်းမြင့်မားသော ဧည့်သည်များ မရေတွက်နိုင်အောင် ရောက်ရှိလာကြ၏။

လူငယ်မိသားစုဝင်ဖြစ်သော ချူးယွင်ဖန်းသည် နံနက်စောစောကတည်း အိမ်တော်သို့ အပြေးနှင့်လာခဲ့ရသည်။ သူသည် အခြားလူများကို ဂရုမစိုက်သော်လည်း သခင်မကြီး၏ မွေးနေ့အတွက် အနည်းငယ် စိတ်ပူနေဆဲဖြစ်သည်။ သူသည် ယခင်ကနှင့်မတူဘဲ အိမ်တော်တွင် နေထိုင်လေ့သိပ်မရှိပေ။ သူ၏ အခြေအနေသည် သခင်မကြီးနှင့် ဆက်နွှယ်နေကြောင်း လူအများ သိကြသော်လည်း ယခုအခါ အရာအားလုံး ပြောင်းလဲသွားခဲ့သည်။

ချူးယွင်ဖန်းသည် ချန်ရှန်းဟုန်ကို အနိုင်ယူခဲ့ပြီးနောက် ချူးမိသားစု၏ ဂုဏ်အရှိန်အဝါများ မြင့်တက်လာစေသည့်အတွက် မိသားစုထဲရှိ သူ၏ ကျော်ကြားမှုသည် ဆက်လက်၍ မြင့်တက်လာခဲ့သည်။ အမွေဆက်ခံသူရာထူးကို စိတ်မဝင်စားကြောင်း လူသိရှင်ကြား မကြေညာခဲ့ပါက၊ သူသည် အကျော်ကြားဆုံး ကိုယ်စားလှယ်လောင်းတစ်ဦး ဖြစ်လာမည်ဖြစ်သည်။ သူသည် ရာထူးနေရာအတွက် ယှဥ်ပြိုင်မှုကို စွန့်လွှတ်ခဲ့သော်လည်း လူတိုင်းသည် သူ့ကို အထင်အမြင်သေးခြင်း မရှိခဲ့ပေ။

ချူးယွင်ဖန်းသည် သူ၏ခွန်အားကို ထိုသို့ပြသလာပြီးနောက် လူအများသည် သူ့တွင် အလားအလာကောင်းများရှိနေသည်ဟု ထင်မြင်ခဲ့ကြသည်။ သူသည် ကျုံးရှင်မြို့ဝန်ကို အားမကိုးလျှင်ပင် သူ၏အဆင့်အတန်းကို ကိုယ်တိုင်မြင့်တင်နိုင်ဆဲဖြစ်သည်။ ဤသည်မှာ မရေတွက်နိုင်သော လူအများအပြားက အာရုံစိုက်နေသည့် အကြောင်းအရာဖြစ်သည်။ သခင်မကြီးသည် ပင်မထိုင်ခုံတွင်ထိုင်၍ လူတိုင်း၏ ဂုဏ်ပြုချီးမြှောက်မှုကို လက်ခံနေစဥ် ချူးယွင်ဖန်းသည် လူငယ်မိသားစုဝင်များကြားတွင် ထိုင်နေခဲ့သည်။ ချူးယောင်ဝေ့သည် သခင်မကြီးဘေးတွင် ထိုင်နေခဲ့ရာ၊ အဆင့်တန်းမြင့်မားသော ဧည့်သည်များကို ကြိုဆိုရန်သာ ရံဖန်ရံခါ မတ်တပ်ထရပ်လေ့ရှိသည်။

ချူးယွင်ဖန်းနှင့် ဆန့်ကျင်ဘက်တွင် ချန်ရှန်းဟုန်၊ ချူးရှို့ကျဲနှင့် အခြားလူများရှိနေကြ၍ သူ့ကို အံကြိတ်လျက် ကြည့်နေကြလေသည်။ ချန်ရှန်းဟုန်သည် လူတိုင်း၏အရှေ့တွင် ပါးရိုက်ခံလိုက်ရသည်ဟု ခံစားနေရသည်။ ဤသည်မှာ သူ့ဘဝ၏ အကြီးမားဆုံးသော အရှက်တကွဲအကျိုးနည်းမှုဖြစ်သည်။ ချူးရှို့ကျဲသည် ချူးယွင်ဖန်းကြောင့် အမွေဆက်ခံသူရာထူးကို ဆုံးရှုံးလိုက်ရသည်ဟုပင် ထင်မြင်နေမိသည်။ ထိုရာထူးသည် သူ့အတွက်သာ ဖြစ်သင့်သည်ဟု အမြဲတစေ ထင်မှတ်ခဲ့သော်လည်း ချူးယွင်ဖန်းကြောင့် ဆုံးရှုံးခဲ့ရသည်။ သူသည် ချူးယွင်ဖန်းကို အကြည့်ဖြင့်ပင် သတ်ဖြတ်နိုင်ရန် ဆုတောင်းနေမိသည်။

ထိုမုန်းတီးမှုအကြည့်များသည် သူ့ကို မထိခိုက်နိုင်မှန်း သိနေသည့်အတွက် ချူးယွင်ဖန်းသည် ၎င်းတို့ကို ဂရုမစိုက်ခဲ့ပေ။ ထိုအချိန်တွင် ချန်ရှန်းဟုန်သည် ချူးယွင်ဖန်းကို စူးစိုက်စွာ ကြည့်ပြီးနောက် သခင်မကြီးထံ လှည့်ပြောလိုက်သည်။

"တော်ဝင်နန်းတော်က မြို့စားနင်က မွေးနေ့လက်ဆောင်ပြင်ဆင်ထားပါတယ်၊ ဒါက လက်ဆောင်တွေရဲ့ စာရင်းပါ။ ကျေးဇူးပြုပြီး ကြည့်ပေးပါ၊ သခင်မကြီး"

ပြီးနောက် သူသည် လက်ဆောင်စာရင်းကို ပေးအပ်လိုက်သည်။ သခင်မကြီးနံဘေးရှိ ချူးယောင်ဝေ့သည် စာရင်းကို လက်လှမ်းယူ၍ ကြည့်ရှုလိုက်သည်။ သူသည် အံ့အားသင့်သွားသော အမူအရာမျိုး ထုတ်ဖော်ပြသလာသည်။ ဤစာရင်းထဲရှိ လက်ဆောင်များသည် အဖိုးတန်ပစ္စည်းများဖြစ်ကြောင်း သူ ဝန်ခံရပေလိမ့်မည်။ သူသည် သာမန်ကာလျှံကာ ကြည့်ရှုလိုက်သည်။ သူ၏ ကျင့်ကြံမှုဖြင့် ဤစာရင်းထဲရှိ လက်ဆောင်များသည် အဆင့်နိမ့်ဝိညာဉ်ကျောက်တုံး သုံးသန်းကျော် တန်ကြေးရှိကြောင်း သူ သိနိုင်သည်။ အဆင့်နိမ့် ဝိညာဉ်ကျောက်တုံး သောင်းချီ၍သာရှိသော အခြားလူများနှင့် နှိုင်းယှဉ်လျှင် မြို့စားနင်သည် ပို၍ချမ်းသာကြွယ်ဝသူဖြစ်သည်။

အစေခံတစ်ဦးက ထိုစာရင်းကို ကျယ်လောင်စွာ ဖတ်ပြလိုက်သောအခါ မွေးနေ့ပွဲရှိ လူအများအပြား ပင့်သက်ရှိုက်လိုက်ကြသည်။ မြို့စားဆယ်ဦးသည် အလွန်ချမ်းသာကြွယ်ဝကြောင်း ၎င်းတို့ ကြားသိခဲ့ဖူးသော်လည်း ယခုအခါ အမှန်တကယ်ဖြစ်ပုံပေါ်သည်။ မြို့စားနင်ထံမှ ဤလက်ဆောင်များသည် ရွှေများကို ကျောက်တုံးများနှင့် နှိုင်းယှဥ်နေသကဲ့သို့ ထင်မှတ်ရစေသည်။ ၎င်းကို မည်သူမျှ ယှဥ်ပြိုင်နိုင်မည် မဟုတ်ပေ။

"မြို့စားနင်က အရမ်းချမ်းသာပြီး တကယ်ဩဇာကြီးတာပဲ"

"ဒါက ပုံမှန်ပါပဲ။ သခင်မကြီးက မြို့စားနင်မိသားစုက ဆင်းသက်လာတာလေ။ ဘာပဲဖြစ်ဖြစ် သခင်မကြီးလည်း သူတို့နဲ့ တစ်မိသားစုထဲပဲကို"

"ဒါကို ကျုပ်တို့လူတွေနဲ့ပဲ ဖော်ပြလို့ရမှာ မဟုတ်ဘူး။ မြို့စားနင်က တော်တော်ရက်ရောတာပဲ"

ချန်ရှန်းဟုန်သည် ချူးယွင်ဖန်းထံတွင် ရှုံးနိမ့်ပြီးနောက် ဤအခိုက်အတန့်ကြောင့်သာ မထွက်ခွာသွားခဲ့ခြင်းဖြစ်သည်။ လူအုပ်ကြီး၏ စကားများကို နားထောင်နေစဥ် သူ၏မျက်နှာပြင်၌ အပြုံးတစ်ခု ပေါ်ပေါက်လာသည်။ နောက်ဆုံးတွင် သူသည် ဂုဏ်ယူနိုင်ပြီဟု ခံစားလိုက်ရသည်။

'ချူးယွင်ဖန်း၊ ခင်ဗျားက ပိုပြီးသန်မာတော့ရော ဘာဖြစ်လဲ၊ ခင်ဗျား မြင်လား။ ဒါက မြို့စားနင်ရဲ့ ချမ်းသာကြွယ်ဝမှုပဲ။ ခင်ဗျားလို ဆင်းရဲမွဲတေတဲ့လူမျိုး ယှဥ်နိုင်တဲ့အရာ မဟုတ်ဘူး'

ချူးယွင်ဖန်းနံဘေးရှိ ချူးဟုန်ချိုင်သည် ဒေါသထွက်စွာ အံကြိတ်နေခဲ့သည်။ သူ၏အမြင်အရ၊ ချန်ရှန်းဟုန်သည် ၎င်းတို့၏ ဒေါသကိုဆွရန်အတွက် ရည်ရွယ်ချက်ရှိရှိ ပြုလုပ်နေခြင်းဖြစ်သည်။ သို့သော်လည်း မြို့စားနင်၏ ထူးခြားသော ရက်ရောမှုနှင့်ပတ်သက်၍ သူလျှင်ပင် မအံ့ဩဘဲ မနေနိုင်ဖြစ်နေမိသည်။

သန်းပေါင်းများစွာသော အဆင့်နိမ့်ဝိညာဉ်ကျောက်တုံးများသည် သာမန်လူများအတွက် စိတ်ကူးမယဉ်နိုင်သည့် ငွေပမာဏမျိုးဖြစ်သည်။ ထိုနေရာတွင် သူသာဖြစ်ခဲ့လျှင် ထိုပမာဏကို စုဆောင်းရန်အတွက် နှစ်ပေါင်းမည်မျှ ကြာမြင့်မည်ကိုပင် သူ မသိနိုင်ပေ။ ဆန့်ကျင်ဘက်အနေဖြင့် သူ့နံဘေးတွင် ထိုင်နေသာ ချူးယွင်ဖန်းသည် အလွန်တည်ငြိမ်နေသည်။ သူသည် ဤဇိမ်ခံလက်ဆောင်များပါရှိသော စာရင်းကြောင့် လုံးလုံးလျားလျား မတုန်လှုပ်ခဲ့ပုံပေါ်သည်။

"လက်ဆောင်တွေအတွက် ကျေးဇူးပါ၊ အဘိုးနဲ့အဖေရော နေကောင်းရဲ့လား" သခင်မကြီးသည် ကျေနပ်စွာ ပြုံးလိုက်သည်။

သူမအတွက် ထိုမျှများပြားသော လက်ဆောင်ပစ္စည်းများ မလိုအပ်သော်လည်း ထိုသို့ခမ်းနားလှသော မွေးနေ့လက်ဆောင်များကို တစ်ပြိုင်တည်း ပေးအပ်လာခြင်းသည် သူမမိသားစု၏ ဂုဏ်အရှိန်အဝါကြီးမားမှုဟု ဆိုနိုင်သည်။ သူမသည် အလွန်မျက်နှာသာ ရရှိခဲ့သည်။ သူမသည် သိုင်းပညာကျင့်ကြံမှုနှင့် ပတ်သက်၍ ရည်မှန်းချက်မရှိသည့်အပြင် အသက်အရွယ်အရလည်း ကြီးရင့်နေပြီဖြစ်သည်။ သူမသည် ဘဝ၏ ဆောင်းရာသီသို့ ရောက်ရှိနေသူဟု ဆိုနိုင်သောကြောင့် သူမ၏ ဂုဏ်သတင်းနှင့်ပတ်သက်၍ အလွန်တန်ဖိုးထားခဲ့သည်။

"အဖေက သခင်မကြီးရဲ့မွေးနေ့ပွဲကို မတက်ရောက်နိုင်လို့ စိတ်မကောင်းတဲ့အကြောင်း ပြောလိုက်ပါတယ်။ သူ ဒီလိုလက်ဆောင်လေးတွေပဲ ပေးလိုက်နိုင်လို့ သခင်မကြီး စိတ်မပျက်သွားဖို့ မျှော်လင့်တယ်လို့လည်း ပြောလိုက်ပါသေးတယ်" ထိုအချိန်တွင် ချန်ရှန်းဟုန်က တက်ကြွစွာ ပြောလိုက်သည်။

၎င်းတို့ကို သေးငယ်သော လက်ဆောင်များဟု ဆိုခဲ့သော်ငြားလည်း ဤလက်ဆောင်များကို မည်သူမျှ ထိုသို့ ဆက်ဆံကြမည်မဟုတ်ကြောင်း သိသာထင်ရှားသည်။

"အိုး စိတ်မပူပါနဲ့။ မင်းအဖေက တိုင်းပြည်အတွက် တာဝန်ထမ်းဆောင်ပြီး ဧကရာဇ်မင်းရဲ့ ဝန်ထုပ်ဝန်ပိုးတွေကို ခွဲဝေနေတဲ့လူပါ၊ ဒီအဘွားအိုကြီးအတွက် စိတ်ပူနေစရာ မလိုပါဘူး။ စိတ်ပူနေခဲ့ရင်သာ အပြစ်ဖြစ်လာနိုင်တယ်" သခင်မကြီးက ပြုံးရွှင်စွာ ပြောလိုက်သည်။

"ကျွန်တော်တို့ မြို့စားနင်မိသားစုကတော့ မွေးနေ့လက်ဆောင် ပေးအပ်ထားပြီးပါပြီး။ သခင်မကြီးက ချူးယွင်ဖန်းကို အရမ်းချစ်တယ်လို့ ကျွန်တော် ကြားထားတော့ သူ ဘယ်လိုလက်ဆောင်မျိုး ပေးမလဲဆိုတာ ကျွန်တော် သိချင်မိပါတယ်"

ချန်ရှန်းဟုန်သည် သခင်မကြီးနှင့် စကားပြောနေသော်လည်း သူ၏ မျက်လုံးများသည် ချူးယွင်ဖန်းဆီ ရောက်ရှိနေခဲ့သည်။ ၎င်းတို့နှစ်ယောက်ကြားရှိ ရန်ငြိုးများအကြောင်း သိထားသူများသည် ချက်ချင်းပင် ဉာဏ်အလင်းပွင့်လာသကဲ့သို့ ခံစားလိုက်ရသည်။

'ဒါဆို ချန်ရှန်းဟုန်က ချူးယွင်ဖန်းကို ဒီမှာစောင့်နေတာပေါ့လေ’

ချန်ရှန်းဟုန်သည် ဤမွေးနေ့လက်ဆောင်များ ပေးအပ်စဥ် မြို့စားနင်ကို ကိုယ်စားပြုခဲ့ခြင်းဖြစ်သည်။ ၎င်းကို မည်သူမျှ မနှိုင်းယှဉ်နိုင်သောကြောင့် အရေးကြီးဆုံး လက်ဆောင်များဟု ဆိုနိုင်သည်။ အခြားသော ဂုဏ်သရေရှိများပင် မယှဉ်နိုင်ခဲ့ပေ။

ချူးယွင်ဖန်းကဲ့သို့ လူငယ်တစ်ဦးမဆိုနှင့် ဤချမ်းသာကြွယ်ဝသူများပင် မယှဥ်နိုင်ခဲ့ပေ။ သူသည် ကျုံးရှင်မြို့ဝန်၏ အမွေဆက်ခံသူပင် မဟုတ်ခဲ့ပေ။ ချူးယွင်ဖန်းသည် အမွေဆက်ခံသူရာထူးအတွက် ကိုယ်စားလှယ်လောင်းတစ်ဦးမျှသာဖြစ်သောကြောင့် ငွေကြေးမည်မျှရှိနိုင်မည်နည်း။ သူသည် အဆင့်နိမ့် ဝိညာဉ်ကျောက်တုံး ထောင်ပေါင်းများစွာ ပိုင်ဆိုင်ခဲ့လျှင်ပင် အလွန်ကောင်းမွန်နေပြီဖြစ်သည်။ ဤသည်မှာ ချန်ရှန်းဟုန်၏ ကြီးမားသော လှုပ်ရှားမှုဟု ဆိုနိုင်သည်။

******