နတ်ဘုရားလက်နက်ကို သန့်စင်ခြင်း

လူတိုင်းက အလေးအနက် စဉ်းစားတွေးတောနေစဉ် ယခုတင် ထွက်ပေါ်လာသော ရွှေရောင်အလင်းက ရုတ်တရက် ပျောက်ကွယ်သွားသည်။

မျောက်ဘုရင် နီရဲပင်လယ်နှင့် အခြားသူများက စဉ်းစားနေဖို့ အချိန်များစွာ မရဘဲ ရှေ့သို့ အလောတကြီး ပြေးတက်လာကြ၏။

သိပ်မကြာခင် လူတိုင်းသည် နက်မှောင်နေသော ကျောက်တိုင်ရှေ့သို့ ရောက်ရှိလာကြသည်။

“ဒီမှာ ထွက်ပေါက်မရှိတော့ဘူးလား”

သိပ်မကြာခင် လူတိုင်းသည် နက်မှောင်နေသော ကျောက်တိုင်၏ နောက်ဘက်မှာ ကောင်းကင်ဘုံသို့ သွားရာလမ်းကြောင်းက ဖြတ်တောက်ခံထားရသည်ကို သတိထားမိသွားကြ၏။

“ဟိုလူနှစ်ယောက် အခုတင် ဘယ်ရောက်သွားတာလဲ”

မျောက်ဘုရင် နီရဲပင်လယ်နှင့် အခြားသူများ ရောက်ရှိလာသည့် အချိန်မှာ ဆူဇီမိုနှင့် မျောက်က ပျောက်ကွယ်သွားခဲ့ပြီ ဖြစ်သည်။

ဘေးပတ်ဝန်းကျင်မှာ ပုန်းကွယ်စရာ မည်သည့်နေရာမှ မရှိဘဲ ကောင်းကင်ဘုံသို့ သွားရာလမ်းကြောင်းက အဆုံးသတ်သွားခဲ့ပြီဖြစ်သည်။ သူတို့နှစ်ယောက်သည် လေထဲမှာ တိုးဝင်ပျောက်ကွယ်သွားပုံရသည်။

“သူတို့နှစ်ယောက်က သေချာပေါက် သေရတော့မယ်ဆိုတာသိလို့ ဘေးဘက်မှာရှိတဲ့ အာကာသတွင်းနက်ထဲ တိုးဝင်ပြီး အထဲမှာ မြှုပ်နှံခံလိုက်ရပြီလား”

မြင်းမျောက်ဘုရင်တစ်ဦးက သူ၏ ထင်မြင်ယူဆချက်ကို ပြောဆိုလိုက်၏။

မျောက်ဘုရင် နီရဲပင်လယ်က နက်မှောင်နေသော ကျောက်တိုင်ရှေ့သို့ ရောက်ရှိလာပြီး ၎င်းအပေါ်မှ သွေးနီရောင် လက်ဝါးရာကို စိုက်ကြည့်လိုက်၏။ သူ၏ မျက်လုံးက တစ်ဖျပ်ဖျပ်လက်လာပြီး သူက တည်တံ့စွာ ပြောလိုက်၏။

“ငါထင်တာ မမှားဘူးဆိုရင် သူတို့နှစ်ယောက်က ဒီမဟာဧကရာဇ်လက်နက်ထဲမှာ ဝင်ပုန်းနေတာ ဖြစ်ရမယ်”

“ဟမ်…”

မြင်းမျောက်ဘုရင်များက အနည်းငယ် မှင်တက်သွားပြီး သူတို့၏ မျက်လုံးထဲမှာ တွေဝေရှုပ်ထွေးမှုက ပေါ်ထွက်လာ၏။

အထွတ်အထိပ်ဘုရင်တစ်ဦးက အလေးအနက် စဉ်းစားတွေးတောနေပုံရပြီး ညင်သာစွာ ခေါင်းညိတ်လိုက်၏။

“နီရဲပင်လယ် ပြောတာက တကယ်ပဲ ဖြစ်နိုင်ခြေများတယ်… ဒဏ္ဍာရီအရဆို မဟာဧကရာဇ်တိုက်ပွဲရဲ့ လက်နက်က သတ်ဖြတ်နိုင်တဲ့ နတ်ဘုရားလက်နက်တစ်ခု ဖြစ်ရုံတင်မကဘူး… နေရာလွတ် နတ်ဘုရားလက်နက်တစ်ခုလည်း ဖြစ်တယ်လို့ ဆိုတယ်”

“အထဲမှာ သူ့ကိုယ်ပိုင်လောကတစ်ခု ရှိနေတယ်… မဟာဧကရာဇ်တိုက်ပွဲရဲ့ အမွေအနှစ်ကလည်း အထဲမှာရှိဖို့ ဖြစ်နိုင်ခြေများတယ်”

မျောက်ဘုရင် နီရဲပင်လယ်က သူ၏ သိုလှောင်အိတ်ထဲကနေ လက်နက်တစ်ခုကို ထုတ်ယူပြီး သူ၏ လက်ဖဝါးကို လှီးလိုက်၏။ သူက သွေးတစ်စက်စက်စီးကျနေသော သူ့လက်ဖဝါးကိုမြှောက်ပြီး နက်မှောင်နေသော ကျောက်တိုင်ပေါ်ကို ဖိချလိုက်၏။

နက်မှောင်နေသော ကျောက်တိုင်ကနေ မည်သည့် တုံ့ပြန်မှုမှ ရှိမလာခဲ့ပေ။

မျောက်ဘုရင် နီရဲပင်လယ်က မျက်မှောင်အနည်းငယ်ကြုတ်ပြီး သူ၏ အမူအရာက ပျက်ယွင်းသွား၏။

အခြားသော အထွတ်အထိပ်ဘုရင်နှစ်ဦးက တိတ်တဆိတ် ကျေနပ်သဘောကျသွားပြီး ရှေ့သို့ အလောတကြီး တက်လာကြ၏။ သူတို့က သူတို့၏ မျိုးဆက်သွေးများကို ထုတ်ဖော်ပြီး နက်မှောင်နေသော ကျောက်တိုင်ပေါ်ကို သွေးအစက်ချလိုက်၏။

သူတို့၏ သွေးများက နက်မှောင်နေသော ကျောက်တိုင်ပေါ်သို့ ကျဆင်းသွားသော်လည်း တုံ့ပြန်မှု ရှိမလာသေးပေ။

အထွတ်အထိပ်ဘုရင်နှစ်ဦး၏ အမူအရာကလည်း ပျက်ယွင်းသွားလေသည်။

ကျန်ရှိနေသော မြင်းမျောက်ဘုရင်များက ထိုသည်ကို တွေ့မြင်သောအခါ တစ်ယောက်ပြီးတစ်ယောက် ရှေ့သို့တက်လှမ်းပြီး သူတို့၏ မျိုးဆက်သွေးများကို ထုတ်ဖော်လိုက်ကြ၏။

သို့သော်လည်း နက်မှောင်နေသော ကျောက်တိုင်ကနေ မည်သည့် တုံ့ပြန်မှုမှ ရှိမလာသေးပေ။

“ဘာဖြစ်နေတာပါလိမ့်”

“ကျုပ်တို့ရဲ့ မျိုးဆက်သွေးက လုံလောက်မှု မရှိတာများလား… ကျုပ်သိရသလောက်ဆိုရင် အရင်တုန်းက မဟာဧကရာဇ်တိုက်ပွဲမှာ လက်ချင်းဆက် နီညိုရောင်မျောက်ဝံရဲ့ မျိုးဆက်သွေး ရှိတယ်”

မြင်းမျောက်များက တိတ်တဆိတ် ဆွေးနွေးပြောဆိုလိုက်ကြ၏။

“အဲဒါက မျိုးဆက်သွေးနဲ့ မဆိုင်လောက်ဘူး”

ရုတ်တရက် မျောက်ဘုရင် နီရဲပင်လယ်က ပြောလိုက်၏။

“အဲဒါက မျိုးဆက်သွေးနဲ့ သက်ဆိုင်တယ်ဆိုရင် နီညိုရောင်မျောက်ဝံ အထဲကို ဝင်ရောက်သွားတာကို နားလည်ပေးနိုင်တယ်… ဒါပေမဲ့ ဟိုလူသားကရော အထဲကို ဘာလို့ ဝင်ရောက်သွားနိုင်ရတာလဲ”

မြင်းမျောက်ဘုရင်များက အသိအမှတ်ပြု ခေါင်းညိတ်လိုက်၏။

မျိုးဆက်သွေးအရ မည်သို့ပင်ဆိုစေ ဆူဇီမို၏ လူသားမျိုးဆက်သွေးထက် သူတို့မှာ အားသာချက် ပိုရှိလေသည်။

ရုတ်တရက် မျောက်ဘုရင် နီရဲပင်လယ်က ပြုံးပြလိုက်၏။

“သူတို့က ငါတို့ထက် နှာတစ်ဖျားသာသွားတယ်ဆိုလည်း ရတယ်လေ”

“ညီအစ်ကို နီရဲပင်လယ်… မင်းမှာ ပိုပြီးတော့ ပြောင်မြောက်တဲ့ အကြံအစည်ရှိလို့လား”

အထွတ်အထိပ်ဘုရင်နှစ်ဦးက အလောတကြီး မေးလိုက်၏။

မျောက်ဘုရင် နီရဲပင်လယ်က ပြောလိုက်၏။

“ဒီတိုက်ပွဲနတ်ဘုရားလက်နက်မှာ ပိုင်ရှင်မှ မရှိတော့ပဲ… ငါတို့က အထဲမှာရှိတဲ့ နေရာလွတ်ထဲကို မဝင်ရောက်နိုင်ဘူးဆိုပေမဲ့ ငါတို့က အဲဒါကို သန့်စင်လို့ရတာပဲ”

အထွတ်အထိပ်ဘုရင်နှစ်ဦး မျက်လုံးက ဝင်းလက်သွား၏။

၎င်းသည် အစစ်အမှန် မဟာဧကရာဇ်လက်နက်တစ်ခု ဖြစ်မည်ဆိုလျှင် သူတို့၏ အစွမ်းအစအရ သူတို့က အဲဒါကို သန့်စင်နိုင်စရာ အကြောင်းမရှိပေ။

သို့သော်လည်း တိုက်ပွဲနတ်ဘုရားလက်နက်က အပြင်းအထန် ပျက်စီးထိခိုက်ထားပြီး ယခင်ကနှင့် ဆက်လက်၍ မတူတော့ပေ။ ၎င်း၏ လက်နက်စိတ်ဝိညာဉ်က အထဲမှာ ပျက်ပြယ်သွားလောက်ပြီဖြစ်သည်။

သူတို့က ၎င်းကို သန့်စင်ပြီး သူတို့၏ ကိုယ်ပိုင်နတ်ဘုရားလက်နက်နှင့် စိတ်ဝိညာဉ်ရတနာအဖြစ် ပြုလုပ်နိုင်မည်ဆိုလျှင် သူတို့သည် အထဲကို စိတ်ရှိတိုင်း ဝင်ရောက်ကာ အထဲမှာရှိသော အမွေအနှစ်နှင့် အရာရာတိုင်းကို ထိန်းချုပ်နိုင်မည် ဖြစ်သည်။

မြင်းမျောက်ဘုရင်တစ်ဦးက ပြောလိုက်၏။

“ဒါက ဘာပဲပြောပြော မဟာဧကရာဇ်လက်နက်တစ်ခုပဲ… အဲဒါက ယိုယွင်းပျက်စီးနေတယ်ဆိုရင်တောင် အဲဒါကို သန့်စင်ဖို့က လွယ်မှာမဟုတ်ဘူး… အဲဒါက နှစ်ပေါင်းရာချီ ဒါမှမဟုတ် နှစ်ပေါင်းထောင်ချီ ကြာသွားနိုင်တယ်”

“အဲဒီအချိန်ကျရင် အထဲမှာရှိတဲ့ နီညိုရောင်မျောက်ဝံက အမွေအနှစ်ကို ရရှိပြီးသွားလောက်ပြီ”

“ဟဲဟဲ”

မျောက်ဘုရင် နီရဲပင်လယ်က လှောင်ရယ်လိုက်၏။

“သူက မဟာဧကရာဇ်တိုက်ပွဲရဲ့ အမွေအနှစ်တွေအားလုံး ရရှိသွားတယ်ဆိုတော့ရော ဘာဖြစ်လဲ… နီညိုရောင်မျောက်ဝံက ဗလာနယ်ဝိညာဉ်နယ်ပယ်မှာပဲ ရှိတယ်… ဟိုလူသားကလည်း သုခဘုံလေဟာနယ်နယ်ပယ်မှာပဲ… အဲဒီကောင်စုတ်နှစ်ကောင်က ငါတို့ကို ဘာများလုပ်နိုင်မှာလဲ”

“ဘေးပတ်ဝန်းကျင်မှာ ကောင်းကင်နှင့်မြေကြီးအမြုတေချီ အပါအဝင် အရာရာတိုင်းကို ပိုင်းခြားပေးထားတဲ့ အာကာသတွင်းနက်တစ်ခု ရှိနေတယ်ဆိုတာကို မမေ့လိုက်နဲ့”

မြင်းမျောက်ဘုရင်များစွာက နားလည်သဘောပေါက်လာကြ၏။

ကောင်းကင်လိုဏ်ဂူတစ်ခု၏ လေးနက်သိမ်မွေ့မှုသည် လူတစ်ယောက်၏ ခန္ဓာကိုယ်အပြင်ဘက်မှာ မိုးကောင်းကင်ထက် ရောက်ရှိနိုင်ပြီး ကောင်းကင်နှင့်မြေကြီး အမြုတေချီကို စုပ်ယူနိုင်သည့် အခန်းတစ်ခန်းကို ဖွင့်လှစ်ရန် ဖြစ်သည်။

သို့သော်လည်း အာကာသတွင်းနက်ထဲမှာ သူတို့၏ ကောင်းကင်လိုဏ်ဂူများပင်လျှင် အပြင်ဘက်မှာရှိသော ကောင်းကင်နှင့်မြေကြီး အမြုတေချီကို အငမ်းမရ ဝါးမျိုနိုင်ခြင်း မရှိပေ။

မျောက်ဘုရင် နီရဲပင်လယ်နှင့် အခြားသော အထွတ်အထိပ်ဘုရင်နှစ်ဦးကသာ သူတို့၏ ကောင်းကင်လိုဏ်ဂူများကို ပကတိအဆင့်ထိ ကျင့်ကြံထားပြီး ဤနေရာမှာ ဘေးပတ်ဝန်းကျင်ရှိ အာကာသတွင်းနက်၏ စွမ်းအားကနေတစ်ဆင့် ကောင်းကင်နှင့်မြေကြီး အမြုတေချီတချို့ကို စုပ်ယူနိုင်လေသည်။

နက်မှောင်နေသော ကျောက်တိုင်ထဲသို့ ဝင်ရောက်သွားသူ နှစ်ယောက်ကတော့ ပကတိစိတ်ဝိညာဉ်များသာ ဖြစ်ကြသည်။ အရာရာကို ပိုင်းခြားပေးထားသည့် ဤအာကာသတွင်းနက်ထဲမှာ သူတို့သည် မဟာဧကရာဇ်တစ်ပါး၏ အမွေအနှစ်ကို ရရှိမည်ဆိုလျှင်တောင် ကောင်းကင်နှင့်မြေကြီး အမြုတေချီ၏ အားဖြည့်ထောက်ပံ့မှုက မယ်မယ်ရရ တိုးလာလိမ့်မည် မဟုတ်ပေ။

ထိုနေရာမှာ အဆင့်ကြီးတစ်ဆင့် ချိုးဖျက်တက်လှမ်းဖို့ မပြောနှင့်၊ အဆင့်သေးတစ်ဆင့်ကို ဖြတ်ကျော်ရသည်ကပင် ကောင်းကင်ဘုံကို တက်လှမ်းရသလောက် ခဲယဉ်းပေလိမ့်မည်။

နောက်ထပ် အထွတ်အထိပ်ဘုရင်တစ်ဦးက ပြောလိုက်၏။

“နှစ်ပေါင်းရာချီ ဒါမှမဟုတ် နှစ်ပေါင်းထောင်ချီကို မပြောနဲ့… ငါက သူတို့နှစ်ယောက်နဲ့ နှစ်ပေါင်းသောင်းချီ ဒါမှမဟုတ် နှစ်ပေါင်းတစ်သိန်းလောက် အချိန်ယူရမယ်ဆိုရင်တောင် အဲဒါက ထိုက်တန်တယ်”

မျောက်ဘုရင် နီရဲပင်လယ်က ကျန်ရှိနေသော မြင်းမျောက်ဘုရင် ဆယ်ဦးကျော်ကျော်ကို ကြည့်ပြီး ပြောလိုက်၏။

“မင်းတို့တွေက ဒီတစ်ခေါက် ငါနဲ့လိုက်လာခဲ့တယ်… ငါတို့က မဟာဧကရာဇ်တိုက်ပွဲရဲ့ အမွေအနှစ်ကို ရရှိမယ်ဆိုရင် မင်းတို့ကလည်း အကျိုးအမြတ်ကြီးကြီးမားမား ရလိမ့်မယ်”

မြင်းမျောက်ဘုရင်များက အားတက်တရော ရှိလာပြီး ကျေနပ်သဘောကျသော အမူအရာများ ထွက်ပေါ်လာကြ၏။

မျောက်ဘုရင် နီရဲပင်လယ်နှင့် အခြားသော အထွတ်အထိပ်ဘုရင်နှစ်ဦးက အကြည့်ချင်းဖလှယ်လိုက်ကြပြီး တစ်စုံတစ်ရာ ထပ်မံပြောဆိုခြင်း မရှိပေ။ သူတို့မှာ အလိုအလျောက် နားလည်မှု ရှိနေ၏။

မျောက်ဘုရင် နီရဲပင်လယ်၏ စကားမှာ အဓိကအချက်သည် အခြားသော မြင်းမျောက်ဘုရင်များကို ယုံကြည်စိတ်ချစေပြီး သူတို့ကို ဤနေရာမှာ ထိန်းသိမ်းထားဖို့ ဖြစ်သည်။

တစ်ယောက်ယောက်က ထွက်ခွာသွားပြီး ဤကိစ္စကို သူတို့မျိုးနွယ်မှ ဧကရာဇ်ပညာရှင်များထံ တင်ပြလိုက်သည်နှင့် သူတို့သည် မဟာဧကရာဇ်တိုက်ပွဲ၏ အမွေအနှစ်ကို သေချာပေါက် ရရှိနိုင်တော့မည် မဟုတ်ပေ။

“အချိန်ဆွဲနေလို့ မဖြစ်ဘူး… အခုပဲ စကြတာပေါ့”

မျောက်ဘုရင် နီရဲပင်လယ်က အထွတ်အထိပ်ဘုရင်နှစ်ဦးနှင့် ဆွေးနွေးပြီးနောက် နက်မှောင်နေသော ကျောက်တိုင်ရှေ့သို့ ရောက်ရှိလာခဲ့၏။ သူက ခြေချိတ်ထိုင်ပြီး သူ၏ နောက်ဘက်မှာ ပကတိကောင်းကင်လိုဏ်ဂူတစ်ခု ပေါ်ထွက်လာကာ ကျောက်တိုင်ကို စတင်၍ သန့်စင်နေ၏။

မျောက်ဘုရင် နီရဲပင်လယ်က သူတတ်နိုင်သလောက် ပြုလုပ်ပြီးနောက် သူက သူ့၏ အသက်ရှူသံကို ဖြည်းဖြည်းချင်း ထိန်းညှိကာ ကောင်းကင်နှင့်မြေကြီး အမြုတေချီကို ပြန်လည်ဖြည့်တင်းနေ၏။

ထိုအချိန်မှာ ဒုတိယမြောက် အထွတ်အထိပ်ဘုရင်က ဆက်လက်၍ သန့်စင်နေ၏။

သူတို့သုံးယောက်က အလှည့်ကျ လှုပ်ရှားနေပြီး ပကတိကောင်းကင်လိုဏ်ဂူများအတွင်းမှာ တိုက်ပွဲနတ်ဘုရားလက်နက်ကို အဆက်မပြတ် သန့်စင်နေ၏။

ကျန်ရှိနေသော သာမန်ဘုရင်များနှင့် အန္တိမဘုရင်များက ဝင်ပါကြခြင်း မရှိပေ။

သူတို့သည် ဤနေရာကနေ ကောင်းကင်နှင့်မြေကြီး၏ အမြုတေချီကို စုပ်ယူခြင်းနှင့် နတ်ဘုရားလက်နက်ကို သန့်စင်ခြင်းများ မပြုလုပ်နိုင်ကြပေ။ သူတို့က အားအင်ကုန်ဆုံးသွားမည်ဆိုလျှင် သူတို့အနေဖြင့် ကုန်ဆုံးသွားသော အားအင်ကို ပြန်လည်ဖြည့်တင်းဖို့က အင်မတန် ခဲယဉ်းပေလိမ့်မည်။

မျောက်ဘုရင် နီရဲပင်လယ်နှင့် အခြားသူများ ထင်သည်မှာ မမှားပေ။ ဆူဇီမိုနှင့် မျောက်က နက်မှောင်နေသော ကျောက်တိုင်ထဲသို့ တကယ်ပင် ဝင်ရောက်သွား၏။

မျောက်က အထဲသို့ ဝင်ရောက်လာသည်မှာ ဖြစ်သင့်လေသည်။

မျောက်က သူ၏ မျိုးဆက်သွေးကို နှိုးထစေသည့် အချိန်မှာပင် ဤနေရာမှ ခေါ်ယူနေခြင်းကို သူက အာရုံခံမိခဲ့၏။

ဆူဇီမိုကလည်း သူ့နောက်ကနေ လိုက်ပါလာနိုင်ခဲ့သည်မှာ အံ့အားသင့်စရာကောင်းလေသည်။

သူတို့နှစ်ယောက်သည် တိုက်ပွဲနတ်ဘုရားလက်နက်ထဲမှာ ပုန်းကွယ်နေပြီး အပြင်ဘက်မှာ ရှိသော အခြေအနေကို အာရုံစိုက်ကြည့်နေ၏။

မျောက်ဘုရင် နီရဲပင်လယ်နှင့် အခြားသူများက ဤနေရာသို့ မဝင်ရောက်နိုင်သည်ကို တွေ့ရသောအခါ သူတို့နှစ်ယောက်က စိတ်သက်သာစွာ သက်ပြင်းချပြီး စိတ်ကို လုံးလုံးလျှော့ချလိုက်၏။

မည်သို့ပင်ဆိုစေ သူတို့သည် အနည်းဆုံးတော့ လောလောဆယ်မှာ အန္တရာယ်ကနေ လွတ်မြောက်သွားခဲ့ပြီ ဖြစ်သည်။

ဆူဇီမိုက လှည့်ပတ်ကြည့်ရှုလိုက်၏။

ဤနေရာက အတော်လေး ဗလာကျင်းနေပြီး ဘေးပတ်လည်မှာ နံရံပြောင်များသာ ရှိနေ၏။ ဤနေရာမှာ အထွေအထူး မည်သည့်ပစ္စည်းမှ မရှိဘဲ အရာရာတိုင်းကို တစ်ချက်ကြည့်ရုံဖြင့် တွေ့မြင်နိုင်သည်။

“ငါ မင်းကို အရင်ကုသပေးမယ်”

ဆူဇီမိုက မျောက်ကို သူ့ရှေ့မှာ ထိုင်စေပြီး ဖန်တီးခြင်းကြာပဒုမ္မာ၏ မျိုးဆက်သွေးကို အသုံးချကာ အသက်ဓာတ်ကြာလက်ညှိုးကို ထုတ်ဖော်လိုက်၏။ သန့်စင်၍ သိပ်သည်းကျစ်လျစ်သော အသက်ဓာတ်အားက မျောက်၏ ခန္ဓာကိုယ်ထဲသို့ တလိပ်လိပ်တိုးဝင်လာ၏။

တစ်ရက်မျှနှင့် မျောက်သည် အတော်လေး သက်သာကောင်းမွန်သွား၏။ သူ၏ မျက်နှာက အသားရောင်သန်းလာပြီး သူ့၏ အသက်ရှူသံက တည်ငြိမ်လာခဲ့သည်။

“အစ်ကိုကြီး… ငါအခု အဆင်ပြေသွားပြီ”

ဆူဇီမိုသည် ဒဏ်ရာရရှိထားပြီး သူ့ကို တစ်လမ်းလုံး သယ်ပိုးကာ ထွက်ပြေးလာရသည်ကို မျောက်က သိရှိထားလေသည်။ ယခု ဆူဇီမိုက သူ့ကို ကုသပေးခြင်းနှင့်အတူ သူသည် စွမ်းအင်အမြောက်အများကို ထပ်မံ၍ သုံးစွဲခဲ့ရသည်။ ထို့ကြောင့် သူက မတ်တတ်ထရပ်ပြီး အကြောအခြင်ဆန့်ကာ သူ၏ ခန္ဓာကိုယ်ထဲကနေ တဖျောက်ဖျောက်အသံများ ထွက်ပေါ်လာ၏။

ဆူဇီမိုက ခေါင်းညိတ်လိုက်၏။ သူသည် ခဏမျှ အနားယူသည်နှင့် အဆင့်-၁၂ ဖန်တီးခြင်းကြာပဒုမ္မာ၏ ပြန်လည်ကုသနိုင်စွမ်းအရ သူက သိပ်မကြာခင် မူလအခြေအနေသို့ ပြန်လည်ရောက်ရှိသွားပေလိမ့်မည်။