ယိုယွင်းပျက်စီးနေသော ရှေးဟောင်းသင်္ဘော

သိုင်းတာအိုပင်မခန္ဓာသည် အဲဒါက မီးတောက်တစ်ခုလားဆိုတာ သေချာမပြောတတ်ပေ။

သူက တမလွန်မြစ်၏ အနက်ပိုင်းထဲသို့ ဝင်ရောက်လာစဉ် သိုင်းတာအိုပိုင်နက်နယ်မြေထဲရှိ မီးတောက်ခြောက်ခုက သိသိသာသာ ဖိနှိမ်ခံရပြီး မီးတောက်များက လျော့ကျလာသောကြောင့်ဖြစ်၏။

သို့သော်လည်း မြင်ကွင်း၏ အဆုံး တမလွန်မြစ်ပေါ်မှာ ဤကဲ့သို့ စွမ်းအားကြီးမားသော မီးတောက်တစ်ခု အမှန်တကယ်ပင် ရှိနေ၏။ ၎င်းက ဖိနှိမ်မခံရဘဲ ဘေးပတ်ဝန်းကျင်မှာရှိသော မြစ်ရေမျက်နှာပြင်ကိုပင် နီရဲနေအောင် အလင်းပေးထား၏။

သိုင်းတာအိုပင်မခန္ဓာ၏ မျက်လုံးထဲမှာ ခရမ်းရောင်မီးတောက်နှစ်ခု ပေါ်ထွက်လာပြီး သူက အဲဒါကို ရှင်းရှင်းလင်းလင်း တွေ့မြင်လိုကာ မီးတောက်လုံးကို မမှိတ်မသုန် စိုက်ကြည့်နေ၏။

မီးတောက်လုံး၏ အလယ်မှာ တစ်စုံတစ်ရာ ရှိနေပုံရသည်။

သို့သော်လည်း နေရာက အရမ်းကို ဝေးကွာပြီး ကျိန်းစပ်နေသော မီးတောက်လုံးနှင့်အတူ သူက အဲဒါကို ရှင်းရှင်းလင်းလင်း မတွေ့မြင်နိုင်ပေ။

“ဟမ်…”

သိုင်းတာအိုပင်မခန္ဓာက လက်လျှော့တော့မည့်ဆဲဆဲမှာပင် သူ၏ မျက်ဝန်းထောင့်ကနေ ဒေါသူပုန်ထနေသော မီးတောက်၏ ဘေးမှာ ယိုယွင်းပျက်စီးနေသော ရှေးဟောင်းသင်္ဘောတစ်စင်းကို တွေ့မြင်လိုက်ရ၏။

ရှေးဟောင်းသင်္ဘောက အလွန်တရာ ရိုးရှင်းသည့်ပုံပေါ်ပြီး ဘေးဘောင်များ သို့မဟုတ် ရွက်တိုင်များ မရှိဘဲ ပိန်းပိတ်အောင် နက်မှောင်နေ၏။ နက်မှောင်နေသော ခတ်တက်နှစ်ချောင်းကို ဘေးတစ်ဖက်တစ်ချက်စီမှာ ချိတ်ဆွဲထားပြီး မြစ်ရေမျက်နှာပြင်ပေါ်မှာ ပေါလောပေါ်နေ၏။

ဤကဲ့သို့သော ရှေးဟောင်းသင်္ဘောတစ်စင်းကို မြစ်ထဲတွင် တွေ့ရသည်မှာ ထူးဆန်းမနေပေ။

သို့သော်လည်း ဤနေရာက တမလွန်မြစ် ဖြစ်လေသည်။

ယိုယွင်းပျက်စီးနေသော ဤရှေးဟောင်းသင်္ဘော၏ ပေါ်ထွက်လာမှုက အနည်းငယ် ထူးဆန်းနေ၏။ ဒါ့အပြင် ယိုယွင်းပျက်စီးနေသော ရှေးဟောင်းသင်္ဘောက မီးတောက်နှင့် အလွန်တရာ နီးကပ်နေသော်လည်း ၎င်းက လောင်ကျွမ်းခံရသည့် အရိပ်လက္ခဏာ မရှိပေ။ တစ္ဆေတစ်ကောင်ကဲ့သို့ ၎င်းက မြစ်ထဲမှာ မလှုပ်မယှက် ပေါလောပေါ်နေ၏။

ထိုမျှသာ မကပေ။

ရုတ်တရက် သိုင်းတာအိုပင်မခန္ဓာက မျက်မှောင်ကြုတ်လိုက်၏။

မီးတောက်လုံးနှင့် ယိုယွင်းပျက်စီးနေသော ရှေးဟောင်းသင်္ဘောက တမလွန်မြစ်ထဲမှာ ရှိနေမည်ဆိုလျှင် သူတို့သည် ရေစီးကြောင်းနှင့် မျောပါရမည့်အစား ဘာကြောင့်တစ်ချိန်လုံး မလှုပ်မယှက် ပေါလောပေါ်နေရတာလဲ။

ရုတ်တရက်ဆိုသလို….

တမလွန်မြစ်၏ အနက်ပိုင်းထဲမှာ မကောင်းဆိုးဝါးဆန်ဆန် လေပြင်းတစ်ချက်က ဖြည်းဖြည်းချင်း တိုက်ခတ်လာပြီး မြစ်ရေမျက်နှာပြင်ကို တောက်ပသွားစေ၏။

သိုင်းတာအိုပိုင်နက်နယ်မြေထဲရှိ မီးတောက်ခြောက်ခုက ချက်ချင်းပင် ငြိမ်းသေသွားသည်။

သိုင်းတာအိုပင်မခန္ဓာ၏ မျက်လုံးထဲရှိ ခရမ်းရောင်မီးတောက်နှစ်ခုက တစ်ချိန်တည်းနီးပါး ငြိမ်းသေသွား၏။ သူ့မျက်လုံးထဲကနေ စူးရှသော နာကျင်မှုတစ်ခု ထွက်ပေါ်လာပြီး သူက သူ၏ မျက်လုံးနှစ်ဖက်ကို အလိုလိုမှိတ်လိုက်ရ၏။

တစ်ချိန်တည်းမှာပင် သူ၏ ရင်ထဲမှာ မကြုံစဖူး အကြောက်တရားတစ်ခု ပေါ်ထွက်လာပြီး သူ့ကို ရင်တလှပ်လှပ်နှင့် ခေါင်းနားပန်းကြီးလာစေ၏။

ထိုအကြောက်တရားက သူ့ကို ထွက်ပြေးစေလိုနီးပါးပင်။

ထိုမျှသာမကပေ။

သိုင်းတာအိုပင်မခန္ဓာ၏ အသိစိတ်ထဲမှာ လောင်ကျွမ်းနေသော ခရမ်းရောင်မီးတောက်များက မကောင်းဆိုးဝါးဆန်ဆန်လေကြောင့် ယိမ်းထိုးသွားပြီး သူတို့က အချိန်မရွေး ငြိမ်းသေသွားနိုင်သည့်အလား တဖျပ်ဖျပ်ဖြစ်လာ၏။

ထိုခရမ်းရောင်မီးတောက်များက သူ၏ သိုင်းစိတ်ဝိညာဉ် ဖြစ်သည်။

သိုင်းစိတ်ဝိညာဉ်မီးက ငြိမ်းသေသွားသည်နှင့် သူ၏ အမြုတေစိတ်ဝိညာဉ်က ဖျက်ဆီးခံရသည်ဟု အဓိပ္ပာယ်ရပြီး သူက သေသွားရပေလိမ့်မည်။

သူ၏ တိုက်ခိုက်ရည်ခွန်အားက ဘယ်လောက်ပင် သန်မာသည်ဖြစ်စေ သို့မဟုတ် သူက ဘယ်လောက်ပင် စွမ်းအားကြီးမားသော ဓမ္မတာအိုကို ဖန်တီးထားသည်ဖြစ်စေ သူက လေထဲမှာ ပျောက်ကွယ်သွားရပေလိမ့်မည်။

ငရဲဖိနှိမ်မီးဖိုက အဆက်မပြတ် တုန်ခါပြီး ပူဆွေးဝမ်းနည်းနေသော ငိုကြွေးသံကို ထုတ်ဖော်ကာ သိုင်းတာအိုပင်မခန္ဓာထံ အကြောက်တရား စိတ်ခံစားချက်ကို ပို့ဆောင်ပေးနေ၏။

ငရဲဖိနှိမ်မီးဖို၏ အော်သံကပင်လျှင် ဖိနှိမ်ခံလိုက်ရပြီး ၎င်းက ဆက်လက်၍ အသံမထွက်ရဲတော့ပေ။

မီးဖိုထဲမှာ ဂါထာမန္တန် ရွတ်ဖတ်သံကလည်း ဖြတ်တောက်ခံလိုက်ရပြီဖြစ်သည်။

ဝိညာဉ်မီးအိမ်၏ ဖြန့်ကြက်ထားသော ရွှေရောင်အလင်းကလည်း ဟန့်တားနှောင့်ယှက်ခံလိုက်ရပြီ ဖြစ်သည်။

သိုင်းတာအိုပင်မခန္ဓာသည် သူ၏ မျက်လုံးနှစ်ဖက်ကို မှိတ်ပြီး သူ့ရှေ့မှာ တမလွန်ဘုံရတနာကြေးမုံနှင့် ဝိညာဉ်မီးအိမ်ကို ကာထားပြီး လျင်မြန်စွာ ဆုတ်ခွာလိုက်၏။

သူသည် လမ်းတစ်လျှောက် ပြေးလွှားလာခဲ့ပြီး အကြောက်တရား ခံစားချက်က တဖြည်းဖြည်းစဲကာ သိုင်းစိတ်ဝိညာဉ်မီးက သူ၏ အသိစိတ်ထဲမှာ နဂိုပုံမှန်အတိုင်း ပြန်ဖြစ်လာမှသာ သူက ရပ်တန့်လိုက်၏။

သိုင်းတာအိုပင်မခန္ဓာက သူ၏ မာန်နတ်မျက်နှာဖုံးကို ချွတ်လိုက်ပြီး ချွေးများဖြင့် စိုရွှဲနေသော သူ၏ ဖြူဖပ်ဖြူရော်မျက်နှာက ပေါ်ထွက်လာ၏။ သူက သည်းထန်စွာ မောဟိုက်နေပြီး သူ၏ မျက်လုံးနှစ်ဖက်ကို ဖြည်းဖြည်းချင်း ဖွင့်လိုက်၏။

သူသည် အန္တရာယ်ကနေ လွတ်မြောက်လာခဲ့ပြီ ဖြစ်သော်လည်း သူသည် စောစောက မြင်ကွင်းကို ပြန်လည်စဉ်းစားကြည့်သည့်အခါ အကြောက်မပြေသေးပေ။

မကောင်းဆိုးဝါးဆန်ဆန် လေက ဘာလဲ။

အဲဒါက ဘယ်နေရာကနေ ရောက်လာတာလဲ။

သိုင်းတာအိုပင်မခန္ဓာသည် ထိုစဉ်တုန်းက အခြေအနေကို ပြန်လည်စဉ်းစားကြည့်လိုက်၏။

မကောင်းဆိုးဝါးဆန်ဆန် လေသည် သန်မာမှုမရှိဘဲ လေပြေတစ်ခုကဲ့သို့ဖြစ်၏။

သို့သော်လည်း ချက်ချင်းဆိုသလိုပင် ကြောက်စရာကောင်းသော ပြောင်းလဲမှုများက သူ၏ ခန္ဓာကိုယ်ထဲမှာ ဆက်တိုက်ပေါ်ထွက်လာခဲ့၏။

သိုင်းတာအိုပင်မခန္ဓာသည် သူ့ခေါင်းကို ငုံ့ပြီး တစ်ချက်ကြည့်လိုက်၏။

သူသည် စောစောက သူ့ကိုယ်သူ ကာကွယ်ဖို့အတွက် ဝိညာဉ်မီးအိမ်ကို အသုံးပြုခဲ့သော်လည်း ဝိညာဉ်မီးအိမ်ထဲရှိ ရွှေရောင်မီးတောက်များက ငြိမ်းသေနေခဲ့ပြီဖြစ်သည်။

ဝိညာဉ်မီးအိမ်၏ မီးတောက်များသည် မကောင်းဆိုးဝါးဆန်ဆန်လေ တိုက်ခတ်လာသည့်အချိန်မှာ ငြိမ်းသေသွားခဲ့ခြင်း ဖြစ်ပေလိမ့်မည်။

သိုင်းတာအိုပင်မခန္ဓာသည် သူ့ကိုယ်သူ တဖြည်းဖြည်း ဣန္ဒြေဆယ်ပြီး တမလွန်မြစ်ကို ဆက်လက်စုံစမ်းထောက်လှမ်းမည့် အတွေးကို ယာယီအားဖြင့် စွန့်လွှတ်လိုက်၏။

မဟာအရိုင်းကမ္ဘာ၏ အန္တရာယ်က ယခုအချိန်ထိ မပြေလည်သေးပေ။ သူက ဤနေရာမှာ တစ်ခုခုဖြစ်နေပြီး တျဲယွဲ့ကို အကူအညီမပေးနိုင်ဘူးဆိုလျှင် သူမသည် ဧကရာဇ်မိုးပြာရောင်မီးတောက်၏ လာမည့်တိုက်ခိုက်မှုကို ခုခံနိုင်လိမ့်မည် မဟုတ်လောက်ပေ။

သိုင်းတာအိုပင်မခန္ဓာသည် ငရဲဖိနှိမ်မီးဖို၊ တမလွန်ဘုံရတနာကြေးမုံနှင့် ဝိညာဉ်မီးအိမ်တို့ကို သိမ်းဆည်းလိုက်၏။ သူက မာန်နတ်မျက်နှာဖုံးကို ပြန်တပ်တော့မည့်ဆဲဆဲမှာပင် ရင်တစ်ချက်ထိတ်သွား၏။

အစကတော့ မာန်နတ်မျက်နှာဖုံးသည် ဧကရာဇ်လက်နက်တစ်ခု ဖြစ်ခဲ့၏။ သို့သော်လည်း သိုင်းတာအိုပင်မခန္ဓာသည် အထဲမှာရှိသော လက်နက်စိတ်ဝိညာဉ် ကောင်းကင်ဘုံဝံပုလွေကို လွှတ်ပေးပြီး သူ့ကို ပြန်လည်မွေးဖွားလာစေခဲ့၏။ ရလဒ်အနေဖြင့် ဧကရာဇ်လက်နက်၏ စွမ်းပကားက ကြီးမားစွာ လျော့ကျသွားလေသည်။

သူ၏ လက်ရှိတိုက်ခိုက်ရည်ခွန်အားအရ မာန်နတ်မျက်နှာဖုံးသည် သူ့အတွက် အသုံးဝင်မှု မရှိသလောက်နီးပါး ဖြစ်လာခဲ့လေပြီ။

အချိန်အများစုမှာ သူသည် သူ၏ ပုံပန်းသဏ္ဌာန်ကို ဖုံးကွယ်ဖို့အတွက်သာ အဲဒါကို အသုံးပြုခဲ့လေသည်။

သိုင်းတာအိုပင်မခန္ဓာမှာ အားနည်းချက်တစ်ခုခု ရှိမည်ဆိုလျှင် အဲဒါသည် သူ့အသိစိတ်ထဲရှိ အမြုတေစိတ်ဝိညာဉ် သို့မဟုတ် ခရမ်းရောင်မီးတောက် သိုင်းစိတ်ဝိညာဉ် ဖြစ်ပေလိမ့်မည်။ အဲဒါက တကယ်ပင် အတော်အတန် အားနည်းနေ၏။

၎င်းကို အားနည်းသည်ဟု ဆိုရခြင်းမှာ မတူညီသော ကျင့်ကြံမှုနယ်ပယ်များပေါ် အခြေခံ၍ နှိုင်းယှဉ်ထားသောကြောင့် ဖြစ်သည်။

ဥပမာအားဖြင့် သူသည် အထွတ်အထိပ် ဧကရာဇ်တစ်ပါးကဲ့သို့ သူ့ကျင့်ကြံမှုနယ်ပယ်ထက် များစွာပိုမိုမြင့်မားသော တစ်စုံတစ်ယောက်နှင့် ကြုံတွေ့ရမည်ဆိုလျှင် ထိုသူသည် သူ၏ သိုင်းစိတ်ဝိညာဉ်အပေါ် ပျက်စီးထိခိုက်မှုတချို့ ဖြစ်ကောင်းဖြစ်စေနိုင်လေသည်။

သိုင်းတာအိုပင်မခန္ဓာသည် ခဏမျှ စဉ်းစားတွေးတောပြီးနောက် မာန်နတ်မျက်နှာဖုံးကို ပြန်လည်ပုံသွင်းဖို့ ပြင်လိုက်၏။

ရွှစ်…

သိုင်းတာအိုပင်မခန္ဓာက မီးတောက်ခြောက်ခုကို ထုတ်ဖော်ပြီး မာန်နတ်မျက်နှာဖုံးကို လောင်ကျွမ်းစေလိုက်၏။

ရက်အနည်းငယ်ကြာပြီးနောက် မာန်နတ်မျက်နှာဖုံးက လောင်ကျွမ်းနီရဲ၍ ထွင်းဖောက်မတတ် ကြည်လင်လာခဲ့သော်လည်း ၎င်းက အရည်ပျော်ကျမည့် မည်သည့်လက္ခဏာမှ မပြသပေ။

မာန်နတ်မျက်နှာဖုံးက တကယ်ကို ထူးခြားလွန်းလေသည်။

အရင်တုန်းက ဧကရာဇ်ပိုရွှင်းသည် မရေမတွက်နိုင်သော သဘာဝရတနာများ၊ ရှားရှားပါးပါး သတ္တုရိုင်းများနှင့် သူ၏ စိတ်ခံစားချက်ခုနစ်မျိုးကိုယ်ပွားများ၏ အသားများကို အသုံးချထည့်သွင်းပေါင်းစည်းကာ ဤကဲ့သို့သော မျက်နှာဖုံးတစ်ခုကို သန့်စင်သွန်းလုပ်ခဲ့၏။

သိုင်းတာအိုပင်မခန္ဓာ၏ လက်ရှိခွန်အားအရ ဧကရာဇ်လက်နက်တစ်ခုပင်လျှင် သူ့၏ မီးတောက်ခြောက်ခုကို ခံနိုင်ရည်ရှိလိမ့်မည် မဟုတ်ပေ။

မာန်နတ်မျက်နှာဖုံးက သူ၏ လက်နက်စိတ်ဝိညာဉ်ကို ဆုံးရှုံးထားရသည်ဆိုလျှင်တောင် ၎င်းက ယခုအချိန်ထိ အရည်ပျော်မကျသေးပေ။

ဤအတိုင်းသာ ဆက်သွားလျှင် မည်သည့်ဖြစ်စဉ်မှ ပေါ်ထွက်လာလိမ့်မည် မဟုတ်ပေ။

ထိုအစား ၎င်းသည် သူ၏ ကျင့်ကြံမှုအပေါ် သက်ရောက်မှု ရှိလာပေလိမ့်မည်။

သိုင်းတာအိုပင်မခန္ဓာက လက်လျှော့တော့မည့်ဆဲဆဲမှာပင် သူ၏ စိတ်ထဲမှာ အတွေးတစ်ခု ဖျတ်ခနဲပေါ်ထွက်လာ၏။

သူက ဝိညာဉ်မီးအိမ်ကို ဆင့်ခေါ်ပြီး ၎င်းကို ထွန်းညှိလိုက်၏။

ထိုသို့ဖြင့် မာန်နတ်မျက်နှာဖုံး၏ အောက်ဘက်မှာ နောက်ထပ် ရွှေရောင်မီးတောက်တစ်ခု ပေါ်ထွက်လာ၏။

သိပ်မကြာခင် မာန်နတ်မျက်နှာဖုံးက စတင်၍ အရည်ပျော်ကျလာ၏။

သိုင်းတာအိုပင်မခန္ဓာက ကျေနပ်သဘောကျသွားပြီး မျက်နှာဖုံးကို စတင်၍ ပုံသွင်းလိုက်သည်။

သူသည် မာန်နတ်မျက်နှာဖုံးထဲမှာ ပါဝင်သော ဓမ္မတာအိုနှင့်ပတ်သက်ပြီး များစွာပြောင်းလဲလိုစိတ် မရှိပေ။ သူသည် နောက်ပိုင်းမှာ လက်နက်စိတ်ဝိညာဉ်တစ်ခုအဖြစ် အသွင်ပြောင်းလဲလာစေနိုင်မည့် သူ၏ စိတ်ဝိညာဉ်အသိစိတ်တစ်စကိုသာ ၎င်းအထဲသို့ ထည့်သွင်းပေါင်းစည်းချင်ရုံသာ ဖြစ်လေသည်။

သူ့အတွက်တော့ မာန်နတ်မျက်နှာဖုံးကို ပြန်လည်တည်ဆောက်ရခြင်း၏ အရေးကြီးဆုံးအဆင့်မှာ အရည်ဖျော်ခြင်းနှင့် ပုံသွင်းခြင်းဖြစ်စဉ် မဟုတ်ဘဲ နောက်ဆုံး အအေးခံခြင်း အစီအရင် ဖြစ်လေသည်။

၄၉ ရက် ကြာပြီးနောက် မာန်နတ်မျက်နှာဖုံးကို ပုံသွင်းခြင်းက ပြီးမြောက်သွားပြီး သူက အဲဒါကို အအေးခံဖို့ ပြင်လိုက်၏။

သာမန် အအေးခံခြင်းမှာ နတ်ဘုရားလက်နက်တစ်ခုကို စိမ့်စမ်းရေထဲသို့ နှစ်ပြီး ၎င်းကို လျင်မြန်စွာ အအေးခံဖို့ လိုအပ်လေသည်။

စိမ့်စမ်းရေ၏ အဆင့်က ပိုမိုမြင့်မားလေ နတ်ဘုရားလက်နက်အပေါ် တိုးတက်မှုက ပို၍ကြီးမားလေပင်။

သူ့ကျင့်ကြံမှု၏ ဤအဆင့်မှာ သိုင်းတာအိုပင်မခန္ဓာ တွေ့မြင်ဖူးသည့် အသန်မာဆုံးနှင့် အဆန်းကြယ်ဆုံး ရေအရင်းအမြစ်သည် သူ၏ ခြေဖဝါးအောက်မှ တမလွန်မြစ် ဖြစ်လေသည်။

သိုင်းတာအိုပင်မခန္ဓာက လောင်ကျွမ်းနေသော မာန်နတ်မျက်နှာဖုံးကို တမလွန်မြစ်ထဲသို့ နှစ်လိုက်၏။

ရှဲ...

ရေမျက်နှာပြင်ပေါ်မှာ ပူပေါင်းများ ပေါ်ထွက်လာပြီး အစိမ်းရောင်မီးခိုးများက အူထွက်လာ၏။

မြစ်က သိပ်မကြာခင် တည်ငြိမ်အေးချမ်းမှုကို ပြန်လည်ရရှိသွား၏။

သိုင်းတာအိုပင်မခန္ဓာသည် ပြန်လည်ပုံသွင်းထားသော မာန်နတ်မျက်နှာဖုံးကို ကောက်ယူပြီး စစ်ဆေးကြည့်လိုက်၏။

မာန်နတ်မျက်နှာဖုံး၏ ပုံပန်းသဏ္ဌာန်က များစွာပြောင်းလဲမသွားပေ။ သို့သော်လည်း သိုင်းတာအိုပင်မခန္ဓာထံမှ အတွေးတစ်ချက်နှင့်အတူ မာန်နတ်မျက်နှာဖုံးက ရုတ်တရက် ဝဲဂယက်များနှင့်အတူ မှောင်မည်း၍ နက်ရှိုင်းသော မြစ်တစ်စင်း၏ မျက်နှာပြင်အဖြစ် ပြောင်းလဲသွားလေသည်။

မာန်နတ်မျက်နှာဖုံးသည် ဧကရာဇ်လက်နက်တစ်ခုအဖြစ် နောက်တစ်ဖန် အသွင်ပြောင်းလဲသွား၏။ တမလွန်မြစ်နှင့် ပေါင်းစည်းထားသော လျှို့ဝှက်ဆန်းကြယ်သည့် စွမ်းအားကြောင့် ၎င်းသည် မူလ မာန်နတ်မျက်နှာဖုံးထက်ပင် ပို၍သန်မာလာခဲ့၏။

သိုင်းတာအိုပင်မခန္ဓာသည် မာန်နတ်မျက်နှာဖုံးကို နောက်တစ်ဖန် တပ်ဆင်လိုက်၏။

ဤမျက်နှာဖုံးနှင့်အတူ သိုင်းစိတ်ဝိညာဉ်၏ အားနည်းချက်က ဆက်လက်၍ မရှိတော့ပေ။

သိုင်းတာအိုပင်မခန္ဓာသည် အသက်ပြင်းပြင်းတစ်ချက် ရှူရှိုက်ပြီး ဝိညာဉ်မီးအိမ်ကို ရုပ်သိမ်းကာ ဆက်လက်၍ တိတ်တဆိတ်ကျင့်ကြံဖို့ကို ပြင်လိုက်၏။

သို့သော်လည်း သိပ်မကြာခင် သူက ဝိညာဉ်မီးအိမ်ကို နောက်တစ်ဖန် ထုတ်ယူပြီး ၎င်းပေါ်မှာ လောင်ကျွမ်းနေသည့် ရွှေရောင်မီးတောက်များကို ကြည့်ကာ သူ၏ မျက်လုံးက တလက်လက် တောက်ပလာ၏။

သူသည် ရွှေရောင်မီးတောက်များကို သူ၏ ခန္ဓာကိုယ်ထဲသို့ ထည့်သွင်းပေါင်းစည်းခြင်း ပြုလုပ်နိုင်လေသည်။

ထိုသို့ဖြင့် သူသည် သတ္တမမြောက် မီးတောက်တစ်ခုကို ကျွမ်းကျင်တတ်မြောက်လာပြီး သူ၏ သိုင်းတာအိုငရဲခန်းနှင့် ကောင်းကင်နှင့်မြေကြီးမီးဖိုသည် နောက်ထပ် အသွင်ပြောင်းလဲမှုတစ်ရပ်ကို ဖြတ်ကျော်ကာ သူ၏ ကျင့်ကြံမှုအလျင်အဟုန်ကို ကြီးမားစွာ မြင့်တက်လာစေပေလိမ့်မည်။

တကယ်ဆို သူ့အနေဖြင့် အဆင့်ချိုးဖျက်တက်လှမ်းပြီး ဧကရာဇ်နယ်ပယ်သို့ ဝင်ရောက်ဖို့ပင် အခွင့်အရေးတစ်ခု ရှိနေသည်။