Vulcan စက်ရုပ်
Vol. 17 Ch. 255
“အိုး…ဘယ်လောက်တောင် ကြီးမားတဲ့စက်ကြီးလဲ”
ရှုချင်းက အာမေဋိတ်သံပြုလိုက်၏။
“အရင်က ယူပေဆိပ်ကမ်း သံချပ်ကာစောင့်တပ်ရင်းမှာ တစ်ခါမြင်ဖူးတယ်— သူ့ရဲ့ပစ်အားက ရူးသွပ်စရာပဲ”
“အဲဒါ T7 ပဲ”
လင်းရှန်၏မျက်နှာထားက တည်ကြည်လာသည်။
“ဒီ T8-Z Vulcanက ကမ္ဘာပျက်ကပ်မတိုင်ခင်က နောက်ဆုံးပေါ် ထိုးဖောက်တိုက်ခိုက်ရေးပုံစံပဲ။ စစ်သင်္ဘောအုပ်စုဆီကို နည်းနည်းလေးပဲ ပို့ဆောင်ခဲ့တာ၊၊ အခု ကျပန်းအဖွဲ့အစည်းတစ်ခုက ဒါမျိုးတစ်စီးပိုင်နေတယ်ဆိုတာက…”
“တစ်စီးတည်း မဟုတ်ဘူး။ အများကြီးရှိပုံရတယ်”
တင်းကျန်းရီက ဝပ်ရှော့ကို သေချာကြည့်ကာ ပြောလိုက်သည်။
“ဒီ စက်ရုပ်ပြုပြင်ထိန်းသိမ်းရေးပလက်ဖောင်းတွေပေါ်မှာ သိုလှောင်ခန်းဆယ့်ခြောက်ခု ရှိပြီး အားလုံးက ဗလာပဲ။ ဒီတစ်စီးက ပျက်နေတာလား မသိဘူး”
လင်းရှန်၏ မျက်လုံးများက ထက်ရှလာသည်။ သူသည် ရေစပ်တစ်လျှောက် ခြေလှမ်းအနည်းငယ် ခပ်သွက်သွက် လှမ်းလိုက်ပြီး စက်ရုပ်ပေါ်သို့ ခုန်တက်လိုက်သည်။ ယာဉ်မောင်းခန်း၏ သံမဏိအပေါက်ဆီသို့ ရွေ့လျားကာ အညစ်အကြေးများကို သုတ်သင်လိုက်ရာ….အတွင်း၌ ရေနစ်သေဆုံးနေသော အလောင်းတစ်လောင်းကို ချက်ချင်း မြင်လိုက်ရ၏— ထိုအလောင်းသည် ဖောင်ဒေးရှင်းယူနီဖောင်း ဝတ်ဆင်ထားသည်။
“သူတို့ အပြင်ကို မထွက်နိုင်ခဲ့ပုံရတယ်။ ဒါပေမဲ့ ပျက်နေတယ်လို့တော့ မဆိုလိုဘူး”
လင်းရှန်သည် ပြင်းထန်သော စိတ်လှုပ်ရှားမှုတစ်ခုကို ခံစားလိုက်ရသည်။ ရှာဖွေမှု အများကြီးပြုလုပ်ပြီးနောက် နောက်ဆုံးတော့ အကြီးစားစက်ရုပ်တစ်ရုပ်ကို သူ ရှာတွေ့ခဲ့ပြီ..
သူသည် စက်ရုပ်၏ အပေါ်ပိုင်းကို စိတ်အားထက်သန်စွာ စူးစိုက်ကြည့်ရှုလိုက်၏။
ဤသားရဲကြီးသည် ၁၇ တန် အပြည့် အလေးချိန်ရှိပြီး သုံးမီတာကျော် မြင့်မားသည်။ ၎င်း၏ လက်ယာလက်မောင်းတွင် ၃၀မီလီမီတာ ပြောင်းသုံးခု စက်အမြောက်ကို တပ်ဆင်ထားပြီး၊ ကျည် ၆,၀၀၀ သယ်ဆောင်နိုင်သည်။ လက်ဝဲလက်မောင်းမှာ ၇၅မီလီမီတာ အဓိကတပ်ဆင်အမြောက်ဖြစ်ပြီး ပေါက်ကွဲအားပြင်း ကျည်ဆန်များ၊ သံချပ်ကာဖောက်ကျည်ဆန်များနှင့် ပဲ့ထိန်းဒုံးကျည်များကို တစ်မိနစ်လျှင် အလုံး ၄၀ နှုန်းဖြင့် ပစ်ခတ်နိုင်သည်။ ထို့အပြင် ၎င်းတွင် မီးတောက်လွှတ်စက် နှင့် လက်ပစ်ဗုံးစနစ်လည်း ပါဝင်သည်။ ၎င်း၏ သံချပ်ကာသည် တင့်ကားတစ်စီးနှင့် နှိုင်းယှဉ်နိုင်ပြီး အကျွင်းမဲ့ ထိုးဖောက်တိုက်ခိုက်ရေးလက်နက် ဖြစ်သည်။
“ပျက်စီးမှု ရှိမရှိ စစ်ဆေးရမယ်၊ ပြီးရင် အနန္တရထားဆီကို ပြန်ယူသွားဖို့ နည်းလမ်းရှာရမယ်”
လင်းရှန်သည် အေးစက်သော သတ္တုပြားပေါ်သို့ လက်ကို ဖိလိုက်ပြီး မက်ကာကို စကင်ဖတ်ရန်အတွက် ယန္တရားနှလုံးသားကို အသက်သွင်းလိုက်၏။
“လင်းရှန် တခြားနေရာတွေကို ကျွန်မ သွားကြည့်လို့ရမလား” တင်းကျန်းရီက သူမ၏လက်ထဲရှိ စာရွက်စာတမ်းများကို မြှောက်ပြကာ ပြောလိုက်သည်။
“ကျွန်မတို့ မထွက်ခွာခင် အသုံးဝင်တဲ့ အချက်အလက်တွေ ထပ်စုချင်လို့ပါ”
လင်းရှန်သည် အစောပိုင်းက အမည်မသိထူးဆန်းသောသတ္တဝါနှင့် တွေ့ခဲ့ရသဖြင့် တင်းကျန်းရီကို စိုးရိမ်နေသည်။ သို့သော် သူမ၏ စိတ်အားထက်သန်သောမျက်နှာကို မြင်သောအခါ…ဤအရာသည် သူမအတွက် မည်မျှအရေးကြီးသည်ကို သူ နားလည်လိုက်၏။ သူသည် ရှုချင်းဘက်သို့ လှည့်ကာ
“ကောင်းပြီ။ အတူတူ သွားကြ၊ ဒါပေမဲ့ အရမ်းဝေးဝေးတော့ မသွားနဲ့”
ထို့နောက် သူသည် ဆက်သွယ်ရေးကိရိယာကို နှိပ်ကာ သတိပေးလိုက်သည်။
“ခုနစ်လွှာတုန်းက အချက်ပြစနစ်က ကောင်းတယ်။ ဒါပေမဲ့ ဒီအောက်ဘက်ကျတော့ နှောင့်ယှက်မှုက ပြင်းထန်တယ်။ ထူးဆန်းတဲ့သတ္တဝါရဲ့ အမှောင်စွမ်းအင်ကြောင့် ဖြစ်နိုင်သလို၊ ရေတွေကြောင့်လည်း ဖြစ်နိုင်တယ်။ သတိထားကြ”
ရှုချင်းက ခေါင်းညိတ်လိုက်သည်။
“မပူပါနဲ့ ကပ္ပတိန်လင်း…ငါ ဒါရိုက်တာတင်းအနားမှာ ရှိနေမှာပါ”
လင်းရှန် တင်းကျန်းရီကို ခေါင်းညိတ်ပြလိုက်သည်၊၊
အမျိုးသမီးနှစ်ဦးသည် ဝပ်ရှော့အလုပ်ရုံကို ကျော်လွန်ကာ ကိုးလွှာရှိ အခြားနေရာများသို့ ရွေ့လျားသွားကြ၏။
ဤအလွှာသည် ဖောင်ဒေးရှင်း၏ ပင်မလုပ်ငန်းလည်ပတ်ရေးဗဟို ဖြစ်သဖြင့် အခြားအဆင့်များထက် တန်ဖိုးရှိသော အရင်းအမြစ်များ ပို၍ရှိနိုင်ဖွယ်ရှိသည်— ဤအချက်ကို လင်းရှန်က သူ့အစီအစဉ်များတွင် ထည့်သွင်းတွက်ချက်ပြီးသား ဖြစ်သည်။
သူတို့ ထွက်ခွာသွားသည်ကို မြင်သောအခါ လင်းရှန်သည် အချိန်မဆွဲဘဲ စက်ရုပ်ကို စကင်ဖတ်ခြင်းအား စတင်လိုက်သည်။
[စကင်ဖတ်နေသည်... ၁%]
ယန္တရားနှလုံးသား အသက်ဝင်လာသည်နှင့်အမျှ လေထုထဲတွင် နက်ရှိုင်းသော တုန်ခါမှုတစ်ခု ပြည့်နှက်လာသည်။ သူ၏ အသိစိတ်သည် စက်ရုပ်နှင့် ပေါင်းစပ်သွားသည်နှင့် တပြိုင်နက်၊ စိတ်လှုပ်ရှားမှု လှိုင်းလုံးတစ်ခုသည် သူ့စိတ်ထဲသို့ ရုတ်တရက် ဝင်ရောက်လာ၏— ဤခံစားချက်မျိုးကို သူ၏ စွမ်းအားမြှင့်ဝတ်စုံကို စကင်ဖတ်စဉ်က တစ်ကြိမ်သာ သူ ခံစားခဲ့ဖူးသည်။
အပြင်သတ္တုပြားအောက်တွင်၊ ရှုပ်ထွေးသော စက်မှုဂီယာဒီဇိုင်း၊ ကျောဘက်ရှိ စွမ်းအင်ဗဟို၊ ထိန်းချုပ်စနစ်များ၊ ခြေထောက်ရှိ ချိန်ခွင်လျှာ ထိန်းညှိကိရိယာများ၊ ပေါင်ရှိ ဟိုက်ဒရောလစ်စွမ်းအင် ဖြန့်ဖြူးရေးယူနစ်များ၊ ရုန်းအားမြင့် လျင်မြန်သော ဒူးနှစ်ဖက်မှ မောင်းနှင်စက်များနှင့် ကြွက်သားမျှင်အင်ဂျင်အစုအဝေးများ— ထိုအရာအားလုံးသည် လင်းရှန်၏ အာရုံများကို တုန်လှုပ်မှုတစ်ခု ပေးပို့လာပြီး၊ စက်မှုနှင့် လက်မှုပညာပေါင်းစပ်မှု၏ စစ်မှန်သော အနုပညာက သူ့နှလုံးခုန်နှုန်းကို မြန်စေခဲ့သည်။
ဤအရာကို သူ ပြန်ယူလာနိုင်ခဲ့ပါက ၎င်းသည် လုံးဝ ဂိမ်းကို ပြောင်းလဲစေမည့် အရာတစ်ခု ဖြစ်ပေလိမ့်မည်။ သူ ဆက်လက်လုပ်ဆောင်နေဆဲဖြစ်သော G3 လျှပ်စစ်သံလိုက်အမြောက်နှင့် ပေါင်းစပ်လိုက်လျှင် အနန္တရထား၏ ပစ်အားသည် လုံးဝ အဆင့်သစ်တစ်ခုသို့ ရောက်ရှိသွားပေမည်၊၊
“…နေဦး…ငါ မေ့နေတာ”
အတွေးတစ်ခုက သူ့ကို ရုတ်တရက် သတိရသွားစေကာ သုတေသနစင်တာ စနစ်မြင်ကွင်းကို ဖွင့်လိုက်သည်။
“သေစမ်း…စနိုက်ပါရဲ့ အခြေခံပုံကြမ်းက နှစ်နာရီစောပြီး အဆင့်မြှင့်တင်မှု ပြီးသွားတာကိုး…”
ဟိုလိုဂရမ် စနစ်မြင်ကွင်းကို ကြည့်ရင်း လင်းရှန်သည် အရေးပါသော အရာတစ်ခုကို ရုတ်တရက် သတိရလိုက်သည်။
“ငါ အနက်ရောင်ကင်းခြေများကို တိုက်ခိုက်ဖို့ပဲ အရမ်း အာရုံစိုက်နေလို့ အကြောင်းကြားချက်ကို လွဲသွားတာ”
[ဂုဏ်ယူပါသည်။ သင်သည် ‘ဥက္ကာပျံ-၃ အကြီးစား စနိုက်ပါရိုင်ဖယ်’ (အခြေခံပုံကြမ်း)ကို ရရှိပါပြီ။]
“သောက်ကျိုးနဲ… ဒါက အဆင့်မြင့်ကိရိယာပဲ”
ဥက္ကာပျံ-၃ သည် စစ်သင်္ဘောအုပ်စု၏ အထူးတပ်ဖွဲ့များ အသုံးပြုသော ထိပ်တန်းစနိုက်ပါရိုင်ဖယ် ဖြစ်သည်။ အထူးသတ္တုစပ်ပစ္စည်းများဖြင့် တည်ဆောက်ထားသောကြောင့် ပိုမို ပေါ့ပါးပြီး၊ ရွေ့လျားမှု ပို၍လွယ်ကူကာ၊ ပြန်ကန်အားလျှော့ချရေးစနစ်နှင့် ပေါင်းစပ်ထားသည်— ထို့ကြောင့် သာလွန်သော ပစ်အား၊ တည်ငြိမ်မှုနှင့် လှုပ်ရှားနိုင်စွမ်းကို ပေးနိုင်သည်။
“အဆင့်မြင့်အကူအညီပေးစနစ်တောင် ပါသေးတယ်။ ဒီဟာကို ဆရာမချန်ကို ပေးပြီး သူ့အတွက် သံချပ်ကာဝတ်စုံ ဖန်တီးပေးလိုက်ရင်… အိုး…”
ဆရာမချန်ကို စနိုက်ပါနတ်သမီးအဖြစ် ပြောင်းလဲပေးရန် စိတ်ကူးသည် လင်းရှန်အား ပြင်းပြသော စိတ်လှုပ်ရှားမှုနှင့် ပြည့်နှက်သွားစေသည်။
“နောက်ဆုံးတော့…သံချပ်ကာဝတ်စုံကို အဆင့်မြှင့်တင်ဖို့ အချိန်တန်ပြီ”
ဤတစ်ကြိမ်တွင် သူသည် သံချပ်ကာ ထုတ်လုပ်မှုကို ဦးစားပေးလိုက်သည်။ တင်းချီထံမှ TRP-4 စက်မှုလုပ်ငန်းသုံး စွမ်းအားမြှင့်ဝတ်စုံကို ရရှိခဲ့ပြီးနောက်၊ ၎င်းကို ပြုပြင်မွမ်းမံကာ အဆင့်မြှင့်တင်ရန် သူ အစီအစဉ်ဆွဲခဲ့သည်။ လျှပ်စစ်သံလိုက်အမြောက်စနစ်ပြီးမြောက်သည်နှင့် သူ၏ ထိပ်တန်းတိုက်ခိုက်ရေးသမားများအတွက် သံချပ်ကာဝတ်စုံများကို ထုတ်လုပ်ပေးမည်ဖြစ်သည်၊၊ ၎င်းသည် လူတိုင်း၏ တိုက်ခိုက်ရေးစွမ်းရည်ကို မြှင့်တင်ပေးမည်ဖြစ်သည်။
မတွန့်ဆုတ်ဘဲ သူသည် သံချပ်ကာဝတ်စုံ အခြေခံပုံကြမ်းကို သုတေသနစင်တာသို့ တင်လိုက်သည်။
[ဤ အခြေခံပုံကြမ်းသည် အဆင့်မြင့်သည်။ လက်ရှိ ယန္တရားထုတ်လုပ်မှု အဆင့်- ၃။ သုတေသနကြာချိန် ၂၅% တိုးလာသည်။]
[ခန့်မှန်းခြေ သုတေသနကြာချိန်- ၁၃ ရက်၊ နာရီ ၂၀။]
“ထင်ထားတဲ့အတိုင်းပဲ”
လင်းရှန်၏ မျက်လုံးများ အနည်းငယ် မှောင်ကျသွားသည်။ သို့သော် ဤတစ်ကြိမ်တွင် သူသည် သုတေသနပြုမှုကို ပယ်ဖျက်ခြင်းမပြုတော့ဘဲ သေချာစွာ သော့ခတ်လိုက်၏။
[ယန္တရားထုတ်လုပ်မှု- အဆင့် ၃ (၄၆၀/၁၀၀၀)]
ဟန်ရှန်းတောင်ကြားတွင် လက်နက်ကြီးများ ထုတ်လုပ်မှု အများအပြားနှင့် သုတေသနဌာနတွင် စက်မှုစွမ်းရည်များကို မကြာခဏ အသုံးပြုခဲ့ခြင်းကြောင့် သူ၏ ကျွမ်းကျင်မှုသည် နောက်တစ်ဆင့်သို့ တစ်ဝက်နီးပါး ရောက်ရှိနေပြီ ဖြစ်သည်။
“ငါ အနန္တရထားအတွက် လက်နက်စခန်းကို စနစ်တကျ တည်ဆောက်ပြီးတာနဲ့ ဒါမှမဟုတ် လက်နက်ကြီး တစ်သုတ်လောက် ထုတ်လုပ်လိုက်ရင်…”
“ကောင်းပြီ— ငါ ဟူဆိုတဲ့လူလည်ဂျပိုးကို ခြေရာခံဖို့ အစီအစဉ်ဆွဲထားတဲ့အတိုင်း…ဆီးနှင်းလွင်ပြင်ထဲ မဝင်ခင် လက်နက်တွေ ထပ်ထုတ်ပြီး မရှိမဖြစ် လိုအပ်တဲ့ ပစ္စည်းတွေနဲ့ လဲလှယ်ရမယ်”
လင်းရှန်သည် စက်ရုပ်ကို စကင်ဖတ်ခြင်းအပေါ် ပြန်လည်အာရုံစိုက်လိုက်သော်လည်း သူ၏ ပတ်ဝန်းကျင်ကို အလွန်အမင်း သတိထားနေဆဲ ဖြစ်သည်။
“ရှုချင်း၊ မင်းတို အခြေအနေ ဘယ်လိုလဲ”
“ပုံမှန်မဟုတ်တာ ဘာမှမတွေ့ဘူး…ကပ္ပတိန်”
ရှုချင်းက ပြန်ဖြေသည်။
ထိုအသံကို ကြားရသောအခါ လင်းရှန်သည် အနည်းငယ် စိတ်သက်သာရာရသွားသည်။ သူသည် အသက်ပြင်းပြင်းရှူသွင်းလိုက်ပြီး ယန္တရားနှလုံးသားကို အပြည့်အဝအသက်သွင်းကာ ကြီးမားသောစက်ရုပ်ကို စကင်ဖတ်ရန် သူ၏ အာရုံစိုက်မှုအားလုံးကို အသုံးချလိုက်သည်၊၊
ဂလုတ်… ဂလုတ်…
ရေအောက်နစ်မြုပ်နေသော လေယာဉ်ရုံသည် ရေပွက်များလှိုင်းထနေပြီး ရေမျက်နှာပြင်သည် ဖြည်းဖြည်းချင်း မြင့်တက်လာသည်။ စက်ရုပ်၏ ခါးအထိ ရောက်ခဲ့သော ရေသည် ယခုအခါ ရင်ဘတ်အထိ ရောက်ရှိလာပြီး လမ်းလျှောက်စင်္ကြံသည်လည်း ရေလွှမ်းလာတော့မည့် အခြေအနေ ဖြစ်သည်။
လင်းရှန်သည် မျက်မှောင်ကြုတ်လိုက်ပြီး ရေတက်နှုန်းကို ခန့်မှန်းလိုက်သည်။ ဆက်သွယ်ရေးကိရိယာမှတစ်ဆင့် ရှုချင်းကို ရံဖန်ရံခါ စစ်ဆေးနေ၏။
ဖျတ် ဖျတ်
ရုတ်တရက်၊ သူတို့ ဝင်ရောက်လာသော စင်္ကြံလမ်းမှ ခြေသံများ ပဲ့တင်ထပ်လာသည်။
လင်းရှန်၏ နှလုံးသား တင်းကျပ်သွားသည်။ သူသည် အသံလာရာဘက်သို့ ခေါင်းကို ဆတ်ခနဲ လှည့်ကြည့်လိုက်သည်— အရိပ်တစ်ခု လျင်မြန်စွာ ဖြတ်သွားသည်ကို မြင်လိုက်ရသည်။
“ဘယ်သူလဲ” သူ အော်မေးလိုက်သည်။
တိတ်ဆိတ်ခြင်း။ မည်သည့် အဖြေမှ မရှိပေ။
လင်းရှန်သည် သူ၏ အနက်ရောင်လှံရှည်ကို ဆုပ်ကိုင်လိုက်သော်လည်း၊ စကင်ဖတ်ခြင်းက ဆက်လက် လည်ပတ်နေသဖြင့် စက်ရုပ်ကို လက်လွှတ်၍မရပေ။
[စကင်ဖတ်မှု တိုးတက်မှု- ၅၅%]
လုံးဝ မလိုအပ်လျှင် စကင်ဖတ်ခြင်းကို သူ ဖြတ်တောက်မည် မဟုတ်ပေ။
“ရှုချင်း”
“ဘာဖြစ်လို့လဲ ကပ္ပတိန်”
“ဘယ်မှာလဲ”
“ကျွန်မတို့ ရုံးခန်းနေရာမှာပါ”
လင်းရှန်၏ အကြည့်များ ထက်ရှလာသည်။
“သတိထား…မင်းတို့ဘက်ဆီကို တစ်ခုခု ရွေ့လျားလာနေတယ်”
“သိပြီ”
ရှုချင်း၏ အသံ တင်းမာသွားသည်။
ဖျတ် ဖျတ် ဖျတ်—
ခြေသံများက ပို၍ ပို၍ နီးကပ်လာသည်။
ဘစ်ဇ်ဇ်တ်
မီးများ မှိတ်တုတ် မှိတ်တုတ် ဖြစ်သွားသည်။
တစ်စက္ကန့်အတွင်း အရာအားလုံး အမှောင်ထုထဲသို့ နစ်မြုပ်သွားသည်။
အနက်ရောင်မြူများဖုံးလွှမ်းလာသည်၊၊
မီးများ ပြန်လင်းလာသောအခါ လင်းရှန်၏ အသက်ရှူနှုန်း ရပ်တန့်သွားသည်။
ကီကီ။
သူမသည် စင်္ကြံလမ်းတွင် ရပ်နေပြီး သူ့ကို တိတ်ဆိတ်စွာ စောင့်ကြည့်နေသည်။
“ဘယ်တုန်းက ဒီကို ရောက်နေတာလဲ”
ကီကီသည် ရှေ့သို့ တစ်လှမ်း တိုးလာသည်— ထို့နောက် သူမသည် တွန့်ဆုတ်ခြင်း မရှိပဲ…လုံးဝ နားမလည်နိုင်ဖွယ် အပြုအမူတစ်ခုကို ပြုလုပ်လိုက်သည်။
လင်းရှန်၏ ကြောင်အသွားသော မျက်လုံးများရှေ့တွင် သူမသည် သူမ၏ အဝတ်အစားများကို တစ်စစီ ဖြည်းညှင်းစွာ ချွတ်ချလိုက်သည်။