ဟွမ်သွမ့်နတ်မိစ္ဆာခန္ဓာနှင့် ပြန်လည်မွေးဖွားခြင်းလမ်းခြောက်သွယ် လက်သီးသိုင်း
Vol. 1 Ch. 9
"ဟမ်။ အမတအချစ်ဆေးလုံး။ နတ်နဂါးဆေးလုံး"
ဒီစတင်သူအတွက် ဆုလဘ်နှစ်ခုအကြောင်း ကြားလိုက်ရသည့်အခါ စုရွှမ် ကြောင်အသွားလေသည်။
ဒါက သူထင်နေသလိုမျိုး ဟုတ်မှ ဟုတ်ရဲ့လား။
စနစ်ရဲ့ သတိပေးချက်နဲ့ ချိတ်ဆက်တွေးတောလိုက်တဲ့အခါမှာတော့ စုရွှမ် သဘောပေါက်သွား၏။
ဒါက… တကယ်ပဲ သူထင်သလို ဖြစ်နေပါလား။
"လက်ခံမယ်"
စုရွှမ်က စိတ်ထဲမှ တိတ်တဆိတ် ရွတ်ဆိုလိုက်သည်နှင့် တစ်ပြိုင်နက် အခန်းတစ်ခုလုံးကို သွေးရောင်အရှိန်အဝါများက ရုတ်တရက် လွှမ်းခြုံသွားလေသည်။
ပြီးနောက် စုရွှမ်၏ လက်ထဲတွင် ကြည်လင်တောက်ပပြီး အဖိုးတန်အလင်းရောင်များ မှုန်ပြပြထွက်ပေါ်နေသော ဆေးလုံးတစ်လုံး ရုတ်တရက် ပေါ်လာသည်။
"ဘာဖြစ်တာလဲ။ ဘာလို့ ငါနည်းနည်းပူလာသလို ခံစားနေရတာလဲ"
လမ့်ရိုလီ၏ မျက်နှာသည် ပို၍ပင် နီရဲလာပြီး ချွေးများပင်ကျတော့မည့်အလားပင်။ ထိုအခိုက်အတန့်တွင် လမ့်ရိုလီ၏ လှပသောမျက်ဝန်းများထဲတွင် မြူနှင်းများဖုံးလွှမ်းနေသကဲ့သို့ စွဲမက်ဖွယ်အကြည့်များဖြင့် တောက်ပနေသည်။
တကယ်ပင် နိုင်ငံတစ်နိုင်ငံကို ပျက်စီးစေနိုင်ပြီး သက်ရှိအားလုံးကို ဆွဲဆောင်နိုင်စွမ်းရှိသော အလှပဂေးတစ်ဦးပင်။ အချိန်ကြာလာသည်နှင့်အမျှ လမ့်ရိုလီသည် သူမ၏ အဝတ်အစားများကို ဆွဲဖြဲပြီးဖြစ်ကာ သူမ၏ ကြည်လင်သောမျက်ဝန်းများထဲတွင် တပ်မက်မှုအရိပ်အယောင်များ ပေါ်လာခဲ့၏။
ချက်ချင်းပင် ဆီးနှင်းကဲ့သို့ ဖြူဖွေးသော အသားအရေများ ပေါ်ထွက်လာပြီး အိပ်မက်လား တကယ်လားမသဲကွဲနိုင်အောင် အသက်ရှူမှားလောက်အောင် လှပနေသည်။
"မင်း......ငါ့ကို ဆေးခတ်လိုက်တာလား"
လမ့်ရိုလီ၏ လှပသောမျက်ဝန်းများက စုရွှမ်ကို စူးစိုက်ကြည့်ကာ သူမ၏ လေသံမှာ ရေခဲတမျှ အေးစက်နေ၏။
လမ့်ရိုလီသည် တပ်မက်မှုနှင့် အသိတရားကြားတွင် လွန်ဆွဲနေသော အခြေအနေ၌ ရှိနေသည်။ သူမ၏ ခန္ဓာကိုယ်တစ်ခုလုံးကို ဖော်ပြမရနိုင်သော ခံစားမှုတစ်ခုက ကျူးကျော်ဝင်ရောက်နေ၏။
ထိုခံစားမှုမှာ ပြောမပြတတ်အောင်ပင်ဖြစ်ပြီး အနည်းငယ် မသက်မသာလည်း ဖြစ်စေ၏။ သူမ ဒီနေရာမှာ ဒီလိုအခြေအနေမျိုး ကျရောက်လိမ့်မယ်လို့ ဘယ်တုန်းကမှ အိပ်မက်မမက်ခဲ့ဖူးပေ။ ပြီးတော့ ဒီဆေးက အစွမ်းထက်လွန်း၏။ သူမပင်လျှင် ခဏတာအတွင်း ဖြေဆေးရှာမတွေ့နိုင်ခဲ့ပေ။
"စုရွှမ် မင်းသာ ငါ့အပေါ် အဲ့ဒီလိုကိစ္စမျိုးလုပ်ခဲ့ရင် ဒီဘဝမှာ မင်းကို ဘယ်တော့မှ ခွင့်လွှတ်မှာမဟုတ်ဘူး!!" လမ့်ရိုလီက အေးစက်စွာ ပြောလိုက်သည်။
သို့သော် သူမကိုယ်တိုင်ပင် ဒီအခြေအနေမှာ သူမ ဘယ်လောက်တောင် ဆွဲဆောင်မှုရှိနေလဲဆိုတာ မသိခဲ့ပေ။ စုံလင်လှပသော မျက်နှာသွင်ပြင်၊ ရေခဲတမျှ အေးစက်သော အမူအရာ၊ နီရဲနေသော ပါးပြင်များ…
ဤအရာအားလုံးပေါင်းစပ်လိုက်သောအခါ ကမ္ဘာပေါ်ရှိ အစုံလင်ဆုံး ပန်းချီကားတစ်ချပ်ကို ဖန်တီးလိုက်သကဲ့သို့ပင်။ ထိုသို့သောသူမှာ လမ့်ရိုလီပင်ဖြစ်၏။
ကမ္ဘာပေါ်ရှိ မည်သည့်ယောက်ျားမဆို သူမကို မြင်လျှင် သံသယဝင်စရာမရှိ အတွေးများ ပေါ်လာကြမည်သာ။ ဆေးအရှိန်ကြောင့် လန်းဆန်းတက်ကြွပြီး သွေးသားဆူဖြိုးနေသော လူငယ်တစ်ဦးအကြောင်းကိုတော့ ပြောနေစရာပင်မလို။
ထိုအချိန်တွင် လမ့်ရိုလီကို ကြည့်ရင်း စုရွှမ်သည် သူ၏နှလုံးသားကို အရှိန်ပြင်းစွာ တောက်လောင်နေသော မီးတောက်များက လောင်မြိုက်နေသကဲ့သို့ ခံစားလိုက်ရသည်။
မကြာမီပင် စုရွှမ်သည် မိမိကိုယ်ကို မထိန်းချုပ်နိုင်တော့ဘဲ စိတ်ထဲမှသာ ကြွေးကြော်လိုက်နိုင်တော့၏။ ဒါက ငါ့ရဲ့ဆန္ဒကြောင့် မဟုတ်ဘဲ ကံကြမ္မာရဲ့ အလိုအတိုင်းပါပဲ။
ထို့နောက် စုရွှမ်သည် သူ၏လက်ထဲမှ ဆေးလုံးကို မျိုချလိုက်သည်။
သူ၏လက်စကို ဝှေ့ယမ်းလိုက်သည်။ ချက်ချင်းပင် တဖျတ်ဖျတ်တောက်လောင်နေသော ဖယောင်းတိုင်မီးသည် ငြိမ်းသွားသည်။
အခန်းထဲတွင် အက်ကြောင်းများကြားမှ ဖြာကျနေသော လရောင်ကြည်ကြည်လဲ့လဲ့ အနည်းငယ်သာ ကျန်ရစ်တော့သည်။
ဒီညမှာတော့ နွေဦးရာသီသည် ပန်းများဖြင့် ဝေဆာနေခဲ့သည်။
......
"ဒင်! လက်ထပ်ပြီး ပထမဆုံးနေ့၊ ဆုလဘ်: ဟွမ်သွမ့်နတ်မိစ္ဆာခန္ဓာ (၁% နိုးထပြီး၊ နတ်ဘုရားလက်နက်များနှင့် မြင့်မြတ်သောဆေးဝါးများက နိုးထခြင်းအရှိန်ကို မြှင့်တင်ပေးနိုင်သည်)"
......
နောက်တစ်နေ့ မိုးလင်း
စုရွှမ် နိုးလာသောအခါ သူ့ဘေးနားမှ လမ့်ရိုလီသည် ထွက်သွားနှင့်ပြီဖြစ်ကြောင်း တွေ့လိုက်ရသည်။
ဟမ်
ဘေးနားတွင် ကျန်ရစ်နေသေးသော ကိုယ်ငွေ့နွေးနွေးကို ခံစားမိပြီး အိပ်ရာခင်းပေါ်ရှိ လတ်ဆတ်သော သွေးပန်းပွင့်လေးများကို မြင်လိုက်ရသောအခါ စုရွှမ်သည် ရှုပ်ထွေးသွားသည်။
"ငါ့မိန်းမ ရိုလီ ဘယ်ရောက်သွားတာလဲ"
"ထွက်သွားပြီလား"
အိပ်ချင်မူးတူးဖြစ်နေသေးသော စုရွှမ်သည် ကိုယ်ရောစိတ်ပါ ပင်ပန်းနွမ်းနယ်နေသဖြင့် ပြန်လှဲအိပ်လိုက်သည်။
......
စုမိသားစု အပြင်ဘက်၊ အဝေးတစ်နေရာတွင်။
အဖြူရောင်ဝတ်စုံနှင့် ပုံရိပ်တစ်ခုသည် အဝေးရှိ ကောင်းကင်ဘုံကိုးခုမြင့်မြတ်နန်းတော်ဆီသို့ လေထဲတွင် ပျံသန်းနေ၏။
သေချာကြည့်မည်ဆိုလျှင် သူမ၏ ခန္ဓာကိုယ်သည် အနည်းငယ် ယိုင်နဲ့နေပြီး ဟန်ချက်ထိန်းရန် ကြိုးစားနေရသည်ကို သတိပြုမိပေလိမ့်မည်။
သံသယဖြစ်ဖွယ်မရှိ၊ ထိုသူမှာ လမ့်ရိုလီပင်ဖြစ်သည်။
ထိုအချိန်တွင် လမ့်ရိုလီ၏ အသားအရေမှာ မကောင်းမွန်လှဘဲ အနည်းငယ် ဖြူဖျော့နေသော်လည်း ပန်းချီကားထဲမှ ထွက်လာသော နတ်သမီးတစ်ပါးကဲ့သို့ လက်တွေ့မကျလောက်အောင် လှပနေဆဲပင်။
မနေ့ညက ဖြစ်ပျက်ခဲ့သည်များကို ပြန်တွေးမိသောအခါ သူမသည် ကြီးကျယ်ခမ်းနားသော အိပ်မက်တစ်ခု မက်ခဲ့သကဲ့သို့သာ ခံစားရသည်။
"အဲ့ဒီ စုရွှမ်ဆိုတဲ့ကောင်စုတ်လေး၊ သူက ငါ့ကို ဆေးခတ်ရဲတယ်!!"
"မင်းစောင့်နေလိုက်၊ ငါ ခဏလောက် ကျင့်ကြံပြီး အထွတ်အထိပ်အခြေအနေကို ပြန်ရောက်တာနဲ့ မင်းကို ပေးဆပ်စေရမယ်!!"
"အဲ့ဒီအချိန်ကျရင် ဒီအဖွားကြီးက မင်းကို ငါ့ရဲ့ ယောကျာ်းမောင်းမလုပ်ပစ်မယ်"
လမ့်ရိုလီသည် အံ့ကြိတ်ကာ စိတ်ထဲမှ တိတ်တဆိတ် ကျိန်ဆိုလိုက်သည်။ စုရွှမ်သည် တကယ်ပင် အလွန်စွမ်းဆောင်နိုင်ကြောင်းကိုတော့ ဝန်ခံရမည်ဖြစ်သည်။ ကဏ္ဍတိုင်းတွင် သူမကို အနည်းငယ် မယုံနိုင်လောက်အောင်ပင် ဖြစ်စေခဲ့သည်။
ဒါပေမယ့်၊ ဒီတော့ ဘာဖြစ်လဲ။
နောက်တစ်ခါတွေ့ရင် သူမသည် စုရွှမ်ကို ပြင်းပြင်းထန်ထန် နှိပ်ကွပ်မည်မှာ သေချာ၏။
......
နေ့လည်ခင်း။
စုရွှမ် နောက်ဆုံးတွင် လုံးဝနိုးလာခဲ့သည်။
"ဒင်! လက်ထပ်ပြီး ဒုတိယနေ့ ဆုလာဘ် - ပြန်လည်မွေးဖွားခြင်းလမ်းခြောက်သွယ် လက်သီးသိုင်း!"
"ပြန်လည်မွေးဖွားခြင်းလမ်းခြောက်သွယ် လက်သီးသိုင်း - လမ်းခြောက်သွယ်ကို ပြောင်းပြန်လှန်ပြီး ပြန်လည်မွေးဖွားခြင်းကို ချိုးဖျက်မည်။ လက်သီးတစ်ချက်ထိုးသည်နှင့် ငါသည် ရှုံးနိမ့်ခြင်းမရှိ။"
ထိုအချိန်တွင်ကြင်နာတတ်သော စနစ်သည် သာယာသော အသိပေးသံဖြင့် မြည်လာသည်။ ၎င်းက စုရွှမ်၏ စိတ်ကို ချက်ချင်း ကြည်လင်သွားစေသည်။
"ပြန်လည်မွေးဖွားခြင်းလမ်းခြောက်သွယ် လက်သီးသိုင်း!"
"သောက်ကျိုးနဲ! ဒါက အရှိန်အဟုန်နဲ့ တက်လှမ်းတာပဲ မဟုတ်လား"
စုရွှမ်သည် ဤ ပြန်လည်မွေးဖွားခြင်းလမ်းခြောက်သွယ် လက်သီးသိုင်းသည် မည်သည့်အဆင့် နတ်ဘုရားစွမ်းရည်ဖြစ်သည်ကို မသိသော်လည်း၊ ဤဖော်ပြချက်ကို ကြည့်ရုံဖြင့်ပင်၊ ဤနတ်ဘုရားစွမ်းရည်သည် လုံးဝသာမန်မဟုတ်ကြောင်း စုရွှမ် သိလိုက်သည်။
သူသည် သူ၏လက်သီးများဖြင့် ကမ္ဘာကြီးကို စိုးမိုးမည့် မြင်ကွင်းကို မျှော်လင့်နေပြီဖြစ်သည်။
"အိုး၊ မနေ့က ဟွမ်သွမ့်နတ်မိစ္ဆာခန္ဓာလည်း ရှိသေးတာပဲ"
မနေ့ညက စုရွှမ်သည် အရေးကြီးကိစ္စများဖြင့် အလုပ်ရှုပ်နေခဲ့သော်လည်း၊ သူ၏ စနစ်ဆုလာဘ်များကို သူ မမေ့ခဲ့ပေ။
"စနစ်၊ ဟွမ်သွမ့်နတ်မိစ္ဆာခန္ဓာအကြောင်း ပြန်မိတ်ဆက်ပေးပါ။"
စုရွှမ်က စိတ်ထဲမှ ပြောလိုက်သည်။
"ဒင်! ဟွမ်သွမ့်နတ်မိစ္ဆာခန္ဓာသည် တာအိုအားလုံးနှင့် သဘာဝအတိုင်း ပေါင်းစပ်နိုင်သည်။ ကျင့်ကြံခြင်းအရှိန်မြန်ရုံသာမက ၎င်း၏နတ်
စွမ်းအားသည် တူညီသောအဆင့်ရှိ ကျင့်ကြံသူများထက် များစွာသာလွန်ပြီး မည်သည့်ဥပဒေသများ၏ ဖိနှိပ်မှုကိုမျှ ခံရမည်မဟုတ်ဘဲ ပြိုင်ဘက်ကင်းသော တိုက်ခိုက်ရေးစွမ်းအားကို ပိုင်ဆိုင်ထားသည်။"
"ထို့အပြင် ဟွမ်သွမ့်နတ်မိစ္ဆာခန္ဓာသည် အခြားသော ကိုယ်ခန္ဓာအမျိုးအစားများနှင့် ပေါင်းစပ်နိုင်ပြီး၊ အဆက်မပြတ် ပိုမိုအားကောင်းလာကာ ပြောင်းလဲနိုင်သော ဖြစ်တည်မှုတစ်ခုအဖြစ်သို့ ပြောင်းလဲပြီး ခေတ်အဆက်ဆက်တွင် တစ်မူထူးခြားနေမည်ဖြစ်သည်။"
"တာအိုခန္ဓာအမျိုးအစား သုံးထောင် အဆင့်သတ်မှတ်ချက်တွင် - အဆင့် ၁"
"သောက်ကျိုးနဲ! ဒီတစ်ခါတော့ တကယ် အရှိန်အဟုန်နဲ့ တက်လှမ်းပြီပဲ"
စနစ်၏ မိတ်ဆက်စကားကို ကြားရသောအခါ စုရွှမ်သည် သူ၏အနာဂတ်သည် အလွန်တောက်ပနေသည်ဟု ခံစားလိုက်ရသည်။
"ဒါပေမဲ့ ဟွမ်သွမ့်နတ်မိစ္ဆာခန္ဓာ ပေါ်ထွက်လာတာက မရေမတွက်နိုင်တဲ့ မုန်တိုင်းတွေကို မွှေနှောက်မှာ သေချာတယ်။ အထွတ်အထိပ် အင်အားကြီးတွေက ငါ့ကို တိုက်ခိုက်ပြီး ဒီကိုယ်ခန္ဓာကို လုယူချင်ကြမှာပဲ၊ ဘယ်သူသိနိုင်မလဲ။"
"ဒါကြောင့် လုံးဝမလိုအပ်ဘဲနဲ့တော့၊ ဟွမ်သွမ့်နတ်မိစ္ဆာခန္ဓာ တည်ရှိနေတာကို ငါ ဘယ်တော့မှ အလွယ်တကူ ဖော်ထုတ်လို့မရဘူး။ ဒါက အရမ်းကို အံ့အားသင့်စရာကောင်းပြီး သေစေနိုင်လောက်တဲ့ ဘေးအန္တရာယ်ကို အလွယ်တကူ ဆောင်ကြဉ်းလာနိုင်တယ်။"
အတွေးတစ်ခုနှင့်အတူ၊ အပြာရောင်ဖျော့ဖျော့ စနစ်မျက်နှာပြင်တစ်ခု စုရွှမ်၏ မျက်စိရှေ့တွင် ပေါ်လာသည်။
အမည် - စုရွှမ်
ဂုဏ်ပုဒ် - မြောက်ပိုင်းဒေသ စုမိသားစု၏ ဧကရာဇ်သားတော်၊ အရှေ့ပိုင်းစွန့်ပစ်နယ်မြေ တာယန်မြင့်မြတ်နယ်မြေ၏ သားတော်မြတ်
အဆင့် - ဟွာလုံ (နတ်နဂါးအသွင်ပြောင်းခြင်း) တတိယအဆင့်
ကျင့်ကြံနည်း - တာယန်မြင့်မြတ်ကျမ်း၊ စုမိသားစု ဧကရာဇ်ကျမ်း (မပြည့်စုံ)
နတ်ဘုရားစွမ်းရည် - တာယန်ဓားကိုးလက်
"ခန္ဓာ - အဓိပတိရိုး၊ ဟွမ်သွမ့်နတ်မိစ္ဆာခန္ဓာ (၀.၀၁% နိုးထပြီး....)"
ဟုတ်၏။ စုရွှမ်၏ ဂုဏ်ပုဒ်မှာ စုမိသားစု၏ ဧကရာဇ်သားတော်ဖြစ်ရုံသာမက အရှေ့ပိုင်းစွန့်ပစ်နယ်မြေ တာယန်မြင့်မြတ်နယ်မြေ၏ မြင့်မြတ်သားတော်တစ်ဦးလည်း ဖြစ်၏။
စုရွှမ်က ဘာကြောင့် မြောက်ပိုင်းဒေသ ထိုက်ချူမြင့်မြတ်နယ်မြေသို့ မဝင်ရောက်ခဲ့သလဲဆိုလျှင်တော့ ဒါက ဇာတ်လမ်းရှည်တစ်ခုဖြစ်၏။
စုရွှမ်မွေးဖွားသည့်နေ့တွင် ကောင်းကင်ဘုံ၌ ထူးဆန်းသောဖြစ်ရပ်တစ်ခု ဖြစ်ပွားခဲ့၏။ ခရမ်းရောင်ချီသည် အရှေ့အရပ်မှ လီပေါင်း သုံးသောင်းအထိ ရောက်ရှိလာပြီး ရွှေကြာပန်းများ မြေမှပေါက်လာကာ နတ်ဘုရားစင်မြင့်တစ်ခု ပွင့်လန်းခဲ့သည်.....ဤသည်မှာ အဓိပတိရိုးတစ်ခု၏ မွေးဖွားခြင်းပင်ဖြစ်သည်။
ထိုသို့သော ထူးဆန်းသည့်ဖြစ်ရပ်ကို မြောက်ပိုင်းဒေသတစ်ခုလုံးနှင့် အနီးအနားရှိ အရှေ့ပိုင်းစွန့်ပစ်နယ်မြေမှ သတိပြုမိခဲ့ကြ၏။
တစ်ချိန်က မရေမတွက်နိုင်သော အင်အားကြီးများသည် သူတို့၏တပည့်အဖြစ် စုရွှမ်ကို ခေါ်ဆောင်လို၍ တံခါးဝသို့ ရောက်လာခဲ့ကြသော်လည်း စုမိသားစု၏ ဘိုးဘေးကြီးက သူတို့အားလုံးကို ငြင်းပယ်ခဲ့သည်။
ဘိုးဘေးကြီး၏အမြင်တွင် သူတို့သည် စုရွှမ်ကို သင်ကြားပေးရန် လုံးဝမထိုက်တန်ပေ။ စုရွှမ်သည် စုမိသားစုတွင် နေထိုင်ရုံဖြင့် လုံလောက်ပြီဖြစ်သည်။
တာယန်မြင့်မြတ်နယ်မြေ၏ အရှင်သခင် ကိုယ်တိုင် လာရောက်ပြီး စုရွှမ်ကို မြင့်မြတ်နယ်မြေသို့ ခေါ်ဆောင်လိုကြောင်း အတင်းတောင်းဆိုကာ သူ့ကို မြင့်မြတ်သားတော်ရာထူးပေးဆောင်ရန် ကတိပေးသည့်အချိန်ကျမှသာ စုမိသားစု ဘိုးဘေးကြီးသည် စိတ်ယိုင်လာခဲ့သည်။
စုမိသားစု၏ အခြေခံအုတ်မြစ်သည် တာယန်မြင့်မြတ်နယ်မြေထက် လုံးဝနိမ့်ကျနေ၍တော့ မဟုတ်ပေ။
အမှန်မှာ တာယန်မြင့်မြတ်နယ်မြေ၏ ဘိုးဘေးနှင့် တိတ်ဆိတ်ငြိမ်သက်သွားပြီဖြစ်သော စုမိသားစု၏ မဟာဧကရာဇ်ကြားတွင် ဖော်ပြမရ၊ မရှင်းလင်းသော ဆက်ဆံရေးတစ်ခု ရှိခဲ့သောကြောင့် ဖြစ်သည်......
ထို့ကြောင့် စုရွှမ်သည် တာယန်မြင့်မြတ်နယ်မြေသို့ ဝင်ရောက်ပြီး ၎င်းတို့၏ မြင့်မြတ်သားတော် ဖြစ်လာခဲ့၏။
သို့သော် စုရွှမ်သည် မြင့်မြတ်နယ်မြေ၏ ခြားမြင့်မြတ်သားတော်များထက် ပိုမိုလွတ်လပ်၏။ သူသည် သူအလိုရှိရာနေရာတွင် ကျင့်ကြံနိုင်သည်။
ထို့ကြောင့် စုရွှမ်သည် သူ၏အချိန်အများစုကို စုမိသားစုရှိ ဘိုးဘေးကြီးနှင့်အတူ ကျင့်ကြံပြီး မြောက်ပိုင်းဒေသနှင့် အရှေ့ပိုင်းစွန့်ပစ်နယ်မြေရှိ လျှို့ဝှက်နယ်မြေအချို့ကို စူးစမ်းရှာဖွေရင်း ကုန်ဆုံးခဲ့သည်။
အတိအကျအားဖြင့် ဤအကြောင်းကြောင့်ပင် တာယန်မြင့်မြတ်နယ်မြေရှိ လူအများအပြားသည် စုရွှမ်ကိုပင် မသိကြပေ..။