တောင်ထွတ်ကိုးခုပြိုင်ပွဲ၏ ပထမနေရာအား ဖိနှိပ်ခြင်း

"မင်းတို့နှစ်ယောက်က ဒီနှစ်ရဲ့ တောင်ထွတ်ကိုးခုပြိုင်ပွဲမှာ ပထမရတဲ့သူတွေလား"

စုရွှမ်သည် ပေါ့ပေါ့ပါးပါးပင် ပြောလိုက်၏။ သူ၏ အသံမှာ နှင်းကဲ့သို့ ကြည်လင်နေလေသည်။

"ဟုတ်… ဟုတ်ပါတယ်"

အကြောင်းတစ်စုံတစ်ရာကြောင့် သူတို့နှစ်ဦးသည် စုရွှမ်၏ ကွယ်ရာ၌ ထိန်းချုပ်မှုမရှိဘဲ ကျိန်ဆဲခဲ့ကြသည်။ သို့သော် သူတို့သည် စုရွှမ်နှင့် အမှန်တကယ် ရင်ဆိုင်ရသောအခါ၌မူ အနည်းငယ် ကြောက်ရွံ့နေခဲ့ကြ၏။

"မြင့်မြတ်သားတော်... လမ်းညွှန်ပြသပေးပါ"

ပြောစရာစကားမရှိတော့သည်ဖြစ်ရာ လင်းယွီသည် လက်နှစ်ဖက်ကိုဆုပ်ကာ ပြောလိုက်လေသည်။ သူ စကားဆုံးသည်နှင့် တစ်ပြိုင်နက် စုရွှမ်ထံသို့ ရုတ်တရက် တိုက်ခိုက်လိုက်လေသည်။

"သတ်ဖြတ်ခြင်းလက်သီး ခုနစ်သွယ်"

ဤသည်ကား လင်းယွီ၏ သတ်ဖြတ်ခြင်းခုနစ်သွယ်အရှင်သခင်ခန္ဓာ၏မူလနတ်စွမ်းအင်ပင် ဖြစ်သည်။ ၎င်းသည် နတ်ဆိုးအငွေ့အသက်များဖြင့် ပြည့်နှက်နေပြီး အလွန်အမင်း အားကောင်းလှ၏။

"သူက နတ်နဂါးအသွင်ပြောင်းခြင်း တတိယအသွင်ပြောင်း ကို ရောက်နေပြီပဲ။ ပါရမီကောင်းတွေတော့ ရှိသား... ဒါပေမဲ့ ဒီလောက်ပါပဲ"

စုရွှမ်သည် လူကြီးတစ်ယောက်က လူငယ်တစ်ယောက်အား မှတ်ချက်ပေးနေသည့်အလား လေသံတိုးတိုးဖြင့် ပြောလိုက်သည်။ နောက်တစ်စက္ကန့်၌ စုရွှမ်သည်လည်း လက်သီးတစ်ချက် ထိုးထုတ်လိုက်၏။

ချက်ချင်းပင် တုန်လှုပ်ဖွယ် လက်သီးအလင်းတန်းတစ်ခု လက်ခနဲ ထွက်ပေါ်လာကာ အရာခပ်သိမ်းကို ထိုးခွင်းလျက် ဟင်းလင်းပြင်ကိုပင် ကြေမွသွားစေ၏။ ကယောင်ကတမ်း အမြင်အာရုံတစ်ခုတွင် ရှေးဟောင်းစစ်မြေပြင်ထက်၌ ရပ်နေသော ပုံရိပ်တစ်ခု ရှိနေဟန်တူပြီး သူ၏ လက်သီးတစ်စုံဖြင့် အရာအားလုံးကို ဖိနှိပ်ကာ မျိုးနွယ်အားလုံးကို ချေမှုန်းနေလေသည်။

တစ်ချက်ပြီးတစ်ချက် ထိုးထုတ်လိုက်သော ထိုတုန်လှုပ်ဖွယ် လက်သီးအလင်းတန်းသည် အရာခပ်သိမ်းကို ဖျက်ဆီးပစ်လိုက်၏။ ကြောက်မက်ဖွယ် လက်သီးအလင်းတန်းသည် ဆက်လက်၍ တောက်ပနေကာ မရေမတွက်နိုင်သော နဂါးငွေ့တန်းများကို ထိုးဖောက်သွားလေသည်။

ဒုန်း!

လက်သီးနှစ်ခုဆောင့်တိုက်မိသွားရာ ဟင်းလင်းပြင်သည် ပြင်းထန်စွာ တုန်ခါသွား၏။ ကြည့်ရှုနေသော လူအုပ်ကြီးမှာ မှင်သက်သွားကြပြီး သူတို့နှစ်ဦး၏ အားအင်ကို အံ့ဩနေကြလေသည်။ ခုလေးတင်က ဖြစ်ပွားခဲ့သော မြင်ကွင်းများနှင့် နှိုင်းယှဉ်ပါက ဤကဲ့သို့သော တိုက်ပွဲမျိုးသည် ကြည့်ရှုရန် ပို၍ စိတ်လှုပ်ရှားဖွယ် ကောင်းလှပေသည်။

ထိုအခိုက် လူတိုင်း၏ မျက်လုံးများ စူးစိုက်နေသော နေရာ၌...

"ဝေါ့… ဟွတ်"

သွေးအန်သံနှင့်အတူ ပုံရိပ်တစ်ခု ယိုင်နဲ့စွာ နောက်သို့ဆုတ်သွားသည်။ ထိုသူမှာ လင်းယွီပင် ဖြစ်၏။ သူ၏ လက်မောင်းမှာ ကျိုးပြတ်သွားပြီး သွေးများ အဆက်မပြတ် စီးကျနေကာ လက်မောင်းတစ်ခုလုံးမှာ ပြင်းထန်စွာ တုန်ယင်နေခဲ့သည်။ ယင်း

တိုက်ခိုက်မှုသည် သူ၏ လက်မောင်းကို နီးပါး ကျိုးသွားစေခဲ့သည်။

"ဟူးးး"

ပြင်းထန်သော နာကျင်မှုကြောင့် လင်းယွီသည် အသက်ပြင်းပြင်း ရှူလိုက်မိသည်။ ဤကဲ့သို့သော တိုက်ပွဲရလဒ်သည် ပွဲကြည့်ပရိသတ်များအတွက် လက်ခံရန် ခက်ခဲနေလေသည်။

သတ်ဖြတ်ခြင်းခုနစ်သွယ်အရှင်သခင်ခန္ဓာကို ပိုင်ဆိုင်ထားသော လင်းယွီသည် သတ်ဖြတ်ခြင်းခုနစ်သွယ်လက်သီးသိုင်းကွက်၏ အကူအညီဖြင့် နတ်နဂါးအသွင်ပြောင်းခြင်း စတုတ္ထသွင်ပြောင်းသူနှင့်ပင် ရင်ဆိုင်နိုင်စွမ်းရှိ၏။

သို့သော် စုရွှမ်၏ ရှေ့မှောက်၌မူ သူသည် တစ်ကွက်ပင် မခံနိုင်ခဲ့ပေ။

စုရွှမ်သည် မည်သည့်အဆင့်သို့ ရောက်နေပြီနည်း။

"မင်း... မင်းက နတ်နဂါးအသွင်ပြောင်းခြင်း ပဉ္စမအသွင်ပြောင်းပဲ"

လင်းယွီသည် ဤအခါမှ တုံ့ပြန်နိုင်တော့ပြီး တုန်လှုပ်မှုကြောင့် သူ၏ ဦးရေပြားမှာ ထုံကျင်သွားလေသည်။

သူမှတ်မိသလောက်ဆိုလျှင် လွန်ခဲ့သောတစ်လက စုရွှမ်သည် မြင့်မြတ်နယ်မြေမှ ထွက်ခွာစဉ်က နတ်နဂါးအသွင်ပြောင်းခြင်း တတိယအဆင့်၌သာ ရှိသေးသည်။ သို့သော် ယခုမူ တစ်လအတွင်း၌ပင် သူသည် ပဉ္စမအဆင့်သို့ ရောက်ရှိသွားခဲ့လေပြီ။ တစ်လအတွင်း အဆင့်နှစ်ဆင့် တက်သွားသည်တဲ့လား။ ဤသည်မှာ မည်သို့ ဖြစ်နိုင်မည်နည်း။

တစ်ခဏအတွင်း၌ သူ၏ လောကအမြင်မှာ ပြိုလဲသွားသကဲ့သို့ ခံစားလိုက်ရသည်။

နတ်နဂါးအသွင်ပြောင်းခြင်းအဆင့်သို့ ရောက်ရှိပြီးနောက် အဆင့်တစ်ခုစီကို ကျော်ဖြတ်ရန် အချိန်များစွာ လိုအပ်သည်ကို သိထားရပေမည်။ ပါရမီရှင်တစ်ယောက်အတွက်ပင် နှစ်ပေါင်းများစွာ အချိန်ယူရလေသည်။

သို့ဖြစ်လျှင် စုရွှမ်က မည်သို့ ထိုမျှ လျင်မြန်စွာ ကျော်ဖြတ်နိုင်ခဲ့သနည်း။

ဤလောကကြီး၌ ထိုကဲ့သို့သော မိစ္ဆာလူသားများ အမှန်ပင် ရှိနေသလော။

"မင်းကရော... ငါ့ကို စိန်ခေါ်ချင်သေးလား"

လင်းယွီကို လျစ်လျူရှုကာ စုရွှမ်သည် ကျန်ရှိနေသော စွန်းဟောက်ကို ခက်ထန်သော အကြည့်ဖြင့် ကြည့်လိုက်သည်။ စုရွှမ်သည် ဤလူနှစ်ယောက် သူ့အပေါ် မကျေမနပ်ဖြစ်နေသည်ကို အစကတည်းက သိရှိပြီး ဖြစ်၏။ သို့သော် သူသည် အလေးမထားခဲ့ပေ။ ၎င်းတို့မှာ ပုရွက်ဆိတ်များသာ ဖြစ်ပြီး လက်တစ်ဖက်ယမ်းရုံဖြင့် ဖိနှိပ်နိုင်ပေသည်။

"ငါ… ငါ"

ရုတ်တရက်ပင် စွန်းဟောက်သည် သူ၏ ခြေထောက်များ တင်းကြပ်လာသည်ကို ခံစားလိုက်ရပြီး ကျောပြင်မှ ချွေးစေးများ စတင်စီးကျလာလေသည်။

"ဟမ်"

ဘုန်း!

ချက်ချင်းပင် စုရွှမ်ထံမှ ဖိအားတစ်ခု ထွက်ပေါ်လာကာ စွန်းဟောက်အပေါ်သို့ ကျရောက်လာ၏။ ထိုကဲ့သို့ ကြောက်မက်ဖွယ်ကောင်းသော ဖိအားသည် စွန်းဟောက်အား သေခြင်းတရား၏ အေးစက်သော အငွေ့အသက်ကို ခံစားလိုက်ရစေသည်။

"ငါ... ငါ အရှုံးပေးပါတယ်"

တစ်ခဏအတွင်း၌ စွန်းဟောက် သည် ကြောက်လန့်သွားကာ လက်နှစ်ဖက်ကို မြှောက်လိုက်သည်။

ဟမ်

မင်းက သောက်သုံးမကျတဲ့ သစ္စာဖောက်တစ်ယောက်လား။ ဒီပုံစံက ဘာအဓိပ္ပာယ်လဲ။

ဘုန်း!

စုရွှမ်သည် မကျေမနပ်ဖြစ်ကာ စွန်းဟောက်ကို စင်မြင့်ပေါ်မှ လက်သီးတစ်ချက်ဖြင့် ထိုးချလိုက်လေသည်။ ဤအရာအားလုံးကို လုပ်ဆောင်ပြီးနောက် စုရွှမ်သည် သူ၏ အကြည့်ကို လင်းယွီထံသို့ တစ်ဖန် ပြန်ရွှေ့လိုက်သည်။

"ငါ... ငါ ကိုယ့်ဘာသာ သွားပါ့မယ်"

ရုတ်တရက်ပင် လင်းယွီသည် သူ၏ စိတ်ဝိညာဉ်အနက်ရှိုင်းဆုံးမှ ကြောက်ရွံ့မှုကို ခံစားလိုက်ရပြီး လျင်မြန်စွာ စင်မြင့်ပေါ်မှ ဆင်းသွားရတော့သည်။ ထိုအချိန်မှစ၍ သူတို့နှစ်ဦးသည် တာယန်မြင့်မြတ်သားတော်၏ နေရာနှင့်ပတ်သက်၍ မည်သည့်အတွေးမျှ မရှိတော့ပေ။

စုရွှမ်ပေးသော ဖိနှိပ်မှု ခံစားချက်မှာ အလွန်ပင် ပြင်းထန်လှသည်တကား။

"ကောင်းပြီ... ကောင်းပြီ... ဒီလိုလူစားမျိုးမှ ငါ့ရဲ့ပြိုင်ဘက် ဖြစ်နိုင်မှာပေါ့။ အခြေအနေတွေက နည်းနည်း စိတ်ဝင်စားဖို့ ကောင်းလာပြီ..."

ကျီဖူမြင့်မြတ်နယ်မြေ တည်ရှိရာ နေရာ၌ ကျီဖူမြင့်မြတ်သားတော် ကျွင်းမိုသည် သူ၏ နှုတ်ခမ်းထောင့်ကို အပေါ်သို့ကွေးညွှတ်လိုက်ရာ သူ၏ မျက်နှာထက်တွင် ကစားလိုသော အပြုံးတစ်ခု ပေါ်လာလေသည်။

"တာယန်မြင့်မြတ်သားတော်က ကောလာဟလတွေထဲကလို အသုံးမကျပုံ မပေါ်ဘူးပဲ။ သူက နတ်နဂါးအသွင်ပြောင်းခြင်း ပဉ္စမအဆင့်ကို ရောက်နေတာပဲ... ငါနဲ့ အတူတူပဲ"ယောင်ကွမ်းသူတော်စင်မ ရှန်မင်ယွဲ့၏ မျက်လုံးများမှာ တောက်ပသော အရောင်အဝါများဖြင့် လင်းလက်လာသည်။

"စိတ်ဝင်စားစရာပဲ..."ဓားသားတော် ကျန့်ဝူရွှမ်းက တိုးတိုးရေရွတ်လိုက်သည်။

"စုရွှမ်... အဲဒီကောင်လေးက မနေ့ကမှ နတ်နဂါးအသွင်ပြောင်းခြင်း တတိယအဆင့်ရှိနေတာလေ... ဘယ်လိုလုပ်ပြီး ဒီနေ့ ပဉ္စမအဆင့် ဖြစ်သွားရတာလဲ။ ကျင့်ကြံခြင်းက ဘယ်တုန်းက ဒီလောက် လွယ်သွားတာလဲ" တာယန်မြင့်မြတ်သခင်၏ မျက်နှာအမူအရာမှာ မပြောင်းလဲသွားသော်လည်း သူ၏ စိတ်အတွင်း၌မူ အလွန်အမင်း ပျော်ရွှင်နေလေသည်။

စုရွှမ်က သူတို့အား မနေ့က ပြောခဲ့သည့် စကားသည် အမှန်ပင် ကြွားဝါခြင်း မဟုတ်ခဲ့လေသလော။ ရှေ့ပိုင်းစွန့်ပစ်နယ်မြေမှ မျိုးဆက်သစ်များနှင့် နှိုင်းယှဉ်လျှင် သူသည် အမှန်တကယ်ပင် ရှုံးနိမ့်စရာမရှိသူတစ်ယောက်လော။

"ဟားဟားဟား... တာယန်မြင့်မြတ်သားတော်က အဓိပတိရိုးကို ပိုင်ဆိုင်ပြီး မွေးရာပါ အဓိပတိတစ်ပါးဖြစ်တယ်လို့ ကြာမြင့်စွာကတည်းက ကြားဖူးပါတယ်။ ဒီနေ့ တွေ့လိုက်ရတော့ အမှန်ပင် ထူးခြားလှပါပေတယ်"

ရုတ်တရက်ပင် ရယ်သံတစ်ခုသည် ဟင်းလင်းပြင်တစ်ခုလုံးကို ပြည့်နှက်သွားလေသည်။ ထို့နောက် ပုံရိပ်တစ်ခုသည် စင်မြင့်ပေါ်မှ ပေါ်ထွက်လာသည်။ သူသည် အစိမ်းရောင်ဝတ်စုံကို ဝတ်ဆင်ထားပြီး ဓားသွားကဲ့သို့သော မျက်ခုံးနှင့် တောက်ပသော မျက်လုံးများ ရှိကာ သူ၏ မျက်နှာသွင်ပြင်မှာ ထက်မြက်သော ခံစားချက်ကို ပေးစွမ်း၏။ သူ၏ ကျင့်ကြံမှုအဆင့်မှာ နတ်နဂါးအသွင်ပြောင်းခြင်း ပဉ္စမအဆင့်ဖြစ်ပြီး စုရွှမ်နှင့် တူညီလေသည်။

ဟမ်

တစ်ခဏအတွင်း၌ ကျီဖူမြင့်မြတ်သားတော်၊ ယောင်ကွမ်းသူတော်စင်မနှင့် ဓားသားတော်တို့ အားလုံး မှင်သက်သွားကြသည်။ ငါတို့နဲ့ နောက်နေတာလား။ ငါတို့တောင် စကားမပြောရသေးဘူးလေ။

သို့သော်လည်း စင်ပေါ်မှ အပြာရောင်ဝတ်စုံနှင့် လူ၏ အစွမ်းကို လျှော့မတွက်သင့်ပေ။ သူတို့သုံးဦးသည် စုရွှမ်၏ အစစ်အမှန်အစွမ်းကို စမ်းသပ်ရန် ၎င်းကို အသုံးချရန် စဉ်းစားလိုက်ကြရာ အကြံကောင်းတစ်ခုပင် ဖြစ်လေသည်။

"မင်းက ဘယ်သူလဲ။ ရှေ့ပိုင်းစွန့်ပစ်နယ်မြေ ပါရမီရှင်များစာရင်းက ထိပ်တန်းဆယ်ယောက်ထဲက တစ်ယောက်လား။ မင်းကို ငါ မမြင်ဖူးသလိုပဲ" စုရွှမ်က အေးစက်သော အသံဖြင့် ပြောလိုက်သည်။

အကယ်၍ သင်သည် ရှေ့ပိုင်းစွန့်ပစ်နယ်မြေ ပါရမီရှင်များစာရင်း၏ ထိပ်ဆုံးဆယ်ယောက်ထဲသို့ပင် မဝင်နိုင်ပါက ဤနေရာသို့ လာ၍ အချိန်ဖြုန်းနေရန် အဓိပ္ပာယ်မရှိပေ။

သို့သော် နောက်တစ်စက္ကန့်၌ ထိုလူ ပြောလိုက်သောစကားက ရှိနေသူအားလုံးကို တုန်လှုပ်သွားစေသည်။

"ငါက ကျုံးကျိုးက လာတာ"

ထိုလူက ပြောလိုက်၏။ သူ၏ လေသံမှာ တည်ငြိမ်နေပြီး ဂုဏ်ယူမှုများဖြင့် ပြည့်နှက်နေသည်။

"ဘာ... ကျုံးကျိုးက ပါရမီရှင်တဲ့လား။ အဲဒီနေရာက အမှန်တကယ် ထိပ်တန်းပါရမီရှင်တွေ စုဝေးတဲ့နေရာပဲ။ ကျုံးကျိုးမှာ ခြေကုပ်ယူနိုင်တဲ့ ပါရမီရှင်တွေရဲ့ အစွမ်းကို စဉ်းစားကြည့်လို့ရတယ်"

ထိုလူက သူ၏ကိုယ်သူ မိတ်ဆက်လိုက်ရာ တက်ရောက်လာသူအားလုံးကို တုန်လှုပ်သွားစေ၏။

ကျုံးကျိုးမှ လာသူသည် ဧကန်မုချ ထူးခြားပေလိမ့်မည်။ တစ်ခဏမျှ ကျီဖူမြင့်မြတ်သားတော်၊ ယောင်ကွမ်းသူတော်စင်မနှင့် ဓားသားတော်တို့ပင် သတိရှိလာကြသည်။

သူသည် ကျုံးကျိုးမှ လာသည်ဟု ဆိုသော စင်မြင့်ပေါ်မှ လူကို စူးစိုက်ကြည့်နေမိသည်။ ဤ ကျုံးကျိုးပါရမီရှင်ဟုခေါ်သောသူ မည်မျှ အစွမ်းထက်သည်ကို ကြည့်လိုလှသည်။

"ကျုံးကျိုး... ပြီးတော့ရော"

မျက်လုံးအားလုံးက သူ၏အပေါ်သို့ စူးစိုက်နေစဉ် စုရွှမ်သည် တည်ငြိမ်စွာပင် ပြန်မေးလိုက်သည်။

ဟမ်

တစ်ခဏမျှ လူတိုင်း အနည်းငယ် ရှုပ်ထွေးသွားကြသည်။

စုရွှမ်... ဒါ ဘာအဓိပ္ပာယ်လဲ။ စိန်ခေါ်တာလား။

သူက ကျုံးကျိုးက ပါရမီရှင်နော်။ စိတ်ကူးလို့မရတဲ့ ဖြစ်တည်မှုတစ်ခုပဲ။ စုရွှမ်... မင်းက ဘယ်လိုလုပ်ပြီး တိုက်ရိုက် စိန်ခေါ်ရဲရတာလဲ။ သူက သူ့ရဲ့ ယုံကြည်မှုကို ဘယ်ကရနေတာလဲ။

"မင်းက တော်လေး သန်မာတယ်။ ငါနဲ့တိုက်ခိုက်ဖို့ အရည်ချင်းပြည့်မှီတယ်"

ထိုလူသည် ဒေါသမထွက်ဘဲ ပြုံးလိုက်ရုံသာ ပြုံးလိုက်သည်။ သို့သော် သူ၏ လေသံ၌ ဖုံးကွယ်မထားသော သာလွန်လိုစိတ်တစ်ခု ရှိနေပြီး သူသည် ကျုံးကျိုးမှ လာသောကြောင့် အခြားသူများထက် မွေးရာပါ သာလွန်နေသည့်အလားပင်။

ဘုန်း!

သူ စကားဆုံးသည်နှင့် တစ်ပြိုင်နက် ကောင်းကင်နှင့်မြေကြီးကြား၌ ကြောက်မက်ဖွယ် အလင်းတန်းတစ်ခု လက်ခနဲ ထွက်ပေါ်လာသည်။

တစ်စက္ကန့်အကြာတွင် ခုလေးတင်က အဓိပ္ပာယ်မရှိသော စကားများ ပြောနေခဲ့သည့် ထိုလူသည် ပျောက်ကွယ်သွားလေသည်။ မြေပြင်ပေါ်တွင် သွေးအိုင်တစ်ခုသာ ကျန်ရစ်ခဲ့၏။