ငါ့အဖေက အေးစက်တဲ့ သင်ယူခြင်းနတ်ဘုရားရဲ့ ခန္ဓာကိုယ်ထဲမှာ ပြန်လည်မွေးဖွားလာခဲ့တယ်

လွန်ခဲ့သည့်နှစ်နှစ်က လင်ချူးဆွေ့၏ အဖေဖြစ်သူ မီးသတ်သမားက သူ့ကိုယ်သူ မီးထဲ၌ စွန့်လွှတ်အနစ်နာခံခဲ့သည်။ အဖေနှင့် သမီးကြားမှ နောက်ဆုံးစကားဝိုင်းတွင် သူတို့က အကြီးအကျယ် ရန်ဖြစ်စကားများခဲ့ကြ၏။ လင်ချူးဆွေ့က သူမ၏ အိပ်မက်များထဲတွင် မရေတွက်နိုင်အောင် အကြိမ်ပေါင်းများစွာ ငိုကြွေးကာ နိုးလာခဲ့ရပြီး သူမ အဖေသာ ပြန်မွေးဖွားလာနိုင်လျှင် သူမက နာနာခံခံနှင့် စကားနားထောင်ပြီး မည်သည့်အခါမှ ပြန်မပြောတော့ဟု ဆန္ဒရှိခဲ့သည်။ သူမသည် သူမ အဖေက အမှန်တကယ် ပြန်လည်မွေးဖွားလာမည်ဟု ထင်မှတ်မထားမိခဲ့ပေ။ သူ၏ ဝိညာဥ်က သူတို့ အထက်တန်းကျောင်း၏ သင်ယူခြင်းနတ်ဘုရား ရှောက်ယန်၏ ခန္ဓာကိုယ်ကို တွယ်ကပ်ခဲ့သည်။ … ရှောက်ယန်က သင်ယူခြင်းနှင့် ကိုယ်ကျင့်စရိုက် နှစ်ခုလုံးတွင် ထူးချွန်ပေသည်။ သူ၏ စုစုပေါင်းအမှတ်များသည် မည်သည့်အခါမှ ၇၀၀ အောက်သို့ မကျခဲ့ပေ။ သူတို့ အထက်တန်းကျောင်းမှ မိန်းကလေးများ အားလုံး သိကြသည်မှာ ချင်းဟွာ သို့မဟုတ် ပေကျင်းတက္ကသိုလ်ကို ဝင်ရန်မှာ လွယ်ကူပြီး ရှောက်ယန်နှင့် နီးစပ်ရန်က ခက်ခဲသည်ဟု ဖြစ်သည်။ သို့သော် လတ်တလော၌ လင်ချူးဆွေ့ သတိပြုမိခဲ့သည်မှာ ရှောက်ယန်က သူမကို ကြည့်သည့်အကြည့်များက အလွန် ထူးဆန်းလှသည်။ သူ၏ အေးစက်စက် အကြည့်များတွင် နက်ရှိုင်းသည့် ချစ်ခင်တွယ်တာမှုများ ရှိနေခဲ့သည်။ သူ၏ ချစ်ခင်တွယ်တာမှုတွင် ဖခင်တစ်ယောက်၏ ချစ်ခြင်းမေတ္တာတို့ဖြင့် ပြည့်နှက်နေသည်လား။ ထိုသို့ဖြင့် လင်ချူးဆွေ့၏ နေ့စဥ်ဘဝက ဤကဲ့သို့ ဖြစ်လာခဲ့သည်။ စာမေးပွဲမဖြေခင် ရှောက်ယန်က သူမကို သူ၏ မှတ်စုများအား ကူးပေးလိမ့်မည် ဖြစ်သည်။ သူမ၏ ဓမ္မတာကာလအတွင်း ရှောက်ယန်က တရုတ်ဆီးသီးလက်ဖက်ရည် ကျိုပေးကာ ဆန်ပြုတ်ပူပူလေး ချက်ပေးလိမ့်မည် ဖြစ်သည်။ လူဆိုးလေးများက သူမ၏ လမ်းကိုပိတ်ကာ သူမအား စိတ်အနှောက်အယှက် ပေးသည့်အခါ ရှောက်ယန်၏ ကန်ချက်ဖြင့် လွင့်ထွက်သွားမည် ဖြစ်၏။ လင်ချူးဆွေ့က အလွန် ထိရှသွားခဲ့သည်။ သူမ၏ အဖေမှလွဲ၍ မည်သူကမှ သူမကို ဤမျှ ကောင်းမွန်စွာ မဆက်ဆံခဲ့ဖူးပေ။ ….... ပူအိုက်သည့် နေ့လယ်ခင်းတစ်ခုတွင် ရှောက်ယန်က လင်ချူးဆွေ့နှင့်အတူ အိမ်စာလုပ်ရန် လှေကားထစ်များ၌ ထိုင်နေစဥ် သူ၏ အကြည့်များက စကားလုံးများဖြင့် မဖော်ပြနိုင်လောက်အောင် နူးညံ့နေခဲ့သည်။ လေပြေညင်းလေးက ပေါ့ပေါ့ပါးပါး ဖြတ်တိုက်သွား၏။ လူငယ်လေးက သူမကို နမ်းရှိုက်ရန် ကိုယ်ကိုယိမ်း၍ ခေါင်းငုံ့လာခဲ့သည်။ ရုတ်တရက် ရေခဲတမျှ အေးစက်သည့် အမျိုးသားတစ်ယောက်၏ အသံက သူ့စိတ်ထဲမှ ထွက်ပေါ်လာသည်။ "ရှောင်ရှောက် မင်း ငါ့သမီးကို ဘာလုပ်ဖို့ ကြံနေတာလဲ။" ရှောက်ယန် : …… *** ရှောက်ယန်က ရွှံ့နွံထဲတွင် တွားသွားထွက်လာခဲ့သူ ဖြစ်သည်။ သူ၏ အေးစက်ကာ သီးခြားဆန်သည့် အသွင်အပြင်အောက်၌ ဆိုးယုတ်ကာ လက်တုန့်ပြန်တတ်သည့် ရက်စက်သော သဘာဝရှိသည်။ အနိမ့်ကျဆုံး ဖုန်မှုန့်များထဲမှ ထိပ်ဆုံးသို့ တက်လှမ်းနိုင်ရန် သူ၏ လမ်းတလျှောက်၌ ဆူးများဖြင့် ပြည့်နှက်နေခဲ့သည်။ သူ၏ ရည်မှန်းချက် ပြည့်ဝဖို့ရာ မည်မျှပင် ပေးဆပ်ရပါစေ သူက နောက်တွန့်လိမ့်မည် မဟုတ်ပေ။ သို့သော် ထူးခြားလှသည့် ဆုံတွေ့မှုတစ်ခုကြောင့် သူ့ဘဝ၏ အမှောင်ထုနှင့် စိတ်ပျက်စရာများက အဆုံးသတ်သွားခဲ့သည်။ ထိုအချိန်မှစ၍ ကောင်းကင်က ကြည်လင်သန့်ရှင်းလာပြီး သူ၏ သေဆုံးနေသော ဘဝက အသစ်တစ်ဖန် စတင်လာခဲ့သည်။ ဆိုးယုတ်ရက်စက်သည့် ပါရမီရှင်ကောင်လေးက ဆိုးသွမ်းသည့် ခပ်ညံ့ညံ့ကောင်မလေးနှင့် တွေ့ဆုံခဲ့သည်။ ***