ကောင်းကင်ဘုံသို့

ဤလောက၌ များပြားလှသော အရာများစွာကို သက်သေပြရန် အနှစ်တစ်ရာ မည်သို့ လုံလောက်နိုင်မည်နည်း။ ကူချန်သည် ဘဝတစ်သက်တာလုံး အလုပ်ကြိုးစားပြီးနောက်တွင် သေဆုံးသွား၏။ ထို့နောက် တောင်ပိုင်းဝိညာဉ် ကုန်းမြေကြီး၏ ကူမိသားစုတွင် သခင်လေးတစ်ယောက်အဖြစ် ပြန်လည် မွေးဖွားလာခဲ့သည်။ ကူမိသားစုသည် ကြွယ်ဝသော မိသားစုဖြစ်ပြီး စီးပွားရေးအမြင်ရှိနေသည့် ကူချန်အပေါ် များစွာမျှော်လင့်ခဲ့သည်။ သို့သော် ကူချန်သည် သေရမည်ကို ကြောက်ကာ နေအိမ်မှထွက်ပြေးသွား‌တော့၏။ သူ့ကို ရှန်ရှင်းနယ်ပယ်ဖြင့် မွေးဖွားလာခဲ့ပြီး ကံကြမ္မာမျက်ဝန်း ပိုင်ဆိုင်ထားသည်။ ထို့ကြောင့် လူတိုင်း၏ကံကြမ္မာကို ကောင်းကင်တာအို ပေါင်းစည်းခြင်းပုံစံဖြင့် တွက်ချက်ကာ ပြောင်းလဲပေးနိုင်ခဲ့၏။ ကြွယ်ဝခြင်းသည် ပြောင်းလဲခြင်းသို့ ဦးတည်သည်။ ဖူဆုနိုင်ငံ မငြိမ်မသက်ဖြစ်မှုတွင် ကူမိသားစု၏ကြွယ်ဝမှုသည် အမှန်တကယ် ပြောင်းလဲခြင်းလမ်းပေါ် စတင်လာတော့၏။ ထို့နောက်တွင် ကူမိသားစု၏ အင်အားကြီးထွားလာမှုနှင့် တိုက်ပွဲဝင်ရတနာ များကြောင့် ကူချန်အပေါ် ကူမိသားစုဘိုးဘေးအဖြစ် ရှုမြင်ကာ ပြိုင်ဘက်အင်အားစုများမှ ရှုပ်ထွေးသော ပြဿနာများအတွင်း ဆွဲသွင်းလာကြသည်။ အချို့သည် စောင့်ရှောက်ပေးရန် အညံ့ခံလာ၏။ ဤနည်းဖြင့် ပျံဝဲနေသော ဝိညာဉ်ဓား(၁၂)လက်နှင့်အတူ တာအိုဘုန်းကြီး တစ်ပါးသည် တောင်ပေါ်မှ ပြန်လည် ဆင်းသက်လာခဲ့ရသည်။ “ဘိုးဘေး ငါ့ကို ကယ်တင်ပါ” “ငါက ထာဝရရှင်သန်ဖို့အတွက် မွေးဖွားလာတဲ့လူပဲ... သေမျိုးတွေအရေးကိစ္စကို စိတ်မဝင်စားဘူး... ကောင်းကင်အသံက ငါ့အပေါ် လမ်းညွှန်ပြီး... ကံကြမ္မာကို ပြောင်းလဲပေးနိုင်တယ်... ...ငါ့လက်ညှိုးတစ်ချောင်းက ဓားတစ်သိန်းနဲ့ညီမျှပြီး နတ်ဆိုးတွေကို လက်လှိုင်းနဲ့ သတ်နိုင်တယ်... ဒီဘဝက ရှည်လျားတယ်” *** နွေဦးရာသီ သာယာသောညဉ့်အချိန်။ ကောင်းကင်၌ ကြယ်တာရာများ လင်းလက်နေသည်ကို ကူချန်မှမော့ကြည့်လျက် ကောင်းကင် တာအိုပေါင်းစည်းခြင်းပုံစံ သင်ယူနေ၏။ ကောင်းကင်တာအို ပေါင်းစည်းခြင်းသည် ကောင်းကင်နှင့် မြေကြီးဖန်ဆင်းခြင်း၊ ကံကြမ္မာ ရှာဖွေခြင်း၊ ယင်-ယန်၊ အတိတ်၊ ပစ္စုပ္ပန်၊ အနာဂါတ်တို့ကို တွက်ချက်နိုင်၏။ ထို့ကြောင့် ကူချန်သည် ဖူစုနိုင်ငံ၏ ကံကြမ္မာကို တွက်ချက်ကြည့်နေခြင်း ဖြစ်သည်။ အကြိမ်ပေါင်းများစွာ တွက်ချက်ပြီးသည့်တိုင် ရလဒ်မှာ မျက်မှောင်ကြုတ်စေ၏။ “ဘာလို့တွက်လိုက်တိုင်း ရလဒ်တွေက မတူရတာလဲ... ငါ့ရဲ့ လက်ရှိကျင့်ကြံမှုအဆင့်က အရမ်းနိမ့်နေလို့... ဒီလောက်ကြီးမားတဲ့ ကံကြမ္မာကို မတွက်နိုင်တာလား... ...ဒါဆို ရှန်နန်လမ်းရဲ့ရလဒ်က ဘာလို့အကြိမ်တိုင်း တူနေတာလဲ... ငါ့အပြင် ယွမ်ဖူနယ်ပယ်ကျင့်ကြံသူတွေ ရှိနေတာတောင် ငါတွက်ချက်နိုင်သေးတာပဲ” ဤရလဒ်သည် ကူချန်ကို အနည်းငယ် စိတ်ရှုပ်ထွေးစေ၏။ ရှန်နန်တွင် ရှန်ရှင်းအဆင့် ကျွမ်းကျင်သူမျှသာ ရှိမည်ဟု ထင်ခဲ့သည်။ ယခုတွက်ချက်မှုအရ ယွမ်ဖူနယ်ပယ်များ ပုန်းအောင်းနေကြောင်း သိခဲ့ရ၏။ ကမ္ဘာကြီး၌ ပုန်းကွယ်နေသော နဂါးများနှင့် ဝပ်တွားနေသော ကျားများ တကယ်ရှိချေပြီ။ အတွေးများရပ်ပြီး လက်ချောင်းများ ရေတွက်ကာ ဝိညာဉ်ဆေးပင်များတည်ရှိရာ အရပ်ထံ ထပ်မံတွက်ချက် ကြည့်လိုက်၏။ အဖြေမှာ ကျေနပ်စရာပေပင်။ “မဆိုးဘူး ... ငါခရီးထွက်သင့်တယ်” ကောင်းကင်တာအိုသည် အမှန်ပင် အစွမ်းထက်ချေ၏။ သူ၏ လက်ရှိခွန်အားသည် တာအိုများအပေါ် နားမလည်နိုင်သေးသဖြင့် ကံကြမ္မာစည်းမျဉ်းများကို မထိနိုင်သေးချေ။ သို့သော် ဤကောင်းကင်တာအို အကူအညီဖြင့် အမှန်တကယ် အသုံးဝင်သော အချက်အလက်များစွာကို ရရှိခဲ့သည်။ ကောင်းကင်ကြီး အောက်တွင် ရှင်သန်နေရသည့် မည်သို့သော အရာများမဆို နေ၊ လ၊ ကြယ်တို့၏ လွှမ်းမိုးသက်ရောက်မှုထံမှ မလွတ်မြောက်နိုင်ချေ။ ကောင်းကင်တာအို ပေါင်းစည်းခြင်း ပညာရပ်သည် အမှန်ပင် ကြောက်စရာကောင်း ချေ၏။ ကံကြမ္မာနှင့် တာအိုနိယာမများကိုသာ ထည့်သွင်းတွက်ချက်နိုင်ပါက မည်မျှတိကျမည် ဖြစ်ကြောင်း မမှန်းဆနိုင်တော့ချေ။ ထိုအဆင့်ရောက်ရှိသွားသောအခါ အတွေးတစ်ခုတည်းဖြင့် ကမ္ဘာကြီး၏နက်နဲမှုကို သိမြင်နိုင်ပေမည်။ တာအိုချင်းရှသည်လည်း သိချင်စိတ်ဖြင့် ကူချန် တွက်ချက်နေသည်များကို တိတ်ဆိတ်စွာ စောင့်ဆိုင်းနေသည်။ “မင်းကံကြမ္မာကို တွက်နိုင်တာ တကယ်လားဆိုတာ ငါကြည့်မယ်” ကူချန်မှ ပြုံးလျက် တုံ့ပြန်ခြင်း မပြုတော့ချေ။ ထို့ကြောင့် တာအိုချင်းရှခမျာ သည်းမခံနိုင် ဖြစ်လာ၏။ များမကြာခင် မျက်ဝန်းများ ရုတ်တရက် ပြန်ပွင့်လာပြီး တာအိုချင်းရှကို ထူးဆန်းသော အကြည့်ဖြင့် လှမ်းကြည့်ကာ “ဆရာ... မင်းရဲ့အရည်အချင်းက တော်တော်အစွမ်းထက်တယ် သစ်တော်ကိုင်းမှာ သစ်တော်ပွင့်တွေ ဝေနေတယ်...” -ဟု မှတ်ချက်ပေးလိုက်သည်။ “ဟမ့်... မင်းဘာမြင်လို့လဲ ...” တာအိုချင်းရှတစ်ယောက် စိတ်လှုပ်ရှားလာ၏။ ကူချန်မှ လက်နှစ်ချောင်း ထောင်ပြလိုက်ပြီး “အမွှာ၊ ယောကျ်ားလေးနဲ့ မိန်းကလေး” -ဟု ပြန်လည် ဖြေကြားလိုက်တော့သည်။ တာအိုချင်းရှတစ်ယောက် ထိုစကားကို ကြားသောအခါ အနည်းငယ် ထိတ်လန့်သွားပြီး မှင်တက်သွား၏။ ထိုစဉ် ကူချန်က စိတ်မကောင်းဟန်ဖြင့် ခေါင်းရမ်းပြကာ “ကျွတ်... ကျွတ်... ကလေးတွေက မင်းနဲ့မတူဘူး... အရမ်းရိုးသားပြီး ချစ်စရာ ကောင်းလွန်းနေတယ်”